ਸ਼ਰੂਤੀ ਅਗਵਾ ਵਿਰੋਧੀ ਜੇਤੂ
ਘੋਲ ਦੇ ਸਬਕਾਂ ਨੂੰ ਪੱਲੇ ਬੰਨੋ!
ਪੁਲਸ, ਸਿਆਸੀ, ਗੁੰਡਾ-ਗੱਠਜੋੜ ਨੂੰ ਸਜ਼ਾਵਾਂ ਦਿਵਾਉਣ ਲਈ ਮੁਹਿੰਮ ਜਾਰੀ ਰੱਖੋ
ਧੀਆਂ-ਭੈਣਾਂ ਵਾਲਿਓ,
ਫਰੀਦਕੋਟ ਅੰਦਰ ਪੂਰੇ ਦੋ ਮਹੀਨੇ ਚੱਲੇ ਘੋਲ ਨੇ ¸ ਪੈਸੇ, ਹਥਿਆਰਾਂ, ਪੁਲਸ ਤੇ ਸਰਕਾਰ ਦੀ
ਸਾਂਝੀ ਤਾਕਤ ਦੇ ਜੋਰ ਗੁੰਡਿਆਂ ਵੱਲੋਂ ਅਗਵਾ ਕੀਤੀ ਬੱਚੀ, ਸ਼ਰੂਤੀ ਮਾਪਿਆਂ ਦੀ ਮੁੜ ਬੁੱਕਲ 'ਚ
ਵਾਪਸ ਲਿਆ ਦਿੱਤੀ ਹੈ। ਗੁੰਡਿਆਂ ਦੇ ਹਮਾਇਤੀਆਂ ਦੇ ਸਿਰ ਸੁਆਹ ਪਾ ਦਿੱਤੀ ਹੈ। ਵੱਡੀ ਜਿੱਤ ਤੇ
ਮੁੱਲਵਾਨ ਸਬਕ ਲੋਕਾਂ ਦੀ ਝੋਲੀ ਪਾਏ ਹਨ।
ਘੋਲ ¸ ਕਦੇ ਢਕੀ ਰਿੱਝਣ ਨਹੀਂ ਦਿੰਦਾ!
ਅੰਨੇ ਪੈਸੇ ਤੇ ਜਮੀਨ ਦੇ ਮਾਲਕ ਅਤੇ ਤਿੰਨਾਂ-ਚੌਹਾਂ ਸਾਲਾਂ 'ਚ ਹੀ ਉੱਭਰੇ ਗੁੰਡੇ-ਅਗਵਾਕਾਰ
ਨਿਸ਼ਾਨ ਨੇ, ਹਥਿਆਰਬੰਦ ਗੁੰਡਾ-ਢਾਣੀ ਨਾਲ ਦੋ ਧੀਆਂ ਵਾਲੇ ਇਸ ਸਧਾਰਨ ਪ੍ਰੀਵਾਰ ਦੇ ਘਰ ਧਾਵਾ
ਬੋਲਿਆ ਹੈ। ਮਾਪਿਆਂ ਦਾ ਸਿਰ ਪਾੜ ਕੇ ਤੇ ਬਾਹਾਂ ਤੋੜ ਕੇ ਫਾਇਰ ਕਰਦਾ ਹੋਇਆ ਉਹ, ਬੱਚੀ ਨੂੰ
ਕੇਸਾਂ ਤੋਂ ਘੜੀਸ ਕੇ ਅਗਵਾ ਕਰਕੇ ਲੈ ਕੇ ਗਿਆ।
ਇਸ ਗੁੰਡਾ-ਟੋਲੇ ਦੀ ਪਿੱਠ 'ਤੇ ਹਾਕਮ ਅਕਾਲੀ ਸਿਆਸਤਦਾਨ ਖਾਸ ਕਰਕੇ ਮਜੀਠੀਏ ਤੇ ਛੋਟੇ ਬਾਦਲ
ਹੋਰੀਂ, ਪੁਲਸ ਅਫਸਰ ਤੇ ਨਿਸ਼ਾਨ ਦੇ ਮਾਪੇ ਖੜ•ੇ ਹਨ। 19-20 ਕੇਸ ਦਰਜ ਹੋਣ ਦੇ ਬਾਵਜੂਦ
ਵੀ, ਅਕਾਲੀ-ਪਾਰਟੀ ਦੀ ਤੱਕੜੀ ਵਾਂਗੂੰ ਅਦਾਲਤ ਦਾ ਪੱਲੜਾ ਵੀ ਉਸੇ ਵੱਲ ਤੁਲਦਾ ਹੈ, ਕਦੇ ਕੋਈ ਸਜ਼ਾ
ਨਹੀਂ ਕੀਤੀ। ਏਸੇ ਦੇ ਜ਼ੋਰ ਉਹ, ਵਾਰਦਾਤ ਕਰਕੇ ਹਥਿਆਰਾਂ ਦਾ ਵਿਖਾਵਾ ਕਰਦਾ ਤੇ ਰਸਤੇ 'ਚ ਆਉਂਦੀਆਂ
ਕਾਰਾਂ ਭੰਨਦਾ ਹੋਇਆ, ਸੰਘਣੀ ਅਬਾਦੀ 'ਚੋਂ ਬੜੀ ਬੇਫਿਕਰੀ ਨਾਲ ਨਿਕਲਿਆ ਹੈ।
ਗੁੰਡਿਆਂ ਤੇ ਪੁਲਸ ਅਫਸਰਾਂ ਵੱਲੋਂ ਬਿਠਾਏ ਡਰ-ਦਹਿਲ ਤੇ ਪਰੇਸ਼ਾਨੀ ਵਿਚੋਂ ਬਾਹਰ ਆਈ ਬੱਚੀ ਵੱਲੋਂ
ਲੋਕਾਂ ਦੇ ਇਕੱਠ ਵਿਚ ਆ ਕੇ ਦਿੱਤੇ ਬਿਆਨ ਨੇ ਗੁੰਡਿਆਂ, ਪੁਲਸ ਅਫ਼ਸਰਾਂ ਤੇ ਸਰਕਾਰ ਨੂੰ ਸੱਥ 'ਚ
ਛੰਡ ਦਿੱਤਾ ਹੈ।
ਵੱਡੇ ਬਾਦਲ ਵੱਲੋਂ ਆਵਦੇ ਬੀਬੇ-ਮੁਖਾਰਬੰਦ ਵਿਚੋਂ ਇਕ ਵੀ ਸ਼ਬਦ ਨਾ ਉਚਾਰਨ ਦੀ ਅਤੇ ਆਵਦੇ ਮੀਡੀਆ
ਸਲਾਹਕਾਰ ਤੋਂ ਘੋਲ ਚਲਾਉਣ ਵਾਲਿਆਂ 'ਤੇ ਪੁਲਸ-ਕੇਸ ਮੜ•ਨ ਦੀਆਂ ਧਮਕੀਆਂ ਦਿਵਾਉਣ ਦੀ ਚੱਲੀ
ਚਾਲਬਾਜ਼ੀ ਓਸੇ ਦਾ ''ਅਲੀ-ਬਾਬਾ, ਚਾਲੀ ਚੋਰ'' ਵਾਲਾ ਅਸਲੀ ਚੇਹਰਾ ਬੇਨਕਾਬ ਕਰ ਗਈ ਹੈ। ਫਰੀਦਕੋਟ
ਹਲਕੇ ਦੀ ਅਕਾਲੀ ਐਮ.ਪੀ. ਗੁਲਸ਼ਨ ਨੇ ਤਾਂ ਮੂੰਹ ਹੀ ਨਹੀਂ ਖੋਹਲਿਆ, ਜੀਭ ਠਾਕੀ ਰੱਖੀ। ਡੂਢ ਮਹੀਨੇ
ਬਾਦ...ਕੱਫਣ ਪਾੜ ਕੇ ਪੁਲਸ ਅਫ਼ਸਰਾਂ ਦੀ ਪਿੱਠ ਥਾਪੜਦਿਆਂ ਬੱਚੀ ਖਿਲਾਫ਼ ਬੋਲ ਕੇ ਬਠਿੰਡੇ ਤੋਂ
ਅਕਾਲੀ ਐਮ.ਪੀ. ਹਰਸਿਮਰਤ ਬਾਦਲ, ਨੰਨੀ ਛਾਂ ਦੀ ਰਾਖੀ ਦਾ ਚਾੜਿਆ ਮਾਖੌਟਾ ਲੁਹਾ ਬੈਠੀ।
ਲੋਕ ਰੋਹ ਦੀਆਂ ਲਾਟਾਂ ਦੇ ਸੇਕ ਨੇ ਨਾ ਸਿਰਫ਼ ਅਕਾਲੀ ਮੰਤਰੀਆਂ ਤੇ ਲੀਡਰਾਂ ਨੂੰ ਸ਼ਹਿਰ ਅੰਦਰ
ਵੜਨੋਂ ਰੋਕ ਦਿੱਤਾ, ਸਗੋਂ ਢੂਹੀ ਭੰਨਾ ਚੁੱਕੇ ਵਿਹੁ ਘੋਲਦੇ ਸੱਪ ਵਾਂਗੂੰ ਵੱਡੇ ਬਾਦਲ ਵੱਲੋਂ
ਆਵਦੇ ਐਮ.ਐਲ.ਏਆਂ ਤੇ ਅਫਸਰਾਂ ਰਾਹੀਂ ਬੱਚੀ ਦੇ ਘਰ ਆ ਕੇ ''ਬੁੱਕਲ 'ਚ ਲੈ ਕੇ ਗਲ ਘੁੱਟ ਦੇਣ''
ਦੀ ਹਰਨਾਕਸ਼ੀ-ਚਾਲ ਵੀ ਸਾੜ ਕੇ ਸੁਆਹ ਕਰ ਦਿੱਤੀ।
''ਆਜ਼ਾਦ ਤੇ ਨਿਰਪੱਖ'' ਹੋਣ ਦਾ ਗੇਟ 'ਤੇ ਬੈਨਰ ਸਜਾਈ ਅਦਾਲਤ ਵੀ, ਬੱਚੀ ਦੇ ਮੁੱਢਲੇ ਬਿਆਨ ਨੂੰ ਨਾ
ਮੰਨ ਕੇ ਅਤੇ 21 ਨਵੰਬਰ ਵਾਲੀ ਪੇਸ਼ੀ ਸਮੇਂ ਵੀ ਬੱਚੀ ਨੂੰ ਵਕੀਲ ਦੀ ਸਹੂਲਤ ਨਾ ਦੇ ਕੇ, ਨਾ ਆਜ਼ਾਦ
ਰਹੀ ਤੇ ਨਾ ਨਿਰਪੱਖ ਰਹੀ। 'ਇਨਸਾਫ਼ ਦੀ ਮੂਰਤੀ' ਦੀ ਅੱਖ ਦਾ ਟੀਰ ਸਾਫ ਦਿਖਾਈ ਦਿੱਤਾ ਹੈ।
ਬੱਚੀ ਦੇ ਅਖਬਾਰਾਂ 'ਚ ਆਏ ਪਹਿਲੇ ਬਿਆਨ, ''. . .ਉਸ ਬਾਰੇ ਮੁਹੱਬਤ ਦੇ ਕਿੱਸੇ ਵਰਗੀਆਂ ਅਫਵਾਹਾਂ
ਬਿਲਕੁਲ ਬੇਬੁਨਿਆਦ ਹਨ'' ਨੇ ਹੀ ''ਲੜਕੀ ਆਪਣੀ ਮਰਜੀ ਨਾਲ ਗਈ ਹੈ। ਇਹ ਪਿਆਰ-ਮੁਹੱਬਤ ਦਾ ਕਿੱਸਾ
ਹੈ'' ਦੇ ਬਿਆਨ ਦੇਣ ਵਾਲੇ ਪੰਜਾਬ ਪੁਲਸ ਮੁਖੀ ਅਤੇ ਬੱਚੀ ਦੇ ਨਾਂ 'ਤੇ ਜਾਅਲੀ ਚਿੱਠੀ ਤੇ ਫੋਟੋਆਂ
ਜਾਰੀ ਕਰਨ ਵਾਲੇ ਫਰੀਦਕੋਟ ਦੇ ਉਸ ਸਮੇਂ ਦੇ ਡੀ.ਆਈ.ਜੀ. ਤੇ ਐਸ.ਐਸ.ਪੀ. ਦੇ ਕਰਾਰੀ ਚਪੇੜ ਮਾਰੀ
ਹੈ।
ਵਾਰਦਾਤ ਦੀ ਤੁਰੰਤ ਰਿਪੋਰਟ ਮਿਲਣ ਦੇ ਬਾਵਜੂਦ ਗੁੰਡਾ ਗ੍ਰੋਹ ਦੀ ਨਾਕਾਬੰਦੀ ਨਾ ਕਰਨ ਵਾਲੇ
ਡੀ.ਐਸ.ਪੀ. ਗੁਰਮੀਤ ਸਿੰਘ ਅਤੇ ਮੌਕੇ 'ਤੇ ਜਾ ਕੇ ''. . .ਹੱਥ 'ਚ ਹੱਥ ਪਾ ਕੇ'' ਜਾਣ ਦੀਆਂ
ਤੁਹਮਤਾਂ ਲਾਉਣ ਵਾਲੀ ਬੇਗੈਰਤ ਡੀ.ਐਸ.ਪੀ. ਕਸ਼ਮੀਰ ਕੌਰ ਤਾਂ ਇਹ ਵਾਰਦਾਤ ਸਿਰੇ ਚੜ•ਾਉਣ ਵਿੱਚ ਅਤੇ
ਬਚ ਨਿਕਲਣ ਵਿਚ ਗੁੰਡਿਆਂ ਨਾਲ ਗਿੱਟ-ਮਿੱਟ ਕਰਨ ਦੇ ਪਾਪਾਂ ਦੇ ਭਾਗੀ ਹੋ ਨਿੱਬੜੇ ਹਨ।
ਸ਼ਰੂਤੀ ਨੂੰ ਵੱਖ-ਵੱਖ ਮੌਕਿਆਂ 'ਤੇ ਮਿਲਣ ਸਮੇਂ ਅਤੇ 21
ਨਵੰਬਰ ਨੂੰ ਅਦਾਲਤ 'ਚ ਪੇਸ਼ੀ ਲਈ ਦਾਖਲ ਹੋਣ ਸਮੇਂ ''ਸਤਾਰਾਂ ਜਾਣਿਆਂ ਦੀ ਜਾਨ ਤੇਰੇ ਹੱਥ ਹੈ,
ਬਿਆਨ ਸੋਚ ਕੇ ਦਈਂ'' ਦੀ ਡਰਾਵਿਆਂ ਭਰੀ ਸੁਣਾਉਣੀ ਕਰਨ ਵਾਲੇ ਥਾਣੇਦਾਰ ਸੰਜੀਵ ਕੁਮਾਰ ਸਾਦਿਕ
ਨੂੰ, ਉਸ ਦੀ ਨਸ਼ਰ ਹੋਈ ਇਸ ਕਰਤੂਤ ਨੇ ਗੁੰਡਿਆਂ ਦੇ ਜੋਟੀਦਾਰ ਵਜੋਂ ਦੋਸ਼ੀ ਗਰਦਾਨ ਦਿੱਤਾ ਹੈ।
''ਕੁੜੀ ਨੂੰ ਭੁੱਲ ਜਾਓ। ਕੁੜੀ ਹੁਣ ਨਿਸ਼ਾਨ ਦੇ ਘਰ ਹੀ ਆਵੇਗੀ'', ''ਕੁੜੀ ਦੇ ਨਾਂ ਜਮੀਨ ਚੜ•ਵਾ
ਦਿਆਂਗੇ'' ਵਰਗੀ ਬੇ-ਹਿਆਈ ਕਰਨ ਰਾਹੀਂ ਨਿਸ਼ਾਨ ਦੀ ਦਲਾਲੀ ਕਰਨ ਵਾਲਾ ਐਸ.ਪੀ. (ਡੀ) ਪੰਨੂੰ ਮੂੰਹ
ਕਾਲਾ ਕਰਵਾ ਗਿਆ ਹੈ।
ਸੋ ਕੁੱਲ ਮਿਲਾ ਕੇ ਵੇਖਿਆਂ, ਇਹ ਕਿਸੇ ਇੱਕਾ-ਦੁੱਕਾ ਪੁਲਸ ਅਫ਼ਸਰ ਦੀ ਮਿਲੀਭੁਗਤ ਦਾ ਸਿੱਟਾ ਨਹੀਂ
ਹੈ, ਸਗੋਂ ਅਕਾਲੀ ਭਾਜਪਾ ਸਰਕਾਰ ਤੇ ਖਾਸਕਰ ਬਾਦਲ ਪ੍ਰੀਵਾਰ ਦੇ ਧੁਰ ਉਪਰੋਂ ਮਿਲੇ ਇਸ਼ਾਰੇ 'ਤੇ ਹੀ
ਨਿਸ਼ਾਨ ਤੇ ਉਸਦੇ ਗਰੋਹ ਨੂੰ ਬਚਾਉਣ ਲਈ ਲਟਾ-ਪੀਂਘ ਹੁੰਦੇ ਰਹਿਣ ਕਰਕੇ ਜਿਥੇ ਸਮੁੱਚਾ
ਪੁਲਸ-ਪ੍ਰਸ਼ਾਸ਼ਨ ਆਵਦੇ ਮੋਢਿਆਂ 'ਤੇ ਲੱਗੇ ਬਦੀ ਦੇ ਸਟਾਰਾਂ ਵਿੱਚ ਹੋਰ ਵਾਧਾ ਕਰਵਾ ਗਿਆ ਹੈ, ਉਥੇ
ਅਕਾਲੀ ਭਾਜਪਾ ਸਰਕਾਰ ਤੇ ਬਾਦਲ ਪਰਿਵਾਰ ਵੀ ਆਵਦੇ ਮੱਥੇ 'ਤੇ ਕਾਲਾ-ਕਲੰਕੀ-ਦਾਗ ਲਗਵਾ ਬੈਠਾ ਹੈ।
ਘੋਲ ਸਬਕ ਦਿੰਦਾ ਹੀ ਦਿੰਦਾ ਹੈ!
v
ਇਹ ਘੋਲ, ਮਾਪਿਆਂ
ਵੱਲੋਂ ''ਆਪਣੇ ਹੱਥੀਂ ਆਪਣੀ ਇੱਜ਼ਤ ਰੋਲਣ'' ਦੇ ਪਿਛਾਖੜੀ ਵਿਚਾਰ ਉੱਤੇ ਕਾਟਾ ਮਾਰ ਕੇ ਲੋਕਾਂ ਕੋਲ
ਦੱਸਣ ਦੀ ਹਿੰਮਤ ਕਰਨ ਕਰਕੇ ਸਫ਼ਲ ਹੋਇਆ ਹੈ।
v
ਇਸ ਦਿਲ-ਵਿੰਨਵੇ
ਮਸਲੇ ਖਿਲਾਫ਼ ਧੀਆਂ-ਭੈਣਾਂ ਵਾਲੇ ਤੇ ਇਨਸਾਫ਼ਪਸੰਦ ਹਰੇਕ ਮਨ 'ਚੋਂ ਉੱਭਰੀ ''ਘਰਾਂ 'ਚ ਵੀ ਕੋਈ
ਸੁਰੱਖਿਅਤ ਨਹੀਂ'' ਦੀ ਫਿਕਰਮੰਦੀ ਅਤੇ ''ਕੁਛ ਹੋਣਾ ਚਾਹੀਦੈ'' ਦੀ ਇੱਛਾ ਦੀ ਸਾਂਝੀ ਹੂਕ ਦੀ
ਤਾਕਤ ਹੀ ਮਾਪਿਆਂ ਦੀ ਬਾਂਹ ਬਣੀ ਹੈ।
v
ਐਕਸ਼ਨ ਕਮੇਟੀ ਵੱਲੋਂ
ਲਗਾਤਾਰ ਘੋਲ ਕਰਦੇ ਰਹਿਣ ਕਰਕੇ, ਲੋਕਾਂ ਦਾ, ਜਥੇਬੰਦੀਆਂ ਦਾ, ਸੰਗਠਨਾਂ ਦਾ ਸਹਿਯੋਗ ਲੈਣ ਕਰਕੇ
ਅਤੇ ਇਹਨਾਂ ਸਭਨਾਂ ਵੱਲੋਂ ਡਟਵਾਂ ਕੰਨ•ਾ ਲਾਉਣ ਕਰਕੇ ਹੀ ਗੁੰਡਾ ਗ੍ਰੋਹ ਤੇ ਸਮੁੱਚਾ ਹਕੂਮਤੀ
ਲਾਣਾ ਗੋਡਣੀਏ.ਂ ਕੀਤਾ ਹੈ। ਮਾਪਿਆਂ ਦਾ ਸਵੈਮਾਣ ਬਚਾਇਆ ਹੈ ਤੇ ਮਾਣ ਵਧਾਇਆ ਹੈ।
v
ਹਕੂਮਤ ਦੇ ਕੁੱਲ
ਲਾਣੇ ਵੱਲੋਂ ਲੋਕਾਂ ਖਿਲਾਫ਼ ਬੋਲੇ ਇਹ ਜਾਂ ਅਜਿਹੇ ਹੋਰ ਧਾਵਿਆਂ ਨੂੰ ਰੋਲਣ-ਠੱਲਣ ਤੇ ਮੋੜਵੇਂ ਵਾਰ
ਕਰਕੇ ਪੁੱਠ-ਪੈਰੇ ਦਬੱਲਣ ਅਤੇ ਆਪਾ ਬਚਾਉਣ ਜਾਂ ਕੁਝ ਹਾਸਲ ਕਰਨ ਲਈ ਘੋਲਾਂ ਵਿਚ ਜਥੇਬੰਦ ਤੇ ਚੇਤਨ
ਜੁਝਾਰੂ ਹੀ ਪੈਰ ਗੱਡ ਕੇ ਖੜਨ ਤੇ ਲੜਨ ਵਿਚ ਮੋਹਰੀ ਹਿੱਸਾ ਪਾਉਂਦੇ ਹਨ। ਕਿਸੇ ਕੱਲੇ-ਕਹਿਰੇ
ਵਿਅਕਤੀ ਜਾਂ ਪ੍ਰੀਵਾਰ ਦੇ ਵੱਸ ਦਾ ਰੋਗ ਨਹੀਂ ਹੁੰਦਾ। ਜਥੇਬੰਦ ਹੋਵੋ।
v
''ਰਾਜ ਨਹੀਂ
ਸੇਵਾ'', ''ਨੰਨ•ੀ ਛਾਂ'', ''ਬੀਬੇ ਚੇਹਰੇ'', ''ਸੇਵਾ, ਸੁਰੱਖਿਆ, ਸਨਮਾਨ'' ਅਤੇ ''ਆਜ਼ਾਦ ਤੇ
ਨਿਰਪੱਖ ਨਿਆਂ ਪ੍ਰਬੰਧ'' ਸਭ ਦਾ ਲੋਕ-ਵਿਰੋਧੀ, ਨਿਤਾਣਿਆਂ-ਵਿਰੋਧੀ ਤੇ ਔਰਤ-ਵਿਰੋਧੀ ਕਿਰਦਾਰ
ਬੇਪਰਦ ਹੋਇਆ ਹੈ ਅਤੇ ''ਘੋਲ ਦਾ ਰਾਹ ਹੀ ਸਵੱਲੜਾ ਰਾਹ ਹੈ'', ''ਘੋਲ ਹੀ ਢਾਲ ਤੇ ਤਲਵਾਰ ਹੈ''
ਅਤੇ ''ਕੱਠ ਲੋਹੇ ਦੀ ਲੱਠ'' ਉਭਰਿਆ ਹੈ। ਪੁਸ਼ਟ ਹੋਇਆ ਹੈ।
ਘੋਲ ਅਗਾਂਹ ਵੱਲ ਸੰਕੇਤ ਕਰਦਾ ਹੈ!
v
ਬਾਦਲਕਿਆਂ ਨੇ 25
ਸਾਲ ਰਾਜ ਕਰਨ ਦੇ ਸੁਪਨੇ ਪਾਲੇ ਹਨ। ਦਮਗਜੇ ਵੀ ਮਾਰੇ ਜਾ ਰਹੇ ਹਨ। ਸੂਬੇ ਦੀ ਹਕੂਮਤ ਲਗਾਤਾਰ
ਦੂਜੀ ਵਾਰ ਹਥਿਆ ਲੈਣ ਨਾਲ ਸਿੰਗ ਮਿੱਟੀ ਕੁਝ ਜਿਆਦਾ ਹੀ ਚੱਕੀ ਹੋਈ ਹੈ।
v
ਕੇਂਦਰ ਵਾਂਗੂੰ ਹੀ
ਸੂਬੇ ਵਿਚ ਵੀ ਕੁੱਲ ਮਾਲ-ਖਜ਼ਾਨੇ, ਸਰਕਾਰੀ ਜਮੀਨਾਂ-ਜਾਇਦਾਦਾਂ, ਸੰਸਥਾਵਾਂ-ਮਹਿਕਮੇ ਵੇਚਣ ਤੇ
ਪ੍ਰਾਈਵੇਟ ਕਰਨ ਦੀਆਂ ਨੀਤੀਆਂ ਮੜ•ੀਆਂ ਹੋਈਆਂ ਹਨ। ਲੋਕਾਂ ਤੋਂ ਹਰ ਸ਼ੈਅ ਖੋਹ ਕੇ ਦੇਸੀ-ਬਦੇਸੀ
ਕਾਰਪੋਰੇਟ ਘਰਾਣਿਆਂ-ਕੰਪਨੀਆਂ ਦੀ ਝੋਲੀ ਪਾਈਆਂ ਜਾ ਰਹੀਆਂ ਹਨ। ਸਾਮਰਾਜੀ ਦਖਲਅੰਦਾਜੀ ਲਈ ਦਰਵਾਜੇ
ਚੌਪਟ ਖੋਹਲੇ ਜਾ ਰਹੇ ਹਨ।
v
ਲੋਕਾਂ ਦੀ ਝੋਲੀ
ਕਰਜਾ, ਗਰੀਬੀ, ਮਹਿੰਗਾਈ, ਬੇਰੁਜ਼ਗਾਰੀ ਪਾਈ ਜਾ ਰਹੀ ਹੈ। ਤੰਗੀ ਦੀ ਹਾਲਤ ਵਧਾਈ ਜਾ ਰਹੀ ਹੈ।
ਲੋਕਾਂ 'ਚ ਔਖ-ਬੇਚੈਨੀ ਤੇ ਰੋਸ-ਰੋਹ ਵਧ ਰਿਹਾ ਹੈ। ਜਥੇਬੰਦ ਹੋ ਰਹੇ ਹਨ। ਘੋਲਾਂ ਦੇ ਰਾਹ ਪੈ ਰਹੇ
ਹਨ। ਹਾਕਮਾਂ ਦੀਆਂ ਨੀਤੀਆਂ-ਚਾਲਾਂ ਵਿਚ ਰੁਕਾਵਟਾਂ ਪਾ ਰਹੇ ਹਨ। ਹਾਕਮਾਂ ਦੀ ਰਾਤ ਦੀ ਨੀਂਦ ਤੇ
ਦਿਨ ਦਾ ਚੈਨ ਹਰਾਮ ਕਰ ਰਹੇ ਹਨ।
v
ਲੋਕਾਂ ਖਿਲਾਫ਼ ਪੁਲਿਸ
ਦੀ ਅੰਨ•ੀ ਵਰਤੋਂ ਕਰਦੇ ਹਨ ਤਾਂ ਤੋਏ ਤੋਏ ਜਿਆਦਾ ਹੁੰਦੀ ਹੈ। ਫਿਟਕਾਰਾਂ ਪੈਂਦੀਆਂ ਹਨ। ਹੇਠੋਂ
ਗੱਦੀ ਸਿਰਕਦੀ ਲੱਗਦੀ ਹੈ। ਗੱਦੀ 'ਤੇ ਕਾਬਜ ਰਹਿਣ ਲਈ ਲੋਕਾਂ 'ਤੇ ਕਾਠੀ ਪਾ ਕੇ ਰੱਖਣ ਲਈ ਗੁੰਡਾ
ਗਰੋਹ ਵਧ ਲਾਹੇਵੰਦੇ ਹਨ। ਇਹ ਗੁੰਡਾ-ਗਰੋਹਾਂ ਨੂੰ ਲੋਕਾਂ 'ਚ ਡਰ, ਦਬਸ਼-ਦਹਿਲ ਪਾ ਕੇ ਰੱਖਣ ਲਈ
ਖੁੱਲ•ਾਂ ਦਿੰਦੇ ਹਨ। ਲੋਕਾਂ ਨੂੰ ਲੁੱਟਾਂ-ਖੋਹਾਂ 'ਚ ਉਲਝਾ ਕੇ ਰੱਖਦੇ ਹਨ। ਗਲਤ ਅਤੇ ਧੱਕੇ ਨਾਲ
ਵੋਟਾਂ ਪਵਾਉਣ ਦੇ ਜਰੀਏ ਵਜੋਂ ਇਹਨਾਂ ਨੂੰ ਪਾਲਦੇ ਪੋਸਦੇ ਹਨ।
v
ਇਥੇ ਫਰੀਦਕੋਟ ਵਿਚ
ਪਿਛਲੇ ਤਿੰਨ-ਚਾਰ ਸਾਲਾਂ ਤੋਂ ਇਹਨਾਂ ਨੇ ਇਸ ਨਿਸ਼ਾਨ ਦੇ ਗਰੋਹ ਨੂੰ ਪਾਲਿਆ ਹੈ। ਉਸਨੂੰ ਹਰ ਕੇਸ
'ਚੋਂ ਬਚਾਇਆ ਹੈ। ਅਸੰਬਲੀ ਚੋਣਾਂ ਸਮੇਂ ਵੱਡੇ ਬਾਦਲ ਵੱਲੋਂ ਤੇ ਹੁਣ ਮੇਲੇ 'ਤੇ ਛੋਟੇ ਬਾਦਲ
ਵੱਲੋਂ ਸਟੇਜ 'ਤੇ ਆਵਦੇ ਨਾਲ ਬਿਠਾ ਕੇ ਉਸਦੀ ਤਾਕਤ ਵਧਾਈ ਹੈ। ਉਸਨੂੰ ਹੱਲਾਸ਼ੇਰੀ ਦਿੱਤੀ ਹੈ।
ਪੁਲਸ ਨੂੰ, ਉਸਨੂੰ ਹੱਥ ਪਾਉਣ ਤੋਂ ਰੋਕਿਆ ਹੈ। ਅਦਾਲਤ ਨੂੰ ਵੀ ਉਸਦੀ ਸੇਵਾ 'ਚ ਭੁਗਤਾਇਆ ਹੈ। ਆਮ
ਲੋਕਾਂ ਤੇ ਉਹਨਾਂ ਦੀ ਇੱਕ ਬੱਚੀ ਨਾਲ ਵੈਰ ਕਮਾਇਆ ਹੈ।
v
ਇਹ ਤਾਂ ਰਾਜਿਆਂ
ਵਾਂਗੂੰ ਆਵਦਾ ਪੱਕਾ ਰਾਜ ਚਲਾਉਣ ਲਈ ਲੋਕਾਂ ਨੂੰ ਆਵਦੀ ਕਾਲੀ ਕੀਲ ਵਿਚ ਸਦਾ ਸਦਾ ਲਈ ਕੈਦ ਕਰਕੇ
ਰੱਖਣਾ ਚਾਹੁੰਦੇ ਹਨ। ਏਹਦੇ ਲਈ ਪੁਲਸ ਜਬਰ ਨਾਲੋਂ ਗੁੰਡਿਆਂ ਦੀ ਵਰਤੋਂ ਦੇ ਲਾਹੇ ਵੱਧ ਹੋਣ ਕਰਕੇ
ਨਿਸ਼ਾਨ ਤੇ ਉਸਦੇ ਗੁੰਡਾ-ਗਰੋਹ ਦੀ ਅੰਨ•ੀ ਮੱਦਦ ਕਰਨ ਰਾਹੀਂ ਪੰਜਾਬ ਭਰ ਵਿਚ ਪੈਦਾ ਕੀਤੇ ਤੇ ਨਵੇਂ
ਪੈਦਾ ਕੀਤੇ ਜਾਣ ਵਾਲੇ ਗੁੰਡਾ-ਗਰੋਹਾਂ ਨੂੰ ਸਪੱਸ਼ਟ ਸੁਨੇਹਾ ਦੇ ਰਹੀ ਹੈ ਕਿ ਗੁੰਡਿਆਂ ਦੀ
ਪੁਸ਼ਤਪਨਾਹੀ ਕਰਨ ਵਿਚ ਸਰਕਾਰ ਸਿਆਸੀ ਮਜਬੂਰੀਆਂ ਨੂੰ ਅੜਿੱਕਾ ਨਹੀਂ ਬਣਨ ਦੇਵੇਗੀ।
v
ਇਹ ਰਵੱਈਆ ਤੇ ਰਾਹ
ਇਕੱਲੀ ਬਾਦਲ ਹਕੂਮਤ ਦਾ ਹੀ ਨਹੀਂ, ਸਭੇ ਹਕੂਮਤੀ ਗੱਦੀਆਂ 'ਤੇ ਬੈਠੀਆਂ ਤੇ ਬੈਠਣ ਲਈ ਤਰਲੋਮੱਛੀ
ਹੋ ਰਹੀਆਂ ਸਿਆਸੀ ਪਾਰਟੀਆਂ, ਸੂਬਾਈ ਵੀ ਤੇ ਕੇਂਦਰੀ ਵੀ, ਏਸੇ ਰਵੱਈਏ ਤੇ ਰਾਹ ਉੱਤੇ ਚੱਲ ਰਹੀਆਂ
ਹਨ। ਇਹਨਾਂ ਸਭਨਾਂ ਨੇ ਜਿਥੇ ਲੋਕਾਂ ਨੂੰ ਲਾਦੂ ਕੱਢ ਕੇ ਰੱਖਣ ਲਈ ਪੁਲਸਾਂ-ਫੌਜਾਂ, ਕਾਲੇ
ਕਾਨੂੰਨ, ਨਵੇਂ ਨਵੇਂ ਹਥਿਆਰ ਤੇ ਔਜ਼ਾਰ, ਨੀਤੀਆਂ-ਚਾਲਾਂ ਬਣਾ ਕੇ ਰੱਖੀਆਂ ਹੋਈਆਂ ਹਨ, ਉਥੇ
ਪ੍ਰਾਈਵੇਟ ਸੈਨਾਵਾਂ-ਸਲਵਾ ਜੁਦਮ, ਕੋਇਆ ਕਮਾਂਡੋ, ਰਣਬੀਰ ਸੈਨਾ, ਫਿਰਕੂ ਤੇ ਮੂਲਵਾਦੀ ਤਾਕਤਾਂ
ਅਤੇ ਗੁੰਡਾ-ਗਰੋਹਾਂ ਨੂੰ ਬਕਾਇਦਾ ਰੂਪ ਵਿਚ ਸੰਗਠਿਤ ਕੀਤਾ ਹੋਇਆ ਹੈ।
ਘੋਲ - ਜਥੇਬੰਦ ਹਿੱਸਿਆਂ ਦਾ ਰੋਲ
ਅਖਬਾਰੀ, ਬਿਆਨਾਂ,
ਧਮਕੀਆਂ ਤੇ ਘੋਲ ਨੂੰ ਲਮਕਾ ਕੇ ਦਮੋਂ ਕੱਢਣ ਸਮੇਤ ਹੋਰ ਸਿਆਸੀ ਚਾਲਾਂ ਰਾਹੀਂ ਚੜ•ੇ ਆਉਂਦੇ
ਹਕੂਮਤੀ ਲਾਣੇ ਦੇ ਹੱਥ ਰੋਕਣ ਤੇ ਪਿਛਲ-ਮੋੜਾ ਕਟਾਉਣ ਦੀਆਂ ਉਭਰੀਆਂ ਲੋੜਾਂ ਨੂੰ ਕਿਸਾਨਾਂ, ਖੇਤ
ਮਜ਼ਦੂਰਾਂ, ਵਿਦਿਆਰਥੀਆਂ, ਨੌਜਵਾਨਾਂ, ਮੁਲਾਜ਼ਮਾਂ ਤੇ ਇਨਕਲਾਬੀ ਸੰਗਠਨਾਂ ਵੱਲੋਂ ਭਰੇ ਹੁੰਗਾਰੇ ਨੇ
ਘੋਲ ਨੂੰ ਅੱਗੇ ਵਧਾਇਆ ਹੈ।
ਇਸ ਮੌਕੇ ਪੈਦਾ ਹੋਈ
ਨਾਜ਼ੁਕ ਹਾਲਤ ਦੀਆਂ ਲੋੜਾਂ ਕਈ ਕੁਛ ਦੀ ਮੰਗ ਕਰਦੀਆਂ ਸਨ। ਇਹ ਮੰਗ ਸੀ¸ਘੋਲ 'ਚ ਹਿੱਸਾ ਪਾ ਰਹੇ ਤੇ
ਪਾਉਣ ਲਈ ਤਿਆਰ ਸਭਨਾਂ ਹਿੱਸਿਆਂ ਦੀ ਇਕਜੁੱਟਤਾ ਨੂੰ ਕਾਇਮ ਰੱਖਦਿਆਂ ਇੱਕੋ ਘੋਲ ਸੈਂਟਰ ਨੂੰ
ਮਜ਼ਬੂਤ ਕਰਨ ਦੀ। ਲਾਮਬੰਦੀ ਵਧਾਉਣ ਤੇ ਘੋਲ ਨੂੰ ਜ਼ਿਲ•ੇ ਤੋਂ ਬਾਹਰ ਪੰਜਾਬ ਭਰ 'ਚ ਫੈਲਾਉਣ ਦੀ।
ਹਕੂਮਤੀ ਕੂੜ ਪ੍ਰਚਾਰ ਨੂੰ ਹੂੰਝ ਕੇ ਅਸਲੀਅਤ ਉਘਾੜਨ ਦੀ। ਸਰਕਾਰੀ ਗਿੱਦੜ ਧਮਕੀਆਂ ਨੂੰ ਟਿੱਚ
ਜਾਨਣ ਦੀ। ਹਕੂਮਤ ਦੀ ਹਰ ਚਾਲ ਤੇ ਵਾਰ ਨੂੰ ਬੁੱਝਕੇ ਮੋੜਵੇਂ ਤੇ ਕਰਾਰੇ ਸ਼ਿਸਤ ਬੱਝਵੇਂ ਵਾਰ ਕਰਨ
ਦੀ। ਕਾਨੂੰਨੀ ਪੱਖੋਂ ਡਟਵੀਂ ਪੈਰਵਈ ਕਰਨ ਦੀ। ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਤੇ ਪੰਜਾਬ
ਖੇਤ ਮਜ਼ਦੂਰ ਯੂਨੀਅਨ ਵੱਲੋਂ ਇਹਨਾਂ ਸਭਨਾਂ ਲੋੜਾਂ ਨੂੰ ਹਰ ਪੱਖ ਤੋਂ ਬਿਨਾਂ ਸ਼ਰਤ ਡਟਵਾਂ ਹੁੰਗਾਰਾ
ਦੇ ਕੇ ਇਸ ਘੋਲ ਨੂੰ ਜਿੱਤ ਤੱਕ ਪਹੁੰਚਾਉਣ 'ਚ ਅਹਿਮ ਰੋਲ ਨਿਭਾਇਆ ਗਿਆ ਹੈ।
ਇਸ ਰੋਲ ਨੇ ਹਕੂਮਤੀ
ਲਾਣੇ ਨੂੰ ਢੂਹੀ ਪਰਨੇ ਕਰਨ 'ਚ ਸਹਾਈ ਹੋਣ ਤੋਂ ਅੱਗੇ ਵਧਕੇ ਹਾਕਮ ਜਮਾਤਾਂ ਵੱਲੋਂ ਕਿਸਾਨਾਂ ਤੇ
ਦੁਕਾਨਦਾਰਾਂ, ਪੇਂਡੂਆਂ ਤੇ ਸ਼ਹਿਰੀਆਂ, ਹਿੰਦੂਆਂ ਤੇ ਸਿੱਖਾਂ 'ਚ ਪਾਟਕ ਪਾ ਕੇ ਰੱਖਣ ਦੀਆਂ ਲੋੜਾਂ
ਤਹਿਤ ਬਣਾਈ ਵਿੱਥ ਨੂੰ ਵੀ ਘਟਾਇਆ ਹੈ।
ਘੋਲ ਪੱਲਾ ਫੜੀ ਰੱਖੋ!
v
ਮਸਲਾ ਅਜੇ
ਅੱਧਾ-ਅਧੂਰਾ ਪਿਆ ਹੈ। ਗੁੰਡੇ ਗ੍ਰਿਫ਼ਤਾਰ ਹੋ ਗਏ ਹਨ, ਉਹਨਾਂ ਨੂੰ ਸਜ਼ਾਵਾਂ ਦਿਵਾਉਣ ਦਾ ਕੰਮ ਰਹਿੰਦਾ
ਹੈ। ਗੁੰਡਿਆਂ ਦੀ ਪੁਸ਼ਤਪਨਾਹੀ ਕਰਨ ਵਾਲੇ, ਸੇਵਾ ਕਰਨ ਵਾਲੇ, ਦਲਾਲੀ ਕਰਨ ਵਾਲੇ ਅਤੇ ਜਨਮਦਾਤੇ ਤੇ
ਪਾਲਣਹਾਰੇ ਸਰਕਾਰ, ਅਕਾਲੀ ਸਿਆਸਤਦਾਨ ਤੇ ਪੁਲਸ ਅਫ਼ਸਰ, ਸਭ ਕਨੂੰਨ ਦੇ ਕਟਹਿਰੇ 'ਚ ਲਿਆਉਣੇ ਹਨ।
ਸਜ਼ਾਵਾਂ ਦਿਵਾਉਣੀਆਂ ਹਨ। ਲੋਕਾਂ ਦੀ ਕਚਹਿਰੀ ਵਿਚ ਵੀ ਬੇਪਰਦ ਕਰਨੇ ਹਨ।
v
ਇਹ ਸਭ ਸ਼ੈਤਾਨ ਦੀ
ਟੂਟੀ ਹਨ। ਅਲੀ-ਬਾਬਾ ਚਾਲੀ ਚੋਰ ਹਨ। ਲੋਕ-ਵਿਰੋਧੀ ਹਨ। ਦੰਭੀ ਤੇ ਫਰੇਬੀ ਹਨ। ਝੂਠ ਬੋਲਣ ਤੇ
ਕੁਫ਼ਰ ਤੋਲਣ 'ਚ ਸੰਗ ਨਹੀਂ ਮੰਨਦੇ। ਬਥੇਰੀ ਵਾਰ ਸਮਝੌਤੇ ਕਰਦੇ ਤੇ ਮੁੱਕਰਦੇ ਹਨ। ਹੁਣ ਘੋਲ ਦਾ
ਦਬਾਅ ਬਣਿਆ ਹੈ ਤਾਂ ਕੁਝ ਢਿੱਲੇ ਪਏ ਹਨ। ਪਿੱਛੇ ਮੁੜੇ ਹਨ।
v
ਪਰ ਇਹ,
ਘਾਗ-ਸਿਆਸਤਦਾਨ ਹਨ। ਹਾਲਾਤ ਸੰਭਾਲਣ 'ਚ ਤੇਜ-ਤਰਾਰ ਹਨ। ਇਹਨਾਂ ਕੋਲ ਪੈਸਾ ਤੇ ਸਰਕਾਰੀ ਜੋਰ ਹੈ।
ਚਾਲਾਂ ਚੱਲਣੋਂ ਬਾਜ਼ ਨਹੀਂ ਆਉਣਗੇ। ਇਹ ਮੁੜ ਸੰਭਲਣ ਦੀ, ਉੱਠਣ ਦੀ, ਤਾਕਤ ਫੜਨ ਦੀ ਤੇ ਮੋੜਵੀਂ
ਕਾਰਵਾਈ ਕਰਨ ਲਈ ਰੱਸੇ ਤੁੜਾਉਣਗੇ।
v
ਘੋਲ ਦੀਆਂ ਲੋੜਾਂ
ਨੂੰ ਹੁੰਗਾਰਾ ਭਰੋ। ਵੱਖ ਵੱਖ ਢੰਗਾਂ ਤੇ ਸ਼ਕਲਾਂ ਰਾਹੀਂ ਘੋਲ-ਸਰਗਰਮੀ ਜਾਰੀ ਰੱਖੋ। ਤੁਰਦੇ ਰਹੋ।
ਤੁਰਿਆਂ ਹੀ ਵਾਟ ਮੁੱਕਣੀ ਹੈ। ਮੰਜ਼ਲ ਆਉਣੀ ਹੈ। ਦੋਸ਼ੀਆਂ ਨੂੰ ਸਜ਼ਾਵਾਂ ਮਿਲਣੀਆਂ ਹਨ।
ਸੂਬਾ ਕਮੇਟੀ
ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ)
ਪ੍ਰਕਾਸ਼ਕ : ਸੁਖਦੇਵ ਸਿੰਘ ਕੋਕਰੀ ਕਲਾਂ (94174-66038)
ਸੂਬਾ ਕਮੇਟੀ
ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ
ਪ੍ਰਕਾਸ਼ਕ : ਲਛਮਣ ਸਿੰਘ ਸੇਵੇਵਾਲਾ (94170 79170)
ਪ੍ਰਕਾਸ਼ਨ ਮਿਤੀ : 05.12.2012
