ਮਜ਼ਦੂਰ ਘੋਲਾਂ ਦਾ ਸਿਰੜੀ ਜਰਨੈਲ ਸੀ ਨਾਨਕ ਸਿੰਘ ਸਿੰਘੇਵਾਲਾ: ਨਸਰਾਲੀ

ਨਾਨਕ ਸਿੰਘ ਸਿੰਘੇਵਾਲਾ ਨੂੰ ਮਜ਼ਦੂਰਾਂ-ਕਿਸਾਨਾਂ ਵੱਲੋਂ ਸ਼ਰਧਾਂਜਲੀਆਂ ਭੇਟ

ਮਜ਼ਦੂਰ ਘੋਲਾਂ ਦਾ ਸਿਰੜੀ ਜਰਨੈਲ ਸੀ ਨਾਨਕ ਸਿੰਘ ਸਿੰਘੇਵਾਲਾ: ਨਸਰਾਲੀ

ਲੰਬੀ, 12 ਸਤੰਬਰ -ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਜਿਲਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪ੍ਰਧਾਨ ਨਾਨਕ ਸਿੰਘ ਦੇ ਸ਼ਰਧਾਂਜਲੀ ਮੌਕੇ ਅੱਜ ਇਕ ਵਿਸ਼ਾਲ ਇਕੱਠ ਵੱਲੋਂਂ ਉਨਾਂ ਸਲਾਮੀ ਭੇਂਟ ਕੀਤੀ ਗਈ। ਨਾਨਕ ਸਿੰਘ ਨੂੰ ਸ਼ਰਧਾ ਦੇ ਫੁੱਲ ਭੇਂਟ ਕਰਨ ਲਈ ਅੱਜ ਖੇਤ ਮਜ਼ਦੂਰ, ਕਿਸਾਨ, ਔਰਤਾਂ, ਬਿਜਲੀ ਕਾਮੇ, ਨੌਜਵਾਨ, ਆਰ.ਐਮ.ਪੀ. ਡਾਕਟਰ ਤਰਕਸ਼ੀਲ ਕਾਮੇ ਤੇ ਅਧਿਆਪਕ ਬੇਹੱਦ ਵੱਡੀ ਤਦਾਦ ਵਿੱਚ ਪਹੁੰਚੇ ਹੋਏ ਸਨ। ਇਸ ਮੌਕੇ ਸ੍ਰੀ ਨਾਨਕ ਸਿੰਘ ਨੂੰ ਸ਼ਰਧਾਂਜਲੀ ਭੇਂਟ ਕਰਦਿਆਂ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਸੂਬਾ ਪ੍ਰਧਾਨ ਜੋਰਾ ਸਿੰਘ ਨਸਰਾਲੀ, ਜਨਰਲ ਸਕੱਤਰ ਲਛਮਣ ਸਿੰਘ ਸੇਵੇਵਾਲਾ ਤੇ ਸੂਬਾ ਵਿਤ  ਸਕੱਤਰ ਹਰਮੇਸ਼ ਮਾਲੜੀ ਨੇ ਆਖਿਆ ਕਿ ਸ੍ਰੀ ਨਾਨਕ ਸਿੰਘ ਖੇਤ ਮਜ਼ਦੂਰ ਲਹਿਰ ਦਾ ਨਿਧੱੜਕ ਯੋਧਾ ਸੀ। ਉਹ ਜਿਲੇ ਵਿੱਚ ਸਿਰੜੀ, ਲੰਬੇ ਤੇ ਖਾੜਕੂ ਘੋਲਾਂ ਦਾ ਮੋੜੀ ਗੱਡ ਸੀ। ਉਸਨੇ ਘਰ ਦੀ ਘੋਰ ਗਰੀਬੀ ਤੇ ਅਨਪੜ ਹੋਣ ਦੇ ਬਾਵਜੂਦ 18 ਸਾਲ ਪੇਸ਼ਾਵਰ ਖੇਤ ਮਜਦੂਰ ਆਗੂ ਦੀਆਂ ਜਿੰਮੇਵਾਰੀਆਂ ਨਿਭਾਈਆਂ। ਉਸਨੇ ਖੇਤ ਮਜ਼ਦੂਰਾਂ ਨੂੰ ਜਗੀਰੂ ਲੁੱਟ ਦਾਬੇ, ਜਾਤਪਾਤੀ ਵਿਤਕਰੇ ਤੋਂ ਮੁਕਤੀ ਦੁਆਉਣ ਅਤੇ ਮਜ਼ਦੂਰਾਂ ਦੀ ਆਰਥਿਕ ਸਮਾਜਿਕ ਤੇ ਰਾਜਨੀਤਕ ਬਰਾਬਰੀ ਲਈ ਬੇਹੱਦ ਕਠਿਨ ਘਾਲਣਾ ਘਾਲੀ। ਉਸਦੀ ਅਗਵਾਈ ਵਿੱਚ ਖੇਤ ਮਜ਼ਦੂਰ ਜਥੇਬੰਦੀ ਵੱਲੋਂ ਅਨੇਕਾਂ ਘੋਲ ਲੜਕੇ ਜਿੱਤਾਂ ਪ੍ਰਾਪਤ ਕੀਤੀਆਂ ਗਈਆਂ ਅਤੇ ਖੇਤ ਮਜ਼ਦੂਰਾਂ ਅੰਦਰ ਆਪਣੀ ਹਸਤੀ ਤੇ ਤਾਕਤ ਦਾ ਨਵਾਂ ਅਹਿਸਾਸ ਭਰਿਆ ਗਿਆ। ਨਾਨਕ ਸਿੰਘ ਨੂੰ ਸ਼ਰਧਾਂਜਲੀ ਦੇਣ ਲਈ ਵਿਸ਼ੇਸ਼ ਤੌਰ ਤੇ ਪਹੁੰਚੇ ਭਾਰਤੀ ਕਿਸਾਨ ਯੂਨੀਅਨ (ਏਕਤਾ) ਦੇ ਸੂਬਾ ਪ੍ਰਧਾਨ ਜੋਗਿੰਦਰ ਸਿੰਘ ਉਗਰਾਹਾਂ ਨੇ ਕਿਹਾ ਕਿ ਨਾਨਕ ਸਿੰਘ ਨੇ ਜਿਲੇ ਵਿੱਚ ਕਿਸਾਨਾਂ ਤੇ ਖੇਤ ਮਜ਼ਦੂਰਾਂ ਦੀ ਜੋਟੀ ਪਵਾਉਣ ਲਈ ਵਿਸ਼ੇਸ਼ ਉਪਰਾਲੇ ਕੀਤੇ। ਉਨਾਂ ਆਖਿਆ ਕਿ ਅੱਜ ਜਦੋਂ ਸਰਕਾਰਾਂ ਵਲੋਂ ਸਾਮਰਾਜੀਆਂ , ਜਗੀਰਦਾਰ ਤੇ ਕਾਰਪੋਰੇਟ ਘਰਾਣਿਆਂ ਪੱਖੀ ਤੇ ਲੋਕਾਂ ਦਾ ਕੰਘਾ ਕਰਨ ਵਾਲੀਆਂ ਆਰਥਿਕ ਨੀਤੀਆਂ ਲਾਗੂ ਕਰਨ ਲਈ ਕਾਲੇ ਕਾਨੂੰਨ ਘੜਨ ਵਗੈਰਾ ਕਦਮਾਂ ਰਾਹੀਂ ਲੋਕਾਂ ਦੀ ਜੁਬਾਨਬੰਦੀ ਕੀਤੀ ਜਾ ਰਹੀ ਹੈ ਤਾਂ ਨਾਨਕ ਸਿੰਘ ਵਰਗੇ ਨਿਧੜੱਕ ਤੇ ਸੂਝਵਾਨ ਆਗੂਆਂ ਦੀ ਬੇਹੱਦ ਲੋੜ ਹੈ। ਉਨਾ ਐਲਾਨ ਕੀਤਾ ਕਿ ਸਾਡੀ ਜਥੇਬੰਦੀ ਖੇਤ ਮਜਦੂਰਾਂ ਨਾਲ ਸਾਂਝ ਨੂੰ ਹੋਰ ਵੀ ਗੂੜੀ ਤੇ ਪੱਕੀ ਕਰਕੇ ਹਕੂਮਤ ਦੇ ਆਰਥਿਕ ਤੇ ਜਾਬਰ ਧਾਂਵੇ ਦਾ ਮੂੰਹ ਮੋੜਨ ਲਈ ਕੋਈ ਕਸਰ ਨਹੀਂ ਛੱਡੇਗੀ। ਉਨਾਂ ਕਿਹਾ ਕਿ ਖੇਤ ਮਜ਼ਦੂਰ , ਕਿਸਾਨਾਂ ਤੇ ਆਮ ਲੋਕਾਂ ਦੀ ਮੁਕਤੀ ਲਈ ਘੋਲਾਂ ਨੂੰ ਹੋਰ ਤੇਜ ਕਰਨਾ ਹੀ ਨਾਨਕ ਸਿੰਘ ਨੂੰ ਸੱਚੀ ਸ਼ਰਧਾਂਜਲੀ ਹੈ। ਇਸ ਮੌਕੇ ਲੋਕ ਮੋਰਚਾ ਪੰਜਾਬ ਦੇ ਜਨਰਲ ਸਕੱਤਰ ਜਗਮੇਲ ਸਿੰਘ ਨੇ ਕਿਹਾ ਕਿ ਨਾਨਕ ਸਿੰਘ ਸ਼ਹੀਦ ਭਗਤ ਦੇ ਸੁਪਨਿਆਂ ਦਾ ਸਮਾਜ ਸਿਰਜਣ ਲਈ ਜੂਝ ਰਹੇ ਕਾਫਲੇ ਦਾ ਸੰਗੀ ਸੀ। ਉਨਾਂ ਕਿਹਾ ਕਿ ਮੌਜੂਦਾ ਪ੍ਰਬੰਧਾਂ ਵਿੱਚ ਸਿਹਤ ਸਹੂਲਤਾਂ ਦੀ ਘਾਟ ਹੀ ਨਾਨਕ ਸਿੰਘ ਵਰਗੇ ਅਣਮੋਲ ਆਗੂਆ ਦੀ ਮੌਤ ਲਈ ਜਿੰਮੇਵਾਰ ਹੈ। ਉਨਾਂ ਕਿਹਾਕਿ ਮੌਜੂਦਾ ਲੋਕ ਦੋਖੀ, ਆਰਥਿਕ, ਸਮਾਜਿਕ ਤੇ ਰਾਜਨੀਤਕ ਨਿਜਾਮ ਨੂੰ ਬਦਲ ਕੇ ਲੋਕ ਪੱਖੀ ਸਮਾਜ ਦੀ ਸਿਰਜਣਾ ਲਈ ਅੱਗੇ ਵਧਣਾ ਹੀ ਨਾਨਕ ਸਿੰਘ ਨੂੰ ਸੱਚੀ ਸ਼ਰਧਾਂਜਲੀ ਹੈ। ਇਸ ਮੌਕੇ ਸ਼ਰਧਾਂਜਲੀ ਸਮਾਗਮ ਤਿਆਰੀ ਕਮੇਟੀ ਸਿੰਘਵੇਾਲਾ, ਫਤੂਹੀਵਾਲਾ ਵੱਲੋਂ ਗੁਰਪਾਸ਼ ਸਿੰਘ, ਟੀ.ਐਸ.ਯੂ., ਮੈਡੀਕਲ  ਪਰੈਕਟੀਸ਼ਨਰ ਐਸੋਸੀਏਸ਼ਨ ਦੇ ਪ੍ਰਧਾਨ ਡਾ. ਅਮਰਿੰਦਰ ਸਰਾਂ, ਨੌਜਵਾਨ ਭਾਰਤ ਸਭਾ ਦੇ ਪਾਵੇਲ ਕੁੱਸਾ, ਤਰਕਸ਼ੀਲ ਆਗੂ ਰਾਮ ਸਵਰਨ ਲੱਖੇਵਾਲੀ, ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਜਿਲਾ ਕਾਰਜਕਾਰੀ ਪ੍ਰਧਾਨ ਗੁਰਜੰਟ ਸਿੰਘ ਸਾਉਕੇ, ਸੁੱਖਾ ਸਿੰਘ, ਗੁਰਮੇਲ ਕੌਰ, ਤਰਸੇਮ ਸਿੰਘ ਖੁੰਡੇ ਹਲਾਲ ਤੋਂ ਇਲਾਵਾ ਨਾਨਕ ਸਿੰਘ ਦੀ ਬੇਟੀ ਮਮਤਾ ਰਾਣੀ ਤੇ ਸ਼ਮਿੰਦਰ ਕੌਰ ਨੇ ਵੀ ਨਾਨਕ ਸਿੰਘ ਨੂੰ ਸ਼ਰਧਾਂਜਲੀ ਭੇਂਟ ਕੀਤੀ।

ਕੰਮੀਆਂ ਦੇ ਵਿਹੜੇ ਦਾ ਮਘਦਾ ਸੂਰਜ -ਨਾਨਕ ਸਿੰਘ

12 ਸਤੰਬਰ ਨੂੰ ਸ਼ਰਧਾਂਜਲੀ ਸਮਾਗਮ 'ਤੇ ਵਿਸ਼ੇਸ਼

 ਕੰਮੀਆਂ ਦੇ ਵਿਹੜੇ ਦਾ ਮਘਦਾ ਸੂਰਜ ਸੀ-ਨਾਨਕ ਸਿੰਘ

ਪਿੰਡ ਸਿੰਘੇਵਾਲਾ (ਇਲਾਕਾ ਲੰਬੀ) ਵਿਖੇ ਮਾਤਾ ਵੀਰੋ ਕੌਰ ਤੇ ਪਿਤਾ ਸੀਤਲ ਸਿੰਘ ਦੇ ਘਰ ਜਨਮੇ ਸ਼੍ਰੀ ਨਾਨਕ ਸਿੰਘ ਖੇਤ ਮਜਦੂਰਾਂ ਦੇ ਹਰਮਨ ਪਿਆਰੇ ਤੇ ਨਿਧੜੱਕ ਆਗੂ ਸਨ। ਉਹਨਾਂ ਆਪਣੀ ਜਿੰਦਗੀ ਦੇ ਪੂਰੇ 18 ਸਾਲ ਦੱਬੇ ਕੁਚਲੇ ਖੇਤ ਮਜਦੂਰਾਂ ਦੀ ਆਰਥਿਕ ਬੇਹਤਰੀ, ਖੁਸ਼ਹਾਲੀ ਤੇ ਮਾਨ-ਸਨਮਾਨ ਦੀ ਬਹਾਲੀ ਲਈ ਸੰਘਰਸ. ਦੇ ਲੇਖੇ ਲਾਏ।

           ਉਹ ਕਰੀਬ ਡੇਢ ਦਹਾਕਾ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਜਿਲਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪ੍ਰਧਾਨ ਰਹੇ। ਉਹਨਾਂ ਦੀ ਅਗਵਾਈ ਵਿੱਚ ਪਿੰਡ , ਇਲਾਕੇ ਤੇ ਜਿਲੇ ਦੇ ਖੇਤ ਮਜਦੂਰਾਂ  ਵੱਲੋਂ ਜਗੀਰੂ ਲੁਟ ਤੇ ਦਾਬੇ ਅਤੇ ਜਾਤਪਾਤੀ ਵਿਤਕਰੇ ਖਿਲਾਫ. ਅਨੇਕਾਂ ਸਫ਼ਲ ਘੋਲ ਲੜੇ ਤੇ ਜਿੱਤੇ ਗਏ। ਉਹਨਾਂ ਦੀ ਕਰਮ ਭੂਮੀ ਵੱਡੀ ਜਗੀਰਦਾਰੀ ਤੇ ਹਕੂਮਤੀ ਹਲਕੇ ਦਾ ਗੜ ਹੋਣ ਕਾਰਨ ਇੱਥੇ ਖੇਤ ਮਜ਼ਦੂਰਾਂ ਨੂੰ ਜਥੇਬੰਦ ਕਰਨਾ ਬੇਹੱਦ ਕਠਿਨ ਤੇ ਗੁੰਝਲਦਾਰ ਕਾਰਜ ਸੀ।  ਸ੍ਰੀ ਨਾਨਕ ਸਿੰਘ ਨੇ ਜਦੋਂ 1996 ਵਿੱਚ ਆਪਣੇ ਪਿੰਡ ਤੇ ਇਲਾਕੇ ਦੇ ਖੇਤ ਮਜ਼ਦੂਰਾਂ ਨੂੰ ਜਥੇਬੰਦ ਕਰਨਾ ਸ਼ੁਰੂ ਕੀਤਾ ਤਾਂ ਜਗੀਰਦਾਰਾਂ ਵੱਲੋਂ ਜਿੱਥੇ ਡਾਂਗ ਸੋਟੀ ਦੀ ਵਰਤੋਂ ਵੀ ਕੀਤੀ ਗਈ, ਉੱਥੇ ਖੇਤ ਮਜ਼ਦੂਰਾਂ ਦਾ ਆਰਥਿਕ ਤੇ ਸਮਾਜਿਕ ਬਾਈਕਾਟ ਕਰਨ ਵਰਗੇ ਹੱਥ ਕੰਡੇ ਵੀ ਅਪਣਾਏ ਗਏ।  ਹਕੂਮਤੀ ਹੱਲਾਸ਼ੇਰੀ ਕਾਰਨ ਪੁਲਿਸ ਵੱਲੋਂ ਮਜ਼ਦੂਰਾਂ ਦੀ ਕੁੱਟਮਾਰ, ਝੂਠੇ ਕੇਸਾਂ, ਗ੍ਰਿਫਤਾਰੀਆਂ ਤੇ ਇਕੱਠਾਂ ਉੱਪਰ ਪਾਬੰਦੀਆਂ ਮੜਨ ਵਰਗੇ ਕਦਮਾਂ ਦੀ ਹਨੇਰੀ ਲਿਆਂਦੀ ਗਈ।  ਪਰ ਨਾਨਕ ਸਿੰਘ ਦੀ ਧੜੱਲੇਦਾਰ ਤੇ ਸੂਝਵਾਨ ਅਗਵਾਈ ਸਦਕਾ ਖੇਤ ਮਜਦੂਰਾਂ ਵੱਲੋਂ ਦੋ ਸਾਲ ਲੰਮੀ ਤੇ ਕਠਿਨ ਲੜਾਈ ਲੜਕੇ ਆਖਰ ਜਥੇਬੰਦ ਹੋਣ ਦਾ ਹੱਕ ਹਾਸਲ ਕਰ ਲਿਆ।

ਨਾਨਕ ਸਿੰਘ ਦੀ ਅਗਵਾਈ ਚ ਖੇਤ ਮਜਦੂਰਾਂ ਦੀ ਜਥੇਬੰਦੀ ਵੱਲੋਂ ਮਜਦੂਰਾਂ ਨੂੰ ਨਜਾਇਜ ਹਿਰਾਸਤ ਵਿੱਚ ਰੱਖਣ, ਕੁੱਟਮਾਰ ਕਰਨ ਤੇ ਜਾਤ-ਪਾਤ ਪਰਖਣ ਵਾਲੇ ਕਈ ਪੁਲਿਸ ਅਫ਼ਸਰਾਂ ਤੋਂ ਕਈ ਵਾਰ ਜਨਤਕ ਮਾਫੀਆਂ ਮੰਗਵਾਈਆਂ ਤੇ ਜੁਰਮਾਨੇ ਵਸੂਲੇ ਗਏ। ਇਉ ਉਸ ਵੱਲੋ ਖੇਤ ਮਜ਼ਦੂਰਾਂ ਅੰਦਰ ਨਵੇ ਵਿਚਾਰਾਂ ਦਾ ਅਗਾਜ. ਕਰਨ ਚ ਮੋਹਰੀ  ਭੂਮਿਕਾ ਨਿਭਾਈ ਗਈ । ਰਿਹਾਇਸ਼ੀ ਪਲਾਟਾਂ, ਰੁਜ਼ਗਾਰ ਤੇ ਸਰਕਾਰੀ ਰਿਆਇਤਾਂ ਸਹੂਲਤਾਂ ਲਾਗੂ ਕਰਾਉਣ ਲਈ ਤੇ ਮਜ਼ਦੂਰ ਘਰਾਂ ਦੇ ਉੱਜਾੜੇ ਵਿਰੁੱਧ ਉਸਦੀ ਅਗਵਾਈ ਤੇ ਜਿਲੇ ਅੰਦਰ ਅਨੇਕਾਂ ਵਾਰ ਮੋਰਚੇ ਲਾਏ ਤੇ ਜਿੱਤੇ ਗਂਏ। ਉਸ ਵੱਲੋ ਖੇਤ ਮਜ਼ਦੂਰਾਂ ਦੇ ਸਥਾਨਕ ਤੇ ਰੋਜ਼ਮਰਾਂ ਦੇ ਮਸਲਿਆਂ ਉੱਤੇ ਜਿੱਥੇ ਘੋਲਾਂ ਦੀ ਅਗਵਾਈ ਕੀਤੀ ਗਈ ਉੱਥੇ ਮਜ਼ਦੂਰਾਂ ਦੀ ਆਰਥਿਕ, ਸਮਾਜਿਕ ਤੇ ਰਾਜਨੀਤਿਕ ਬਰਾਬਰੀ ਲਈ  ਜ਼ਮੀਨ ਦੀ ਵੰਡ ਦੇ ਮੁੱਦੇ ਨੂੰ ਜ਼ੋਰ ਨਾਲ ਉਭਾਰਿਆ ਗਿਆ। ਕਈ ਪਿੰਡਾਂ ਵਿੱਚ ਪੰਚਾਇਤੀ ਜ਼ਮੀਨ ਵਿੱਚੋਂ ਦਲਿਤਾਂ ਦੇ ਬਣਦੇ ਤੀਜੇ ਹਿੱਸੇ ਦੇ ਹੱਕ ਨੂੰ ਮਨਾਇਆ ਤੇ ਲਾਗੂ ਕਰਾਇਆ ਗਿਆ। ਉਸਦੇ ਕਦਮਾਂ ਦੀ ਤਾਲ ਤੇ ਗਰਜ਼ਵੀਂ ਲਲਕਾਰ ਸੰਘਰਸ਼ ਦੇ ਮੈਦਾਨ ਵਿੱਚ ਜੂਝ ਰਹੇ ਖੇਤ ਮਜ਼ਦੂਰਾਂ ਦੇ ਕਦਮਾਂ ਵਿੱਚ ਬਿਜਲੀਆਂ ਭਰਦੀ ਸੀ । ਸਿਰ ਤਲੀ ਤੇ ਧਰ ਕੇ ਜੂਝ ਮਰਨ ਦਾ ਹੌਸਲਾ ਬਖ਼ਸ਼ਦੀ ਸੀ।

ਅਗਸਤ 2008 ਵਿੱਚ ਮੁੱਖ ਮੰਤਰੀ ਵੱਲੋਂ ਕੀਤਾ ਸਮਝੌਤਾ ਲਾਗੂ ਕਰਾਉਣ ਲਈ ਉਸਦੀ ਅਗਵਈ ਹੇਠ ਬਾਦਲ ਵਿਖੇ ਧਰਨਾ ਦੇਣ ਜਾ ਰਹੇ ਸੈਂਕੜੇ ਮਜ਼ਦੂਰ ਮਰਦ ਔਰਤਾਂ ਦੇ ਕਾਫਲੇ ਉੱਤੇ ਖਿਓਵਾਲੀ ਵਿਖੇ ਭਾਰੀ ਪੁਲਿਸ ਲਾਠੀਚਾਰਜ ਦਾ ਖੇਤ ਮਜ਼ਦੂਰਾਂ ਵੱਲੋ ਜਿਸ ਦ੍ਰਿੜਤਾ ਤੇ ਦਲੇਰੀ ਨਾਲ ਟਾਕਰਾ ਕੀਤਾ ਗਿਆ ਉਹ ਆਪਣੇ ਆਪ ਵਿੱਚ ਵਿਲੱਖਣ ਮਿਸਾਲ ਸੀ। ਇਹ ਨਾਨਕ ਸਿੰਘ ਦੀ ਅਗਵਾਈ ਵਾਲੀ ਖੇਤ ਮਜ਼ਦੂਰ ਜਥੇਬੰਦੀ ਹੀ ਹੇੈ ਜਿਸਦੀ ਵਿਸ਼ਾਲ ਤਾਕਤ ਤੇ ਤਪਤੇਜ ਸਦਕਾ ਮੁੱਖ ਮੰਤਰੀ ਦੇ ਕਾਫ਼ਲਿਆਂ ਨੂੰ ਵੀ ਰਾਹ ਬਦਲਣਾ ਪੈੇਂਦਾ ਰਿਹਾ ਹੈ।

ਉਸਨੇ ਖੇਤ ਮਜ਼ਦੂਰਾਂ, ਕਿਸਾਨਾਂ, ਬਿਜਲੀ ਕਾਮਿਆਂ, ਬੇਰੁਜ਼ਗਾਰਾਂ ਤੇ ਪੇਂਡੂ ਡਾਕਟਰਾਂ ਨਾਲ ਸਾਂਝ ਉਸਾਰਨ ਲਈ ਵੀ ਨਿੱਗਰ ਯੋਗਦਾਨ ਪਾਇਆ। ਉਸਨੇ ਖੇਤ ਮਜ਼ਦੂਰਾਂ ਨੂੰ ਗਦਰੀ ਬਾਬਿਆਂ ਤੇ ਸ਼ਹੀਦ ਭਗਤ ਸਿੰਘ ਦੇ ਵਿਚਾਰਾਂ ਨਾਲ ਜੋੜਨ ਲਈ ਵੀ ਵਿਸ਼ੇਸ਼ ਉਪਰਾਲੇ ਕੀਤੇ। ਘਰ ਵਿੱਚਂ ਘੋਰ ਗਰੀਬੀ ਦੇ ਬਾਵਜ਼ੂਦ ਉਸਨੇ 18 ਵਰੇ ਪੇਸ਼ਾਵਰ ਖੇਤ ਮਜ਼ਦੂਰ ਆਗੂ ਵਜੋਂ ਜਿੰਮੇਵਾਰੀਆਂ ਨਿਭਾਈਆਂ। ਅੱਤ ਦੀ ਆਰਥਿਕ ਮੰਦਹਾਲੀ ਦੇ ਚਲਦਿਆਂ ਉਸਦੀ ਪਤਨੀ ਬਿਮਲਾ ਦੇਵੀ ਨੇ ਚਾਰ ਬੱਚਿਆਂ ਨੂੰ ਪਾਲਣ ਪੋਸ਼ਣ ਦੀ ਜਿੰਮੇਵਾਰੀ ਆਪਣੇ ਮੋਢਿਆਂ ਤੇ ਚੱਕ ਕੇ ਨਾਨਕ ਸਿੰਘ ਦਾ ਅੰਤ ਤੱਕ ਸਾਥ ਨਿਭਾਇਆ।

ਇਹ ਉਸਦੀ ਖੇਤ ਮਜ਼ਦੂਰ ਲਹਿਰ ਪ੍ਰਤੀ ਬੇਗਰਜ਼ ਭਾਵਨਾ ਨਾਲ ਸੇਵਾ ਕਰਨ ਦਾ ਨਮੂਨਾ ਸੀ ਕਿ ਜਦ ਪਿੰਡ ਵਿੱਚ ਪਲਾਟਾਂ ਲਈ ਅਨੇਕਾਂ ਲੋੜਵੰਦ ਪਰਿਵਾਰਾਂ ਨੂੰ ਛੱਡ ਕੇ ਮੁੱਖ ਮੰਤਰੀ ਸ: ਬਾਦਲ  ਦੇ ਭਰਾਤਾ ਸ਼੍ਰੀ ਗੁਰਦਾਸ ਸਿੰਘ ਬਾਦਲ ਵੱਲੋਂ 1997 ਵਿੱਚ ਉਸਨੂੰ ਇਕੱਠ ਦੌਰਾਨ ਪਲਾਟ ਵਾਲਾ ਸਰਟੀਫਿਕੇਟ ਦਿੱਤਾ ਗਿਆ ਤਾਂ ਉਸਨੇ  ਇੰਕੱਠ ਵਿੱਚ ਹੀ ਸਰਟੀਫਿਕੇਟ ਦੇ ਟੁਕੜੇ ਕਰਕੇ ਸ਼੍ਰੀ ਬਾਦਲ ਦੇ ਹੱਥ ਫੜਾ ਦਿੱਤੇ। ਆਖਿਰ 3 ਸਤੰਬਰ 2014 ਨੂੰ ਉਹ 52 ਵਰਿਆਂ ਦੀ ਉਮਰ ਵਿੱਚ ਫੇਫੜਿਆਂ, ਕਾਲੇ ਪੀਲੀਏ ਤੇ ਸ਼ੂਗਰ ਦੀ ਗੰਭੀਰ ਬਿਮਾਰੀ ਕਾਰਨ ਪਰਿਵਾਰ ਦੇ ਖੇਤ ਮਜ਼ਦੂਰ ਲਹਿਰ ਨੂੰ ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਕਾਲਜ ਫਰੀਦਕੋਟ ਵਿਖੇ ਵਿਛੋੜਾ ਦੇ ਗਏ। ਉਸਦੀ ਅੰਤਿਮ ਯਾਤਰਾ ਮੌਕੇ ਬੇਹੱਦ ਭਾਰੀ ਇਕੱਠ ਵੱਲੋਂ ਉਸਨੂੰ ਜਥੇਬੰਦੀ ਦੇ ਸੂਹੇ ਝੰਡੇ ਵਿੱਚ ਲਪੇਟ ਕੇ ਨਾਹਰਿਆਂ ਦੀ ਗੂੰਜ ਵਿੱਚ ਵਿਦਾਇਗੀ ਦਿੱਤੀ ਗਈ ।

ਅੱਜ 12 ਸਤੰਬਰ ਨੂੰ ਉਸਦੇ ਸ਼ਰਧਾਂਜਲੀ ਸਮਾਗਮ ਮੌਕੇ ਉਸਨੂੰ ਸੂਹੀ ਸਲਾਮ ਦੇਣ ਲਈ ਹਜ਼ਾਰਾਂ ਖੇਤ ਮਜ਼ਦੂਰ, ਕਿਸਾਨ, ਬਿਜਲੀ ਕਾਮੇ, ਤਰਕਸ਼ੀਲ ਤੇ ਹੋਰ ਸੰਘਰਸ਼ਸ਼ੀਲ ਕਾਮੇ ਉਸਦੇ ਜੱਦੀ ਪਿੰਡ ਸਿੰਘੇਵਾਲਾ ਵਿਖੇ ਪੁੱਜਣਗੇ।

ਲਛਮਣ ਸਿੰਘ ਸੇਵੇਵਾਲਾ

94170-79170

ਸੂਬਾ ਜਨਰਲ ਸਕੱਤਰ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਪੰਜਾਬ

ਸਰਕਾਰ ਤੇ ਪੁਲਸ ਵੱਲੋਂ ਅਗਵਾਕਾਰ ਤੇ ਬਲਾਤਕਾਰੀਆਂ ਦੀ ਪੁਸ਼ਤ-ਪਨਾਹੀ, ਪੀੜਤ ਜੇਲੀਂ ਡੱਕੇ।

ਗੰਧੜ ਕਾਂਡ :

ਸਰਕਾਰ ਤੇ ਪੁਲਸ ਵੱਲੋਂ ਅਗਵਾਕਾਰ ਤੇ ਬਲਾਤਕਾਰੀਆਂ ਦੀ ਪੁਸ਼ਤ-ਪਨਾਹੀ, ਪੀੜਤ ਜੇਲੀਂ ਡੱਕੇ।

ਜਮਹੂਰੀਅਤ ਦੇ ਦੰਦ ਜੋਕਾਂ ਲਈ ਹੋਰ ਤੇ ਲੋਕਾਂ ਲਈ ਹੋਰ।

(ਜਗਮੇਲ ਸਿੰਘ ਜਨਰਲ ਸਕੱਤਰ, ਲੋਕ ਮੋਰਚਾ ਪੰਜਾਬ   Mobile: 9417224822)

26 ਮਈ, ਜਦੋਂ ਦਿੱਲੀ ਵਿਚ, ਨਵੇਂ ਬਣੇ ਪ੍ਰਧਾਨ ਮੰਤਰੀ ਦੇ ਸਹੁੰਚੁੱਕ ਸਮਾਗਮ 'ਤੇ 'ਜਮਹੂਰੀਅਤ' ਦੇ ਨਾਟਕ ਦੇ ਮੰਚਨ ਦੀਆਂ ਤਿਆਰੀਆਂ ਚੱਲ ਰਹੀਆਂ ਸਨ, ਐਨ ਉਦੋਂ ਹੀ, ਬਠਿੰਡਾ (ਪੰਜਾਬ) ਵਿਚ, ਪੁਲਸ ਜ਼ੋਨ ਬਠਿੰਡਾ ਦੇ ਪਿੰਡ ਗੰਧੜ (ਮੁਕਤਸਰ) ਦੀ ਮਜਦੂਰ ਬੱਚੀ ਦੇ ਅਗਵਾਕਾਰਾਂ ਤੇ ਬਲਾਤਕਾਰੀਆਂ ਨੂੰ 4 ਮਹੀਨੇ (24 ਜਨਵਰੀ ਤੋਂ 26 ਮਈ) ਬੀਤ ਜਾਣ 'ਤੇ ਵੀ ਗ੍ਰਿਫਤਾਰ ਨਾ ਕੀਤੇ ਜਾਣ ਦੇ ਰੋਸ ਵਜੋਂ ਗ੍ਰਿਫਤਾਰ ਕਰਨ ਦੀ ਮੰਗ ਨੂੰ ਲੈ ਕੇ ਪੰਜਾਬ ਖੇਤ ਮਜਦੂਰ ਯੂਨੀਅਨ ਤੇ ਭਾਰਤੀ ਕਿਸਾਨ ਯੂਨੀਅਨ (ਉਗਰਾਹਾਂ) ਦੀ ਅਗਵਾਈ ਵਿਚ ਆਈ.ਜੀ. (ਪੁਲਸ) ਦੇ ਬਠਿੰਡਾ ਦਫਤਰ ਮੂਹਰੇ ਰੋਸ ਧਰਨਾ ਮਾਰਨ ਲਈ ਬਠਿੰਡੇ ਆ ਰਹੇ ਮਜਦੂਰਾਂ-ਕਿਸਾਨਾਂ ਨੂੰ ਫੜ ਫੜ ਜੇਲੀ ਡੱਕਿਆ ਜਾ ਰਿਹਾ ਸੀ। ਪੀੜਤ ਪਰਿਵਾਰ ਅਤੇ ਮਜਦੂਰ-ਕਿਸਾਨ ਸੰਗਠਨਾਂ ਵੱਲੋਂ ਹਰ ਰੋਜ਼ ਧਰਨੇ ਲਈ ਜਥੇ ਆ ਰਹੇ ਹਨ ਤੇ ਸਰਕਾਰ ਗ੍ਰਿਫਤਾਰੀਆਂ ਕਰ ਰਹੀ ਹੈ। ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਨ ਦੀ ਥਾਂ ਗ੍ਰਿਫਤਾਰੀ ਦੀ ਮੰਗ ਕਰਨ ਵਾਲੇ ਮਜਦੂਰਾਂ-ਕਿਸਾਨਾਂ ਦੀ ਫੜੋ-ਫੜੀ ਨੇ ਦੁਨੀਆਂ ਦੀ ਸਭ ਤੋ ਵੱਡੀ ਕਹੀ ਜਾਂਦੀ ਜਮਹੂਰੀਅਤ ਨੂੰ ਇਕ ਵਾਰ ਫੇਰ ਝੂਠੀ ਜਮਹੂਰੀਅਤ ਵਜੋਂ ਬੇਪਰਦ ਕਰ ਦਿੱਤਾ ਹੈ। ਇਸ ਜਮਹੂਰੀਅਤ ਦੇ ਦੰਦ ਜੋਕਾਂ ਲਈ ਹੋਰ ਤੇ ਲੋਕਾਂ ਲਈ ਹੋਰ ਨੂੰ ਤਸਦੀਕ ਕਰ ਦਿੱਤਾ ਹੈ। ਜਿਵੇਂ ਕੇਂਦਰੀ ਵਜਾਰਤ ਵਿਚ ਨਵੇਂ ਬਣੇ 45 ਮੰਤਰੀਆਂ ਵਿਚੋਂ 42 ਪ੍ਰਤੀਸ਼ਤ ਮੰਤਰੀਆਂ ਉਪਰ ਅਪਰਾਧਿਕ ਮਾਮਲੇ ਦਰਜ ਹੋਏ ਹੋਣ 'ਤੇ ਵੀ ਗ੍ਰਿਫਤਾਰ ਨਾ ਕਰਨਾ, ਉਲਟਾ ਸਰਕਾਰੀ ਕੁਰਸੀ, ਮਹਿਕਮਾ ਤੇ ਸੁਰੱਖਿਆ ਦਿੱਤੇ ਜਾਣਾ ਭਾਜਪਾ ਤੇ ਉਸਦੇ ਗਠਜੋੜ ਵੱਲੋਂ ਦਿੱਤੇ ਹਕੂਮਤੀ ਥਾਪੜੇ ਨੂੰ ਪ੍ਰਗਟ ਕਰਦਾ ਹੈ, ਉਵੇਂ ਇਥੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਨਾ ਕੀਤੇ ਜਾਣ ਨਾਲ ਦੋਸ਼ੀਆਂ ਨੂੰ ਅਕਾਲੀ-ਭਾਜਪਾ ਸਰਕਾਰ ਵੱਲੋਂ ਦਿੱਤੀ ਹਰੀ ਝੰਡੀ ਨੂੰ ਹੀ ਨੰਗਿਆ ਕਰਦਾ ਹੈ। ਪੰਜਾਬ ਅੰਦਰ ਪਹਿਲਾਂ ਵੀ ਅਗਵਾਕਾਰਾਂ ਬਲਾਤਕਾਰੀਆਂ, ਗੁੰਡਾ ਗਰੋਹਾਂ ਨੂੰ ਸ਼ਹਿ ਤੇ ਸਰਪ੍ਰਸਤੀ ਦੇਣ ਕਾਰਨ ਸਰਕਾਰ ਆਪਣੇ ਮੱਥੇ ਕਲੰਕੀ ਟਿੱਕਾ ਲਗਵਾ ਚੁੱਕੀ ਹੋਣ ਦੇ ਬਾਵਜੂਦ ਵੀ ਇਥੇ ਫਿਰ ਉਨ੍ਹਾਂ ਪਾਪਾਂ ਦੀ ਭਾਗੀ ਹੀ ਬਣ ਰਹੀ ਹੈ। ਇਥੋਂ ਦੇ ਰਾਜਨੀਤਕ, ਆਰਥਿਕ, ਸਮਾਜਿਕ ਤਾਣੇਬਾਣੇ ਦੇ ਗੈਰ-ਜਮਹੂਰੀ, ਔਰਤ- ਵਿਰੋਧੀ ਤੇ ਗਰੀਬ -ਵਿਰੋਧੀ ਹੋਣ ਦੀ ਲਗਾਤਾਰ ਹੁੰਦੀ ਆ ਰਹੀ ਪੁਸ਼ਟੀ ਨੇ ਇਹ ਗੱਲ ਉਭਾਰ ਕੇ ਸਾਹਮਣੇ ਲਿਆਂਦੀ ਹੈ ਕਿ ਆਬਾਦੀ ਦੇ ਵੱਡੇ ਹਿੱਸੇ ਨੂੰ ਅਧਿਕਾਰਾਂ, ਪੁੱਗਤ ਤੇ ਵੁੱਕਤ ਤੋਂ ਵਾਂਝੇ ਕੀਤੇ ਹੋਣ ਪਿਛੇ ਇਥੇ ਜਮੀਨ-ਜਾਇਦਾਦ ਤੇ ਪੂੰਜੀ ਉੱਤੇ ਮੁੱਠੀ ਭਰ ਜੋਕਾਂ ਦਾ ਗਲਬਾ ਹੈ। ਜੀਹਦੇ ਜੋਰ 'ਤੇ ਇਥੋਂ ਦਾ ਸਮੁੱਚਾ ਰਾਜ-ਪ੍ਰਬੰਧ ਉਨ੍ਹਾਂ ਦੀ ਮੁੱਠੀ ਵਿਚ ਹੈ। ਉਨ੍ਹਾਂ ਨੇ ਹੀ ਇਥੋਂ ਦੇ ਰਾਜਕੀ ਤੇ ਸਮਾਜੀ ਤਾਣੇ-ਬਾਣੇ ਨੂੰ ਗੈਰ- ਜਮਹੂਰੀ ਵਲਾਵੇ ਵਿਚ ਵਲਿਆ ਹੋਇਆ ਹੈ। ਏਸੇ ਕਰਕੇ ਇਥੋਂ ਦਾ ਕਨੂੰਨ, ਪੁਲਸ, ਅਦਾਲਤ, ਮਹਿਕਮੇ ਸਭ ਉਨ੍ਹਾਂ ਦੇ ਇਸ਼ਾਰੇ 'ਤੇ ਚਲਦੇ ਹਨ।

ਬੱਚੀ ਦੇ ਮਾਪਿਆਂ ਦੀ ਗਰੀਬੀ ਅਤੇ ਗੁੰਡਾ ਟੋਲੇ ਦੀ ਅਮੀਰੀ ਤੇ ਸਿਆਸੀ ਸ਼ਹਿ ਨੇ ਹੀ ਇਹ ਕਹਿਰ ਵਰਤਾਇਆ ਹੈ। ਗਰੀਬੀ ਅਤੇ ਗਰੀਬੀ ਕਰਕੇ ਬਣਦੀ ਮੁਥਾਜਗੀ, ਗਰੀਬ ਦੀ ਤਾਕਤ ਕਮਜੋਰ ਕਰਦੀ ਹੈ ਤੇ ਸੁਰੱਖਿਆ ਘਟਾਉਂਦੀ ਹੈ। ਇਸਦੇ ਉਲਟ ਅਮੀਰੀ ਤੇ ਸਿਆਸੀ ਸਹਿ ਤਾਕਤ ਵਧਾਉਂਦੀ ਹੈ ਤੇ ਹਮਲਾਵਰ ਬਣਾਉਂਦੀ ਹੈ। ਇਸ ਗੁੰਡਾ ਟੋਲੇ ਨੇ ਨਾ ਸਿਰਫ ਇਹ ਅਗਵਾ ਤੇ ਸਮੂਹਿਕ ਬਲਾਤਕਾਰ ਦਾ ਕਹਿਰ ਢਾਹਿਆ ਹੈ, ਇਸਤੋਂ ਵੀ ਅੱਗੇ ਵਧਕੇ ਪੀੜਤ ਪਰਿਵਾਰ ਨੂੰ ਚੁੱਪ ਕਰਵਾਉਣ ਵਾਸਤੇ 'ਸਮਝੌਤੇ' ਲਈ ਦਬਾਅ ਪਾਇਆ ਹੈ?

ਰਾਜ-ਪ੍ਰਬੰਧ ਦਾ ਕੋਈ ਵੀ ਅੰਗ, ਜਦੋਂ ਕੋਈ ਕਦਮ ਚੱਕਦਾ ਹੈ ਜਾਂ ਮੂੰਹੋਂ ਬੋਲਦਾ ਹੈ ਤਾਂ ਉਸਦਾ ਔਰਤ-ਵਿਰੋਧੀ ਤੇ ਗਰੀਬ- ਵਿਰੋਧੀ ਗੈਰ- ਜਮਹੂਰੀ ਵਿਵਹਾਰ ਸਾਹਮਣੇ ਆਏ ਬਿਨਾਂ ਨਹੀਂ ਰਹਿੰਦਾ। ਅਨੇਕਾਂ ਸਾਧ੍ - ਬਾਬੇ ਵੀ ਔਰਤ ਵਿਰੋਧੀ ਭੜਾਸ ਕੱਢਦੇ ਰਹਿੰਦੇ ਹਨ।

ਇਸ ਮਾਮਲੇ ਵਿਚ ਪੁਲਸ-ਪ੍ਰਸਾਸਨ ਦਾ ਰੋਲ ਕੋਈ ਵੱਖਰਾ ਨਹੀਂ ਹੈ। ਪਹਿਲੇ ਹੀ ਦਿਨ, ਪਿੰਡ ਜਾ ਕੇ, ਬੱਚੀ ਨੂੰ ਮਿਲਕੇ, ਬਿਆਨ ਸੁਣ ਕੇ ਵੀ ਥਾਣੇਦਾਰ ਨੇ ਦੋਸ਼ੀਆਂ ਖਿਲਾਫ਼ ਪਰਚਾ ਦਰਜ ਨਹੀਂ ਕੀਤਾ। ਜਥੇਬੰਦ ਸੰਘਰਸ਼ ਦੇ ਜ਼ੋਰ ਪਰਚਾ ਹੋਇਆ। ਪਰ ਬਣਦੀਆਂ ਵਾਜਬ ਧਾਰਾਵਾਂ ਨਾ ਲਾਈਆਂ। ਪੰਦਰਾਂ ਦਿਨ ਬਾਦ ਦੋ ਦੋਸ਼ੀਆਂ ਦੀ ਗ੍ਰਿਫਤਾਰੀ ਵੀ ਧਰਨੇ ਨਾਲ ਹੋਈ। ਚਾਰ ਮਹੀਨੇ ਬੀਤ ਜਾਣ 'ਤੇ ਵੀ ਤੀਜੇ ਦੋਸ਼ੀ ਨੂੰ ਫੜਨ ਲਈ ਪੁਲਸ ਨੇ ਕੁਝ ਨਹੀਂ ਕੀਤਾ। ਉਲਟਾ ਲੋਕਾਂ ਵਿਚ ਪੈਦਾ ਹੋਏ ਰੋਸ ਨੂੰ ਕੁਚਲਣ ਲਈ ਤਿੰਨ ਜਿਲਿਆਂ ਦੀ ਪੁਲਸ-ਫੋਰਸ ਤਾਇਨਾਤ ਕਰਕੇ ਦੋਸ਼ੀਆਂ ਦੀ ਪਿੱਠ ਥਾਪੜੀ ਹੈ।

ਇਸ ਕੇਸ ਵਿਚ ਸਾਹਮਣੇ ਆਏ ਤੱਥਾਂ ਨੇ ਸਰਕਾਰੀ ਸੇਹਤ ਸੇਵਾਵਾਂ ਦੇ ਪ੍ਰਬੰਧਕਾਂ ਦਾ ਵੀ ਕਰੂਰ ਕਿਰਦਾਰ ਸਾਹਮਣੇ ਲਿਆਂਦਾ ਹੈ। ਬੱਚੀ ਨੂੰ ਇਲਾਜ ਲਈ ਦਾਖਲ ਕਰਨ ਤੋਂ ਆਨੀ-ਬਹਾਨੀ ਜਵਾਬ ਦਿੱਤਾ ਗਿਆ। ਜਥੇਬੰਦਕ ਦਬਾਅ ਆਸਰੇ ਹੀ ਦਾਖਲਾ ਮਿਲਿਆ ਹੈ। ਮੈਡੀਕਲ ਰਿਪੋਰਟ ਦੇਣ ਤੋਂ ਟਾਲਾ ਵੱਟੀ ਰੱਖਿਆ।

ਲੋਕਾਂ ਦੇ ਦੁੱਖਾਂ ਦਰਦਾਂ ਦੇ ਦਰਦੀ ਹੋਣ ਅਤੇ 'ਨੰਨੀ ਛਾਂ' ਦੇ ਰਖਵਾਲੇ ਹੋਣ ਦਾ ਖੇਖਣ ਕਰਨ ਵਾਲੀਆਂ ਸਿਆਸੀਪਾਰਟੀਆਂ ਅਤੇ ਸਿਆਸਤਦਾਨਾਂ ਵੱਲੋਂ ਇਨ੍ਹਾਂ ਚੋਣਾਂ ਵਿਚ ਵੀ, ਇਸ ਬੱਚੀ ਨਾਲ ਦਰਦ ਸਾਂਝਾਂ ਨਾ ਕਰਕੇ ਲੋਕਾਂ ਨਾਲ ਦੁਸ਼ਮਣਾਨਾ ਰਿਸ਼ਤਾ ਕਾਇਮ ਰੱਖਿਆ ਹੈ। ਅਕਾਲੀ-ਭਾਜਪਾ ਸਰਕਾਰ ਵੱਲੋਂ ਅਗਵਾਕਾਰੀ ਤੇ ਬਲਾਤਕਾਰੀ ਗੁੰਡਾ ਗਰੋਹਾਂ ਦੀ ਪੁਸ਼ਤਪਨਾਹੀ ਕਰਨ ਤੇ ਹੱਲਾਸ਼ੇਰੀ ਦੇਣ ਦੀ ਅਪਨਾਈ ਨੀਤੀ ਨੂੰ ਇਹਨਾਂ ਚੋਣਾਂ ਵਿਚ ਥੂ-ਥੂ ਕਰਵਾ ਕੇ ਵੀ ਜਾਰੀ ਰੱਖਿਆ ਜਾ ਰਿਹਾ ਹੈ, ਉਥੇ, ਸਭ ਹਾਕਮ ਪਾਰਟੀਆਂ ਵੀ ਗੁੰਡਾ ਗਰੋਹਾਂ ਨੂੰ ਪਾਲਣ ਪੋਸ਼ਣ ਵਿਚ ਪਿੱਛੇ ਨਹੀਂ ਹਨ। ਰਾਜ ਅਤੇ ਸਰਕਾਰ ਬਣਾਉਣ ਤੇ ਚਲਾਉਣ ਅਤੇ ਸਾਮਰਾਜੀ ਨੀਤੀਆਂ ਰਾਹੀੱ ਵਿੱਢੇ ਆਰਥਿਕ ਹੱਲੇ ਨੂੰ ਲੋਕਾਂ ਸਿਰ ਮੜਨ ਲਈ ਪੁਲਸ ਫੌਜ ਦੀ ਜਾਬਰ ਤਾਕਤ ਦੇ ਨਾਲ ਇਨਾਂ ਨੇ ਗੁੰਡਾ੍-ਗਰੋਹਾਂ ਦੀ ਤਾਕਤ ਉਤੇ ਟੇਕ ਵਧਾਈ ਹੋਈ ਹੈ।

ਇਸ ਕੇਸ ਵਿਚ ਬੱਚੀ ਦੀ ਨਾ ਸੁਣਨ, ਦੋਸ਼ੀਆਂ ਨੂੰ ਗ੍ਰਿਫਤਾਰ ਨਾ ਕਰਨ ਅਤੇ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਨ ਦੀ ਮੰਗ ਕਰਨ ਵਾਲਿਆਂ ਨੂੰ ਜੇਲ੍ਹੀਂ ਡੱਕਣ ਦਾ ਸਰਕਾਰ ਤੇ ਪੁਲਸ ਵੱਲੋਂ ਅਖਤਿਆਰ ਕੀਤੇ ਜਾਬਰ ਰਵੱਈਏ, ਜਿਥੇ ਪੀੜਤ ਬੱਚੀ ਤੇ ਪ੍ਰੀਵਾਰ ਅਤੇ ਸੰਘਰਸ਼ ਕਰ ਰਹੀਆਂ ਮਜਦੂਰ-ਕਿਸਾਨ ਜਥੇਬੰਦੀਆਂ, ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਵਾਉਣ ਤੇ ਸਜਾ ਦਿਵਾਉਣ ਅਤੇ ਬੋਲਣ ਤੇ ਰੋਸ ਪ੍ਰਗਟਾਉਣ ਦੇ ਹੱਕ ਨੂੰ ਬੁਲੰਦ ਕਰਨ ਲਈ ਇਸ ਸੰਘਰਸ਼ ਨੂੰ ਜਾਰੀ ਰੱਖ ਰਹੀਆਂ ਹਨ। ਇਨ੍ਹਾਂ ਨੂੰ ਹੋਰ ਲੋਕ ਹਿੱਸਿਆਂ ਨੂੰ ਖਾਸ ਕਰਕੇ ਜਥੇਬੰਦ ਤੇ ਸੰਘਰਸ਼ਸ਼ੀਲ ਹਿੱਸਿਆਂ ਨੂੰ ਇਸ ਕੇਸ ਅਤੇ ਸਰਗਰਮੀ ਨਾਲ ਜੋੜਨ ਲਈ ਯਤਨ ਕਰਨੇ ਚਾਹੀਦੇ ਹਨ। ਉਥੇ ਹੋਰ ਸਭਨਾਂ ਸੰਘਰਸ਼ਸ਼ੀਲ ਜਥੇਬੰਦੀਆਂ, ਇਨਸਾਫ-ਪਸੰਦ ਤੇ ਜਮਹੂਰੀਅਤ ਪਸੰਦ ਸੰਗਠਨਾਂ ਤੇ ਸ਼ਕਤੀਆਂ, ਧੀਆਂ-ਭੈਣਾਂ ਦੀਆਂ ਇੱਜਤਾਂ ਦੇ ਸਾਂਝੀਵਾਲ ਅਤੇ ਗੁੰਡਾਗਰਦੀ ਨੂੰ ਨੱਥ ਪਾਉਣਾ ਚਾਹੁੰਦੇ ਸਭ ਲੋਕਹਿੱਸਿਆਂ ਨੂੰ ਇਸ ਪੀੜਤ ਬੱਚੀ ਤੇ ਪਰਿਵਾਰ ਅਤੇ ਸੰਘਰਸ਼ ਦੇ ਹੱਕ ਵਿਚ ਅਤੇ ਦਿਨੋ-ਦਿਨ ਵੱਧ ਰਹੇ ਇਸ ਗੁੰਡਾ ਰੁਝਾਨ ਤੇ ਇਸਦੀ ਪੁਸ਼ਤ-ਪਨਾਹੀ ਕਰ ਰਹੀ ਹਕੂਮਤ ਦੇ ਹੱਥ ਨੂੰ ਰੋਕਣ ਲਈ ਆਪੋ ਆਪਣੇ ਵਿੱਤ-ਸਮਰੱਥਾ ਅਨੁਸਾਰ ਹਿੱਸਾ ਪਾਈ ਕਰਨ ਲਈ ਅੱਗੇ ਆਉਣਾ ਚਾਹੀਦਾ ਹੈ। ਹੋਰ ਬਹੁਤ ਸਾਰੀਆਂ ਮਿਸਾਲਾਂ ਦੇ ਨਾਲ ਨਾਲ ਇਸ ਕੇਸ ਦੇ ਰਜਿਸਟਰ ਹੋਣ, ਬੱਚੀ ਨੂੰ ਹਸਪਤਾਲ ਵਿਚ ਦਾਖਲ ਕਰਵਾਉਣ ਅਤੇ ਦੋ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਵਾਉਣ ਵਿਚ ਕਾਮਯਾਬ ਰਹੇ ਜਥੇਬੰਦ ਸੰਘਰਸ਼ ਨੂੰ ਉਚਿਆਣ ਦੀ ਅਤੇ ਅੱਜ ਵਾਂਗ ਜਾਰੀ ਰੱਖਣ ਦੀ ਲੋੜ ਹੈ। ਇਹ ਲੜਾਈ ਆਪਾ-ਸੁਰੱਖਿਆ ਅਤੇ ਆਪਾ-ਪੁਗਾਈ ਦੀ ਲੜਾਈ ਹੈ। ਰਾਜ ਤੇ ਸਮਾਜ ਦੇ ਜਮਹੂਰੀਕਰਨ ਦੀ ਲੜਾਈ ਦਾ ਹਿੱਸਾ ਹੈ। ਜਿਹੜੀ ਇਉਂ ਕਦਮਬਕਦਮ ਅੱਗੇ ਵਧਦੀ ਹੋਈ ਸੱਚੀ ਜਮਹੂਰੀਅਤ ਸਿਰਜਣ ਵਿਚ ਹਿੱਸਾਪਾਈ ਕਰੇਗੀ।  (30 ਮਈ 2014)