ਕਿਸਾਨਾਂ-ਮਜ਼ਦੂਰਾਂ ਵੱਲੋਂ ਪਿੰਡਾਂ ਵਿੱਚ ਅਕਾਲੀ ਦੀਆਂ ਚੋਣ ਬੈਠਕਾਂ ਫੇਲ੍ਹ ਕਰਨ ਦਾ ਐਲਾਨ

ਕਿਸਾਨਾਂ-ਮਜ਼ਦੂਰਾਂ ਵੱਲੋਂ 

ਅਣਮਿਥੇ ਸਮੇਂ ਲਈ ਡੀਸੀ ਦਫਤਰ ਦਾ ਘਿਰਾਓ ਸ਼ੁਰੂ

ਪਿੰਡਾਂ ਵਿੱਚ ਅਕਾਲੀ ਦੀਆਂ ਚੋਣ ਬੈਠਕਾਂ ਫੇਲ੍ਹ ਕਰਨ ਦਾ ਐਲਾਨ

ਮੁਕਤਸਰ ਦੇ ਡੀਸੀ ਦਫਤਰ ਦਾ ਅਣਮਿਥੇ ਸਮੇਂ ਲਈ ਘਿਰਾਓ ਕਰਦੇ ਕਿਸਾਨ- ਮਜ਼ਦੂਰ।

ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਅਤੇ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਵੱਲੋਂ ਡਿਪਟੀ ਕਮਿਸ਼ਨਰ ਸ੍ਰੀ ਮੁਕਤਸਰ ਸਾਹਿਬ ਦਫਤਰ ਦਾ ਅਣਮਿਥੇ ਸਮੇਂ ਲਈ ਘਿਰਾਓ ਸ਼ੁਰੂ ਕਰ ਦਿੱਤਾ ਹੈ। ਡੀਸੀ ਦਫਤਰ ਦੇ ਮੁੱਖ ਦਫਤਰ ਮੂਹਰੇ ਉਨ੍ਹਾਂ 'ਝੰਡੇ ਗੱਡ' ਕੇ ਦਫਤਰ ਵਿੱਚ ਦਾਖਲਾ ਬੰਦ ਕਰ ਦਿੱਤਾ ਹੈ। ਇਸਦੇ ਨਾਲ ਉਨ੍ਹਾਂ ਐਲਾਨ ਕੀਤਾ ਹੈ ਕਿ ਪੰਜਾਬ ਸਰਕਾਰ ਵੱਲੋਂ ਕਿਸਾਨਾਂ ਤੇ ਮਜ਼ਦੂਰਾਂ ਪ੍ਰਤੀ ਅਪਣਾਏ ਲਾਰੇ- ਲੱਪੇ ਦੀ ਨੀਤੀ ਕਾਰਣ ਆਉਣ ਵਾਲੀਆਂ ਲੋਕ ਸਭਾ ਚੋਣਾਂ ਵੇਲੇ ਪਿੰਡਾਂ ਵਿੱਚ ਚੋਣ ਪ੍ਰਚਾਰ ਕਰਨ ਵਾਸਤੇ ਆਉਣ ਵਾਲੇ ਅਕਾਲੀ-ਭਾਜਪਾ ਆਗੂਆਂ ਦਾ ਕਾਲੀਆਂ ਝੰਡੀਆਂ ਨਾਲ ਵਿਖਾਵਾ ਕਰਕੇ ਪਿੰਡਾਂ ਵਿੱਚ ਵੜ੍ਹਣ ਤੋਂ ਵਰਜਿਆ ਜਾਵੇਗਾ।

ਧਰਨੇ ਨੂੰ ਸੰਬੋਧਨ ਕਰਦਿਆਂ ਕਿਸਾਨ ਆਗੂ ਗੁਰਭਗਤ ਸਿੰਘ ਭਲਾਈਆਣਾ, ਮਾਸਟਰ ਗੁਰਾਂਦਿੱਤਾ ਸਿੰਘ ਭਾਗਸਰ, ਪਿਆਰਾ ਸਿੰਘ ਮਦਰਸਾ, ਸੁਖਰਾਜ ਸਿੰਘ ਰਹੂੜਿਆਂ ਵਾਲੀ ਅਤੇ ਮਜ਼ਦੂਰ ਆਗੂ ਤਰਸੇਮ ਸਿੰਘ ਖੁੰਡੇ ਹਲਾਲ, ਕਾਲਾ ਸਿੰਘ ਖੁੰਡੇ ਹਲਾਲ, ਰਾਜਾ ਸਿੰਘ, ਗੁਰਜੰਟ ਸਿੰਘ ਹੋਰਾਂ ਨੇ ਕਿਹਾ ਕਿ ਪੰਜਾਬ ਸਰਕਾਰ ਨੇ ਜਥੇਬੰਦੀਆਂ ਨਾਲ ਕਈ ਵਾਰ ਬੈਠਕਾਂ ਕੀਤੀਆਂ ਹਨ, ਲਿਖਤੀ ਸਮਝੋਤੇ ਕੀਤੇ ਹਨ ਪਰ ਇਨ੍ਹਾਂ ਨੂੰ ਲਾਗੂ ਕਰਨ ਤੋਂ ਅਕਸਰ ਟਾਲਾ ਵੱਟ ਲੈਂਦੀ ਹੈ।

ਉਨ੍ਹਾਂ ਕਿਹਾ ਕਿ ਮੋਜੂਦ ਧਰਨੇ ਦੌਰਾਨ ਖੁਦਕਸ਼ੀ ਪੀੜਤਾਂ ਲਈ ਮੁਆਵਜ਼ੇ ਦੀ ਮੁਕੰਮਲ ਸਰਵਾ ਕਰਕੇ ਮੁਆਵਜ਼ਾ ਰਾਸ਼ੀ ਦੀ ਵੰਡ ਕਰਨ, ਲੋੜਵੰਦ ਤੇ ਬੇਘਰੇ ਮਜ਼ਦੂਰ ਪਰਿਵਾਰਾਂ ਨੂੰ ਅਲਾਟ ਕੀਤੇ ਪਲਾਟਾਂ ਦਾ ਕਬਜ਼ਾ ਦੇਣ, ਰਹਿੰਦੇ ਪਰਿਵਾਰਾਂ ਲਈ ਮਤੇ ਪਾਉਣੇ, ਪਿੰਡ ਗੋਬਿੰਦਪੁਰਾ ਦੇ ਉਜਾੜੇ ਮੂੰਹ ਆਏ ਮਜ਼ਦੂਰ ਪਰਿਵਾਰਾਂ ਨੂੰ ਦਿੱਤੀ ਜਾਣ ਵਾਲੀ ਮੁਆਵਜ਼ਾ ਰਾਸ਼ੀ ਜਾਰੀ ਕਰਨ ਅਤੇ ਕਰਜ਼ਾ ਕਾਨੂੰਨ ਲਾਗੂ ਕਰਨਾ ਸ਼ਾਮਲ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ ਲੋਕਾਂ ਨੂੰ ਭਰਮਾ ਕੇ ਵੋਟਾਂ ਹਾਸਲ ਕਰ ਲਈਆਂ ਜਾਂਦੀਆਂ ਹਨ ਤੇ ਫੇਰ  ਉਨ੍ਹਾਂ ਦੀ ਸਾਰ ਨਹੀਂ ਲਈ ਜਾਂਦੀ ਇਸ ਲਈ ਹੁਣ ਲੋਕ ਵੀ ਉਨ੍ਹਾਂ ਨੂੰ ਸਿਆਸੀ ਤਰੀਕੇ ਨਾਲ ਮਾਤ ਦੇਣਗੇ। ਪਿੰਡਾਂ ਵਿੱਚ ਅਕਾਲੀ ਆਗੂਆਂ ਨੂੰ ਵੜਣ ਤੋਂ ਅਤੇ ਚੋਣ ਬੈਠਕਾਂ ਕਰਨ ਤੋਂ ਰੋਕਿਆ ਜਾਵੇਗਾ।

      ਘਿਰਾਓ ਕੀਤੇ ਜਾਣ ਸਮੇਂ ਡਿਪਟੀ ਕਮਿਸ਼ਨਰ ਸਣੇ ਹੋਰ ਅਧਿਕਾਰੀ ਦਫਤਰ ਵਿਚ ਸਨ ਤੇ ਦੇਰ ਸ਼ਾਮ ਤੱਕ ਉਹ ਬਾਹਰ ਨਹੀਂ ਸਨ ਨਿਕਲੇ। ਇਸ ਦੌਰਾਨ ਥਾਨਾ ਸਦਰ ਦੇ ਪੁਲੀਸ ਮੁਖੀ ਇਕਬਾਲ ਸਿੰਘ ਦੀ ਅਗਵਾਈ ਹੇਠ ਪੁਲੀਸ ਫੋਰਸ ਲਾਗਾਤਾਰ ਤਾਇਨਾਤ ਹੈ।

'ਜਮਹੂਰੀਅਤ' ਦਾ ਜਲੂਸ

 'ਜਮਹੂਰੀਅਤ' ਦਾ ਜਲੂਸ

ਧੱਕੜ ਰਾਜ ਦੀ ਧੱਕੜ ਪਾਰਲੀਮੈਂਟ ਦੇ ਧਾਕੜ ਨੁਮਾਇੰਦੇ

Pepper spray in Lok Sabha

MLA's fighting in J&K Assembly

MP affected by pepper spray

      ਨਕਲੀ ਆਜ਼ਾਦੀ, ਝੂਠੀ ਜਮਹੂਰੀਅਤ ਤੇ ਅਖੌਤੀ ਵਿਕਾਸ ਦੇ ਘੱਟੇ ਦੀ ਧੂੜ ਪਲੇ ਪਲੇ ਲੋਕਾਂ ਦੇ ਅੱਖੀਂ ਪਾ ਕੇ ਮੁਲਕ ਦੇ ਰਾਜ ਦੇ ਲੁਟੇਰੇ ਤੇ ਧੱਕੜ ਕਿਰਦਾਰ ਨੂੰ ਪਿਛਲੇ 64 ਸਾਲਾਂ ਤੋਂ ਜਮਹੂਰੀਅਤ ਦੇ ਛਲਾਵੇ ਨਾਲ ਢਕਦੇ ਆ ਰਹੇ ਇਸ ਦੇ ਨੁਮਾਇੰਦਿਆਂ ਨੇ (ਸਾਂਸਦਾਂ ਨੇ), ਰੂਸੀ ਇਨਕਲਾਬ ਦੇ ਸਿਧਾਂਤਕਾਰ ਵਲਾਦੀਮੀਰ ਇਲੀਅਚ ਲੈਨਿਨ ਦੁਆਰਾ ਕਹੇ ਗਏ “ਸੂਰਾਂ ਦੇ ਵਾੜੇ” ਵਿਚ,  ਪਾਰਲੀਮੈਂਟ ਵਿਚ ਜਦ ਹੁਣ ਤੇਰਾਂ ਫਰਵਰੀ ਨੂੰ, ਆਪੋ ਵਿਚੀ ਇਕ-ਦੂਜੇ ਦੀਆਂ ਅੱਖਾਂ ਵਿਚ ਮਿਰਚਾਂ ਦੀ ਧੂੜ ਪਾਈ ਤਾਂ ਇਸ ਲੋਕ ਵੈਰੀ ਰਾਜ ਦੀਆਂ 'ਬਰਕਤਾਂ' ਮਾਣ ਰਹੇ ਇਸ ਦੇ ਸਭ ਖੈਰ-ਖੁਆਹਾਂ ਦੀਆਂ ਭੁੱਬਾਂ ਨਿਕਲ ਗਈਆਂ। ਸਾਹ ਸੂਤੇ ਗਏ। ਹੋਸ਼ ਉੱਡ ਗਏ। ਪਾਰਲੀਮਾਨੀ ਛਲਾਵੇ ਦੇ ਬੇਪਰਦ ਹੋ ਜਾਣ ਤੋਂ ਤ੍ਰਹਿੰਦਿਆਂ ਨੇ ਇਕ ਦੂਜੇ ਨੂੰ ਸ਼ਾਂਤ ਰਹਿਣ ਤੇ ਸ਼ਾਂਤੀ ਬਣਾਈ ਰੱਖਣ ਦੀਆਂ ਅਪੀਲਾਂ ਕੀਤੀਆਂ। ਕਈ ਡਰੂ ਦਾਖਲ ਹੋਣ ਵੇਲੇ ਤਲਾਸ਼ੀ ਲਏ ਜਾਣ ਨੂੰ ਯਕੀਨੀ ਬਣਾਉਣ ਦੀ ਗੱਲ ਕਹਿ ਕੇ ਆਵਦੇ ਮਨ ਦੇ ਪਾਲੇ ਦੀ ਚੁਗਲੀ ਕਰ ਬੈਠੇ ਹਨ ਕਿ ਬਚ ਗਏ, ਜੇ ਕਿਤੇ ਡੱਬਾਂ ਵਿਚੋਂ ਵੈਬਲੇ ਸਕਾਟ ਨਿਕਲ ਪੈਂਦੇ, ਫਿਰ ਪਤਾ ਨਹੀਂ ਕਿੰਨਿਆਂ ਦੀਆਂ ਫੋਟੋਆਂ ਉਤੇ ਹਾਰ ਪਾਉਣੇ ਪੈਂਦੇ? ਹਾਂ, ਆਹ ਜਲੂਸ ਨਿਕਲਣ ਦਾ ਇਸ ਲਾਣੇ ਦੇ ਉਸ ਹਿੱਸੇ ਨੂੰ ਪਹਿਲਾਂ ਹੀ ਪਤਾ ਹੋਣਾ, ਜਿਸਨੇ ਮੁਲਕ ਦੇ ਜਗੀਰਦਾਰੀ ਸਮਾਜਿਕ ਨਿਜ਼ਾਮ ਦੇ ਗੋਲ ਸੱਲ੍ਹ ਵਿਚ ਇਸ ਪਾਰਲੀਮਾਨੀ ਜਮਹੂਰੀਅਤ ਦੇ ਛਲਾਵੇ ਦੀ ਚੌਰਸ ਗਿੱਟੀ ਠੋਕੀ ਹੈ।

ਇਹ ਨਾ ਪਹਿਲੀ ਤੇ ਨਾ ਨਵੀਂ ਘਟਨਾ ਹੈ। ਇਸ ਪਾਰਲੀਮੈਂਟ ਅੰਦਰ ਹੀ ਨਹੀਂ, ਰਾਜ ਵਿਧਾਨ ਸਭਾਵਾਂ ਅੰਦਰ ਵੀ, ਇਹਨਾਂ ਦੇ ਬਣਨ ਵੇਲੇ ਤੋਂ ਹੀ ਲਗਾਤਾਰ ਏਹੀ ਜੂਤ ਪਤਾਣ ਹੁੰਦਾ ਆ ਰਿਹਾ ਹੈ। ਮਾਈਕ ਤੋੜ ਤੋੜ ਡਲਿਆਂ ਵਾਂਗ ਇਕ ਦੂਜੇ ਵੱਲ ਵਰਾਉਣੇ, ਸੈਂਡਲਾਂ ਥੱਪੜਾਂ ਦੇ ਕੜਾਕੇ, ਆਮ ਵਰਤਾਰਾ ਹੈ। ਨਾ ਸਿਰਫ ਇਹਨਾਂ ਧਾਕੜ ਨੁਮਾਇੰਦਿਆਂ ਦੀਆਂ ਕਾਰਵਾਈਆਂ ਕਰਤੂਤਾਂ ਕਰਕੇ ਹੀ, ਸਗੋਂ ਇਹਨਾਂ ਪਾਰਲੀਮਾਨੀ ਸੰਸਥਾਵਾਂ ਅੰਦਰੋਂ ਪਾਸ ਹੋ ਹੋ ਆ ਰਹੀਆਂ ਨੀਤੀਆਂ ਤੇ ਕਨੂੰਨ ਇਹਨਾਂ ਦੀ ਲੋਕ ਤੇ ਮੁਲਕ ਦੋਖੀ ਹਕੀਕਤ ਨੂੰ ਜੱਗ ਜ਼ਾਹਰ ਕਰਦੇ ਰਹਿੰਦੇ ਹਨ। 

ਲੋਕ ਮੋਰਚਾ ਪੰਜਾਬ, ਪਹਿਲਾਂ ਤੋਂ ਹੀ ਇਸ ਝੂਠੀ ਜਮਹੂਰੀਅਤ ਦੇ ਢਕਵੰਜ - ਪਾਰਲੀਮੈਂਟ ਤੇ ਰਾਜ ਵਿਧਾਨ ਸਭਾਵਾਂ ਦੇ ਲੋਕ ਦੋਖੀ ਤੇ ਮੁਲਕ ਦੋਖੀ ਕਿਰਦਾਰ ਨੂੰ ਬੇਪਰਦ ਕਰਦਾ ਆ ਰਿਹਾ ਹੈ। ਇਹ ਅਖੌਤੀ ਅਦਾਰੇ, ਵੱਡੇ ਪੂੰਜੀਪਤੀਆਂ, ਜਗੀਰਦਾਰਾਂ ਤੇ ਸਾਮਰਾਜੀਆਂ ਵੱਲੋਂ ਲੋਕਾਂ ਦੀ ਤੇ ਮੁਲਕ ਦੀ ਕੀਤੀ ਜਾ ਰਹੀ ਲੁੱਟ ਨੂੰ ਕਨੂੰਨੀ ਬਾਣਾ ਪਹਿਨਾਏ ਜਾਣ ਵਾਲੀ ਬੁਟੀਕ ਹਨ। ਇਹ ਲੋਕਾਂ ਕੋਲੋਂ ਜਲ, ਜੰਗਲ, ਜਮੀਨਾਂ, ਸਰਕਾਰੀ ਰੈਗੂਲਰ ਰੁਜ਼ਗਾਰ ਖੋਹ ਲੈਣ ਵਾਲੇ ਵੱਡੇ ਝਬੁੱਟਮਾਰ ਹਨ। ਇਹ ਗਰੀਬੀ, ਕੰਗਾਲੀ, ਬੇਰੁਜ਼ਗਾਰੀ ਤੇ ਮਹਿੰਗਾਈ ਵਧਾਉਣ ਵਾਲੇ ਜਰਾਸੀਮਾਂ ਵਾਲਾ ਸੜਿਆਂਦ ਮਾਰਦਾ ਗੰਦਾ ਛੱਪੜ ਹਨ। ਇਹ ਸਿੱਖਿਆ, ਸੇਹਤ, ਬਿਜਲੀ, ਪਾਣੀ, ਆਵਾਜਾਈ ਮਹਿੰਗੀ ਕਰਨ ਵਾਲੇ ਲੁੱਟ ਦੀ ਦੁਕਾਨ ਹਨ। ਇਹ ਲੋਕਾਂ ਦੀ ਹੱਕ, ਸੱਚ, ਇਨਸਾਫ ਦੀ ਆਵਾਜ਼ ਦਾ ਗਲਾ ਘੁੱਟਣ, ਜਨਤਕ ਰੋਸ ਪ੍ਰਗਟਾਵਿਆਂ 'ਤੇ ਪਾਬੰਦੀਆਂ ਲਾਉਣ, ਹੱਕਾਂ ਲਈ ਸੰਘਰਸ਼ ਕਰਦੇ ਲੋਕਾਂ ਨੂੰ ਝੂਠੇ ਕੇਸਾਂ ਤਹਿਤ ਜੇਲ੍ਹੀਂ ਡੱਕਣ, ਉੱਤਰ ਪੂਰਬ ਦੇ ਸੂਬਿਆਂ ਸਮੇਤ ਜੰਮੂ ਕਸ਼ਮੀਰ ਦੇ ਲੋਕਾਂ ਦੀ ਆਜ਼ਾਦੀ ਦੀ ਲੜਾਈ 'ਤੇ ਅੰਨ੍ਹਾ ਜਬਰ ਢਾਹੁਣ, ਔਰਤਾਂ ਨਾਲ ਬਲਾਤਕਾਰ ਕਰਨ, ਮਾਰ-ਖਪਾ ਦੇਣ ਵਾਲੇ ਅਫਸਪਾ (AFSPA) ਵਰਗੇ ਕਾਲੇ ਕਨੂੰਨ ਘੜਨ ਤੇ ਮੜਨ, ਜਲ, ਜੰਗਲ, ਜਮੀਨ ਖੋਹੇ ਜਾਣ ਖਿਲਾਫ਼ ਜੂਝ ਰਹੇ ਜੰਗਲ ਵਾਸੀਆਂ ਉਤੇ ਹਵਾਈ ਤੇ ਡਰੋਨ ਹਮਲੇ ਕਰਨ ਦੀ ਕਤਲਗਾਹ ਹਨ। ਸਾਮਰਾਜੀਆਂ ਨੂੰ ਮੁਲਕ ਲੁੱਟਣ ਚੂੰਡਣ ਦੇ ਨਿਓਤੇ ਦੇ ਕੇ ਸੁਆਗਤ ਕਰਨ ਵਾਲਾ ਸੁਆਗਤੀ ਦਰਵਾਜ਼ਾ ਹਨ। ਇਹ, ਸੱਟੇਬਾਜਾਂ, ਕਾਤਲਾਂ, ਬਲਾਤਕਾਰੀਆਂ, ਚੋਰਾਂ, ਡਾਕੂਆਂ ਦੀ ਵਧੀਆ ਵੱਡੀ ਛੁਪਣਗਾਹ ਹਨ।

ਏਸੇ ਕਰਕੇ ਲੋਕ ਮੋਰਚਾ ਪੰਜਾਬ, ਆਪਣੇ ਪਿਆਰੇ ਲੋਕਾਂ ਨੂੰ ਸੱਦਾ ਦਿੰਦਾ ਆ ਰਿਹਾ ਹੈ ਕਿ ਇਹਨਾਂ ਅਦਾਰਿਆਂ ਤੋਂ ਭਲੇ ਦੀ ਝਾਕ ਛੱਡੋ। ਮੂਹਰੇ ਆ ਰਹੀਆਂ ਪਾਰਲੀਮੈਂਟ ਦੀਆਂ ਚੋਣਾਂ ਤੋਂ ਭਲੇ ਦੀ ਆਸ ਬੰਨਾਉਣਾ ਚਾਹੁੰਦਿਆਂ ਨੂੰ ਲੋਕ-ਸੱਥ ਦੇ ਚੁਰਾਹਿਆਂ ਵਿਚ ਛੰਡੋ। ਗਦਰੀ ਬਾਬਿਆਂ, ਭਗਤ-ਸਰਾਭਿਆਂ ਦੇ ਇਨਕਲਾਬੀ ਰਾਹ ਦੇ ਰਾਹੀ ਬਣ ਕੇ ਜਥੇਬੰਦ ਜੁਝਾਰੂ ਲੋਕ-ਲਹਿਰ ਮਜਬੂਤ ਕਰੋ। ਸੰਘਰਸ਼ਾਂ ਦੇ ਅਖਾੜੇ ਭਖਾਓ। ਮੌਜੂਦਾ ਲੁਟੇਰੇ ਤੇ ਜਾਬਰ ਰਾਜ ਪ੍ਰਬੰਧ ਨੂੰ ਬਦਲ ਕੇ ਲੋਕ-ਪੱਖੀ ਖਰਾ ਜਮਹੂਰੀ ਰਾਜ ਤੇ ਸਮਾਜ ਉਸਾਰਨ ਲਈ ਅੱਗੇ ਵਧੋ। ਇਨਕਲਾਬ-ਜਿੰਦਾਬਾਦ ਦੇ ਨਾਹਰੇ ਗੂੰਜਾਓ।

ਜਗਮੇਲ ਸਿੰਘ ਜਨਰਲ ਸਕੱਤਰ, ਲੋਕ ਮੋਰਚਾ ਪੰਜਾਬ

9417224822                (15.02.2014)

ਕਿਸਾਨਾਂ - ਮਜ਼ਦੂਰਾਂ ਦੇ ਜਬਰਦਸਤ ਐਕਸ਼ਨ ਅੱਗੇ ਸਰਕਾਰ ਨੇ ਗੋਡੇ ਟੇਕੇ ਮੰਨੀਆਂ ਮੰਗਾਂ ਤੁਰੰਤ ਲਾਗੂ ਕਰਨ ਦਾ ਐਲਾਨ

ਕਿਸਾਨਾਂ - ਮਜ਼ਦੂਰਾਂ ਦੇ ਜਬਰਦਸਤ ਐਕਸ਼ਨ ਅੱਗੇ ਸਰਕਾਰ ਨੇ ਗੋਡੇ ਟੇਕੇ

ਮੰਨੀਆਂ ਮੰਗਾਂ ਤੁਰੰਤ ਲਾਗੂ ਕਰਨ ਦਾ ਐਲਾਨ

 

Farmers & Agri-labourers sitting on dharna before the main gate of Mini-Secretariat Bathinda. All three gates of Mini-Secretariat complex were massively blockaded.

DC & SSP Bathinda announcing acceptance of struggling peoples' demands

Joginder Singh Ugrahan, President BKUU addressing the agitators

ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) ਅਤੇ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਵੱਲੋਂ ਅੱਜ ਸਵੇਰੇ ਮਿੰਨੀ ਸਕੱਤਰੇਤ ਦਾ ਮੁਕੰਮਲ ਘੇਰਾਓ ਕਰਕੇ ਕੱਲ੍ਹ ਸ਼ਾਮ 5 ਵਜੇ ਤੱਕ ਜਾਰੀ ਰੱਖਣ ਅਤੇ 23 ਫਰਵਰੀ ਨੂੰ ਮੋਦੀ ਦੀ ਜਗਰਾਓ ਰੈਲੀ ਦਾ ਬਾਈਕਾਟ ਕਰਵਾਉਣ ਲਈ ਪਿੰਡਾਂ ਵਿੱਚ ਮੁਹਿੰਮ ਵਿੱਢਣ ਅਤੇ 23 ਨੂੰ ਹੀ ਨਰਿੰਦਰ ਮੋਦੀ ਤੇ ਪ੍ਰਕਾਸ਼ ਸਿੰਘ ਬਾਦਲ ਦੇ ਪੁਤਲੇ ਫੂਕਣ ਦੇ ਕੀਤੇ ਜਬਰਦਸਤ ਐਲਾਨ ਤੋਂ ਬਾਅਦ ਸਰਕਾਰ ਤੇ ਪ੍ਰਸਾਸ਼ਨ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ ਅਤੇ ਅੰਤ ਸਰਕਾਰ ਨੂੰ ਕਿਸਾਨ ਮਜ਼ਦੂਰ ਰੋਹ ਅੱਗੇ ਗੋਡੇ ਟੇਕਦਿਆਂ ਮੰਨੀਆਂ ਮੰਗਾਂ ਤੁਰੰਤ ਲਾਗੂ ਕਰਨ ਲਈ ਮਜਬੂਰ ਕਰ ਦਿੱਤਾ।

ਦੁਪਹਿਰ ਬਾਰਾਂ ਵਜੇ ਡਿਪਟੀ ਕਮਿਸ਼ਨਰ ਬਠਿੰਡਾ, ਸੀਨੀਅਰ ਪੁਲਿਸ ਕਪਤਾਨ ਬਠਿੰਡਾ ਵੱਲੋਂ ਚੰਡੀਗੜ੍ਹ ਤੋਂ ਮਿਲੇ ਹੁਕਮਾਂ ਉਪਰੰਤ ਕਿਸਾਨ ਮਜ਼ਦੂਰ ਆਗੂਆਂ ਨਾਲ ਮੀਟਿੰਗ ਕਰਕੇ ਪਿਛਲੇ ਕਈ ਦਿਨਾਂ ਤੋਂ ਜਿਹਨਾਂ ਮੰਗਾਂ 'ਤੇ ਅੜੀ ਕੀਤੀ ਹੋਈ ਸੀ, ਉਹ ਲਾਗੂ ਕਰਨ ਦਾ ਐਲਾਨ ਕਰ ਦਿੱਤਾ। ਕਿਸਾਨ ਆਗੂ ਝੰਡਾ ਸਿੰਘ ਜੇਠੂਕੇ ਤੇ ਖੇਤ ਮਜ਼ਦੂਰ ਆਗੂ ਲਛਮਣ ਸਿੰਘ ਸੇਵੇਵਾਲਾ 'ਤੇ ਆਧਾਰਤ ਜਥੇਬੰਦੀਆਂ ਦੇ ਵਫਦ ਨਾਲ ਹੋਈ ਮੀਟਿੰਗ ਵਿੱਚ ਸਰਕਾਰ ਦੀ ਤਰਫੋਂ ਉਹਨਾਂ ਮੰਨਿਆ ਕਿ ਸਰਕਾਰੀ ਸਰਵੇ ਵਿੱਚ ਸ਼ਾਮਲ 4800 ਖੁਦਕੁਸ਼ੀ ਪੀੜਤਾਂ ਦਾ ਰਹਿੰਦਾ ਸਾਰਾ ਬਕਾਇਆ ਅਤੇ ਗੋਬਿੰਦਪੁਰਾ ਵਿੱਚ ਰੁਜ਼ਗਾਰ ਉਜਾੜੇ ਦਾ ਸ਼ਿਕਾਰ ਹੋਏ 200 ਤੋਂ ਉੱਪਰ ਬੇਜ਼ਮੀਨੇ ਮਜ਼ਦੂਰਾਂ ਨੂੰ 6 ਕਰੋੜ ਰੁਪਏ ਦਾ ਮੁਆਵਜਾ ਤੁਰੰਤ ਜਾਰੀ ਕਰਕੇ 21 ਫਰਵਰੀ ਤੋਂ ਇਸਦੀ ਵੰਡ ਕੀਤੀ ਜਾਵੇਗੀ ਅਤੇ ਖੇਤ ਮਜ਼ਦੂਰਾਂ ਨੂੰ ਅਲਾਟ ਕੀਤੇ ਗਏ ਪਲਾਟਾਂ ਦਾ ਹਫਤੇ ਦੇ ਅੰਦਰ ਅੰਦਰ ਕਬਜ਼ਾ ਦੇ ਦਿੱਤਾ ਜਾਵੇਗਾ। ਇਸ ਸਬੰਧੀ ਲਿਖਤੀ ਵਚਨ ਦੇਣ ਤੋਂ ਇਲਾਵਾ ਡਿਪਟੀ ਕਮਿਸ਼ਨਰ ਬਠਿੰਡਾ ਵੱਲੋਂ ਇਕੱਠ ਵਿੱਚ ਆ ਕੇ ਐਲਾਨ ਕੀਤਾ ਗਿਆ।

ਦੂਜੇ ਪਾਸੇ ਬੀ.ਕੇ.ਯੂ. ਏਕਤਾ ਦੇ ਸੂਬਾ ਪ੍ਰਧਾਨ ਜੋਗਿੰਦਰ ਸਿੰਘ ਉਗਰਾਹਾਂ, ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਸੂਬਾ ਪ੍ਰਧਾਨ ਜੋਰਾ ਸਿੰਘ ਨਸਰਾਲੀ ਤੇ ਸੁਖਦੇਵ ਸਿੰਘ ਕੋਕਰੀ ਕਲਾਂ ਨੇ ਇਸ ਨੂੰ ਲੋਕ ਤਾਕਤ ਦੀ ਜਿੱਤ ਕਰਾਰ ਦਿੰਦਿਆਂ ਐਲਾਨ ਕੀਤਾ ਕਿ ਕੀਤੇ ਗਏ ਸਮਝੌਤੇ ਨੂੰ ਸਿਰੇ ਚੜ੍ਹਾਉਣ ਦੇ ਲਈ ਕਿਸਾਨ ਤੇ ਖੇਤ ਮਜ਼ਦੂਰਾਂ ਦੇ ਸੰਕੇਤਕ ਇਕੱਠ ਜੋ ਸੈਂਕੜਿਆਂ ਵਿੱਚ ਹੋਵੇਗਾ ਬਠਿੰਡੇ ਵਿੱਚ ਡਟਿਆ ਰਹੇਗਾ। ਵਰਨਣਯੋਗ ਹੈ ਕਿ ਕੱਲ੍ਹ ਮੁੱਖ ਮੰਤਰੀ ਦੇ ਪ੍ਰਿੰਸੀਪਲ ਸਕੱਤਰ ਐਸ.ਕੇ. ਸੰਧੂ ਵੱਲੋਂ ਚੰਡੀਗੜ੍ਹ ਵਿੱਚ ਅਤੇ ਇਸ ਤੋਂ ਪਹਿਲਾਂ 14 ਫਰਵਰੀ ਨੂੰ ਜ਼ਿਲ੍ਹਾ ਪ੍ਰਸਾਸ਼ਨ ਵੱਲੋਂ ਜਥੇਬੰਦੀਆਂ ਨਾਲ ਕੀਤੀ ਮੀਟਿੰਗ ਸਮੇਂ ਇਹ ਸਾਰੀ ਰਾਸ਼ੀ ਜੋ ਕਰੀਬ 70 ਕਰੋੜ ਬਣਦੀ ਹੈ, ਇੱਕਦਮ ਜਾਰੀ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ ਪਰ ਕਿਸਾਨਾਂ ਮਜ਼ਦੂਰਾਂ ਦੇ ਸਖਤ ਐਕਸ਼ਨ ਅਤੇ ਲੰਮੇ ਘੋਲ ਦੇ ਐਲਾਨ ਨੇ ਆਖਰ ਸਰਕਾਰ ਨੂੰ ਸਮਝੌਤਾ ਕਰਨ ਲਈ ਮਜਬੂਰ ਕਰ ਦਿੱਤਾ।

ਕਿਸਾਨ ਮਜ਼ਦੂਰ ਆਗੂਆਂ ਨੇ ਦੱਸਿਆ ਕਿ ਅੱਜ ਦੇ ਫੈਸਲੇ ਤੋਂ ਇਲਾਵਾ ਕੱਲ੍ਹ ਚੰਡੀਗੜ੍ਹ ਵਿੱਚ ਹੋਈ ਮੀਟਿੰਗ ਸਮੇਂ ਕਰਜ਼ਾ ਕਾਨੂੰਨ ਛੇ ਮਹੀਨੇ ਤੋਂ ਪਹਿਲਾਂ ਬਣਾਉਣ, ਕੁਰਕੀਆਂ ਦਾ ਤਹਿਸੀਲਾਂ ਵਿੱਚ ਚੱਲਦਾ ਅਮਲ ਬੰਦ ਕਰਨ, ਸਹਿਕਾਰੀ ਬੈਂਕਾਂ ਵੱਲੋਂ ਮਜ਼ਦੂਰਾਂ ਨੂੰ ਮਿਲਦੇ 25 ਹਜ਼ਾਰ ਰੁਪਏ ਤੇ ਬੈਂਕਾਂ ਵੱਲੋਂ ਮਿਲਦੇ 1 ਲੱਖ ਰੁਪਏ ਦੇ ਕਰਜ਼ੇ 'ਤੇ ਗਾਰੰਟੀ ਦੀ ਸ਼ਰਤ ਖਤਮ ਕਰਨ ਅਤੇ ਖੂਨ ਦੇ ਰਿਸ਼ਤੇ ਵਿੱਚ ਜ਼ਮੀਨ ਤਬਦੀਲ ਕਰਨ ਸਮੇਂ ਲੱਗਦੇ 2 ਫੀਸਦੀ ਅਤੇ 5 ਫੀਸਦੀ ਡਿਊਟੀ ਇੱਕ ਫੀਸਦੀ ਕਰਨ ਦੀ ਮੰਗ ਪ੍ਰਵਾਨ ਕਰ ਲਈ ਸੀ।

ਚੰਡੀਗੜ੍ਹ ਵਿਖੇ ਪ੍ਰਵਾਨ ਹੋਈਆਂ ਮੰਗਾਂ

1.        ਕਰਜ਼ਾ ਕਾਨੂੰਨ ਨੂੰ ਕੈਬਨਿਟ ਦੀ ਸਬ ਕਮੇਟੀ ਵੱਲੋਂ ਪ੍ਰਵਾਨਗੀ ਦੇ ਦਿੱਤੀ ਹੈ ਅਤੇ ਵੱਧ ਤੋਂ ਵੱਧ 6 ਮਹੀਨਿਆਂ ਵਿੱਚ ਕਾਨੂੰਨ ਬਣ ਜਾਵੇਗਾ।

2.         ਕੁਰਕੀਆਂ, ਨਿਲਾਮੀਆਂ ਦਾ ਤਹਿਸੀਲਾਂ ਵਿੱਚ ਚੱਲਦਾ ਅਮਲ ਬੰਦ ਹੋਵੇਗਾ।

3.         ਸਹਿਕਾਰੀ ਬੈਂਕਾਂ ਵੱਲੋਂ ਮਜ਼ਦੂਰਾਂ ਨੂੰ ਮਿਲਦੇ 25 ਹਜ਼ਾਰ ਦੇ ਕਰਜ਼ੇ ਅਤੇ 1 ਲੱਖ ਤੱਕ ਦੇ ਕਰਜ਼ੇ 'ਤੇ ਗਾਰੰਟੀ ਖਤਮ ਹੋਵੇਗੀ। ਇਸ ਦੀ ਬਾਕਾਇਦਾ ਚਿੱਠੀ ਜਾਰੀ ਹੋਵੇਗੀ ਅਤੇ ਜਥੇਬੰਦੀਆਂ ਨੂੰ ਵੀ ਮਿਲੇਗੀ।

4.         ਆਟਾ-ਦਾਲ ਸਕੀਮ ਦਾ ਕੋਟਾ ਜਾਰੀ ਹੋ ਚੁੱਕਾ ਹੈ, ਵੰਡਣਾ ਸ਼ੁਰੂ ਹੋਵੇਗਾ।

5.         ਬਾਪ ਵੱਲੋਂ ਬੱਚਿਆਂ ਦੇ ਨਾਮ ਅਤੇ ਭੈਣਾਂ ਵੱਲੋਂ ਭਰਾਵਾਂ ਦੇ ਨਾਮ ਜ਼ਮੀਨ ਕਰਵਾਉਣ ਸਮੇਂ ਲੱਗਦੀ 2 ਫੀਸਦੀ ਅਤੇ 5 ਫੀਸਦੀ ਡਿਊਟੀ ਹੁਣ ਅੱਗੇ ਤੋਂ 1 ਫੀਸਦੀ ਲੱਗੇਗੀ।

6.         ਮਨਰੇਗਾ ਦੇ ਖੜ੍ਹੇ ਬਕਾਏ ਜਾਰੀ ਹੋਣਗੇ।

7.      ਮਜ਼ਦੂਰ ਘਰਾਂ ਵਿੱਚੋਂ ਪੁੱਟੇ ਗਏ ਮੀਟਰ ਜੋੜਨ ਦੀ ਜੋ ਚਿੱਠੀ ਜਾਰੀ ਹੋ ਚੁੱਕੀ ਹੈ, ਉਹ ਲਾਗੂ ਹੋਵੇਗੀ। ਜਿੱਥੇ ਕਿਤੇ ਅਧਿਕਾਰੀ ਇਉਂ ਨਹੀਂ ਕਰਦੇ, ਉਹਦੇ ਠੋਸ ਕੇਸ ਦੱਸੇ ਜਾਣ, ਤੁਰੰਤ ਕਾਰਵਾਈ ਹੋਵੇਗੀ।

ਦਫਤਰ ਡਿਪਟੀ ਕਮਿਸ਼ਨਰ ਕਮ ਜ਼ਿਲ੍ਹਾ ਮੈਜਿਸਟਰੇਟ, ਬਠਿੰਡਾ ਵੱਲੋਂ ਮੰਨੀਆਂ ਮੰਗਾਂ

ਭਾਰਤੀ ਕਿਸਾਨ ਯੂਨੀਅਨ (ਏਕਤਾ-ਉਗਰਾਹਾਂ), ਖੇਤ ਮਜ਼ਦੂਰ ਯੂਨੀਅਨ ਅਤੇ ਇਹਨਾਂ ਦੀਆਂ ਕੁਝ ਸਹਿਯੋਗੀ ਸੰਸਥਾਵਾਂ ਵੱਲੋਂ ਬਠਿੰਡਾ ਵਿਖੇ ਮਿਤੀ 12-2-2014 ਤੋਂ ਆਪਣੀਆਂ ਮੰਗਾਂ ਨੂੰ ਲੈ ਕੇ ਰੋਸ ਪ੍ਰਦਰਸ਼ਨ ਕੀਤਾ ਜਾ ਰਿਹਾ ਹੈ। ਇਹਨਾਂ ਦੀ ਮਾਨਯੋਗ ਪ੍ਰਮੁੱਖ ਸਕੱਤਰ, ਮੁੱਖ ਮੰਤਰੀ ਪੰਜਾਬ, ਜੀ ਨਾਲ ਹੋਈ ਮੀਟਿੰਗ ਅਤੇ ਗੱਲਬਾਤ ਅਨੁਸਾਰ ਹੇਠ ਲਿਖੇ ਫੈਸਲੇ ਲਏ ਗਏ ਹਨ:-

1.        ਕਰਜ਼ੇ ਦੇ ਕਾਰਨ ਖੁਦਕੁਸ਼ੀ ਕਰਨ ਵਾਲੇ ਕਿਸਾਨਾਂ ਦੇ ਪਰਿਵਾਰਾਂ, ਜਿਹਨਾਂ ਦੀ ਸ਼ਨਾਖਤ ਪਹਿਲਾਂ ਹੀ ਕੀਤੀ ਜਾ ਚੁੱਕੀ ਹੈ, ਨੂੰ ਉਹਨਾਂ ਦਾ ਬਣਦਾ ਪੂਰਾ ਮੁਆਵਜਾ ਰਾਜ ਸਰਕਾਰ ਵੱਲੋਂ ਮਿਤੀ 20-2-2014 ਤੱਕ ਸਬੰਧਤ ਡਿਪਟੀ ਕਮਿਸ਼ਨਰਾਂ ਨੂੰ ਭੇਜਿਆ ਜਾਵੇਗਾ ਅਤੇ ਡਿਪਟੀ ਕਮਿਸ਼ਨਰਾਂ ਵੱਲੋਂ ਇਹ ਮੁਆਵਜਾ ਪ੍ਰਾਪਤ ਹੋਣ ਤੇ ਅਗਲੇ ਤਿੰਨ ਦਿਨਾਂ ਵਿੱਚ ਹਦਾਇਤਾਂ ਅਨੁਸਾਰ ਹਰ ਹਾਲਤ ਵਿੱਚ ਵੰਡ ਦਿੱਤਾ ਜਾਵੇਗਾ। ਇਸ ਤੋਂ ਇਲਾਵਾ ਜਿਹਨਾਂ ਕੇਸਾਂ ਵਿੱਚ ਕਿਸੇ ਕਿਸਮ ਦੀ ਪੜਤਾਲ ਦੀ ਜ਼ਰੂਰਤ ਹੋਵੇਗੀ ਤਾਂ ਇਹ ਪੜਤਾਲਾਂ ਤੁਰੰਤ ਸ਼ੁਰੂ ਕਰ ਦਿੱਤੀਆਂ ਜਾਣਗੀਆਂ।

2.      ਪਿੰਡ ਗੋਬਿੰਦਪੁਰਾ (ਜ਼ਿਲ੍ਹਾ ਮਾਨਸਾ) ਵਿਖੇ ਮਜ਼ਦੂਰਾਂ ਨੂੰ ਦਿੱਤਾ ਜਾਣ ਵਾਲਾ ਬਣਦਾ ਮੁਆਵਜਾ ਵੀ ਸਰਕਾਰ ਵੱਲੋਂ ਮਿਤੀ 20-2-2014 ਤੱਕ ਡਿਪਟੀ ਕਮਿਸ਼ਨਰ ਮਾਨਸਾ ਨੂੰ ਭੇਜ ਦਿੱਤਾ ਜਾਵੇਗਾ।

3.        ਪਿੰਡਾਂ ਅੰਦਰ ਜਿਹਨਾਂ ਯੋਗ ਪਰਿਵਾਰਾਂ ਨੂੰ ਪੰਚਾਇਤਾਂ ਵੱਲੋਂ ਪਹਿਲਾਂ ਹੀ ਪੰਜ ਮਰਲੇ ਦੇ ਪਲਾਟ ਦੇ ਦਿੱਤੇ ਗਏ ਹਨ ਅਤੇ ਜਿਹਨਾਂ ਦੇ ਇੰਤਕਾਲ ਮਨਜੂਰ ਹੋ ਚੁੱਕੇ ਹਨ ਜਾਂ ਸੰਨਦਾਂ ਜਾਰੀ ਕੀਤੀਆਂ ਜਾ ਚੁੱਕੀਆਂ ਹਨ, ਉਹਨਾਂ ਪਰਿਵਾਰਾਂ ਨੂੰ ਸਬੰਧਤ ਡਿਪਟੀ ਕਮਿਸ਼ਨਰਾਂ ਵੱੱਲੋਂ ਹਦਾਇਤਾਂ ਦੀ ਪਾਲਣਾ ਕਰਦੇ ਹੋਏ ਅਜਿਹੇ ਪਲਾਟਾਂ ਦਾ ਕਬਜ਼ਾ ਮਿਤੀ 25-2-2014 ਤੱਕ ਕਰਵਾਇਆ ਜਾਵੇਗਾ।

ਉਪਰੋਕਤ ਮੰਗਾਂ ਮੰਨਣ 'ਤੇ ਸਬੰਧਤ ਕਿਸਾਨ ਜਥੇਬੰਦੀਆਂ ਵੱਲੋਂ ਧਰਨਾ ਵਾਪਸ ਚੁੱਕਣ ਦਾ ਫੈਸਲਾ ਲਿਆ ਗਿਆ।

SOME LESSONS FROM EGS TEACHERS' STRUGGLE -ਨੰਨ੍ਹੀ ਰੂਥ ਦੇ ਕਾਤਲਾਂ ਨੂੰ ਪਛਾਣੋ ਤੇ ਦੁਰਕਾਰੋ

ਨੰਨ੍ਹੀ ਰੂਥ ਦੇ ਕਾਤਲਾਂ ਨੂੰ ਪਛਾਣੋ ਤੇ ਦੁਰਕਾਰੋ

 

VICTORY: Struggling EGS Teachers, who were sitting atop a water-tank at Bathinda, coming down after receiving appointment orders on 17.02.2014

 

14 month old Baby Eknoor Ruth, who died during the struggle of EGS Teachers due to police brutalities

ਪਿਆਰੇ ਲੋਕੋ,

      ਬੇਰੁਜ਼ਗਾਰ ਈ.ਟੀ.ਟੀ.ਅਧਿਆਪਕਾ ਕਿਰਨਜੀਤ ਦੀ ਨੰਨੀ ‘ਏਕਨੂਰ’ (ਰੂਥ) ਰੁਜ਼ਗਾਰ ਲਈ ਸੰਘਰਸ਼ ਕਰ ਰਹੀ ਆਪਣੀ ਮਾਂ ਦੀ ਬੁੱਕਲ ਵਿਚ ਸੁਪਨੇ ਲੈਂਦੀ ਲੈਂਦੀ ਸੁਪਨਾ ਹੋ ਗਈ ਹੈ। ਇਹ ਇਕ ਮਾਂ ਨਾਲ ਵਾਪਰੇ ਭਾਣੇ ਤੱਕ ਸੀਮਤ ਨਹੀਂ ਰਿਹਾ, ਸਭਨਾਂ ਮਾਵਾਂ, ਖਾਸ ਕਰਕੇ ਸੰਘਰਸ਼ ਕਰ ਰਹੀਆਂ ਸਭ ਮਾਵਾਂ ਅਤੇ ਸੰਘਰਸ਼ ਕਰ ਰਹੇ ਸਭਨਾਂ ਦੀਆਂ ਮਾਵਾਂ ਦੇ ਸੀਨੇ ਬਿੰਨ ਗਿਆ ਹੈ। ਨਾ ਸਿਰਫ ਮਾਵਾਂ ਦੇ ਹੀ, ਬਾਪੂਆਂ ਦੇ ਦਿਲਾਂ ਵਿੱਚੋਂ ਵੀ ਹੂਕ ਉੱਠੀ ਹੈ। ਹਰ ਕਿਸੇ ਦਾ ਗੱਚ ਭਰਿਆ ਹੈ। ਬੱਸ ਅੱਡਾ ਬੰਦ ਹੋਣ ਕਾਰਨ ਔਖਿਆਈਆਂ ਝੱਲ ਕੇ ਵੀ ਹਰ ਸਵਾਰੀ ਨੇ ਸੰਘਰਸ਼ ਵਿਚ ਯੋਗਦਾਨ ਪਾਇਆ ਹੈ। ਹਰ ਜਥੇਬੰਦ ਹਿੱਸੇ ਨੇ ਸੰਘਰਸ਼ ਨੂੰ ਹਮੈਤੀ ਕੰਨ੍ਹਾ ਲਾਇਆ ਹੈ।

      ਲੋਕ ਮੋਰਚਾ ਪੰਜਾਬ ਨੇ ਇਸ ਦੁੱਖ ਤੇ ਸੰਘਰਸ਼ ਦੀ ਘੜੀ ਵਿਚ ਸ਼ਰੀਕ ਹੋ ਕੇ ਨੰਨੀ ਰੂਥ ਦੀ ਕੁਰਬਾਨੀ ਨੂੰ ਸਿਜਦਾ ਕੀਤਾ ਹੈ। ਝੰਡਾ ਨਿਵਾਇਆ ਹੈ। ਗਮ ਨੂੰ ਗੁੱਸੇ ਵਿਚ ਬਦਲ ਕੇ ਸੰਘਰਸ਼ਾਂ ਨੂੰ ਤੇਜ਼ ਤੇ ਵਿਸ਼ਾਲ ਕਰਨ ਵਿਚ ਹਿੱਸਾ ਪਾਉਣ ਦਾ ਅਹਿਦ ਕੀਤਾ ਹੈ। ਆਪਣੇ ਪਿਆਰੇ ਲੋਕਾਂ ਨੂੰ, ਜਮਹੂਰੀ ਸ਼ਕਤੀਆਂ ਤੇ ਜਥੇਬੰਦ ਹਿੱਸਿਆਂ ਨੂੰ ਇਸ ਸੰਘਰਸ਼ ਵਿਚ ਹਿੱਸਾ ਪਾਉਣ ਦਾ ਸੱਦਾ ਦਿੱਤਾ ਹੈ।

      ਸਰਕਾਰ, ਉਸਦੇ ਮੰਤਰੀ ਤੇ ਅਧਿਕਾਰੀ ਅੱਜ ਕੁਝ ਵੀ ਕਹਿਣ, ਉਹਨਾਂ ਦੀਆਂ ਸਭ ਸ਼ਤਰੰਜੀਚਾਲਾਂ ਦੀ ਕੜੀ, ਉਹਨਾਂ ਦੇ ਚੁੱਲੇ ਵਿਚ ਹੀ ਮੁਧ ਚੁੱਕੀ ਹੈ। ਜਿਹੜੇ ਕਹਿੰਦੇ ਸੀ, ਇਹ ਪਾਸ ਨਹੀਂ ਹਨ। ਇਹਨਾਂ ਨੂੰ ਰੁਜ਼ਗਾਰ ਨਹੀਂ ਦਿੱਤਾ ਜਾ ਸਕਦਾ। ਇਹਨਾਂ ਦਾ ਸੰਘਰਸ਼ ਨਿਹੱਕਾ ਹੈ। ਸੰਘਰਸ਼ ਦੇ ਜ਼ੋਰ ਨੇ ਸਭ ਪੁੱਠੇ ਕਰ ਦਿੱਤੇ ਹਨ। ਉਹਨਾਂ ਨੂੰ ਸੱਦ ਕੇ ਮੀਟਿੰਗ ਕਰਕੇ ਸਭ ਕੁਝ ਦੇਣਾ ਪਿਆ ਹੈ। ਰਹਿੰਦੀਆਂ ਕਸਰਾਂ ਪੂਰੀਆਂ ਕਰਾਉਣ ਲਈ ਸੰਘਰਸ਼ ਦਾ ਝੰਡਾ ਚੁੱਕੀ ਰੱਖਣ ਦੇ ਉਹਨਾਂ ਦੇ ਐਲਾਨ ਹਨ।

ਸਰਕਾਰ ਤੇ ਉਸਦੇ ਸਿਵਲ ਤੇ ਪੁਲਸ ਅਧਿਕਾਰੀ ਇਹ ਕੁਝ ਦੇ ਕੇ ਵੀ ਨੰਨੀ ਰੂਥ ਦੀ ਮੌਤ ਦੇ ਦੋਸ਼ਾਂ ਤੋਂ ਬਚ ਨਹੀਂ ਸਕਦੇ। ਏਸੇ ਅਕਾਲੀਭਾਜਪਾ ਸਰਕਾਰ ਨੇ ਟੀਚਰ ਲੱਗਿਆ ਨੂੰ ਸਾਲ 2009 ਵਿਚ ਸੰਘਰਸ਼ ਦੇ ਦਬਾਅ ਹੇਠ ਇਕ ਵਿਸ਼ੇਸ਼ ਯੋਜਨਾ ਤਹਿਤ ਇਹਨਾਂ ਨੂੰ ਈ.ਟੀ.ਟੀ. ਦਾ ਕੋਰਸ ਕਰਵਾਇਆ ਸੀ ਤੇ ਕਿਹਾ ਸੀ ਕਿ ਪਾਸ ਕਰਨ ਵਾਲਿਆਂ ਨੂੰ ਰੈਗੂਲਰ ਰੁਜ਼ਗਾਰ ਦਿੱਤਾ ਜਾਵੇਗਾ। ਸਿੱਖਿਆ ਮੰਤਰੀ ਖੁਦ ਅਖਬਾਰਾਂ (8.2.2014) ਵਿਚ ਮੁੱਖ ਮੰਤਰੀ ਦੇ ਹਵਾਲੇ ਨਾਲ ਇਹੀ ਇਕਬਾਲ ਕਰ ਰਿਹਾ ਹੈ। ਫਿਰ ਹੁਣ ਤੱਕ ਰੁਜ਼ਗਾਰ ਨਾ ਦੇ ਕੇ ਸਰਕਾਰ ਨੇ ਇਹ ਮੁਜਰਮਾਨਾ ਰੋਲ ਨਿਭਾਇਆ ਹੈ। ਇਹ ਅਧਿਆਪਕ ਸਰਕਾਰੀ ਨੀਤੀਆਂ ਦੀ ਦੂਹਰੀ ਮਾਰ ਹੰਢਾਉਂਦੇ ਰਹੇ ਹਨ। ਇਹਨਾਂ ਨੂੰ ਨਾ ਸਿਰਫ ਬੇਰੁਜ਼ਗਾਰੀ ਤੇ ਗਰੀਬੀ ਦਾ ਸੰਤਾਪ ਭੋਗਣਾ ਪਿਆ, ਰੁਜ਼ਗਾਰ ਲਈ ਸੰਘਰਸ਼ ਕਰਦਿਆਂ ਨੂੰ ਅਣਗਿਣਤ ਵਾਰ ਪੁਲਸੀ ਡਾਗਾਂ ਦਾ ਸੇਕ ਵੀ ਹੰਢਾਉਣਾ ਪਿਆ ਹੈ।

ਜਥੇਬੰਦ ਹੋਣ ਤੇ ਰੋਸ ਪ੍ਰਗਟਾਉਣ ਦੇ ਬੁਨਿਆਦੀ ਤੇ ਜਮਹੂਰੀ ਹੱਕ 'ਤੇ ਰੋਕਾਂ ਲਾ ਕੇ ਤੇ ਪਾਬੰਦੀਆਂ ਮੜ ਕੇ ਨਾ ਸਿਰਫ ਜਬਾਨ-ਬੰਦੀ ਕੀਤੀ ਹੈ, ਬੇਰੁਜ਼ਗਾਰੀ ਤੇ ਭੁੱਖ ਦੇ ਮੌਤ ਜਬਾੜਿਆਂ ਵਿਚ ਵੀ ਧੱਕਿਆ ਹੈ ਅਤੇ ਟੈਂਕੀਆਂ 'ਤੇ ਚੜ ਕੇ ਮਰਨ ਲਈ ਮਜਬੂਰ ਵੀ ਕੀਤਾ ਹੈ। ਇੰਦਰਾ ਹਕੂਮਤ (1975) ਦੇ ਪੈੜਾਂ ਵਿੱਚ ਪੈਰ ਧਰਦਿਆਂ ਬਾਦਲ ਹਕੂਮਤ ਨੇ ਪੰਜਾਬ ਵਿਚ ਅਣਐਲਾਨੀ ਐਮਰਜੈਂਸੀ ਲਾਈ ਹੋਈ ਹੈ। ਕਿਸੇ ਗਰੀਬ ਤੇ ਸਾਧਾਰਨ ਬੰਦੇ ਨੂੰ ਸਰਕਾਰ ਕੋਲ ਆਵਦੀ ਗੱਲ ਕਹਿਣ ਦਾ, ਆਵਦਾ ਹੱਕ ਮੰਗਣ ਦਾ ਕੋਈ ਵੀ ਮੌਕਾ ਨਹੀਂ ਦਿੱਤਾ ਜਾ ਰਿਹਾ। ਸੰਗਤ ਦਰਸ਼ਨਾਂ ਦੇ ਢੌਂਗ ਵੇਲੇ ਵੀ ਨਹੀਂ। ਇਹਨਾਂ ਅਧਿਆਪਕਾਂ ਨੂੰ ਟੈਂਟ ਲਾਉਣ ਤੋਂ ਰੋਕਣ, ਟੈਂਟਾਂ ਵਾਲਿਆਂ ਨੂੰ ਟੈਂਟ ਨਾ ਦੇਣ ਲਈ ਤਾੜਨਾ, ਰੋਟੀ-ਚਾਹ ਤੇ ਕੰਬਲ ਰਜਾਈਆਂ ਦੇਣ ਵਾਲਿਆਂ ਨੂੰ ਧਮਕਾਉਣ ਅਤੇ ਇਹਨਾਂ ਉਪਰੋਂ ਰਜਾਈਆਂ ਖਿੱਚ ਕੇ ਲੈ ਜਾਣ ਵਾਲੇ ਪੁਲਸ ਅਧਿਕਾਰੀ ਜੁਰਮ ਦੇ ਭਾਗੀ ਹਨ।

ਨੰਨੀ ਰੂਥ ਦੀ ਮੌਤ ਦਾ ਸਵੇਰੇ ਤਿੰਨ ਵਜੇ ਪਤਾ ਲੱਗ ਜਾਣ ਉਪਰੰਤ ਅਤੇ ਇਹਨਾਂ ਸੰਘਰਸ਼ਸ਼ੀਲ ਅਧਿਆਪਕਾਂ ਵੱਲੋਂ ਰੋਸ ਵਜੋਂ ਸ਼ਾਮ ਤਿੰਨ ਵਜੇ ਬੱਸ ਅੱਡੇ ਮੂਹਰੇ ਸਰਕਾਰ ਦਾ ਸੱਥਰ ਵਿਛਾ ਕੇ ਬੈਠ ਜਾਣ ਤੱਕ ਸਰਕਾਰ ਦੇ ਨੁਮਾਇੰਦਿਆਂ ਦਾ ਸ਼ਹਿਰ ਵਿਚ ਹੀ ਪਾਸਾ ਵੱਟ ਕੇ ਬੋਚ ਕੇ ਘੁੰਮਦੇ ਰਹਿਣਾ, ਅਧਿਕਾਰੀਆਂ ਦਾ ਅਧਿਆਪਕਾਂ ਕੋਲ ਨਾ ਆਉਣਾ ਅਤੇ ਪੁਲਸੀ ਪਲਟਣਾਂ ਆਸਰੇ ਬੱਸ ਅੱਡਾ ਚਲਦਾ ਕਰਾਉਣ ਲਈ ਝਈਆਂ ਲੈਣਾ ਪੀੜਤਾਂ ਨਾਲ ਇਹਨਾਂ ਸਭ ਦੇ ਦੁਸ਼ਮਣਾਨਾ ਰਿਸ਼ਤੇ ਨੂੰ ਹੀ ਜ਼ਾਹਰ ਕਰਦਾ ਹੈ।

ਸੰਘਰਸ਼ ਦੇ ਬਣੇ ਦਬਾਅ ਤੇ ਮੀਡੀਏ ਦੇ ਪ੍ਰਚਾਰ ਮੂਹਰੇ ਬੁਰੀ ਤਰ੍ਹਾਂ ਫਸੀ-ਘਿਰੀ ਬਾਦਲ ਸਰਕਾਰ ਨੂੰ ਬਚਾਉਣ ਲਈ ਆਏ ਸਰਕਾਰ ਦੇ ਮੀਡੀਆ ਸਲਾਹਕਾਰ, ਸਿੱਖਿਆ ਮੰਤਰੀ ਤੇ ਸਿਵਲ ਸਰਜਨ ਬਠਿੰਡਾ ਨੇ ਅਖਬਾਰੀ ਬਿਆਨਾਂ ਰਾਹੀਂ ਨੰਨੀ ਰੂਥ ਦੀ ਮੌਤ ਬਾਰੇ ਹਕੂਮਤੀ ਟਿੱਪਣੀਆਂ ਕਰਕੇ ਆਪਣੇ ਆਪ ਨੂੰ ਦੋਸ਼ੀਆਂ ਦੀ ਕਤਾਰ ਵਿੱਚ ਮੂਹਰੇ ਖੜਾ ਲਿਆ ਹੈ। ਫਰੀਦਕੋਟ ਅਗਵਾ ਕਾਂਡ ਵਿਚ ਘਿਰੀ ਬਾਦਲ ਸਰਕਾਰ ਨੂੰ ਬਚਾਉਣ ਲਈ ਵੀ ਏਸੇ ਮੀਡੀਆ ਸਲਾਹਕਾਰ ਨੇ ਅਗਵਾਕਾਰ ਟੋਲੇ ਦੇ ਪੱਖ ਵਿੱਚ, ਅਗਵਾ ਨਾਬਾਲਗ ਬੱਚੀ ਦੇ ਖਿਲਾਫ ਅਤੇ ਸੰਘਰਸ਼ ਕਰ ਰਹੇ ਲੋਕਾਂ ਨੂੰ ਡਰਾਉਣ ਲਈ ਕੁਫਰ ਤੇ ਕਹਿਰ ਦੀਆਂ ਚੱਲੀਆਂ ਬੇਸ਼ਰਮ ਨਰਦਾਂ ਨੂੰ ਲੋਕਾਂ ਦੇ ਸੰਘਰਸ਼ ਨੇ ਥਾਈਂ ਹੀ ਕੁੱਟ ਧਰਿਆ ਸੀ।

ਸਰਕਾਰ ਅਤੇ ਉਸਦੇ ਸਿਵਲ ਤੇ ਪੁਲਸ ਅਧਿਕਾਰੀਆਂ ਦਾ ਇਹ ਮੁਜਰਮਾਨਾ ਕਿਰਦਾਰ, ਇਥੇ ਚੱਲ ਰਹੇ ਲੁਟੇਰੇ ਤੇ ਜਾਬਰ ਆਰਥਿਕ, ਸਮਾਜਿਕ ਤੇ ਰਾਜਨੀਤਿਕ ਨਿਜ਼ਾਮ ਦੀ ਦੇਣ ਹੈ। ਇਹ ਮੌਜੂਦਾ ਨਿਜ਼ਾਮ, ਜਿੰਨਾ ਕੋਲ ਬਹੁਤੀਆਂ ਜਮੀਨਾਂ ਤੇ ਬਹੁਤੀ ਪੂੰਜੀ ਹੈ, ਉਹਨਾਂ ਮੁੱਠੀ ਭਰ ਵੱਡਿਆਂ ਜਗੀਰਦਾਰਾਂ ਤੇ ਸਰਮਾਏਦਾਰਾਂ ਦਾ ਹੈ। ਇਨਾਂ ਦੀ ਸਾਮਰਾਜੀ ਲੁਟੇਰਿਆਂ ਤੇ ਜਰਵਾਣਿਆਂ ਨਾਲ ਜੋਟੀ ਹੈ।ਨਿਜ਼ਾਮ ਹੁੰਦਾ ਹੀ, ਜਮੀਨਾਂ ਤੇ ਪੂੰਜੀ ਦੀ ਮਾਲਕੀ ਵਾਲਿਆਂ ਦੀ ਮੁੱਠੀ ਵਿਚ ਹੈ। ਇਹਨਾਂ ਜਗੀਰਦਾਰਾਂ ਤੇ ਸਰਮਾਏਦਾਰਾਂ ਨੇ ਲੋਕਾਂ ਨੂੰ ਜਾਤਾਂ, ਧਰਮਾਂ, ਇਲਾਕਿਆਂ ਵਿਚ ਪਾੜ ਕੇ ਰੱਖਣ, ਗਰੀਬ ਤੇ ਬੇਰੁਜ਼ਗਾਰ ਬਣਾਕੇ ਰੱਖਣ, ਸਾਧਨਾਂ ਤੋਂ ਵਾਂਝੇ ਰੱਖਣ, ਹਕੂਮਤੀ ਦਬਸ਼ ਹੇਠ ਰੱਖਣ ਅਤੇ ਇਹਨਾਂ ਸਭ ਉਤੇ ਅਖੌਤੀ ਲੋਕਰਾਜ ਤੇ ਗਣਰਾਜ ਦੇ ਛਲਾਵੇ ਦਾ ਗਿਲਾਫ ਚੜਾ ਕੇ ਰੱਖਣ ਵਾਲੇ ਕਾਨੂੰਨ ਘੜੇ ਤੇ ਮੜੇ ਹੋਏ ਹਨ। ਇਹਨਾਂ ਨੇ ਹੀ ਰਾਜ ਦੇ ਵੱਡੇ ਥੰਮ ਵਿਧਾਨ-ਪਾਲਿਕਾ ਕਾਰਜ-ਪਾਲਿਕਾ ਨਿਆਂ-ਪਾਲਿਕਾ ਖੜੇ ਕੀਤੇ ਹਨ। ਪੁਲਸ-ਫੌਜ਼ ਬਣਾਈ ਹੈ।

ਲੋਕਾਂ ਵਿਚੋਂ ਹੀ ਲੋਕਾਂ 'ਤੇ ਚੌਧਰ ਤੇ ਛਟੀ ਚਲਾਉਣ ਦੇ ਸ਼ੌਕੀਨਾਂ ਦੀਆਂ ਬਣਾਈਆਂ ਸਰਕਾਰਾਂ ਅਤੇ ਅਧਿਕਾਰੀਆਂ ਰਾਹੀਂ ਆਵਦਾ ਲੁੱਟ ਦਾ ਰਾਜ ਚਲਾਉਂਦੇ ਆ ਰਹੇ ਹਨ। ਪੁਲਸਾਂ ਫੌਜਾਂ ਰਾਹੀਂ ਰਾਖੀ ਤੇ ਵਧਾਰਾ ਕਰ ਰਹੇ ਹਨ। ਸਰਕਾਰ ਵਿਚ ਜਾਂ ਕਿਸੇ ਅਹੁਦੇ 'ਤੇ ਵਿਅਕਤੀ ਜਿਹੋ ਜਿਹਾ ਮਰਜੀ ਆ ਜਾਵੇ, ਉਹ ਹਾਕਮਾਂ ਦੇ ਵਿਧੀ-ਵਿਧਾਨ ਅਨੁਸਾਰ ਹੀ ਚੱਲੇਗਾ। 64 ਸਾਲਾਂ ਦਾ ਮੁਲਕ ਦਾ ਅਮਲ ਏਸੇ ਦੀ ਗਵਾਹੀ ਭਰ ਰਿਹਾ ਹੈ। 

1947 ਵੇਲੇ ਮੁਲਕ ਵਿੱਚ ਉੱਠੀ ਸਾਮਰਾਜ ਵਿਰੋਧੀ ਲਹਿਰ ਨੂੰ ਝਕਾਨੀ ਦੇਣ ਲਈ ਅਤੇ 'ਆਵਦੇ ਰਾਜ' ਦਾ ਛਲਾਵਾ ਬਣਿਆ ਰਹਿਣ ਦੇਣ ਲਈ “ਲੋਕ ਭਲਾਈ” ਦੇ ਨਾਂ ਹੇਠ ਦਿੱਤੀਆਂ ਰਿਆਇਤਾਂ ਰਾਹਤਾਂ ਨੂੰ ਛਾਂਗਿਆ ਜਾ ਰਿਹਾ ਹੈ, ਬਹੁਤ ਸਾਰੀਆਂ ਛਾਂਗ ਦਿੱਤੀਆਂ ਗਈਆਂ ਹਨ। ਏਸੇ ਕਰਕੇ ਹੁਣ ਇਥੇ ਸਰਕਾਰ ਭਾਵੇਂ ਅਕਾਲੀ ਪਾਰਟੀ ਦੀ ਹੋਈ, ਭਾਵੇਂ ਕਾਂਗਰਸ ਪਾਰਟੀ ਦੀ ਜਾਂ ਗਵਰਨਰੀ ਰਾਜ ਹੋਇਆ, ਰੁਜਗਾਰ ਚਾਹੁਣ ਵਾਲਿਆਂ ਨੂੰ ਸੰਘਰਸ਼ ਕਰਨਾ ਪੈਂਦਾ ਹੈ ਤੇ ਹਕੂਮਤੀ ਜਬਰ ਝੱਲਣਾ ਪੈਂਦਾ ਹੈ।

ਆਪਣੇ ਦੁੱਖਾਂ ਦਰਦਾਂ ਦੇ ਦੋਖੀ ਤੇ ਦੋਸ਼ੀ ਇਸ ਨਿਜ਼ਾਮ ਨੂੰ ਬਦਲੇ ਬਿਨਾਂ ਲੋਕੋ, ਆਪਣੀ ਹਾਲਤ ਨਹੀਂ ਬਦਲਣੀ। ਲੋਕੀਂ, ਜਿਥੇ ਜਥੇਬੰਦ ਹੋ ਜਾਂਦੇ ਹਨ, ਚੇਤੰਨ ਹੋ ਜਾਂਦੇ ਹਨ, ਵੱਡੀ ਲਾਮਬੰਦੀ ਕਰ ਲੈਂਦੇ ਹਨ, ਇਰਾਦੇ ਦ੍ਰਿੜ ਕਰ ਲੈਂਦੇ ਹਨ ਤੇ ਨਿਰੰਤਰ ਖਾੜਕੂ ਘੋਲਾਂ ਦੇ ਸਵੱਲੜੇ ਰਾਹ ਚੱਲ ਪੈਂਦੇ ਹਨ, ਉਹ ਨਿਜ਼ਾਮ ਬਦਲ ਦਿੰਦੇ ਹਨ। ਆਵਦੀ ਹੋਣੀ ਆਵਦੇ ਹੱਥ ਕਰ ਲੈਂਦੇ ਹਨ। ਇਹੀ ਮੁਕਤੀ ਦਾ ਰਾਹ ਹੈ।

ਲੋਕ ਮੋਰਚਾ ਪੰਜਾਬ ਲੋਕ ਘੋਲਾਂ ਦੇ ਸਦਾ ਹੀ ਅੰਗ ਸੰਗ ਰਹਿੰਦਾ ਹੋਇਆ ਆਪਣੇ ਪਿਆਰੇ ਲੋਕਾਂ ਤੇ ਸੰਘਰਸ਼ਸ਼ੀਲ ਇਹਨਾਂ ਅਧਿਆਪਕਾਂ ਨੂੰ ਹੋਸ਼ਿਆਰ ਖਬਰਦਾਰ ਕਰਦਾ ਹੈ ਕਿ ਘੋਲਾਂ ਵਿਚ ਹਮਾਇਤ ਲੈਣੀ ਬੜੀ ਜ਼ਰੂਰੀ ਹੁੰਦੀ ਹੈ ਪਰ ਚੌਕਸ ਨਿਗਾਹ ਰੱਖਣ ਦੀ ਲੋੜ ਹੈ। ਅੱਜ ਕੱਲ੍ਹ ਵੋਟਾਂ ਡੁੰਗਣ ਦੀ ਰੁੱਤ ਹੈ। ਇਸ ਰੁੱਤ ਵਿਚ ਗੱਦੀਆਂ ਦੇ ਲੋਭੀ ਸਿਆਸਤਦਾਨਾਂ ਦੇ ਲੋਕ ਹਿਤਾਂ ਦੇ ਪਰਦੇ ਪਾਏ ਹੁੰਦੇ ਹਨ। ਖਿਆਲ ਰੱਖਿਓ, ਸੰਘਰਸ਼ਾਂ ਦੇ ਖੇਤ ਵਿਚੋਂ ਕੋਈ ਰੁੱਗ ਭਰ ਕੇ ਨਾ ਲੈ ਜਾਵੇ। ਆਪਣੇ ਤਾਂ ਏਕਾ ਤੇ ਘੋਲ ਹੀ ਕੰਮ ਆਉਣਾ ਹੈ। ਜਥੇਬੰਦੀ ਤੇ ਸੰਘਰਸ਼ ਹੀ ਢਾਲ ਤੇ ਤਲਵਾਰ ਹੈ। ਏਸੇ 'ਤੇ ਟੇਕ ਰੱਖੋ। ਏਸੇ ਨੂੰ ਮਜਬੂਤ ਕਰੋ।

ਵੱਲੋਂ

ਸੂਬਾ ਕਮੇਟੀ, ਲੋਕ ਮੋਰਚਾ ਪੰਜਾਬ

ਪ੍ਰਕਾਸ਼ਕ: ਜਗਮੇਲ ਸਿੰਘ ਜਨਰਲ ਸਕੱਤਰ (9417224822)

(10.02.2014)

ਕਿਸਾਨ ਮਜ਼ਦੂਰ ਧਰਨੇ ਦੇ ਛੇਵੇਂ ਦਿਨ , ਸੰਘਰਸ਼ ਵਿੱਚ ਡਟੇ ਰਹਿਣ ਦਾ ਜ਼ੋਰਦਾਰ ਐਲਾਨ

ਕਿਸਾਨ ਮਜ਼ਦੂਰ ਧਰਨੇ ਦੇ ਛੇਵੇਂ ਦਿਨ ਉਮੜਿਆ ਭਾਰੀ ਇਕੱਠ,

ਸੰਘਰਸ਼ ਵਿੱਚ ਡਟੇ ਰਹਿਣ ਦਾ ਜ਼ੋਰਦਾਰ ਐਲਾਨ

 ਮੁੱਖ ਮੰਤਰੀ ਦੇ ਪ੍ਰਿੰਸੀਪਲ ਸਕੱਤਰ ਨਾਲ ਚੰਡੀਗੜ ਵਿੱਚ ਹੋਈ ਗੱਲਬਾਤ ਰਹੀ ਬੇਸਿੱਟਾ

A section of participants

 

 

 

 

 

 

 

 

 

 

 

 

 

 

 

 

 

 

 

 

 

ਕਿਸਾਨ ਮਜ਼ਦੂਰ ਮੰਗਾਂ ਨੂੰ ਲੈ ਕੇ ਮਿੰਨੀ ਸਕੱਤਰੇਤ ਬਠਿੰਡਾ ਸਾਹਮਣੇ ਚੱਲ ਰਿਹਾ ਧਰਨਾ ਅੱਜ ਛੇਵੇਂ ਦਿਨ ਵੀ ਜਾਰੀ ਰਿਹਾ। ਅੱਜ ਦੇ ਦਿਨ ਪੰਜਾਬ ਦੇ ਕੋਨੇ ਕੋਨੇ ਤੋਂ ਭਾਰੀ ਗਿਣਤੀ ਵਿੱਚ ਖੇਤ ਮਜ਼ਦੂਰ ਕਿਸਾਨ ਤੇ ਵਿਸ਼ੇਸ਼ ਤੌਰ 'ਤੇ ਔਰਤਾਂ ਨੇ ਭਰਵੀਂ ਸ਼ਮੂਲੀਅਤ ਕੀਤੀ। ਕਿਸਾਨ ਮਜ਼ਦੂਰ ਜਥੇਬੰਦੀ ਦੇ ਸੱਦੇ 'ਤੇ ਬਠਿੰਡਾ ਧਰਨੇ ਵਿੱਚ ਪੁੱਜੇ ਲੋਕਾਂ ਦੀ ਗਿਣਤੀ ਅੱਜ ਧਰਨੇ ਦੇ ਪਿਛਲੇ ਸਾਰੇ ਦਿਨਾਂ ਨਾਲੋਂ ਟੱਪ ਗਈ। ਦੂਜੇ ਪਾਸੇ ਸਰਕਾਰ ਦੇ ਸੱਦੇ 'ਤੇ ਚੰਡੀਗੜ ਗੱਲਬਾਤ ਲਈ ਗਏ ਵਫ਼ਦ ਨੇ ਫ਼ੋਨ 'ਤੇ ਸੂਚਿਤ ਕੀਤਾ ਕਿ ਗੱਲਬਾਤ ਬੇਸਿੱਟਾ ਰਹੀ। ਵਫ਼ਦ ਵਿੱਚ ਜੋਗਿੰਦਰ ਸਿੰਘ ਉਗਰਾਹਾਂ, ਝੰਡਾ ਸਿੰਘ ਜੇਠੂਕੇ, ਲਛਮਣ ਸਿੰਘ ਸੇਵੇਵਾਲਾ ਤੇ ਜਸਵੰਤ ਰਾਏ ਮੁਕਤਸਰ ਸ਼ਾਮਲ ਸਨ। ਜਿਨਾਂ ਨੇ ਮੁੱਖ ਮੰਤਰੀ ਦੇ ਪ੍ਰਿੰਸੀਪਲ ਸਕੱਤਰ ਐਸ.ਕੇ.ਸੰਧੂ ਅਤੇ ਹੋਰਨਾਂ ਸਰਕਾਰੀ ਨੁਮਾਇੰਦਿਆਂ ਨਾਲ ਗੱਲਬਾਤ ਕੀਤੀ। ਅੱਜ ਦੀ ਮੀਟਿੰਗ ਦੀ ਕਾਰਵਾਈ ਉੱਪਰ ਕਿਸਾਨ ਮਜ਼ਦੂਰ ਨੁਮਾਇੰਦਿਆਂ ਨੇ ਨਾ-ਤਸੱਲੀ ਜ਼ਾਹਰ ਕਰਦਿਆਂ ਕਿਹਾ ਕਿ ਸਰਕਾਰ ਦੀਆਂ ਪੇਸ਼ਕਸ਼ਾਂ ਨੂੰ ਦੋਹਾਂ ਜਥੇਬੰਦੀਆਂ ਦੀਆਂ ਸੂਬਾ ਕਮੇਟੀਆਂ ਵਿੱਚ ਵਿਚਾਰਨ ਮਗਰੋਂ ਅਗਲੀ ਕਾਰਵਾਈ ਦਾ ਐਲਾਨ ਕੀਤਾ ਜਾਵੇ।

ਅੱਜ ਧਰਨੇ ਦੌਰਾਨ ਜੁੜੇ ਭਾਰੀ ਇਕੱਠ ਨੂੰ ਸੰਬੋਧਨ ਕਰਨ ਵਾਲੇ ਸਭਨਾਂ ਬੁਲਾਰਿਆਂ ਨੇ ਸਰਕਾਰ ਦੀਆਂ ਕਿਸਾਨ ਮਜ਼ਦੂਰ ਵਿਰੋਧੀ ਨੀਤੀਆਂ ਦੀ ਜ਼ੋਰਦਾਰ ਨਿੰਦਾ ਕਰਦਿਆਂ ਸਰਕਾਰੀ ਖੇਤੀ ਸੰਮੇਲਨ ਨੂੰ ਸਿਆਸੀ ਡਰਾਮਾ ਕਰਾਰ ਦਿੱਤਾ। ਇਕੱਠ ਨੂੰ ਸੰਬੋਧਨ ਕਰਦਿਆਂ ਸੁਖਦੇਵ ਸਿੰਘ ਕੋਕਰੀ ਕਲਾਂ, ਜ਼ੋਰਾ ਸਿੰਘ ਨਸਰਾਲੀ, ਸ਼ਿੰਗਾਰਾ ਸਿੰਘ ਮਾਨ ਨੇ ਕਿਹਾ ਕਿ ਉਨਾਂ ਦੀਆਂ ਹੱਕੀ ਮੰਗਾਂ ਦੀ ਪ੍ਰਾਪਤੀ ਤੱਕ ਸੰਘਰਸ਼ ਜਾਰੀ ਰਹੇਗਾ ਤੇ ਹੋਰ ਤਿੱਖਾ ਹੋਵੇਗਾ। ਧਰਨੇ ਵਿੱਚੋਂ ਬਠਿੰਡੇ ਜਿਲੇ ਦੇ ਨੇੜਲੇ ਪਿੰਡਾਂ ਵਿੱਚ ਗਏ ਕਾਫ਼ਲੇ ਨੂੰ ਮਿਲਿਆ ਹੁੰਗਾਰਾ ਦਰਸਾ ਰਿਹਾ ਹੈ ਕਿ ਮਿਹਨਤਕਸ਼ ਲੋਕਾਂ ਦੀਆਂ ਉਮੀਦਾਂ ਇਸ ਧਰਨੇ 'ਤੇ ਟਿਕੀਆਂ ਹੋਈਆਂ ਹਨ ਕਿਉਂਕਿ ਇਨਾਂ ਸਮੁੱਚੀਆਂ ਮੰਗਾਂ ਦੀ ਪ੍ਰਾਪਤੀ ਹੀ ਉਨਾਂ ਦੀ ਜ਼ਿੰਦਗੀ ਵਿੱਚ ਕੁਝ ਰਾਹਤ ਲਿਆਉਣ ਦਾ ਸਬੱਬ ਬਣ ਸਕਦੀ ਹੈ। ਮਿਹਨਤਕਸ਼ ਕਿਸਾਨ ਮਜ਼ਦੂਰ ਜਨਤਾ ਪੂਰੇ ਜੋਸ਼ ਖਰੋਸ਼ ਤੇ ਪੱਕੇ ਇਰਾਦੇ ਧਾਰ ਕੇ ਧਰਨੇ ਵਿੱਚ ਸ਼ਾਮਲ ਹੋ ਰਹੀ ਹੈ। ਅੱਜ ਦੇ ਧਰਨੇ ਨੂੰ ਦੋਹਾਂ ਜਥੇਬੰਦੀਆਂ ਦੇ ਵੱਖ ਵੱਖ ਜ਼ਿਲਾ ਆਗੂਆਂ ਸੁਖਮੰਦਰ ਸਿੰਘ ਵਜੀਦਪੁਰ, ਨਛੱਤਰ ਸਿੰਘ ਰਣ ਸਿੰਘ ਵਾਲਾ, ਤਰਲੋਕ ਸਿੰਘ ਹਿੰਮਤਪੁਰਾ, ਸੌਦਾਗਰ ਸਿੰਘ ਘੁਡਾਣੀ, ਹੇਮਰਾਜ ਬਾਦਲ, ਬੁੱਕਣ ਸਿੰਘ ਸੱਦੋਵਾਲ, ਰਾਮ ਸਿੰਘ ਭੈਣੀਬਾਘਾ, ਮੇਜਰ ਸਿੰਘ ਕਾਲੇਕੇ, ਹਰਭਗਵਾਨ ਮੂਣਕ, ਪਰਮਜੀਤ ਕੌਰ ਸਲੇਮਗੜ, ਸੁਰਜੀਤ ਕੌਰ ਤੁੰਗਵਾਲੀ, ਕਰਮਜੀਤ ਕੌਰ ਲਹਿਰਾ ਖਾਨਾ ਤੇ ਹਰਿੰਦਰ ਕੌਰ ਬਿੰਦੂ ਨੇ ਸੰਬੋਧਨ ਕੀਤਾ। ਇਸ ਤੋਂ ਬਿਨਾਂ ਅੱਜ ਦੇ ਇਕੱਠ ਵਿੱਚ ਸ਼੍ਰੋਮਣੀ ਕਮੇਟੀ ਵੱਲੋਂ ਜ਼ਮੀਨ ਖੋਹਣ ਖਿਲਾਫ਼ ਸੰਘਰਸ਼ ਕਰ ਰਹੇ ਭੁੱਲਰ ਭਾਈਚਾਰੇ ਦੇ ਸੰਘਰਸ਼ਸ਼ੀਲ ਲੋਕਾਂ ਦਾ ਇੱਕ ਜਥਾ ਵੀ ਸ਼ਾਮਲ ਹੋਇਆ ਤੇ ਕਿਸਾਨ ਸੰਘਰਸ਼ ਨੂੰ ਹਰ ਤਰਾਂ ਦੇ ਸਮਰਥਨ ਦਾ ਐਲਾਨ ਕੀਤਾ ਤੇ ਭਾਈਚਾਰੇ ਦੇ ਆਗੂ ਬਲਦੇਵ ਸਿੰਘ ਨੇ ਇਕੱਠ ਨੂੰ ਸੰਬੋਧਨ ਕੀਤਾ।

ਜ਼ਿਕਰਯੋਗ ਹੈ ਕਿ ਕਿਸਾਨ ਮਜ਼ਦੂਰ ਪਿਛਲੇ 6 ਦਿਨਾਂ ਤੋਂ ਅਣਮਿਥੇ ਸਮੇਂ ਦੇ ਧਰਨੇ 'ਤੇ ਬੈਠ ਕੇ ਮੰਗ ਕਰ ਰਹੇ ਹਨ ਕਿ:

·        ਖੁਦਕੁਸ਼ੀ ਪੀੜਤਾਂ ਨੂੰ ਮੁਆਵਜ਼ਾ ਤੇ ਨੌਕਰੀ ਤੁਰੰਤ ਦਿੱਤੇ ਜਾਣ, ਸਰਵੇ ਤੋਂ ਬਾਹਰ ਰਹਿ ਗਏ ਪੀੜਤਾਂ ਨੂੰ     ਵੀ ਸਰਵੇ ਵਿੱਚ ਸ਼ਾਮਲ ਕੀਤਾ ਜਾਵੇ ਤੇ ਸਰਵੇ 1990 ਤੋਂ ਕਰਵਾਇਆ ਜਾਵੇ,

·        ਸੂਦਖੋਰੀ ਨੂੰ ਨੱਥ ਮਾਰਦਾ ਕਰਜ਼ਾ ਕਾਨੂੰਨ ਬਣਾਇਆ ਜਾਵੇ, ਕਰਜ਼ੇ ਮੋੜਨ ਤੋਂ ਬੇਵੱਸ ਕਿਸਾਨਾਂ ਮਜ਼ਦੂਰਾਂ ਦੇ ਕਰਜ਼ੇ ਖ਼ਤਮ ਕੀਤੇ ਜਾਣ, ਮੂਲ ਤੋਂ ਵੱਧ ਵਿਆਜ਼ ਵਸੂਲਣ ਤੇ ਕਰਜ਼ੇ ਬਦਲੇ ਕੁਰਕੀਆਂ ਗ੍ਰਿਫ਼ਤਾਰੀਆਂ 'ਤੇ ਰੋਕ ਲਾਈ ਜਾਵੇ,

·      ਗੋਬਿੰਦਪੁਰਾ (ਮਾਨਸਾ) ਦੇ ਰੁਜ਼ਗਾਰ ਉਜਾੜੇ ਮੂੰਹ ਧੱਕੇ 150 ਮਜ਼ਦੂਰ ਪਰਿਵਾਰਾਂ ਨੂੰ 3-3 ਲੱਖ ਰੁਪਏ ਦਾ ਮੁਆਵਜ਼ਾ ਦੇਣ ਸਣੇ ਪੂਰਾ ਜ਼ਮੀਨੀ ਸਮਝੌਤਾ ਲਾਗੂ ਕੀਤਾ ਜਾਵੇ,

·        ਬੇਜ਼ਮੀਨੇ ਕਿਸਾਨਾਂ ਮਜ਼ਦੂਰਾਂ ਨੂੰ ਘਰੇਲੂ ਲੋੜਾਂ ਅਤੇ ਸਵੈ ਰੁਜ਼ਗਾਰ ਲਈ ਅਤੇ ਪੰਜ ਏਕੜ ਤੱਕ ਵਾਲੇ ਕਿਸਾਨਾਂ ਨੂੰ ਫ਼ਸਲੀ ਕਰਜ਼ੇ ਵੀ ਬਿਨਾਂ ਵਿਆਜ਼ ਤੋਂ ਦਿੱਤੇ ਜਾਣ,

·        ਜਗੀਰਦਾਰਾਂ, ਸੂਦਖੋਰਾਂ ਆੜਤੀਆਂ, ਫਾਈਨਾਂਸ ਕੰਪਨੀਆਂ ਅਤੇ ਖੇਤੀ ਲਾਗਤ ਵਸਤਾਂ ਦੇ ਵਪਾਰੀਆਂ ਵਗੈਰਾ ਨੂੰ 4 ਪ੍ਰਤੀਸ਼ਤ ਸਾਲਾਨਾ ਵਿਆਜ਼ ਵਾਲੇ ਖੇਤੀ ਕਰਜ਼ਿਆਂ ਦੀ ਸੂਚੀ ਵਿੱਚੋਂ ਬਾਹਰ ਕੱਢਿਆ ਜਾਵੇ।

·        ਜ਼ਮੀਨੀ ਸੁਧਾਰ ਪੂਰੀ ਤਰਾਂ ਲਾਗੂ ਕੀਤੇ ਜਾਣ,

·        ਬੇਘਰੇ ਲੋਕਾਂ ਨੂੰ ਪਲਾਟ ਦਿੱਤੇ ਜਾਣ,

·        ਪੰਚਾਇਤੀ ਤੇ ਸ਼ਾਮਲਾਟ ਜ਼ਮੀਨਾਂ ਉੱਪਰ ਕਾਬਜ਼ ਬੇਜ਼ਮੀਨੇ ਮਜ਼ਦੂਰਾਂ ਕਿਸਾਨਾਂ ਨੂੰ ਮਾਲਕੀ ਹੱਕ ਦਿੱਤੇ ਜਾਣ,

·        ਆਟਾ ਦਾਲ ਸਕੀਮ ਬਿਨਾਂ ਸ਼ਰਤ ਚਾਲੂ ਕੀਤੀ ਜਾਵੇ,

·        ਪੰਜ ਏਕੜ ਤੋਂ ਘੱਟ ਮਾਲਕੀ ਵਾਲੇ ਸੱਤਰ ਹਜ਼ਾਰ ਕਿਸਾਨਾਂ ਨੂੰ ਖੇਤੀ ਮੋਟਰਾਂ ਦੇ ਕੁਨੈਕਸ਼ਨ ਸਰਕਾਰੀ ਖਰਚੇ 'ਤੇ ਤੁਰੰਤ ਜਾਰੀ ਕੀਤੇ ਜਾਣ,

·        ਆਬਾਦਕਾਰਾਂ ਨੂੰ ਜ਼ਮੀਨ ਦੇ ਮਾਲਕੀ ਹੱਕ ਦਿੱਤੇ ਜਾਣ,

·        ਮਨਰੇਗਾ ਤਹਿਤ ਪੂਰਾ ਸਾਲ ਰੁਜ਼ਗਾਰ ਦੀ ਗਾਰੰਟੀ ਦਿੱਤੀ ਜਾਵੇ ਅਤੇ ਪੰਜ ਏਕੜ ਤੱਕ ਖੇਤੀ ਦੇ ਸਾਰੇ ਕੰਮ ਮਨਰੇਗਾ ਅਧੀਨ ਲਿਆਂਦੇ ਜਾਣ,

·        ਘਰੇਲੂ ਬਿਜਲੀ ਬਿਲਾਂ ਦੀ ਮੁਆਫ਼ੀ ਉੱਤੇ ਲਾਈ ਜਾਤ ਪਾਤ ਤੇ ਲੋਡ ਦੀ ਸ਼ਰਤ ਖ਼ਤਮ ਕੀਤੀ ਜਾਵੇ ਅਤੇ ਪਿਛਲੇ ਬਕਾਏ ਵੀ ਖ਼ਤਮ ਕੀਤੇ ਜਾਣ,

·        ਸੰਘਰਸ਼ ਕਰਨ 'ਤੇ ਲਾਈਆਂ ਪਾਬੰਦੀਆਂ ਹਟਾਈਆਂ ਜਾਣ,

·        ਆਵਾਰਾਂ ਗਊਆਂ ਤੇ ਹੋਰ ਪਸ਼ੂਆਂ ਦੀ ਸੰਭਾਲ ਦੇ ਪੁਖ਼ਤਾ ਪ੍ਰਬੰਧ ਕੀਤੇ ਜਾਣ।

ਧਰਨੇ ਵਿੱਚ ਗੂੰਜੀਆਂ ਸੰਗੀਤਕ ਧੁਨਾਂ, 'ਜਾਗੋ' ਕੈਸੇਟ ਰਿਲੀਜ਼

ਇਸ ਅਣਮਿਥੇ ਸਮੇਂ ਦੇ ਧਰਨੇ ਵਿੱਚ ਪੰਜਾਬ ਲੋਕ ਸਭਿਆਚਾਰਕ ਮੰਚ (ਪਲਸ ਮੰਚ) ਦੀ ਬਠਿੰਡਾ ਇਕਾਈ ਲੋਕ ਸੰਗੀਤ ਮੰਡਲੀ ਬਠਿੰਡਾ ਵੱਲੋਂ ਮੰਚ ਦੇ ਪ੍ਰਧਾਨ ਅਮੋਲਕ ਸਿੰਘ ਦੀ ਕਲਮ ਤੋਂ ਲਿਖੇ ਗੀਤਾਂ ਦੀ ਆਡੀਓ ਕੈਸੇਟ 'ਜਾਗੋ' ਜਾਰੀ ਕੀਤੀ ਗਈ। ਇਨਾਂ ਗੀਤਾਂ ਨੂੰ ਆਵਾਜ਼ ਨਵਦੀਪ ਧੌਲਾ ਅਤੇ ਜਸਵੰਤ ਦੀਵਾਨਾ ਨੇ ਦਿੱਤੀ ਅਤੇ ਕੈਸੇਟ ਦਾ ਸੰਗੀਤ ਲੋਕ ਬੰਧੂ ਨੇ ਦਿੱਤਾ ਹੈ। ਵੇਖਦੇ ਹੀ ਵੇਖਦੇ ਇਹ ਕੈਸੇਟ ਭਰੇ ਪੰਡਾਲ ਵਿੱਚੋਂ ਲੋਕ ਮਠਿਆਈਆਂ ਵਾਂਗ ਖਰੀਦ ਕੇ ਲੈ ਗਏ।

ਸੁਖਦੇਵ ਸਿੰਘ ਕੋਕਰੀ ਕਲਾਂ General Secretary BKU Ekta (Ugrahan) Mob.: 94174-66038

ਲਛਮਣ ਸਿੰਘ General Secretary Punjab Khet Mazdoor Union  Mob: 94170-79170

ਜਥੇਬੰਦ ਹੋਣ ਅਤੇ ਸੰਘਰਸ਼ ਕਰਨ ਦੇ ਬੁਨਿਆਦੀ ਜਮਹੂਰੀ ਹੱਕ ਦੀ ਰਾਖੀ ਲਈ ਜਦੋ-ਜਹਿਦ

ਜਥੇਬੰਦ ਹੋਣ ਅਤੇ ਸੰਘਰਸ਼ ਕਰਨ ਦੇ ਬੁਨਿਆਦੀ ਜਮਹੂਰੀ ਹੱਕ ਦੀ ਰਾਖੀ ਲਈ ਜਦੋ-ਜਹਿਦ ਚ

ਮੌਤ ਦੀ ਭੇਟ ਚੜੀ ਬਚੀ ਦੀ ਸ਼ਹਾਦਤ ਨੂੰ ਸਲਾਮ ਕਰਦਿਆਂ

ਆਓ ਇਸ ਸੰਘਰਸ਼ ਨੂੰ ਕਾਮਯਾਬੀ ਦੀ ਮੰਜਿਲ ਤਕ ਪੁਚਾਈਏ

ਇਨਸਾਫ਼ ਪਸੰਦ ਲੋਕੋ

ਆਪਣੇ ਚੰਗੇਰੇ ਭਵਿਖ ਲਈ ਜਥੇਬੰਦ ਹੋਣ ਅਤੇ ਸੰਘਰਸ਼ ਕਰਨ ਦੇ ਬੁਨਿਆਦੀ ਜਮਹੂਰੀ ਹੱਕ ਦੀ ਰਾਖੀ ਲਈ ਨਿਕਲੇ ਈ.ਜੀ.ਐਸ ਅਧਿਆਪਕਾਂ ਦੇ ਜੁਝਾਰੂ ਕਾਫਲੇ 'ਚ ਸ਼ਾਮਲ ਸਵਾ 'ਕੁ ਸਾਲ ਦੀ ਬੱਚੀ "ਏਕਨੂਰ ਰੂਥ" ਪੰਜਾਬ ਦੇ ਹਾਕਮਾਂ ਅਤੇ ਪੁਲਸ ਦੀ ਦਰਿੰਦਗੀ ਦਾ ਸ਼ਿਕਾਰ ਹੋਕੇ ਮੌਤ ਦੀ ਗੋਦ ਵਿੱਚ ਜਾ ਸਮਾਈ। ਬਠਿੰਡਾ ਇਲਾਕਾ ਦੇ ਇਨਸਾਫ਼ ਪਸੰਦ ਜਮਹੂਰੀ ਅਤੇ ਸੰਘਰਸ਼ੀਲ ਲੋਕਾਂ ਨੇ ਉਸ ਦੀ ਸ਼ਹਾਦਤ ਨੂੰ ਸਲਾਮ ਕਰਦਿਆਂ ਆਪ-ਮੁਹਾਰੀ ਹਮਦਰਦੀ ਸੰਵੇਦਨਾ ਅਤੇ ਹਮਾਇਤ ਪ੍ਰਗਟਾਈ ਹੈ। ਸਾਰੇ ਪੰਜਾਬ 'ਚੋਂ ਅਕਾਲੀ-ਭਾਜਪਾ ਸਰਕਾਰ ਨੂੰ ਇਸ ਘਟਨਾ 'ਤੇ ਫਿੱਟ-ਲਾਹਣਤਾਂ ਪੈ ਰਹੀਆਂ ਹਨ। 7 ਫਰਵਰੀ ਨੂੰ ਹਿੰਦੋਸਤਾਨ ਟਾਈਮਜ਼ ਅਖਬਾਰ ਚ ਪਤਰਕਾਰ ਵਿਸ਼ਵ ਭਾਰਤੀ ਦੀ ਮੁੱਖ ਮੰਤਰੀ ਬਾਦਲ ਦੇ ਨਾਂ ਛਪੀ ਖੁੱਲ੍ਹੀ ਚਿੱਠੀ ਅਤੇ ਹੋਰ ਵੱਖ-ਵੱਖ ਅਖਬਾਰਾਂ'ਚ ਇਸ ਘਟਨਾ 'ਤੇ ਛਪੇ ਲੋਕਾਂ ਦੇ ਪ੍ਰਤੀਕਰਮ ਨੇ ਬਾਦਲ ਸਰਕਾਰ ਦਾ ਜਾਬਰ ਅਤੇ ਗੈਰ-ਜਮਹੂਰੀ ਚੇਹਰਾ ਜੱਗ-ਜਾਹਰ ਕਰ ਦਿੱਤਾ ਹੈ।

ਲੋਕਾਂ 'ਚ ਆਪਦਾ ਨੰਗ ਜਾਹਰ ਹੋਣ 'ਤੇ ਦੁਖੀ ਅਕਾਲੀ ਆਗੂ, ਕਾਤਲਾਂ ਦੀ ਨੰਗੀ-ਚਿੱਟੀ ਹਮਾਇਤ 'ਤੇ ਉੱਤਰ ਆਏ ਹਨ। ਉਹਨਾਂ ਦੀਆਂ ਜਾਬਰ ਅਤੇ ਗੈਰ-ਜਮਹੂਰੀ ਕਾਰਵਾਈਆਂ ਦੀ ਵਜਾਹਤ ਕਰ ਰਹੇ ਹਨ। ਲੱਛੇਦਾਰ ਸ਼ਬਦਾਂ ਦੇ ਜਾਲ ਬੁਣਕੇ ਜਾਬਰਾਂ ਅਤੇ ਕਾਤਲਾਂ ਦੇ ਚੇਹਰੇ ਢਕਣ ਦੀਆਂ ਕੋਸ਼ਿਸ਼ਾਂ 'ਚ ਜੁਟੇ ਹਨ। ਉਹਨਾਂ ਨੇ ਮ੍ਰਿਤਕ ਬੱਚੀ ਦੀ ਮਾਤਾ, EGS ਅਧਿਆਪਕਾ ਦੀ ਜਥੇਬੰਦੀ, ਪੱਤਰਕਾਰਾਂ ਅਤੇ ਹਮਾਇਤੀ ਲੋਕਾਂ ਦੇ ਖਿਲਾਫ ਹਮਲਾ ਬੋਲਿਆ ਹੈ। ਡਟ ਕੇ ਕੁਫਰ ਤੋਲਿਆ ਹੈ ਅਤੇ ਧਮਕੀਆਂ ਵਰਤਾਈਆਂ ਹਨ। ਇਸ ਕੂੜ ਪ੍ਰਚਾਰ ਦੀ ਅਗਵਾਈ ਮੁੱਖ ਮੰਤਰੀ ਬਾਦਲ ਦਾ ਮੀਡੀਆ ਸਲਾਹਕਾਰ ਹਰਚਰਨ ਬੈਂਸ ਕਰ ਰਿਹਾ ਹੈ| 

ਹਰਚਰਨ ਬੈਂਸ ਕੌਣ ਹੈ? 

ਮੁੱਖ ਮੰਤਰੀ ਦਾ ਮੀਡੀਆ ਸਲਾਹਕਾਰ ਹਰਚਰਨ ਬੈਂਸ ਤਨਖਾਹ ਭੱਤੇ ਤੇ ਹੋਰ ਸਹੂਲਤਾਂ ਸਰਕਾਰੀ ਖਜਾਨੇ 'ਚੋਂ ਲੈਂਦਾ ਹੈ। ਪਰ, ਸੇਵਾ ਕਰਦਾ ਹੈ ਅਕਾਲੀ ਦਲ ਬਾਦਲ ਦੀ। ਜਦੋਂ ਇਹ ਸਰਕਾਰ ਲੋਕਾਂ 'ਤੇ ਕਟਕ ਚਾੜ੍ਹਦੀ ਹੈ ਤਾਂ ਇਸਨੇ ਕਦੇ ਜਬਾਨ ਨਹੀਂ ਖੋਲ੍ਹੀ। ਸਰਕਾਰ ਨੇ ਲੋਕਾਂ ਦੀ ਜੁਬਾਨਬੰਦੀ ਕਰਨ ਲਈ ਧਰਨਿਆਂ, ਮੁਜਾਹਰਿਆਂ ਤੇ ਪਾਬੰਦੀ ਮੜ੍ਹਨ ਦਾ ਫਰਮਾਨ ਜਾਰੀ ਕੀਤਾ, ਬੈਂਸ ਜੀ ਚੁੱਪ ਰਹੇ। ਫਰੀਦਕੋਟ ਸ਼ਹਿਰ 'ਚੋਂ ਦਿਨ-ਦਿਹਾੜੇ ਅਕਾਲੀ ਮੰਤਰੀਆਂ ਦੀ ਸਰਪ੍ਰਸਤੀ ਹੇਠ ਪਲੀ ਗੁੰਡਾ ਢਾਣੀ ਇੱਕ ਮਾਸੂਮ ਲੜਕੀ ਨੂੰ ਵਾਲਾਂ ਤੋਂ ਘੜੀਸ ਕੇ ਲੈ ਗਈ। ਉਸਦੇ ਮਾਂ-ਪਿਓ ਦੀਆਂ ਲੱਤਾਂ ਬਾਹਾਂ ਭੰਨ ਗਈ। ਜਦੋਂ ਲੋਕ ਗੁੰਡਾ-ਢਾਣੀ ਖਿਲਾਫ ਡਟ ਗਏ ਉਹਨਾਂ ਦੇ ਸਰਪ੍ਰਸਤ ਅਕਾਲੀ ਮੰਤਰੀਆਂ ਨੂੰ ਨੰਗਾ ਕਰਨ ਲੱਗ ਪਏ ਤਾਂ ਬੈਂਸ ਸਾਹਬ ਦੁਖੀ ਹੋ ਗਏ । ਵੱਡੀ ਪ੍ਰੈਸ ਕਾਨਫਰੰਸ ਕਰਕੇ ਅਗਵਾ ਹੋਈ ਬਾਲੜੀ ਦੇ ਖਿਲਾਫ ਕੁਫਰ ਤੋਲਿਆ। ਸਾਰੀਆਂ ਇਖਲਾਕੀ ਕਦਰਾਂ-ਕੀਮਤਾਂ ਛਿੱਕੇ 'ਤੇ ਟੰਗ ਕੇ, ਉਸ 'ਤੇ ਆਪਣੀ ਮਰਜੀ ਨਾਲ ਨਿਕਲ ਜਾਣ ਅਤੇ ਵਿਆਹ ਕਰਾਉਣ ਦਾ ਇਲਜਾਮ ਲਗਾਇਆ। ਪਰ, ਲੋਕਾਂ ਨੇ ਆਪਦੀ ਤਾਕਤ ਦੇ ਜੋਰ ਇਸ ਕੂੜ-ਪ੍ਰਚਾਰ ਦੀ ਫੂਕ ਕੱਢੀ। ਅੱਜ ਉਹ ਸਾਰਾ ਗੁੰਡਾ-ਗਰੋਹ ਜੇਲ੍ਹ 'ਚ ਅੱਡੀਆਂ ਰਗੜ ਰਿਹਾ ਹੈ। ਅਦਾਲਤ ਦਾ ਇਹ ਫੈਸਲਾ ਹਰਚਰਨ ਬੈਂਸ ਜੀ ਦੇ ਮੂੰਹ 'ਤੇ ਕਰਾਰੀ ਚਪੇੜ ਹੈ। 

ਹੁਣ ਹਰਚਰਨ ਬੈਂਸ ਜੀ ਏਕਨੂਰ ਰੂਥ ਦੀ ਮੌਤ ਲਈ ਬਾਦਲ ਸਰਕਾਰ ਤੋਂ ਬਿਨਾ ਹੋਰ ਸਾਰਿਆਂ ਨੂੰ ਦੋਸ਼ੀ ਦਸ ਰਹੇ ਹਨ। 'ਜੰਜ ਕੁਪੱਤੀ ਸੁਥਰਾ ਭਲਾ ਮਾਨਸ'।

ਸਿਖਿਆ ਮੰਤਰੀ ਮਲੂਕਾ ਜੀ ਅਤੇ ਮੁਖ ਪਾਰਲੀਮਾਨੀ ਸਕਤਰ ਸਰੂਪ ਚੰਦ ਸਿੰਗਲਾ ਜੀ ਨੇ ਆਪਣੇ ਬਿਆਨਾਂ ਚ ਨਾਂ ਸਿਰਫ ਪੁਲਸ ਅਤੇ ਹੋਰ ਸਰਕਾਰੀ ਅਧਿਕਾਰੀਆਂ ਨੂੰ ਏਕਨੂਰ ਦੀ ਮੌਤ ਲਈ ਹਰ ਕਿਸਮ ਦੀ ਜ਼ਿਮੇੰਦਾਰੀ ਤੋਂ ਸੁਰਖਰੂ ਕੀਤਾ ਹੈ, ਸਗੋ ਮੋੜਵਾਂ ਵਾਰ ਕਰਦਿਆਂ EGS ਅਧਿਆਪਕਾਂ ਦੀ ਜਥੇਬੰਦੀ ਅਤੇ ਇਸ ਦੀ ਹਮਾਇਤ ਕਰ ਰਹੇ ਲੋਕਾਂ ਤੇ ਜਜ਼ਬਾਤੀ ਬਲੈਕਮੇਲ ਕਰਨ ਅਤੇ ਲਾਸ਼ਾਂ ਤੇ ਸਿਆਸਤ ਕਰਨ ਦਾ ਦੋਸ਼ ਲਾਇਆ ਹੈ | ਬੁਖਲਾਹਟ ਵਿਚ ਸ਼ਾਇਦ ਉਹ ਆਵਦੀ ਪਾਰਟੀ ਦਾ ਪਿਛਲਾ ਇਤਿਹਾਸ ਭੁਲ ਗਏ ਹਨ| ਰਾਜ ਸਤਾ ਹਾਸਲ ਕਰਨ ਲਈ ਅਕਾਲੀਆਂ ਨੇ ਜਜ਼ਬਾਤੀ ਬਲੈਕਮੇਲ ਅਤੇ ਲਾਸ਼ਾਂ ਤੇ ਸਿਆਸਤ ਕਰਨ ਤੋਂ ਸਿਵਾ ਹੋਰ ਕੀਤਾ ਵੀ ਕੀ ਹੈ ? 

ਹਰਚਰਨ ਬੈਂਸ ਜੀ ਦੇ ਲੇਖ ਅਤੇ ਉਕਤ ਅਕਾਲੀ ਆਗੂਆਂ ਦੇ ਬਿਆਨਾਂ ਤੋਂ ਇਹ ਗਲ ਸਪਸ਼ਟ ਹੋ ਜਾਂਦੀ ਹੈ ਕੇ ਸਰਕਾਰੀ ਅਧਿਕਾਰੀਆਂ ਵਲੋਂ EGS ਅਧਿਆਪਕਾਂ ਨਾਲ ਚਲ ਰਹੀ ਗਲਬਾਤ ਮਹਿਜ਼ ਇਕ ਡਰਾਮਾ ਹੈ| ਅਸਲ ਚ ਉਹ ਇਸ ਸੰਘਰਸ਼ ਨੂੰ ਪੁਲਸੀ ਡਾਂਗਾਂ ਦੇ ਜੋਰ ਕੁਚਲਣਾ ਚਾਹੁੰਦੇ ਹਨ, ਇਸੇ ਖਾਤਰ ਰਸੇ-ਪੈੜੇ ਵਟ ਰਹੇ ਹਨ| ਲੋਕਾਂ ਦੇ ਰੋਸ ਪ੍ਰਗਟਾਵੇ ਦੇ ਹਕ ਤੇ ਪਾਬੰਦੀ ਲਾਉਣ ਲਈ'ਜਜ਼ਬਾਤੀ ਬਲੈਕਮੇਲ' ਅਤੇ 'ਲਾਸ਼ਾਂ ਤੇ ਸਿਆਸਤ' ਕਰਨ ਦਾ ਬਹਾਨਾ ਬਣਾ ਰਹੇ ਹਨ|

ਸਿਖਿਆ ਮੰਤਰੀ ਜੀ ਤਾਂ ਇਸ ਤੋਂ ਵੀ ਅਗੇ ਗਏ ਹਨ | ਲੋਕਾਂ ਦੇ ਜ਼ਖਮਾਂ ਤੇ ਲੂਣ ਛਿੜਕਦਿਆਂ, ਉਹਨਾਂ ਮਿਰਤਕ ਲੜਕੀ ਦੇ ਮਾਪਿਆਂ ਤੇ ਉਸਦੀ ਲਾਸ਼ ਨੂੰ ਸਿਆਸੀ ਮਕਸਦ ਲਈ ਵਰਤਣ ਦਾ ਦੋਸ਼ ਲਾਇਆ ਹੈ, ਉਹਨਾਂ ਨੂੰ ਸਰਕਾਰ ਤੋਂ ਮਾਫ਼ੀ ਮੰਗਣ ਲਈ ਕਿਹਾ ਹੈ| ਇਨਸਾਫ਼ ਪਸੰਦ ਲੋਕੋ ਇਹ ਕੇਹੀ ਜਮਹੂਰੀਅਤ ਹੈ ਜਿਥੇ ਕਾਤਿਲ ਜਜ ਬਣ ਕੇ ਆਪੇ ਹੀ ਸਜ਼ਾ ਸੁਨਾ ਰਹੇ ਹਨ| ਆਪਣੇ ਹੱਕਾਂ ਲਈ ਲੜ ਰਹੇ, ਸਾਡੇ ਧੀਆਂ ਪੁੱਤਾਂ ਨੂੰ ਹਾਜੀ ਰਤਨ ਗੁਰਦਵਾਰੇ ਚ ਸ਼ਰੇਆਮ ਕੁਟਨ ਅਤੇ ਉਹਨਾਂ ਦੀਆਂ ਗੁਤਾਂ ਤੇ ਵਾਲ ਪੁਟਣ ਵਾਲੇ ਆਗੂ, ਸਤਾ ਦੇ ਨਸ਼ੇ ਚ ਹੁਣ ਸਾਨੂੰ ਹੀ ਜ਼ਲੀਲ ਕਰ ਰਹੇ ਹਨ| 

ਇਹਨਾਂ ਅਕਾਲੀ ਆਗੂਆਂ ਦੇ ਬਿਆਨਾਂ ਦਾ ਸਿਧਾ ਮਤਲਬ ਇਹ ਬਣਦਾ ਹੈ ਕੇ ਪੁਲਸ ਦੀ ਦਰਿੰਦਗੀ ਹਥੋਂ ਮੌਤ ਦੇ ਮੁੰਹ ਚ ਸਮਾਈ ਬਾਲੜੀ ਦੇ ਮਾਪਿਆਂ ਨੂੰ ਮੁਆਵਜ਼ਾ ਦੇਣ ਦੀ ਥਾਂ ਉਹਨਾਂ ਤੇ ਕੇਸ ਦਰਜ਼ ਕੀਤਾ ਜਾਵੇ, ਇਹ ਸ਼ਰਮਨਾਕ ਕਾਰਾ ਕਰਨ ਵਾਲੇ ਪੁਲਸ ਅਧਿਕਾਰੀਆਂ ਨੂੰ ਰਾਸ਼ਟਰਪਤੀ ਅਵਾਰਡ ਨਾਲ ਸਨਮਾਨਿਆ ਜਾਵੇ|

ਇਨਸਾਫ਼ ਪਸੰਦ ਲੋਕੋ ਜੇ ਅਸੀਂ ਚੇਤਨ ਨਾਂ ਹੋਏ, ਆਪਨੇ ਜਥੇਬੰਦ ਹੋਣ ਤੇ ਸੰਘਰਸ਼ ਕਰਨ ਦੇ ਜਮਹੂਰੀ ਹਕ ਦੀ ਰਾਖੀ ਲਈ ਸੜਕਾਂ ਤੇ ਨਾਂ ਨਿਕਲੇ, ਸੰਘਰਸ਼ਾਂ ਚ ਕੁਰਬਾਨੀਆਂ ਕਰਨ ਵਾਲਿਆਂ ਦੇ ਹਕ ਚ ਹਾਅ ਦਾ ਨਾਅਰਾ ਨਾਂ ਮਾਰਿਆ ਤਾਂ ਅਕਾਲੀ ਆਗੂ ਆਪਣੀ ਗਲ ਪੁਗਾ ਜਾਣਗੇ, ਲੋਕ ਹੱਕਾਂ ਤੇ ਇਕ ਹੋਰ ਡਾਕਾ ਮਾਰ ਜਾਣਗੇ | 

 

ਸੋ ਆਓ, ਇਕਠੇ ਹੋਈਏ, ਈ ਜੀ ਐਸ ਅਧਿਆਪਕਾਂ ਦੀ ਜਥੇਬੰਦੀ ਦੀ ਹਮਾਇਤ ਚ ਜੁਟੀਏ ਅਤੇ ਬੁਲੰਦ ਅਵਾਜ਼ ਚ ਮੰਗ ਕਰੀਏ:

*   ਲੋਕਾਂ ਦੇ ਜਥੇਬੰਦ ਹੋਣ ਤੇ ਸੰਘਰਸ਼ ਕਰਨ ਦੇ ਹਕ ਤੇ ਸਾਰੀਆਂ   ਪਾਬੰਦੀਆਂ ਖਤਮ ਕੀਤੀਆਂ ਜਾਨ

*     ਰੂਥ ਦੀ ਮੌਤ ਲਈ ਜ਼ਿਮੇੰਦਾਰ ਪੁਲਸ ਅਧਿਕਾਰੀਆਂ ਦੇ ਖਿਲਾਫ਼    

   ਮੁਕਦਮਾ ਦਰਜ਼ ਕਰਕੇ ਉਹਨਾਂ ਨੂੰ ਢੁਕਵੀਂ ਸਜ਼ਾ ਦਿੱਤੀ ਜਾਵੇ

*  ਏਕਨੂਰ ਰੂਥ ਦੇ ਮਾਪਿਆਂ ਨੂੰ ਨਕਦ ਮੁਆਵਜ਼ਾ ਅਤੇ ਨੌਕਰੀ ਦਿੱਤੀ 

   ਜਾਵੇ

*    EGS ਅਧਿਆਪਕਾਂ ਦੀਆਂ ਮੰਗਾਂ ਪਰਵਾਨ ਕੀਤੀਆਂ ਜਾਨ, ਉਹਨਾਂ 

   ਨਾਲ ਵਖ ਵਖ ਸਮੇਂ ਕੀਤੇ ਵਾਅਦੇ ਪੂਰੇ ਕੀਤੇ ਜਾਨ 

ਜਮਹੂਰੀ ਅਧਿਕਾਰ ਸਭਾ ਪੰਜਾਬ ਇਕਾਈ ਬਠਿੰਡਾ

AN 8-MONTH OLD GIRL LOOSES LIFE BECOMES SECOND VICTIM OF BADAL GOVT’S REPRESSION

EGS TEACHER’S STRUGGLE:

AN 8-MONTH OLD GIRL LOOSES LIFE

BECOMES SECOND VICTIM OF BADAL GOVT’S REPRESSION

8-month old daughter of Kiranjeet Kaur – a protesting EGS teacher today became the second victim of Badal Govt’s repressive policy towards the struggling EGS teachers, who are sitting on hunger strike atop a water tank in the heart of Bathinda city, demanding regular jobs. To foil this struggle, the Disrict Administration has ordered all the tent houses in the city, not to supply any tent, blanket or quilt to the agitating teachers. So they are spending freezing cold & foggy nights under open sky, braving chilly winds & rain. Kiranjit Kaur’s infant daughter caught cold. The administration even instructed the doctors at Civil Hospital, Bathinda, not to give proper medical treatment to the suffering protestors & their wards. Consequently the infant girl died in the early morning today.

Earlier another EGS teacher Makhan Kaur had died at her home in Mansa on Sunday night after falling ill on the protest site due to severe cold. She too was not given any medical aid by the Govt. 

Lok Morcha Punjab strongly condemns Punjab Govt’s policy of repression towards all struggling sections of the people, including the EGS teachers, and demands:

# acceptance of the demands of EGS teachers, and 

# payment of adequate compensation for the deaths of Makhan Kaur and 8-month old daughter of Kiranjeet Kaur.

ਮਜ਼ਦੂਰ ਪਰਿਵਾਰ ਦੀ ਨਾਬਾਲਗ ਕੁੜੀ ਨਾਲ ਬਲਾਤਕਾਰ ਦੇ ਦੋਸ਼ੀਆਂ ਨੂੰ ਗਿਰਫਤਾਰ ਕਰਵਾਉਣ ਲਈ ਅੱਗੇ ਆਓ

ਪਿੰਡ ਗੰਧੜ ਦੇ ਮਜ਼ਦੂਰ ਪਰਿਵਾਰ ਦੀ ਨਾਬਾਲਗ ਕੁੜੀ ਨਾਲ ਬਲਾਤਕਾਰ ਦੇ

ਤਿੰਨ ਦੋਸ਼ੀਆਂ ਨੂੰ ਗਿਰਫਤਾਰ ਕਰਵਾਉਣ ਲਈ

ਵਿਸ਼ਾਲ ਇਕੱਠ ਬੰਨ੍ਹ ਕੇ ਅੱਗੇ ਆਓ

ਇਨਸਾਫਪਸੰਦ ਲੋਕੋ,

24 ਜਨਵਰੀ ਨੂੰ ਪਿੰਡ ਗੰਧੜ ਦੇ ਮਜ਼ਦੂਰ ਪਰਿਵਾਰ ਦੀ ਅੱਠਵੀਂ ਵਿੱਚ ਪੜਦੀ ਨਾਬਾਲਗ ਕੁੜੀ 'ਤੇ ਉਦੋਂ ਕਹਿਰ ਢਹਿ ਗਿਆ ਜਦੋਂ ਉਹ ਸਕੂਲ ਨੂੰ ਜਾ ਰਹੀ ਸੀ। ਸਕੂਲ ਦੇ ਐਨ ਲਾਗੇ ਆਪਣੇ ਘਰ ਕੋਲ ਘਾਤ ਲਾਈ ਖੜ੍ਹੇ ਬਲਜੀਤ ਅਤੇ ਉਹਦੀ ਗੁੰਡਾ ਢਾਣੀ ਕੁੜੀ 'ਤੇ ਝਪਟ ਪਈ। ਬਲਜੀਤ, ਗੁਰਲਾਲ ਅਤੇ ਮਨਪ੍ਰੀਤ ਨਾਂ ਦਾ ਇਹ ਗੁੰਡਾ ਟੋਲਾ ਧੁੰਦ ਦਾ ਫਾਇਦਾ ਉਠਾ ਕੇ ਕੁੜੀ ਨੂੰ ਜਬਰਦਸਤੀ ਚੁੱਕ ਕੇ ਬਲਜੀਤ ਦੇ ਘਰੇ ਲੈ ਗਿਆ। ਕੁੜੀ ਨਾਲ ਜੋਰ ਜਬਰਦਸਤੀ ਕਰਦੇ ਰਹੇ ਇਸ ਗੁੰਡਾ ਟੋਲੇ ਨੇ ਕੁੜੀ ਨੂੰ ਉਦੋਂ ਹੀ ਛੱਡਿਆ ਜਦੋਂ ਉਹਨਾਂ ਦੀ ਇਸ ਕਰਤੂਤ ਦਾ ਅੱਧੇ-ਪੌਣੇ ਘੰਟੇ ਬਾਅਦ ਸਕੂਲ ਤੇ ਆਂਢ-ਗੁਆਂਢ ਵਿੱਚ ਰੌਲਾ ਪੈ ਗਿਆ।

ਪੁਲਿਸ ਨੇ ਲਾਹੀ ਸੰਗ- ਦੋਸ਼ੀ ਘੁੰਮਦੇ ਫਿਰ ਨਸ਼ੰਗ

ਇਸ ਨੰਗੇ-ਚਿੱਟੇ ਧੱਕੇ ਤੇ ਜਬਰ ਵਿਰੁੱਧ ਪੀੜਤ ਮਜ਼ਦੂਰ ਪਰਿਵਾਰ ਵੱਲੋਂ ਉਸੇ ਦਿਨ ਹੀ ਲੱਖੇਵਾਲੀ ਥਾਣੇ ਜਾ ਕੇ ਸਾਰੀ ਰਿਪੋਰਟ ਦਿੱਤੀ ਗਈ। ਥਾਣੇ ਦਾ ਮੁਖੀ ਮੋਹਣ ਲਾਲ ਕੁੜੀ ਦੇ ਮਾਪਿਆਂ ਦੀ ਸ਼ਿਕਾਇਤ 'ਤੇ ਗੰਧੜ ਗਿਆ ਵੀ, ਪਰ ਗੋਂਗਲੂਆਂ ਤੋਂ ਮਿੱਟੀ ਝਾੜ ਕੇ ਮੁੜ ਆਇਆ। ਉਹਨੇ ਨਾ ਤਾਂ ਕਿਸੇ ਦੋਸ਼ੀ ਨੂੰ ਫੜਿਆ, ਨਾ ਪੀੜਤ ਕੁੜੀ ਦੇ ਬਿਆਨਾਂ 'ਤੇ ਪਰਚਾ ਕੱਟਿਆ ਤੇ ਨਾ ਹੀ ਕੁੜੀ ਦੀ ਡਾਕਟਰੀ ਕਰਵਾਉਣ ਲਈ ਉਹਨੂੰ ਹਸਪਤਾਲ ਪਹੁੰਚਾਇਆ। ਸਗੋਂ ਡਰੀ ਤੇ ਸਹਿਮੀ ਕੁੜੀ ਨੂੰ ਥਾਣੇਦਾਰ ਵੱਲੋਂ ਖੁਦ ਹੀ ਸਭ ਕੁੱਝ ਲਿਖ ਕੇ ਦੇਣ ਦਾ ਹੁਕਮ ਸੁਣਾਇਆ ਗਿਆ। ਜਦੋਂ ਕਿ ਚਾਹੀਦਾ ਤਾਂ ਇਹ ਸੀ ਕਿ ਸਭ ਤੋਂ ਪਹਿਲਾਂ ਕੁੜੀ ਨੂੰ ਹਸਪਤਾਲ ਪਹੁੰਚਾ ਕੇ ਉਹਦੀ ਡਾਕਟਰੀ ਤੇ ਇਲਾਜ ਕਰਵਾਇਆ ਜਾਂਦਾ। ਕੁੜੀ ਨੂੰ ਡਰ ਤੇ ਸਹਿਮ 'ਚੋਂ ਕੱਢ ਕੇ ਸੁਖਾਵਾਂ ਮਾਹੌਲ ਸਿਰਜਣ ਰਾਹੀਂ ਉਹਨੂੰ ਬਿਆਨ ਦੇਣ ਦੀ ਹਾਲਤ ਵਿੱਚ ਲਿਆਂਦਾ ਜਾਂਦਾ। ਦੋਸ਼ੀਆਂ ਨੂੰ ਫੜ ਕੇ ਥਾਣੇ ਡੱਕਿਆ ਜਾਂਦਾ। ਪਰ ਥਾਣੇਦਾਰ ਇਹ ਸਭ ਕੁਝ ਕਰਨ ਦੀ ਥਾਂ ਅਕਾਲੀ ਆਗੂਆਂ ਨਾਲ ਗਿੱਟ-ਮਿੱਟ ਕਰਕੇ ਮੁੜ ਗਿਆ।

ਸਾਰੀ ਗੱਲ ਦਾ ਖੇਤ ਮਜ਼ਦੂਰ ਆਗੂਆਂ ਨੂੰ ਪਤਾ ਲੱਗਣ 'ਤੇ ਉਹਨਾਂ ਵੱਲੋਂ ਤੇ ਮਾਪਿਆਂ ਵੱਲੋਂ ਜਦ ਅਗਲੇ ਦਿਨ ਕੁੜੀ ਨੂੰ ਮੁਕਤਸਰ ਦੇ ਸਰਕਾਰੀ ਹਸਪਤਾਲ ਲਿਜਾਇਆ ਗਿਆ ਤਾਂ ਡਾਕਟਰਾਂ ਤੇ ਸਿਵਲ ਸਰਜਨ ਵੱਲੋਂ ਵੀ ਹਮਦਰਦੀ ਕਰਨ ਦੀ ਥਾਂ ਕੁੜੀ ਨੂੰ ਦਾਖਲ ਕਰਨ ਤੋਂ ਹੀ ਜਵਾਬ ਦੇ ਦਿੱਤਾ। ਅਖੇ ਪੁਲਿਸ ਤੋਂ ਬਿਨਾ ਤਾਂ ਅਸੀਂ ਕੁੜੀ ਨੂੰ ਦਾਖਲ ਹੀ ਨਹੀਂ ਕਰ ਸਕਦੇ। ਮਜ਼ਦੂਰ ਆਗੂਆਂ ਤੇ ਪੱਤਰਕਾਰਾਂ ਨੇ ਘੰਟੇ ਭਰ ਦੀ ਜੱਦੋਜਹਿਦ ਤੋਂ ਬਾਅਦ ਹੀ ਕੁੜੀ ਨੂੰ ਦਾਖਲ ਕਰਵਾਇਆ। ਇਸ ਤੋਂ ਬਾਅਦ ਵੀ ਪੁਲਸ ਕਈ ਘੰਟਿਆਂ ਪਿੱਛੋਂ ਹੀ ਹਸਪਤਾਲ ਪਹੁੰਚੀ। ਇਸੇ ਕਰਕੇ 24 ਤਾਰੀਖ ਦੀ ਸਵੇਰ ਨੂੰ ਵਾਪਰੀ ਇਸ ਵਾਰਦਾਤ ਦਾ ਪਰਚਾ 25 ਦੀ ਸ਼ਾਮ ਨੂੰ ਹੀ ਕੱਟਿਆ ਗਿਆ।

ਪਰ ਇਹਦੇ ਵਿੱਚ ਵੀ ਪੁਲਿਸ ਦੀ ਦੋਸ਼ੀਆਂ ਨਾਲ ਮਿਲੀਭੁਗਤ ਜੱਗ ਜ਼ਾਹਰ ਹੋ ਗਈ। ਕੁੜੀ ਦੇ ਲਿਖੇ ਬਿਆਨਾਂ ਮੁਤਾਬਕ ਪੁਲਿਸ ਨੇ ਨਾ ਤਾਂ ਦੋਸ਼ੀਆਂ ਉੱਤੇ ਕੁੜੀ ਨੂੰ ਧੱਕੇ ਨਾਲ ਚੁੱਕ ਕੇ ਲਿਜਾਣ ਵਾਲੀ ਅਗਵਾ ਦੀ ਧਾਰਾ ਹੀ ਲਾਈ ਤੇ ਨਾ ਹੀ ਤਿੰਨ ਜਣਿਆਂ ਵੱਲੋਂ ਵਰਤਾਏ ਇਸ ਕਹਿਰ ਕਰਕੇ ਸਮੂਹਿਕ ਬਲਾਤਕਾਰ ਨਾਲ ਸਬੰਧਤ ਬਣਦੀ ਧਾਰਾ ਹੀ ਲਾਈ ਗਈ। ਕਿਉਂਕਿ ਇਹਨਾਂ ਧਾਰਾਵਾਂ ਤਹਿਤ ਦੋਸ਼ੀਆਂ ਦੇ ਅਪਰਾਧ ਤੇ ਸਜ਼ਾ ਵਿੱਚ ਕਈ ਗੁਣਾਂ ਵਾਧਾ ਹੁੰਦਾ ਸੀ। ਏਦੂੰ ਵੀ ਅੱਗੇ 8-9 ਦਿਨ ਲੰਘਣ ਪਿੱਛੋਂ ਵੀ ਪੁਲਸ ਨੇ ਕਿਸੇ ਦੋਸ਼ੀ ਨੂੰ ਗ੍ਰਿਫਤਾਰ ਨਹੀਂ ਕੀਤਾ।

ਪੁਲਿਸ ਦੋਸ਼ੀਆਂ ਦੇ ਪੱਖ 'ਚ ਕਿਉਂ?

ਇੱਕ ਗੱਲ ਤਾਂ ਇਹ ਹੈ ਕਿ ਪੀੜਤ ਕੁੜੀ ਗਰੀਬ ਪਰਿਵਾਰ ਨਾਲ ਸਬੰਧਤ ਹੈ। ਜਦੋਂ ਕਿ ਦੋਸ਼ੀਆਂ ਵਿੱਚ ਜਾਗੀਰਦਾਰ ਪਰਿਵਾਰ ਦਾ ਮੁੰਡਾ ਵੀ ਸ਼ਾਮਲ ਹੈ ਤੇ ਬਾਕੀ ਦੋ ਵੀ ਸਮਾਜ 'ਚ ਉੱਚਾ ਰੁਤਬਾ ਰੱਖਦੇ ਘਰਾਂ ਨਾਲ ਸਬੰਧ ਰੱਖਦੇ ਹਨ। ਇਸ ਲਈ ਦੋਸ਼ੀ ਪੈਸੇ ਵਾਲੇ ਹੋਣ ਕਾਰਨ ਪੁਲਿਸ ਆਪਣੇ ਜਮਾਂਦਰੂ ਸੁਭਾਅ ਕਾਰਨ ਹੀ ਤਕੜਿਆਂ ਦੇ ਪੱਖ ਵਿੱਚ ਭੁਗਤ ਰਹੀ ਹੈ। ਪਰ ਗੱਲ ਏਦੂੰ ਵੀ ਅੱਗੇ ਲੱਗਦੀ ਹੈ। ਇਹ ਜ਼ਿਲ੍ਹਾ ਬਾਦਲਾਂ ਦਾ ਜੱਦੀ ਜ਼ਿਲ੍ਹਾ ਹੈ। ਇੱਥੇ ਬਾਦਲ ਪਰਿਵਾਰ ਤੇ ਉਹਦੇ ਨੇੜਲਿਆਂ ਦੇ ਕਹੇ ਬਿਨਾ ਸਰਕਾਰੀ ਤੰਤਰ ਦਾ ਪੱਤਾ ਨਹੀਂ ਹਿੱਲਦਾ। ਮੁੱਖ ਮੰਤਰੀ ਬਾਦਲ ਖੁਦ ਕਹਿੰਦੇ ਆ ਕਿ ਮੈਨੂੰ ਤਾਂ ਧਰਤੀ 'ਤੇ ਤੁਰੀ ਫਿਰਦੀ ਕੀੜੀ ਦਾ ਵੀ ਪਤਾ ਹੁੰਦਾ ਹੈ। ਫਿਰ ਇਹਨਾਂ ਦਿਨਾਂ ਵਿੱਚ ਤਾਂ ਬਾਦਲ ਸਾਹਿਬ ਸੰਗਤ ਦਰਸ਼ਨਾਂ ਕਰਕੇ ਖੁਦ ਇਸ ਇਲਾਕੇ ਵਿੱਚ ਹੀ ਤਿੰਨ ਦਿਨ ਫਿਰਦੇ ਰਹੇ ਹਨ। ਇਹਨਾਂ ਦਿਨਾਂ ਵਿੱਚ ਗੰਧੜ ਮਾਮਲੇ ਦਾ ਅਖਬਾਰਾਂ ਵਿੱਚ ਰੌਲ ਵੀ ਪੈਂਦਾ ਰਿਹਾ। ਇਸ ਕਰਕੇ ਇਹ ਗੱਲ ਪੱਕ ਨਾਲ ਹੀ ਕਹਿ ਸਕਦੇ ਹਾਂ ਕਿ ਇਹ ਮਾਮਲਾ ਬਾਦਲ ਸਾਹਿਬ ਦੇ ਵੀ ਧਿਆਨ 'ਚ ਹੈ। ਪਰ ਜੇਕਰ ਪੁਲਿਸ ਫਿਰ ਵੀ ਦੋਸ਼ੀਆਂ ਨੂੰ ਨਹੀਂ ਫੜਦੀ ਤਾਂ ਇਹ ਗੱਲ ਇਹ ਹੀ ਚੁਗਲੀ ਕਰਦੀ ਹੈ ਕਿ ਦੋਸ਼ੀਆਂ ਨੂੰ ਆਹਲਾ ਅਕਾਲੀ ਲੀਡਰਾਂ ਦੀ ਹਮਾਇਤ ਮਿਲੀ ਹੋਈ ਹੈ।

ਇਹ ਗੱਲ ਜੱਗ ਜ਼ਾਹਰ ਹੋ ਚੁੱਕੀ ਹੈ ਕਿ ਬਾਦਲਾਂ ਦੇ ਰਾਜ ਵਿੱਚ ਲੋਕਾਂ ਦੀਆਂ ਧੀਆਂ-ਭੈਣਾਂ ਨੂੰ ਅਗਵਾ ਕਰਕੇ ਬਲਾਤਕਾਰ ਕਰਨ ਵਾਲਿਆਂ 'ਚ ਕਿਤੇ ਤਾਂ ਅਕਾਲੀ ਲੀਡਰ ਆਪ ਹੀ ਸ਼ਾਮਲ ਹਨ ਤੇ ਕਿਤੇ ਦੋਸ਼ੀਆਂ ਦੀ ਨੰਗੀ ਚਿੱਟੀ ਹਮਾਇਤ ਵਿੱਚ ਭੁਗਤ ਰਹੇ ਹਨ। ਕੁਝ ਚਿਰ ਪਹਿਲਾਂ ਹੀ ਫਰੀਦਕੋਟ ਵਿੱਚ ਮਾਪਿਆਂ ਦੇ ਸਿਰ ਤੇ ਬਾਹਾਂ ਭੰਨ ਕੇ ਅਤੇ ਗੋਲੀਆਂ ਚਲਾ ਕੇ ਘਰੋਂ ਅਗਵਾ ਕੀਤੀ ਕੁੜੀ ਦੇ ਦੋਸ਼ੀਆਂ ਨੂੰ ਬਚਾਉਂਦੇ ਬਚਾਉਂਦੇ ਤਾਂ ਬੀਬੇ ਚਿਹਰੇ ਵਾਲੇ,  ਘਾਗ ਅਤੇ ਚਤੁਰ ਸਿਆਸਦਾਨ ਵਜੋਂ ਮਸ਼ਹੂਰ ਮੁੱਖ ਮੰਤਰੀ ਸਿਰੀ ਬਾਦਲ ਖੁਦ ਵੀ ਕਾਲਖ਼ ਦਾ ਟਿੱਕਾ ਲਵਾ ਬੈਠੇ ਸਨ। ਛੇਹਰਟਾ ਵਿੱਚ ਅਕਾਲੀ ਲੀਡਰ ਦੇ ਹੱਥੋਂ ਆਪਣੀ ਧੀ ਦੀ ਪਤ ਬਚਾਉਂਦੇ ਥਾਣੇਦਾਰ ਨੂੰ ਦਿਨ ਦਿਹਾੜੇ ਇਹਨਾਂ ਅਕਾਲੀਆਂ ਨੇ ਭਰੇ ਬਾਜ਼ਾਰ ਕਤਲ ਕਰ ਦਿੱਤਾ ਸੀ। ਹੁਣ ਪੱਤੋ ਹੀਰਾ ਸਿੰਘ (ਮੋਗਾ) ਦੇ ਕਿਸਾਨ ਪਰਿਵਾਰ ਦੀ ਨਾਬਾਲਗ ਕੁੜੀ ਨੂੰ ਮਾਪਿਆਂ ਨੂੰ ਕੁੱਟ ਕੇ ਅਗਵਾ ਕਰਨ ਦੀ ਘਟਨਾ ਵਿੱਚ ਕਾਂਗਰਸੀ ਤੋਂ ਅਕਾਲੀ ਲੀਡਰ ਬਣੇ ਸਾਬਕਾ ਐਮ.ਐਲ.ਏ. ਦੇ ਮੁੰਡੇ ਦਾ ਨਾਂ ਬੋਲਦਾ ਹੈ, ਜਿਸ ਕਰਕੇ ਪੁਲਿਸ ਦੋਸ਼ੀਆਂ ਨੂੰ ਨਹੀਂ ਫੜ ਰਹੀ। ਇਸ ਲਈ ਇਹ ਘਟਨਾਵਾਂ ਵੀ ਇਸੇ ਗੱਲ ਵੱਲ ਇਸ਼ਾਰਾ ਕਰਦੀਆਂ ਹਨ ਕਿ ਗੰਧੜ ਵਿੱਚ ਵਾਪਰੇ ਅਗਵਾ ਤੇ ਬਲਾਤਕਾਰ ਕਾਂਡ ਦੇ ਦੋਸ਼ੀਆਂ ਨੂੰ ਵੀ ਹੁਕਮਰਾਨ ਧਿਰ ਦੀ ਮਿਲੀ ਸ਼ਹਿ ਕਾਰਨ ਹੀ ਪੁਲਸ ਉਹਨਾਂ ਨੂੰ ਫੜਨ ਤੋਂ ਕੰਨੀ ਕਤਰਾ ਰਹੀ ਹੈ।

ਇਨਸਾਫ ਲੈਣ ਲਈ ਡਟਵਾਂ ਮੋਢਾ ਲਾਓ

ਭੈਣੋਂ ਤੇ ਭਰਾਓ,

ਇੱਕ ਪਾਸੇ ਪੁਲਿਸ ਦੋਸ਼ੀਆਂ ਦਾ ਪੱਖ ਪੂਰ ਰਹੀ ਹੈ। ਦੂਜੇ ਪਾਸੇ ਦੋਸ਼ੀਆਂ ਦੇ ਨੇੜਲਿਆਂ ਵੱਲੋਂ ਪੀੜਤ ਮਜ਼ਦੂਰ ਪਰਿਵਾਰ ਕੋਲ ਸਮਝੌਤੇ ਲਈ ਗੇੜਾ ਬੰਨ੍ਹ ਰੱਖਿਆ ਹੈ। ਉਹ ਅਖੌਤੀ ਇੱਜਤ ਦਾ ਵਾਸਤਾ ਪਾ ਕੇ ਤੇ ਲੱਖਾਂ ਰੁਪਏ ਦੇ ਲਾਲਚ ਦੇ ਕੇ ਉਹਨਾਂ ਦੀ ਗਰੀਬੀ ਦਾ ਮਜ਼ਾਕ ਉਡਾ ਰਹੇ ਹਨ। ਪੈਸੇ ਦੇ ਜ਼ੋਰ ਇੱਜਤ ਤੇ ਜਮੀਰ ਖਰੀਦਣ ਦੀ ਕੋਸ਼ਿਸ਼ ਰਾਹੀਂ ਪੀੜਤ ਕੁੜੀ ਤੇ ਮਾਪਿਆਂ ਦੇ ਜ਼ਖਮਾਂ 'ਤੇ ਲੂਣ ਭੁੱਕ ਰਹੇ ਹਨ। ਪਰ ਸਭ ਕੁੱਝ ਦੇ ਬਾਵਜੂਦ ਮਜ਼ਦੂਰ ਪਰਿਵਾਰ ਡਟਿਆ ਖੜਾ ਹੈ। ਉਸ ਨੂੰ ਇਨਸਾਫ ਲਈ ਤੁਹਾਡੇ ਸਭਨਾਂ ਦੇ ਸਾਥ ਤੇ ਹੱਲਾਸ਼ੇਰੀ ਦੀ ਲੋੜ ਹੈ। ਸਾਡਾ ਸਭਨਾਂ ਦਾ ਸਾਥ ਤੇ ਏਕਾ ਹੀ ਦੋਸ਼ੀਆਂ ਨੂੰ ਸੀਖਾਂ ਪਿੱਛੇ ਡੱਕਣ ਲਈ ਪੁਲਸ ਨੂੰ ਮਜਬੂਰ ਕਰ ਸਕਦਾ ਹੈ। ਦੋਸ਼ੀਆਂ ਦਾ ਪੱਖ ਪੂਰਦੇ ਥਾਣੇਦਾਰ ਤੇ ਸਿਆਸੀ ਲੀਡਰਾਂ ਦੇ ਕੰਨਾਂ ਨੂੰ ਹੱਥ ਲਵਾ ਸਕਦਾ ਹੈ। ਪੀੜਤ ਬੱਚੀ ਤੇ ਮਾਪਿਆਂ ਦੇ ਰਿਸਦੇ ਜਖ਼ਮਾਂ 'ਤੇ ਮੱਲਮ ਬਣ ਸਕਦਾ ਹੈ।

ਭੈਣੋਂ ਤੇ ਭਰਾਵੋ, ਗੱਲ ਸਿਰਫ ਗੰਧੜ ਪਿੰਡ ਵਿੱਚ ਨਾਬਾਲਗ ਕੁੜੀ ਨਾਲ ਜਬਰ ਜਨਾਹ ਦੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਵਾ ਕੇ ਸਜ਼ਾ ਦੁਆਉਣ ਤੱਕ ਹੀ ਸੀਮਤ ਨਹੀਂ। ਜੇਕਰ ਅੱਜ ਐਡਾ ਵੱਡਾ ਕੁਕਰਮ ਕਰਕੇ ਦੋਸ਼ੀ ਸੁੱਕੇ ਬਚ ਜਾਂਦੇ ਹਨ, ਉਹਨਾਂ ਦਾ ਪੱਖ ਪੂਰਦੇ ਥਾਣੇਦਾਰ ਨੂੰ ਕੋਈ ਸੇਕ ਨਹੀਂ ਲੱਗਦਾ ਤਾਂ ਅਜਿਹੇ ਗੁੰਡਾ ਟੋਲਿਆਂ ਨੂੰ ਹੋਰ ਵੀ ਮੂੰਹ ਪਊਗਾ। ਉਹ ਜਦੋਂ ਮਰਜ਼ੀ ਤੇ ਜੀਹਦੀ ਮਰਜ਼ੀ ਧੀਅ-ਭੈਣ ਨੂੰ ਹੱਥ ਪਾਉਣਗੇ। ਇਹਨਾਂ ਦੀ ਦੇਖਾ-ਦੇਖੀ ਹੋਰਨਾਂ ਗੁੰਡਿਆਂ ਨੂੰ ਹੱਲਾਸ਼ੇਰੀ ਮਿਲੂਗੀ।

ਇਹ ਖਤਰਾ ਸਿਰਫ ਗਰੀਬ ਖੇਤ ਮਜ਼ਦੂਰਾਂ ਲਈ ਹੀ ਨਹੀਂ, ਹਰ ਘਰ ਦੀ ਧੀ ਭੈਣ ਵਾਸਤੇ ਹੈ। ਬੱਸ ਫਰਕ ਤਾਂ ਸਿਰਫ ਏਨਾ ਹੀ ਹੈ ਕਿ ਗਰੀਬਾਂ ਦੀਆਂ ਧੀਆਂ ਭੈਣਾਂ ਨੂੰ ਹੱਥ ਪਾਉਣਾ ਇਹਨਾਂ ਲਈ ਥੋੜ੍ਹਾ ਸੌਖਾ ਹੁੰਦਾ ਹੈ। ਪਰ ਅਜਿਹੇ ਟੋਲੇ ਬਖਸ਼ਦੇ ਕਿਸੇ ਨੂੰ ਨਹੀਂ। ਇਸ ਲਈ ਇਹ ਮਾਮਲਾ ਕਿਸੇ ਵਿਸ਼ੇਸ਼ ਜਾਤਪਾਤ ਦਾ ਨਹੀਂ, ਸਮੂਹ ਲੋਕਾਂ ਦੀਆਂ ਧੀਆਂ ਭੈਣਾਂ ਦੀ ਰਾਖੀ ਦਾ ਮਸਲਾ ਹੈ। ਇਹ ਰਾਖੀ ਪੁਲਿਸ, ਹਕੂਮਤ ਜਾਂ ਕਿਸੇ ਲੋਕ-ਦੋਖੀ ਸਿਆਸੀ ਲੀਡਰ ਨੇ ਨਹੀਂ ਕਰਨੀ, ਸਗੋਂ ਅਕਾਲੀ ਦਲ ਸਮੇਤ ਸਭੈ ਲੋਕ ਵਿਰੋਧੀ ਸਿਆਸੀ ਪਾਰਟੀਆਂ ਨੌਜਵਾਨਾਂ ਨੂੰ ਰੁਜ਼ਗਾਰ ਦੇਣ ਦੀ ਥਾਂ ਉਹਨਾਂ ਨੂੰ ਨਸ਼ਿਆਂ ਦੇ ਮੂੰਹ ਧੱਕਣ ਤੇ ਕਾਮੁਕ ਬਿਰਤੀ ਨੂੰ ਉਕਸਾਉਣ ਦੇ ਰਾਹੀਂ ਗੁੰਡਾ ਗਰੋਹਾਂ ਵਿੱਚ ਬਦਲਣ ਦੇ ਕੁਕਰਮ 'ਚ ਲੱਗੀਆਂ ਹੋਈਆਂ ਹਨ, ਤਾਂ ਜੋ ਇਹਨਾਂ ਹਕੂਮਤਾਂ ਦੀਆਂ ਲੋਕ ਵਿਰੋਧੀ ਨੀਤੀਆਂ ਕਾਰਨ ਬੇਰੁਜ਼ਗਾਰੀ, ਗਰੀਬੀ, ਮਹਿੰਗਾਈ ਤੇ ਕਰਜ਼ਿਆਂ ਆਦਿ ਦੀ ਚੱਕੀ ਵਿੱਚ ਪਿਸਦੇ ਇਹ ਨੌਜੁਆਨ ਹੱਕੀ ਸੰਘਰਸ਼ਾਂ ਦੇ ਰਾਹ ਪੈ ਕੇ ਹਕੂਮਤਾਂ ਲਈ ਮੁਸੀਬਤਾਂ ਪੈਦਾ ਕਰਨ ਦੀ ਥਾਂ ਇਹਨਾਂ ਪਾਰਟੀਆਂ ਦਾ ਹੱਥਾ ਬਣ ਜਾਣ। ਇਹਨਾਂ ਪਾਰਟੀਆਂ ਲਈ ਵੋਟਾਂ ਮੌਕੇ ਬੂਥਾਂ 'ਤੇ ਕਬਜ਼ੇ ਕਰਨ ਵਾਲੇ ਗਰੋਹਾਂ ਦਾ ਅੰਗ ਬਣ ਜਾਣ। ਇਸ ਲਈ ਪੁਲਸ, ਸਰਕਾਰ ਤੇ ਲੋਕ ਵਿਰੋਧੀ ਸਿਆਸੀ ਪਾਰਟੀਆਂ ਤੋਂ ਧੀਆਂ ਭੈਣਾਂ ਦੀ ਰਾਖੀ ਦੀ ਝਾਕ ਛੱਡ ਕੇ ਖੁਦ ਹੀ ਅੱਗੇ ਆਉਣ ਦੀ ਲੋੜ ਹੈ। ਫਰੀਦਕੋਟ 'ਚ ਵਾਪਰੇ ਕਾਂਡ ਮੌਕੇ ਵੀ ਹਰਕਤ 'ਚ ਆਈ ਸ਼ਹਿਰੀ ਤੇ ਪੇਂਡੂ ਵਿਸ਼ਾਲ ਜਨਤਾ ਦੀ ਤਾਕਤ ਹੀ ਰਾਜਭਾਗ ਦੀ ਬੁੱਕਲ 'ਚ ਛੁਪੇ ਬੈਠੇ ਗੁੰਡਾ ਗਰੋਹ ਨੂੰ ਧੂਹ ਕੇ ਜੇਲ੍ਹ ਦੀਆਂ ਸਲਾਖਾਂ ਪਿੱਛੇ ਪਹੁੰਚਾਉਣ ਦਾ ਸਾਧਨ ਬਣੀ ਸੀ। ਇੱਥੇ ਵੀ ਏਸੇ ਤਾਕਤ ਨੇ ਹੀ ਕੰਮ ਆਉਣਾ ਹੈ।

ਸੋ ਆਓ! ਗੁੰਡਾ ਗਰੋਹ ਦੇ ਹੱਥੋਂ ਬਲਾਤਕਾਰ ਦਾ ਸ਼ਿਕਾਰ ਹੋਈ ਗੰਧੜਾਂ ਦੀ ਨਾਬਾਲਗ ਕੁੜੀ ਤੇ ਪਰਿਵਾਰ ਦਾ ਇਕੱਠੇ ਹੋ ਕੇ ਦੁੱਖ ਵੰਡਾਈਏ। ਉਹਨਾਂ ਦੀ ਬਾਂਹ ਫੜੀਏ, ਉਹਨਾਂ ਦੀ ਢੋਈ ਬਣੀਏ। ਔਰਤਾਂ ਤੇ ਕੁੜੀਆਂ ਨੂੰ ਵਿਸ਼ੇਸ਼ ਕਰਕੇ ਅੱਗੇ ਆਉਣ ਦੀ ਲੋੜ ਹੈ।

ਸੋ ਪਿੰਡ ਪਿੰਡ ਇਕੱਠ ਮਾਰੋ। ਬਲਾਤਕਾਰੀਆਂ, ਪੁਲਸ ਤੇ ਹਕੂਮਤ ਨੂੰ ਲਾਹਣਤਾਂ ਪਾਓ। ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਵਾਉਣ, ਕੇਸ ਵਿੱਚ ਬਣਦੀਆਂ ਧਾਰਾਵਾਂ ਲਵਾਉਣ, ਦੋਸ਼ੀਆਂ ਦਾ ਪੱਖ ਪੂਰਨ ਵਾਲੇ ਥਾਣੇਦਾਰ 'ਤੇ ਕਾਰਵਾਈ ਕਰਵਾਉਣ ਅਤੇ ਪੀੜਤ ਕੁੜੀ ਨੂੰ ਮੁਆਵਜਾ ਦੁਆਉਣ ਲਈ ਲੱਕ ਬੰਨ੍ਹ ਕੇ ਅੱਗੇ ਆਓ।

6 ਤੋਂ 8 ਫਰਵਰੀ ਤੱਕ ਲੱਖੇਵਾਲੀ ਥਾਣੇ ਅੱਗੇ ਦਿੱਤੇ ਜਾ ਰਹੇ ਧਰਨੇ ਵਿੱਚ ਵਹੀਰਾਂ ਘੱਤ ਕੇ ਪਹੁੰਚੋ।

ਸਭਨਾਂ ਇਨਸਾਫਪਸੰਦ ਲੋਕਾਂ ਅਤੇ ਜਥੇਬੰਦੀਆਂ ਨੂੰ ਹਮਾਇਤ ਦੀ ਵਿਸ਼ੇਸ਼ ਅਪੀਲ ਕੀਤੀ ਜਾਂਦੀ ਹੈ।

ਵੱਲੋਂ:ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ (ਇਲਾਕਾ ਮੁਕਤਸਰ)

ਪ੍ਰਕਾਸ਼ਨ ਮਿਤੀ: 1 ਫਰਵਰੀ, 2014

ਪ੍ਰਕਾਸ਼ਕ: ਕਾਕਾ ਸਿੰਘ ਖੁੰਡੇਹਲਾਲ ਸੰਪਰਕ: 94630 43761