StatCounter

Saturday, April 20, 2013

ਨਵੇਂ ਯੁੱਗ ਦਾ ਸਿਰਨਾਵਾਂ : ਗ਼ਦਰ ਲਹਿਰ



21 ਅਪ੍ਰੈਲ ਗ਼ਦਰ ਪਾਰਟੀ ਦੀ 100ਵੀਂ ਵਰ੍ਹੇਗੰਢ 'ਤੇ ਵਿਸ਼ੇਸ਼
ਨਵੇਂ ਯੁੱਗ ਦਾ ਸਿਰਨਾਵਾਂ : ਗ਼ਦਰ ਲਹਿਰ
—ਅਮੋਲਕ ਸਿੰਘ

ਇਤਿਹਾਸ ਦੇ ਸਫ਼ੇ 'ਤੇ ਉੱਕਰੀ ਇਨਕਲਾਬੀ ਤਵਾਰੀਖ਼ 'ਚ ਅਮਿੱਟ ਸਥਾਨ ਹੈ 21 ਅਪ੍ਰੈਲ 1913 ਦੇ ਇਤਿਹਾਸਕ ਦਿਹਾੜੇ ਦਾ। ਇਸ ਦਿਨ ਮੁਲਕ ਦੀ ਆਜ਼ਾਦੀ ਲਈ ਅਮਰੀਕਾ ਦੀ ਧਰਤੀ 'ਤੇ 'ਹਿੰਦੀ ਐਸੋਸੀਏਸ਼ਨ ਆਫ ਪੈਸੇਫਿਕ ਕੋਸਟ' ਨਾਂਅ ਦੀ ਜੱਥੇਬੰਦੀ ਦੀ ਆਧਾਰਸ਼ਿਲਾ ਰੱਖੀ ਗਈ। ਇਸ ਜੱਥੇਬੰਦੀ ਨੇ 1 ਨਵੰਬਰ 1913 ਨੂੰ 'ਗ਼ਦਰ' ਅਖ਼ਬਾਰ ਜਾਰੀ ਕੀਤਾ। ਵੱਖ-ਵੱਖ ਭਾਸ਼ਾਵਾਂ 'ਚ ਛਪਦਾ, ਵੱਖ-ਵੱਖ ਮੁਲਕਾਂ ਤੱਕ ਹਜ਼ਾਰਾਂ ਦੀ ਗਿਣਤੀ 'ਚ ਲੋਕਾਂ ਤੱਕ ਪਹੁੰਚਦਾ ਅਤੇ ਗ਼ਦਰ ਦਾ ਹੋਕਾ ਦਿੰਦਾ ਇਹ ਅਖ਼ਬਾਰ ਲੋਕਾਂ ਵਿਚ ਐਨਾ ਮਕਬੂਲ ਹੋਇਆ ਕਿ ਜੱਥੇਬੰਦੀ 'ਗ਼ਦਰ ਪਾਰਟੀ' ਦੇ ਨਾਂਅ ਨਾਲ ਜਾਣੀ ਜਾਣ ਲੱਗੀ। ਸਨਫਰਾਂਸਿਸਕੋ (ਅਮਰੀਕਾ) ਵਿਚ ਇਸ ਐਸੋਸੀਏਸ਼ਨ ਵੱਲੋਂ 'ਯੁਗਾਂਤਰ ਆਸ਼ਰਮ' ਨਾਂਅ ਦਾ ਮੁੱਖ ਦਫ਼ਤਰ ਸਥਾਪਤ ਕੀਤਾ ਗਿਆ। 'ਗ਼ਦਰ' ਅਖ਼ਬਾਰ ਨੇ ਲੋਕ ਮਨਾਂ ਉਪਰ ਅਜੇਹਾ ਜਾਦੂ ਕੀਤਾ ਕਿ 'ਯੁਗਾਂਤਰ ਆਸ਼ਰਮ' ਦੀ ਵੀ 'ਗ਼ਦਰ ਆਸ਼ਰਮ' ਵਜੋਂ ਪਹਿਚਾਣ ਬਣ ਗਈ।


                          'ਯੁਗਾਂਤਰ ਆਸ਼ਰਮ' 

ਗ਼ਦਰ ਪਾਰਟੀ ਦੇ ਬਾਨੀ ਅਹੁਦੇਦਾਰਾਂ 'ਚ ਬਾਬਾ ਸੋਹਣ ਸਿੰਘ ਭਕਨਾ ਪ੍ਰਧਾਨ, ਭਾਈ ਕੇਸਰ ਸਿੰਘ ਠੱਠਗੜ੍ਹ ਮੀਤ ਪ੍ਰਧਾਨ, ਲਾਲਾ ਹਰਦਿਆਲ ਜਨਰਲ ਸਕੱਤਰ, ਪੰਡਿਤ ਕਾਸ਼ੀ ਰਾਮ ਮੜੌਲੀ ਖਜਾਨਚੀ ਅਤੇ ਠਾਕੁਰ ਦਾਸ ਧੂਰਾ ਨੂੰ ਸਹਾਇਕ ਸਕੱਤਰ ਚੁਣਿਆ ਗਿਆ।

ਸਾਮਰਾਜੀ ਗੁਲਾਮੀ ਦੇ ਜੂਲੇ ਹੇਠ ਦੱਬੀ ਭਾਰਤੀ ਕੌਮ ਨੂੰ ਇਕ ਲੜੀ 'ਚ ਪਰੋ ਕੇ, ਆਜ਼ਾਦੀ ਦੀ ਪ੍ਰਾਪਤੀ ਲਈ ਸਫਲਤਾ ਪੂਰਵਕ ਅੰਦਾਜ਼ 'ਚ ਗ਼ਦਰ ਕਰਨ ਲਈ ਗ਼ਦਰੀ ਦੇਸ਼ ਭਗਤਾਂ ਦਾ ਆਦਰਸ਼, ਉਨ੍ਹਾਂ ਵੱਲੋਂ ਗ਼ਦਰੀ ਝੰਡੇ ਲਈ ਕੀਤੀ ਰੰਗਾਂ ਦੀ ਚੋਣ ਵਿਚੋਂ ਹੀ ਪੜ੍ਹਿਆ ਜਾ ਸਕਦਾ ਹੈ। ਉਨ੍ਹਾਂ ਨੇ ਧਰਮਾਂ, ਫਿਰਕਿਆਂ, ਬੋਲੀਆਂ, ਰੰਗ, ਨਸਲ, ਖਿੱਤੇ ਆਦਿ ਤੋਂ ਕਿਤੇ ਉਪਰ ਉਠ ਕੇ, ਵਤਨ ਦੀ ਆਜ਼ਾਦੀ ਲਈ ਸਾਂਝੀ ਤੰਦ ਮਜ਼ਬੂਤ ਕਰਨ ਦਾ ਸਾਬਤ ਕਦਮੀਂ ਰਾਹ ਚੁਣਿਆ। 'ਗ਼ਦਰ' ਅਖ਼ਬਾਰ ਉਪਰ 'ਜੇ ਚਿਤ ਪ੍ਰੇਮ ਖੇਲਨ ਕਾ ਚਾਉ, ਸਿਰ ਧਰ ਤਲੀ ਗਲੀ ਮੋਰੀ ਆਉ' ਨਾਮੀਂ ਪੰਕਤੀ ਉੱਕਰੀ ਹੁੰਦੀ ਸੀ। ਜਿਵੇਂ ਝੰਡੇ ਉਪਰ ਦੋ ਤਲਵਾਰਾਂ ਦਾ ਨਿਸ਼ਾਨ ਬਣਾਇਆ ਇਉਂ ਹੀ ਤਲਵਾਰਾਂ 'ਗ਼ਦਰ' ਅਖ਼ਬਾਰ ਉਪਰ ਛਾਪੀਆਂ ਜਾਂਦੀਆਂ। ਆਜ਼ਾਦੀ ਲਈ ਤਨ, ਮਨ, ਧਨ ਸਭ ਕੁਝ ਕੁਰਬਾਨ ਕਰਨ ਦਾ ਸੂਚਕ ਬੋਲਾਂ ਅਤੇ ਤਲਵਾਰਾਂ ਦੇ ਚਿੰਨਾਂ ਨੇ ਸੁੱਤੀ ਕੌਮ ਨੂੰ ਜਗਾਉਣ ਲਈ ਸਿਦਕਦਿਲੀ ਭਰਿਆ ਹਲੂਣਾ ਦਿੱਤਾ। ਗ਼ਦਰੀਆਂ ਦਾ ਨਿਸ਼ਾਨਾ ਸਿਰਫ ਮੌਤ ਨੂੰ ਮਖ਼ੌਲਾਂ ਕਰਨ ਤੱਕ ਹੀ ਸੀਮਤ ਨਹੀਂ ਸੀ। ਉਹ ਜ਼ਿੰਦਗੀ ਨੂੰ ਜੀਅ ਭਰ ਕੇ ਮੁਹੱਬਤ ਕਰਦੇ ਸਨ। ਪਰ ਉਹ ਜ਼ਿੰਦਗੀ ਨੂੰ ਕਦੇ ਵੀ ਅਸੂਲਾਂ ਤੋਂ ਵੱਧ ਪਿਆਰੀ ਨਹੀਂ ਸੀ ਸਮਝਦੇ। ਗ਼ਦਰ ਅਖ਼ਬਾਰ ਦੇ ਮੁੱਖ ਪੰਨੇ 'ਤੇ ਤਲਵਾਰਾਂ, ਜ਼ੰਜ਼ੀਰਾਂ 'ਚ ਜਕੜੀ ਭਾਰਤ ਮਾਂ, ਗ਼ਦਰ ਦੀ ਗੂੰਜ ਦਾ ਵੱਜਦਾ ਬਿਗਲ ਹੀ ਨਹੀਂ ਸੀ ਛਪਦਾ, ਮੁੱਖ ਪੰਨੇ 'ਤੇ ਖ਼ੂਬਸੂਰਤ ਫੁੱਲਾਂ ਦੀ ਵੇਲ ਵੀ ਛਾਪੀ ਹੁੰਦੀ ਸੀ। ਫੁੱਲਾਂ ਦੀ ਝਾਂਜਰ ਦਾ ਸੰਗੀਤ ਦਰਸਾਉਂਦਾ ਸੀ ਕਿ 'ਗ਼ਦਰ', ਯੁੱਧ, ਫਾਂਸੀਆਂ, ਜੇਲ੍ਹਾਂ ਅਤੇ ਕੁਰਬਾਨੀਆਂ ਭਰੀ ਜੱਦੋ ਜਹਿਦ ਗ਼ਦਰੀਆਂ ਦਾ ਸ਼ੌਕ ਨਹੀਂ ਸੀ ਸਗੋਂ ਵਕਤ ਵੱਲੋਂ ਉਨ੍ਹਾਂ ਜਿੰਮੇ ਲੱਗੀ ਇਤਿਹਾਸਕ ਜ਼ਿੰਮੇਵਾਰੀ ਸੀ। ਦੇਸ਼ ਦੀ ਆਜ਼ਾਦੀ, ਖੁਸ਼ਹਾਲੀ, ਬਰਾਬਰੀ ਅਤੇ ਜਮਹੂਰੀਅਤ ਲਈ 'ਗ਼ਦਰ' ਉਹਨਾਂ ਦੀ ਲਾਜ਼ਮੀ ਲੋੜ ਸੀ।

ਸਾਮਰਾਜੀ ਗ਼ੁਲਾਮੀ ਕਾਰਨ ਕਰਜ਼ਿਆਂ, ਬਿਮਾਰੀਆਂ, ਆਰਥਕ ਸਮਾਜਕ ਤੰਗੀਆਂ, ਬੇਰੁਜ਼ਗਾਰੀ ਅਤੇ ਭੁੱਖਮਰੀ ਦੇ ਝੰਬੇ ਗ਼ਰੀਬ ਘਰਾਂ ਦੇ ਮਿਹਨਤੀ, ਸਿਰੜੀ ਅਤੇ ਗੈਰਤਮੰਦ ਸਪੂਤ ਜਦੋਂ ਫ਼ੌਜਾਂ 'ਚ ਭਰਤੀ ਹੋਣ ਅਤੇ ਪਰਦੇਸਾਂ 'ਚ ਧੱਕੇ ਖਾਣ ਲਈ ਮਜਬੂਰ ਹੋਏ। ਜਦੋਂ ਪੈਰ ਪੈਰ ਤੇ ਅਪਮਾਨਤ ਹੋਣ ਲੱਗੇ। ਉਨ੍ਹਾਂ ਹਾਲਾਤਾਂ ਨੇ ਨਵੀਂ ਚੇਤਨਾ ਪੈਦਾ ਕੀਤੀ ਕਿ ਸਾਡੇ ਨਾਲ ਜਾਨਵਰਾਂ ਤੋਂ ਵੀ ਭੈੜਾ ਸਲੂਕ ਇਸ ਕਰਕੇ ਹੋ ਰਿਹਾ ਹੈ ਕਿਉਂਕਿ ਅਸੀਂ ਆਜ਼ਾਦ ਦੇਸ਼ ਦੇ ਵਾਸੀ ਨਹੀਂ। ਉਨ੍ਹਾਂ ਦੇ ਬੁੱਲ੍ਹਾਂ 'ਤੇ ਅਜੇਹੇ ਬੋਲ ਥਿਰਕਣ ਲੱਗੇ:

''ਦੇਸ਼ ਪੈਣ ਧੱਕੇ ਬਾਹਰ ਮਿਲੇ ਢੋਈ ਨਾ

ਸਾਡਾ ਪਰਦੇਸੀਆਂ ਦਾ ਦੇਸ਼ ਕੋਈ ਨਾ''


ਉਹ ਸਿਰ ਜੋੜ ਕੇ ਬੈਠਣ ਲੱਗੇ। ਗੰਭੀਰ ਵਿਚਾਰਾਂ ਕਰਨ ਲੱਗੇ। ਅਜੇਹੇ ਮੰਥਨ ਸਦਕਾ ਹਿੰਦੀ ਐਸੋਸੀਏਸ਼ਨ ਆਫ ਪੈਸੀਫਿਕ ਕੋਸਟ ਨਾਂਅ ਦੀ ਜੱਥੇਬੰਦੀ ਦਾ ਮੁੱਢ ਬੱਝਾ ਸੀ। ਇਨ੍ਹਾਂ ਵਿਚ ਕਿਰਤੀ, ਕਿਸਾਨਾਂ, ਕਾਰੀਗਰਾਂ, ਚੜ੍ਹਦੀ ਉਮਰ ਦੇ ਗੱਭਰੂਆਂ ਸਮੇਤ ਬੁੱਧੀਜੀਵੀ ਵਰਗ ਨੇ ਜੋਟੀਆਂ ਪਾਈਆਂ। ਗ਼ਦਰ ਲਹਿਰ ਤੇ ਨਵੀਓਂ ਨਵੀਂ ਬਹਾਰ ਆਈ। ਇਤਿਹਾਸਕ ਪ੍ਰਮਾਣ ਉਨ੍ਹਾਂ ਝੂਠੜਾਂ ਅਤੇ ਸੋਸ਼ੇਬਾਜ਼ਾਂ ਦੀ ਖਿੱਲੀ ਉਡਾਉਂਦੇ ਹਨ ਜਿਹੜੇ ਗ਼ਦਰ ਲਹਿਰ ਦੇ ਸੰਗਰਾਮੀਆਂ ਨੂੰ 'ਹੋਸ਼ ਤੋਂ ਕੋਰੇ', 'ਸਿਰਫ ਜੋਸ਼ੀਲੇ' ਅਤੇ 'ਸਿਰਫ ਸਿੱਖ' ਬਣਾ ਕੇ ਪੇਸ਼ ਕਰਦਿਆਂ ਦਿਮਾਗੀ ਕਸਰਤਾਂ ਦੇ ਭਰਮ ਨਾਲ ਹੀ ਮਨੋਇੱਛਤ ਸਿੱਟੇ ਕੱਢ ਕੇ ਇਤਿਹਾਸ ਦਾ ਹੁਲੀਆ ਵਿਗਾੜਨ ਲਈ ਕਾਲਪਨਿਕ ਦੁਨੀਆ 'ਚ ਗੁਆਚੇ ਫਿਰ ਰਹੇ ਹਨ।

ਇਤਿਹਾਸ ਮੂੰਹੋਂ ਬੋਲਦਾ ਹੈ ਕਿ 436 ਹਿਲ ਸਟਰੀਟ, ਸਾਨਫ੍ਰਾਂਸਿਸਕੋ ਸਥਿਤ ਯੁਗਾਂਤਰ ਆਸ਼ਰਮ ਦਾ ਇੰਚਾਰਜ ਲਾਲਾ ਹਰਦਿਆਲ ਨੂੰ ਬਣਾਇਆ ਗਿਆ। ਪੱਲਿਓਂ ਗ਼ਦਰੀ ਕਾਮੇ ਖਰਚੇ ਕਰਦੇ। ਰਾਸ਼ਨ ਪਾਣੀ ਤੱਕ ਵੀ ਗ਼ਦਰੀ ਬਾਬਾ ਜਵਾਲਾ ਸਿੰਘ ਦੇ ਫ਼ਾਰਮ ਤੋਂ ਆਇਆ ਕਰਦਾ। 'ਗ਼ਦਰ' ਅਖ਼ਬਾਰ ਛਾਪਣ ਲਈ ਪਹਿਲਾਂ ਇਕ ਗੋਰਾ ਕਾਮਾ ਕੰਮ ਕਰਦਾ ਸੀ। ਉਸ ਮਗਰੋਂ ਇਹ ਜ਼ਿੰਮੇਵਾਰੀ ਕਰਤਾਰ ਸਿੰਘ ਸਰਾਭਾ ਨੇ ਹੱਸ ਕੇ ਓਟ ਲਈ। ਅਖ਼ਬਾਰ ਦਾ ਨਾਂਅ 'ਗ਼ਦਰ' ਰੱਖਣ ਪਿੱਛੇ 1857 ਦੇ ਗ਼ਦਰ ਦੀ ਇਤਿਹਾਸਕਤਾ ਧੜਕ ਰਹੀ ਸੀ। 'ਗ਼ਦਰ' ਅਖ਼ਬਾਰ, ਉਰਦੂ, ਗੁਰਮੁਖੀ, ਬੰਗਾਲੀ, ਹਿੰਦੀ ਅਤੇ ਗੁਜਰਾਤੀ ਵਿਚ ਛਾਪਣਾ ਸ਼ੁਰੂ ਕੀਤਾ। ਗ਼ਦਰੀਆਂ ਦੀ ਹੋਸ਼, ਸੂਝ-ਬੂਝ ਅਤੇ ਵਿਗਿਆਨਕ ਦੂਰ-ਦ੍ਰਿਸ਼ਟੀ ਦਾ ਹੀ ਪ੍ਰਮਾਣ ਹੈ ਉਨ੍ਹਾਂ ਵੱਲੋਂ 'ਗ਼ਦਰ' ਦੇ ਪਲੇਠੇ ਅੰਕ ਉਪਰ ਲਿਖਣਾ :

''ਵਿਦੇਸੀ ਧਰਤੀ ਤੋਂ ਦੇਸੀ ਜ਼ਬਾਨਾਂ ਵਿਚ ਸਾਮਰਾਜ ਵਿਰੁੱਧ ਜੰਗ ਦਾ ਐਲਾਨ''


ਅਖ਼ਬਾਰ ਦੇ ਮਜ਼ਬੂਨ ਲਾਲਾ ਹਰਦਿਆਲ ਲਿਖਦੇ, ਉਰਦੂ ਦਾ ਕੰਮ ਰਘਬੀਰ ਦਿਆਲ ਕਰਦੇ ਅਤੇ ਗੁਰਮੁਖੀ ਵਿਚ ਉਲੱਥਾ ਕਰਤਾਰ ਸਿੰਘ ਸਰਾਭਾ ਆਮ ਤੌਰ ਤੇ ਕਰਿਆ ਕਰਦਾ। ਗ਼ਦਰ ਆਸ਼ਰਮ ਵਿਚ ਲਾਲਾ ਹਰਦਿਆਲ ਉਪਰੰਤ ਜਦੋਂ ਭਾਈ ਸੰਤੋਖ ਸਿੰਘ ਨੂੰ ਜਨਰਲ ਸਕੱਤਰ ਬਣਾਇਆ ਤਾਂ ਪ੍ਰੋ. ਬਰਕਤ ਉੱਲਾ ਜਪਾਨ ਤੋਂ ਅਤੇ ਭਾਈ ਭਗਵਾਨ ਸਿੰਘ ਫ਼ਿਲਪਾਈਨ ਤੋਂ ਆ ਕੇ ਆਸ਼ਰਮ ਵਿਚ ਯੋਗਦਾਨ ਪਾਉਣ ਲੱਗੇ। ਹਰਨਾਮ ਸਿੰਘ ਟੁੰਡੀਲਾਟ, ਹਰਨਾਮ ਸਿੰਘ ਸਾਹਰੀ ਅਤੇ ਰਾਮ ਚੰਦ, ਗ਼ਦਰ ਅਖ਼ਬਾਰ ਲਈ ਅਤੇ ਆਪਣੀ ਮਾਂ ਧਰਤੀ ਦੀ ਆਜ਼ਾਦੀ ਲਈ ਆਪਣਾ ਸਭ ਕੁਝ ਨਿਛਾਵਰ ਕਰਨ ਲਈ ਸਮਰਪਤ ਹੋ ਗਏ। ਗ਼ਦਰ ਆਸ਼ਰਮ 1949 'ਚ ਭਾਰਤ ਸਰਕਾਰ ਨੂੰ ਸੌਂਪ ਦਿੱਤਾ ਗਿਆ। ਪਰ ਅਜੇ ਤੱਕ ਇਹ ਮਹਾਨ ਇਤਿਹਾਸਕ ਯਾਦਗਾਰ ਆਮ ਤੌਰ ਤੇ ਬੰਦ ਹੀ ਰੱਖੀ ਜਾਂਦੀ ਹੈ। ਮਨਜੂਰੀਆਂ ਦੇ ਗਧੀ ਗੇੜ 'ਚ ਪੈ ਕੇ ਇਤਿਹਾਸਕਾਰਾਂ ਨੂੰ ਇਸਦੇ ਦੀਦਾਰ ਕਰਨ ਦਾ ਮੁਸ਼ਕਲ ਨਾਲ ਮੌਕਾ ਮਿਲਦਾ ਹੈ। ਇਸਦੇ ਮਾਣਮੱਤੇ ਇਤਿਹਾਸ ਦੇ ਜਦੋਂ ਸੌ ਵਰ੍ਹੇ ਪੂਰੇ ਹੋਣ ਜਾ ਰਹੇ ਹਨ ਅਜੇ ਵੀ ਇਸਨੂੰ ਸਿਰਫ 2 ਦਿਨ ਖੋਲ੍ਹਣ ਦੇ ਮਜ਼ਾਕ ਹੋ ਰਹੇ ਹਨ। ਭਲਾ ਕਿਉਂ? ਇਹ ਸਾਡੇ ਸਭ ਦੇ ਸੋਚਣ ਲਈ ਵੀ ਸੁਆਲ ਹੈ?

ਗ਼ਦਰ ਲਹਿਰ ਦੀਆਂ ਇਤਿਹਾਸਕ ਪੈੜਾਂ ਦੇ ਅਮਿਟ ਨਿਸ਼ਾਨ ਕਾਮਾਗਾਟਾ ਮਾਰੂ, ਗੁਰਦੁਆਰਾ ਸਿੱਖ ਟੈਂਪਲ, ਗ਼ਦਰ ਅਖ਼ਬਾਰ, ਗ਼ਦਰ ਦੀ ਗੂੰਜ ਕਵਿਤਾਵਾਂ, ਬਜ ਬਜ ਘਾਟ, ਕਾਲੇ ਪਾਣੀ, ਜੇਲ੍ਹਾਂ, ਫਾਂਸੀਆਂ, ਸਾਜਸ਼ ਕੇਸਾਂ, ਫ਼ੌਜਾਂ ਅੰਦਰ ਬਗਾਵਤਾਂ ਦੇ ਨਿਰੰਤਰ ਇਤਿਹਾਸ ਵਿਚ ਦੇਖੀਆਂ ਜਾ ਸਕਦੀਆਂ ਹਨ। ਬੱਬਰ ਅਕਾਲੀ ਲਹਿਰ, ਕਿਰਤੀ ਲਹਿਰ, ਨੌਜਵਾਨ ਭਾਰਤ ਸਭਾ ਲਹਿਰ, ਫ਼ੌਜਾਂ ਅੰਦਰ ਵਿਦਰੋਹ, ਆਜ਼ਾਦ ਹਿੰਦ ਫ਼ੌਜ ਦੇ ਇਤਿਹਾਸ ਨੂੰ ਗ਼ਦਰ ਪਾਰਟੀ ਦੀ ਬਦਲਵੇਂ ਰੂਪਾਂ 'ਚ ਨਿਰੰਤਰਤਾ ਵਜੋਂ ਹੀ ਘੋਖਿਆ ਪੜਤਾਲਿਆ ਜਾਣਾ ਚਾਹੀਦਾ ਹੈ। ਇਸ ਕਰਕੇ ਗ਼ਦਰ ਪਾਰਟੀ ਬਾਰੇ 'ਫੇਲ' ਜਾਂ 'ਪਾਸ' ਵਰਗੇ ਗਣਿਤ ਰੂਪੀ ਫਾਰਮੂਲਿਆਂ ਤੋਂ ਸੰਕੋਚ ਕਰਦਿਆਂ ਇਸ ਮਹਾਨ ਲਹਿਰ ਨੂੰ ਸਿਰਫ ਉਸੇ ਕਾਲ ਦੇ ਜੁਮਰੇ ਵਿਚ ਹੀ ਕੈਦ ਨਹੀਂ ਕਰਨਾ ਚਾਹੀਦਾ। ਇਸ ਤੋਂ ਵੀ ਅਗਲੇਰੀ ਅੰਤਰ-ਕੜੀ ਵਜੋਂ ਅੱਜ ਸਾਮਰਾਜੀ ਜਾਗੀਰੂ ਦਾਬੇ, ਮਹਾਂ ਕਾਰਪੋਰੇਟ ਘਰਾਣਿਆਂ ਅਤੇ ਰੱਤ ਪੀਣੇ ਪੂੰਜੀਪਤੀਆਂ, ਸ਼ਾਹੂਕਾਰਾਂ ਖਿਲਾਫ ਚੱਲ ਰਹੀ ਲੋਕ-ਮੁਕਤੀ ਦੀ ਜੱਦੋਜਹਿਦ ਨੂੰ ਵੇਖਣ ਅਤੇ ਸਮਝਣ ਦੀ ਤੀਬਰ ਲੋੜ ਹੈ।

21 ਅਪ੍ਰੈਲ ਗ਼ਦਰ ਪਾਰਟੀ ਦਾ ਸਥਾਪਨਾ ਦਿਹਾੜਾ, ਸ਼ਤਾਬਦੀ ਮੁਹਿੰਮ ਅਤੇ 1 ਨਵੰਬਰ 2013 ਨੂੰ ਦੁਨੀਆ ਭਰ 'ਚ ਗ਼ਦਰ ਸ਼ਤਾਬਦੀ ਸਿਖਰ ਸਮਾਗਮ ਮਨਾਉਣ ਦੇ ਸਮਾਗਮਾਂ ਨੂੰ ਰਸਮ ਪੂਰਤੀ ਦੀਆਂ ਹੱਦ ਬੰਦੀਆਂ 'ਚੋਂ ਬਾਹਰ ਕੱਢਣ ਦਾ ਠੋਸ ਪ੍ਰਮਾਣ ਅਤੇ ਹਾਸਲ ਇਹੋ ਹੋਏਗਾ ਕਿ ਅਸੀਂ ਗ਼ਦਰ ਲਹਿਰ ਦੇ ਦਰਸ਼ਨ, ਇਤਿਹਾਸ, ਰਾਜਨੀਤੀ, ਉਦੇਸ਼, ਸੁਪਨਿਆਂ ਅਤੇ ਕੁਰਬਾਨੀਆਂ ਭਰੀਆਂ ਸਥਾਪਤ ਕੀਤੀਆਂ ਲੀਹਾਂ ਤੋਂ ਵੀ ਅੱਗੇ ਵਧ ਕੇ ਅਜੋਕੇ ਪ੍ਰਸੰਗ ਵਿਚ ਸਮਝਣ ਅਤੇ ਅਮਲੀ ਤੌਰ ਤੇ ਲਾਗੂ ਕਰਨ ਲਈ ਠੋਸ ਉੱਦਮ ਕਰੀਏ।

ਗ਼ਦਰ ਲਹਿਰ ਸਾਡੇ ਅਤੀਤ ਦੀ ਹੀ ਅਮੁੱਲੀ ਧਰੋਹਰ ਨਹੀਂ, ਇਹ ਸਾਡਾ ਵਰਤਮਾਨ ਅਤੇ ਭਵਿੱਖ ਵੀ ਹੈ। ਇਹ ਵਿਦੇਸ਼ੀ ਅਤੇ ਦੇਸੀ ਹਰ ਵੰਨਗੀ ਦੀ ਲੁੱਟ, ਦਾਬੇ, ਵਿਤਕਰੇ, ਅਨਿਆ, ਸਮਾਜਕ ਨਾਬਰਾਬਰੀ, ਜਾਤ-ਪਾਤ, ਫਿਰਕਾਪ੍ਰਸਤੀ, ਜਬਰ-ਜ਼ੁਲਮ ਦੀ ਮੂਲੋਂ ਜੜ੍ਹ ਪੁੱਟ ਕੇ, ਨਵੀਂ ਆਜ਼ਾਦੀ, ਬਰਾਬਰੀ, ਸੈਕੂਲਰ ਸੋਚ ਅਤੇ ਜਮਹੂਰੀ ਰਾਜ ਅਤੇ ਸਮਾਜ ਦੀ ਸਿਰਜਣਾ ਕਰਨ ਲਈ ਲੋਕ ਸੰਗਰਾਮ ਜਾਰੀ ਰੱਖਣ ਦਾ ਇਤਿਹਾਸ ਅਤੇ ਹੋਕਾ ਹੈ। ਕਿਰਤ ਦੀ ਸਰਦਾਰੀ ਵਾਲੇ, ਸਵੈਮਾਣ ਭਰੀ ਨਵੀਂ ਜ਼ਿੰਦਗੀ ਦੀ ਨਵੀਂ ਇਬਾਰਤ ਲਿਖਣਾ ਨਵਾਂ ਯੁੱਗ ਸਿਰਜਣ ਦਾ ਸਿਰਨਾਵਾਂ ਹੈ ਗ਼ਦਰ ਲਹਿਰ।

ਮੋਬਾਇਲ : 94170-76735

Friday, April 12, 2013

ਕਾਲਖ਼ ਦੇ ਵਣਜਾਰਿਓ, ਸੂਰਜ ਕਦੇ ਮਰਿਆ ਨਹੀਂ………….....!



ਕਾਲਖ਼ ਦੇ ਵਣਜਾਰਿਓ, ਸੂਰਜ ਕਦੇ ਮਰਿਆ ਨਹੀਂ………….....!

Shagan Kataria

ਸੇਵੇਵਾਲਾ ਕਾਂਡ ਦੇ 18 ਇਨਕਲਾਬੀ ਸ਼ਹੀਦਾਂ ਦਾ ਪਰਸੋਂ ਸ਼ਹੀਦੀ ਦਿਹਾੜਾ ਸੀ। ਸੇਵੇਵਾਲਾ ਮੇਰੇ ਸ਼ਹਿਰ ਜੈਤੋ ਤੋਂ ਸਿਰਫ 3 ਕਿਲੋਮੀਟਰ ਦੀ ਦੂਰੀ ਤੇ ਹੈ। ਇਹ ਖੂਨੀ ਕਾਂਡ 22ਵਰ੍ਹੇ ਪਹਿਲਾਂ 9 ਅਪ੍ਰੈਲ, 1991 ਨੂੰ ਵਾਪਰਿਆ। ਇਸ ਕਾਂਡ ਨੇ ਖੱਬੀ ਸੋਚ ਵਾਲੀ ਲਹਿਰ ਦੇ ਸੀਨਿਆਂ ਨੂੰ ਉਹ ਸੱਲ ਦਿੱਤੇ ਜਿਸ ਦੀਆਂ ਦੁਖਦ ਯਾਦਾਂ ਇਨਕਲਾਬੀਆਂ ਦੇ ਦਿਲਾਂ ਨੂੰ ਸਦੀਵੀ ਦੁਖਾਉਂਦੀਆਂ ਰਹਿਣਗੀਆਂ।


ਘਟਨਾ ਵਾਲੇ ਦਿਨ ਸੇਵੇਵਾਲੇ ਪਿੰਡ ਦੀ ਧਰਮਸ਼ਾਲਾ 'ਚ ਇਨਕਲਾਬੀ ਨਾਟਕ ਮੇਲਾ ਸੀ। ਮੇਲੇ ਦਾ ਪ੍ਰਬੰਧ ਸਰਕਾਰੀ ਜਬਰ ਅਤੇ ਫ਼ਿਰਕਾਪ੍ਰਸਤ ਤਾਕਤਾਂ ਦਾ ਵਿਰੋਧ ਕਰ ਰਹੇ ਇਨਕਲਾਬੀਆਂ ਵੱਲੋਂ ਕੀਤਾ ਗਿਆ ਸੀ। ਮੇਲੇ ਦੌਰਾਨ ਭੇਸ ਬਦਲ ਕੇ ਫੌਜੀ ਵਰਦੀਆਂ 'ਚ ਆਏ ਦਹਿਸ਼ਤਗਰਦਾਂ ਨੇ ਨਾਟਕਾਂ ਦਾ ਆਨੰਦ ਮਾਣ ਰਹੇ ਪੁਰਸ਼ਾਂ, ਔਰਤਾਂ ਅਤੇ ਬੱਚਿਆਂ ਉਪਰ ਆਪਣੀਆਂ ਵਿਦੇਸ਼ੀਂ ਏ.ਕੇ. ਸੰਤਾਲੀਆਂ ਦੇ ਮੂੰਹ ਖੋਲ੍ਹ ਦਿੱਤੇ।


Shaheed Megh Raj Bhagtuana

Shaheed Gurjant Singh

Shaheed Mata Sadan Kaur

Shaheed Jagpal Selbrah

ਹਮਲਾ ਭਾਵੇਂ ਅਚਨਚੇਤ ਸੀ ਪਰ ਅੱਗੋਂ ਇਨਕਲਾਬੀ ਕਾਰਕੁੰਨਾਂ ਨੇ ਆਪਣੇ ਵਿਤੋਂ ਵਧ ਕੇ ਹਮਲਾਵਾਰਾਂ ਦਾ ਐਸਾ ਵਿਰੋਧ ਕੀਤਾ ਕਿ ਉਨ੍ਹਾਂ ਨੂੰ ਅੱਗੇ ਲਾ ਲਿਆ। ਮੁਕਾਬਲਾ ਕਰਦੇ ਹੋਏ ਇਸ ਕਾਂਡ ਵਿਚ 22 ਲੋਕ ਸਖ਼ਤ ਜ਼ਖ਼ਮੀ ਹੋਏ ਅਤੇ ਇਨਕਲਾਬੀ ਲਹਿਰ ਦੇ ਆਗੂਆਂ ਮੇਘ ਰਾਜ ਭਗਤੂਆਣਾ, ਜਗਪਾਲ ਸੇਲਬਰਾਹ ਅਤੇ ਮਾਤਾ ਸਦਾ ਕੌਰ ਸਮੇਤ 18 ਲੋਕ ਸ਼ਹਾਦਤ ਦੇ ਜਾਮ ਨੂੰ ਪੀ ਗਏ। ਮੌਕਾ-ਏ-ਵਾਰਦਾਤ 'ਤੇ ਦੂਰ-ਦੂਰ ਤੱਕਿਆਂ ਖੂਨ ਦਾ ਦਰਿਆ ਨਜ਼ਰੀਂ ਆਉਂਦਾ ਸੀ। ਘਟਨਾ ਦੇ ਸ਼ਿਕਾਰ ਹੋਏ ਲੋਕਾਂ ਦੀਆਂ ਟਰਾਲੀਆਂ ਭਰ ਕੇ ਇਲਾਜ ਲਈ ਜੈਤੋ ਲਿਆਂਦੀਆਂ ਗਈਆਂ।

ਜਿਸ ਦਿਨ ਇਹ ਕਾਂਡ ਵਾਪਰਿਆ ਉਸ ਦਿਨ ਹਰ ਸੰਵੇਦਨਸ਼ੀਲ ਅੱਖ ਨੇ ਹੰਝੂ ਕੇਰੇ ਅਤੇ ਬਹੁਤੇ ਲੋਕਾਂ ਦੇ ਘਰੀਂ ਚੁੱਲ੍ਹੇ ਨਹੀਂ ਤਪੇ। ਪੂਰੇ ਇਲਾਕੇ ਵਿਚ ਇਕ ਸਹਿਮ ਭਰਿਆ ਸੰਨਾਟਾ ਸੀ।

ਘਟਨਾ ਦੇ ਕੁਝ ਦਿਨਾਂ ਬਾਅਦ ਹੀ ਸ਼ਹੀਦਾਂ ਨਮਿਤ ਸ਼ਰਧਾਂਜਲੀ ਸਮਾਗਮ ਹੋਇਆ। ਸਮਾਗਮ ਵਿਚ ਪੰਜਾਬ ਹੀ ਨਹੀਂ ਬਲਕਿ ਦੇਸ਼ ਦੇ ਕੋਨੇ-ਕੋਨੇ 'ਚੋਂ ਪਹੁੰਚੇ ਖੱਬੀ ਵਿਚਾਰਧਾਰਾ ਦੇ ਉਪਾਸ਼ਕਾਂ ਨੇ ਸ਼ਹੀਦਾਂ ਦੀ ਲਹੂ ਰੱਤੀ ਮਿੱਟੀ ਨੂੰ ਮੱਥੇ ਨਾਲ ਲਾ ਕੇ ਉਨ੍ਹਾਂ ਦੇ ਰਾਹਾਂ 'ਤੇ ਚੱਲਣ ਅਤੇ ਉਨ੍ਹਾਂ ਦੇ ਅਧੂਰੇ ਪਏ ਮਿਸ਼ਨ ਨੂੰ ਪੂਰਾ ਕਰਨ ਦਾ ਹਲਫ਼ ਲਿਆ।


 ਹੁਣ ਵੀ ਸ਼ਹੀਦਾਂ ਦੇ ਵਾਰਸ ਹਰ ਵਰ੍ਹੇ 9 ਅਪ੍ਰੈਲ ਨੂੰ ਪਿੰਡ ਭਗਤੂਆਣਾ ਵਿਖੇ ਉਸਾਰੀ ਗਈ ਸ਼ਹੀਦਾਂ ਦੀ ਲਾਟ 'ਤੇ ਸੂਹਾ ਫ਼ਰੇਰਾ ਲਹਿਰਾ ਕੇ ਸਦੀਵੀ ਰੁਖ਼ਸਤ ਹੋਏ ਸਾਥੀਆਂ ਨੂੰ ਸਲੂਟ ਕਰਦੇ ਹਨ।

ਹੁਣ ਵੀ ਲੋਕ ਸੇਵੇਵਾਲੇ ਦੇ ਸ਼ਹੀਦਾਂ ਨੂੰ ਯਾਦ ਕਰਦਿਆਂ ਗੰਭੀਰ ਗੱਲਾਂ ਕਰਦੇ ਆਖਦੇ ਨੇ ਕਿ ਸੱਚ ਦੇ ਪਾਂਧੀਆਂ ਦੀ ਸ਼ਹਾਦਤ ਅਜਾਈਂ ਨਹੀਂ ਗਈ ਪਰ ਪੂਰੀ ਲੋਕਾਈ ਅੰਦਰ 'ਨ੍ਹੇਰ ਪਾਉਣ ਦੇ ਸੁਪਨੇ ਪਾਲਣ ਵਾਲੇ ਖੁਦ ਸਮੇਂ ਦੇ ਘੁੱਪ ਹਨ੍ਹੇਰੇ ਵਿਚ ਕਦੋਂ ਦੇ ਅਲੋਪ ਹੋ ਗਏ ਹਨ।

ਏਸ ਮਾਮਲੇ ਨਾਲ ਸਬੰਧਿਤ ਦਿਲਚਸਪ ਪਹਿਲੂ ਇਹ ਵੀ ਹੈ ਕਿ ਪਰਸੋਂ ਇਤਫਾਕਨ ਉਹੀ 9 ਅਪ੍ਰੈਲ ਨੂੰ ਇਕ ਖੂਨੀ ਕਾਂਡ ਹੋਇਆ ਜਿਸ ਦੀ ਚਰਚਾ 10 ਅਪ੍ਰੈਲ ਦੀ ਅਖਬਾਰਾਂ ਦੀਆਂ ਪ੍ਰਮੁੱਖ ਸੁਰਖੀਆਂ ਚ ਹੈ। ਜੋ ਦੋਹੇਂ ਧਿਰਾਂ ਭਿੜੀਆਂ ਇਨ੍ਹਾਂ ਦੀ ਸੇਵੇਵਾਲਾ ਕਾਂਡ ਕਰਾਉਣ ਚ ਅਹਿਮ ਭੂਮਿਕਾ ਸੀ....ਵਕਤ ਦੇ ਹੇਰ ਫੇਰ ਦੀ ਗੱਲ ਹੈ 22 ਸਾਲ ਪਹਿਲਾਂ ਇਹ ਕੱਠੇ ਸਨ ਅਤੇ ਅੱਜ ਇਕ ਦੂਜੇ ਦੀ ਜਾਨ ਦੇ ਵੈਰੀ....

(Shagan Kataria is a Jaitu based journalist)




Monday, April 8, 2013

ਕਿਸਾਨ-ਸੰਘਰਸ਼ 'ਤੇ ਸਰਕਾਰੀ ਜਬਰ - ਜਥੇਬੰਦ ਹੋਣ ਤੇ ਸੰਘਰਸ਼ ਕਰਨ ਦੇ ਬੁਨਿਆਦੀ ਹੱਕ 'ਤੇ ਹਮਲਾ

ਕਿਸਾਨ-ਸੰਘਰਸ਼ 'ਤੇ ਸਰਕਾਰੀ ਜਬਰ

ਜਥੇਬੰਦ ਹੋਣ ਤੇ ਸੰਘਰਸ਼ ਕਰਨ ਦੇ ਬੁਨਿਆਦੀ ਹੱਕ 'ਤੇ ਹਮਲਾ


ਪਿਆਰੇ ਲੋਕੋ,
ਕਿਸਾਨ ਸੰਗਠਨਾਂ ਵੱਲੋਂ ਦਿੱਤੇ ਘੋਲ-ਸੱਦਿਆਂ ਨੂੰ ਫੇਲ੍ਹ ਕਰਨ ਲਈ ਪੰਜਾਬ ਦੀ ਅਕਾਲੀ-ਭਾਜਪਾ ਹਕੂਮਤ ਆਪਣਾ ਸਾਰਾ ਪੁਲਸੀ-ਲਾਮ ਲਸ਼ਕਰ ਲੈ ਕੇ ਕਈ ਦਿਨ ਕਿਸਾਨ-ਬੋ, ਕਿਸਾਨ-ਬੋ ਕਰਦੀ ਰਹੀ ਹੈ। ਹਕੂਮਤ ਨੇ, ਕਿਸਾਨਾਂ ਦੀਆਂ ਘੋਲ ਤੋਂ ਪਹਿਲਾਂ ਹੀ ਗ੍ਰਿਫ਼ਤਾਰੀਆਂ ਕਰਨ, ਜੇਲ੍ਹੀਂ ਡੱਕ ਦੇਣ, ਸਭ ਸੜਕਾਂ 'ਤੇ ਪੁਲਸੀ-ਪਹਿਰੇ ਬਿਠਾ ਦੇਣ, ਸ਼ਹਿਰਾਂ ਦੀ ਨਾਕਾਬੰਦੀ ਕਰਨ, ਪਿੰਡਾਂ 'ਚ ਦਫ਼ਾ 44 ਮੜੇ ਜਾਣ ਦੀ ਅਨਾਊਂਸਮੈਂਟ ਕਰਨ ਅਤੇ ਬਠਿੰਡਾ ਤੇ ਅੰਮ੍ਰਿਤਸਰ ਦੇ ਜਿਲ੍ਹਾ ਸਕੱਤਰੇਤਾਂ ਮੂਹਰੇ ਹਜ਼ਾਰਾਂ ਦੀ ਤਦਾਦ ਵਿਚ ਪੁਲਸ-ਕਰਮੀਆਂ ਦੀ ਦੂਹਰੀ-ਤੀਹਰੀ ਸੁਰੱਖਿਆ ਲਾਈਨ 'ਚ ਤਾਇਨਾਤੀ ਕਰਨ ਰਾਹੀ ਰੇਲ ਜਾਮ ਤੇ ਧਰਨੇ ਰੋਕ ਕੇ, ਹਕੂਮਤ ਦੇ ਆਵਦੇ ਵੱਲੋਂ ਹੀ  “ਵਿਚਾਰ ਪ੍ਰਗਟਾਉਣ” ਤੇ “ਰੋਸ ਪ੍ਰਗਟਾਉਣ” ਦੇ ਕਹੇ ਜਾਂਦੇ “ਜਮਹੂਰੀ ਹੱਕ” ਨੂੰ ਖੁਦ ਹੀ ਮਿੱਟੀ 'ਚ ਦਫਨਾਏ ਜਾਣ ਦਾ ਟਿੱਕਾ ਲਵਾ ਲਿਆ ਹੈ ਅਤੇ ਲੋਕ ਮੋਰਚਾ ਪੰਜਾਬ ਦੀ ਸਮਝ--ਮੁਲਕ ਅੰਦਰ ਜਮਹੂਰੀਅਤ ਨਹੀਂ ਹੈ।ਝੂਠੀ ਜਮਹੂਰੀਅਤ ਹੀ ਹੈ- ਨੂੰ ਇਕ ਵਾਰ ਫੇਰ ਤਸਦੀਕ ਕੀਤਾ ਹੈ।ਜ਼ਿਲ੍ਹਾ ਕੇਂਦਰਾਂ ਦੇ ਬੱਸ ਸਟੈਂਡਾਂ ਵਿਚ ਬੱਸਾਂ ਵੜਨੋਂ ਰੋਕ ਕੇ ਅਤੇ ਤਲਾਸ਼ੀਆਂ ਲੈ ਕੇ ਤਿੰਨ-ਚਾਰ ਕਿਲੋਮੀਟਰ ਪੈਦਲ ਜਾਣ ਲਈ ਮਜਬੂਰ ਕਰਕੇ ਆਮ ਲੋਕਾਂ-ਸਵਾਰੀਆਂ ਤੋਂ ਵੀ ਤੋਇ ਤੋਇ ਕਰਵਾ ਲਈ ਹੈ।

ਕਿਸਾਨ ਸੰਗਠਨਾਂ ਵੱਲੋਂ ਦੋ ਵੱਖ ਵੱਖ ਸੱਦੇ ਸਨ। ਇੱਕ, 6 ਮਾਰਚ ਨੂੰ ਦੋ ਘੰਟੇ ਰੇਲਾਂ ਰੋਕਣ ਦਾ ਸੀ ਤੇ ਦੂਜਾ, 10 ਮਾਰਚ ਤੋਂ 13 ਮਾਰਚ ਤੱਕ ਬਠਿੰਡਾ ਤੇ ਅੰਮ੍ਰਿਤਸਰ ਜਿਲ੍ਹਾ ਸਕੱਤਰੇਤਾਂ ਮੂਹਰੇ ਧਰਨੇ ਮਾਰਨ ਦਾ ਸੀ। ਮੰਗਾਂ ਵੀ ਵੱਖ ਵੱਖ ਸਨ। ਪਰ ਇਹ ਮੰਗਾਂ ਸਰਕਾਰ ਵੱਲੋਂ ਮੰਨੀਆਂ ਹੋਈਆਂ ਸਨ, ਲਾਗੂ ਕਰਨ ਤੋਂ ਲਗਾਤਾਰ ਟਾਲਦੀ ਆ ਰਹੀ ਹੈ। ਕਿਸਾਨ ਇਨਾਂ ਮੰਗਾਂ ਨੂੰ ਲਾਗੂ ਕਰਵਾਉਣਾ ਚਾਹੁੰਦੇ ਹਨ, ਏਹਦੇ ਲਈ ਹੀ ਇਹ ਘੋਲ-ਸੱਦੇ ਦਿਤੇ ਗਏ ਸਨ। ਸਰਕਾਰ ਨੇ ਪੁਲਸੀ ਤਾਕਤ ਝੋਕ ਕੇ ਇਹ ਘੋਲ ਸੱਦੇ ਸਿਰੇ ਨਹੀਂ ਚੜਨ ਦਿੱਤੇ। ਤਾਂ ਵੀ ਬਦਲਵੀਆਂ ਸ਼ਕਲਾਂ 'ਚ ਕਿਸਾਨ-ਸਰਗਰਮੀ ਜਾਰੀ ਰਹਿਣ ਦੇ ਸਿੱਟੇ ਵਜੋਂ ਹਕੂਮਤ ਨੂੰ ਕਿਸਾਨ ਸੰਗਠਨਾਂ ਨਾਲ ਗੱਲਬਾਤ ਕਰਨੀ ਪਈ ਤੇ ਜੇਲ੍ਹੀਂ ਡੱਕੇ ਕਿਸਾਨਾਂ ਨੂੰ ਰਿਹਾ ਕਰਨਾ ਪਿਆ।

ਪੰਜਾਬ ਹਕੂਮਤ ਦੇ ਇਸ ਦਹਿਸ਼ਤੀ ਧਾਵੇ ਨੇ ਅਤੇ ਬਠਿੰਡਾ ਦੇ ਜ਼ਿਲ੍ਹਾ ਮੈਜਿਸਟਰੇਟ ਵੱਲੋਂ ਜਿਲ੍ਹਾ ਸਕੱਤਰੇਤ ਮੂਹਰੇ ਧਰਨੇ ਮਾਰਨ 'ਤੇ ਪਾਬੰਦੀ ਲਾਉਣ, ਸ਼ਹਿਰੋਂ ਬਾਹਰ ਦੂਰ ਧਰਨੇ ਮਾਰਨ ਦੀ ਥਾਂ ਮਿੱਥਣ ਅਤੇ ਸਕੱਤਰੇਤ ਦੁਆਲੇ ਕੰਡਿਆਲੀ ਤਾਰ ਲਾਉਣ ਦਾ ਪੱਤਰ ਜਾਰੀ ਕਰਨ ਨੇ ਕਿਸਾਨਾਂ ਅਤੇ ਸਮੂਹ ਲੋਕਾਂ ਦੇ ਜਥੇਬੰਦ ਹੋਣ ਅਤੇ ਸੰਘਰਸ਼ ਕਰਨ ਦੇ ਬੁਨਿਆਦੀ ਤੇ ਜਮਹੂਰੀ ਹੱਕ ਉੱਤੇ ਜਾਰੀ ਹਮਲੇ ਨੂੰ ਅੱਗੇ ਵਧਾ ਲਿਆ ਹੈ।

ਸੰਘਰਸ਼ - ਬੁਨਿਆਦੀ ਹੱਕ ਹੈ

ਰੋਸ ਪ੍ਰਗਟਾਉਣਾ, ਜਥੇਬੰਦੀ ਬਣਾਉਣਾ ਤੇ ਸੰਘਰਸ਼ ਕਰਨਾ ਲੋਕਾਂ ਦਾ ਬੁਨਿਆਦੀ ਅਧਿਕਾਰ ਹੈ। ਇਹ ਹੱਕ, ਹੋਰ ਆਰਥਿਕ, ਰਾਜਨੀਤਿਕ, ਸਮਾਜਿਕ, ਜਮਹੂਰੀ ਹੱਕਾਂ ਤੇ ਹਿੱਤਾਂ ਦੀ ਪ੍ਰਾਪਤੀ, ਸੁਰੱਖਿਆ ਤੇ ਵਧਾਰੇ ਵਾਸਤੇ ਬੁਨਿਆਦ ਬਣਦਾ ਹੈ। ਭਾਰਤੀ ਹਾਕਮਾਂ ਨੇ ਲੇਕਾਂ ਦੇ ਇਸ ਬੁਨਿਆਦੀ ਹੱਕ ਨੂੰ ਆਵਦੀ ਝੂਠੀ ਜਮਹੂਰੀਅਤ ਦੇ ਸੰਵਿਧਾਨ ਵਿਚ ਦਰਜ ਕਰਕੇ ਮੁੱਢਲੇ ਜਮਹੂਰੀ ਹੱਕਾਂ ਦੇ ਦਾਅਵੇਦਾਰ ਹੋਣ ਦਾ ਦੰਭੀ ਪ੍ਰਪੰਚ ਵੀ ਰਚਿਆ ਹੋਇਆ ਹੈ। ਪਰ ਅਸਲੀਅਤ ਅੰਦਰ ਭਾਰਤੀ ਰਾਜ ਦੀ ਕੁੱਲ ਤਾਕਤ--ਜਮੀਨ ਦੀ, ਪੈਸੇ ਦੀ, ਹਕੂਮਤ ਦੀ, ਕਾਨੂੰਨ ਦੀ, ਪੁਲਿਸ-ਫੌਜ ਦੀ ਤੇ ਸਾਹਿਤ ਸੱਭਿਆਚਾਰ ਦੀ ਤਾਕਤ--ਉੱਤੇ ਕਾਬਜ ਜਮਹੂਰੀਅਤ ਦੇ ਦੁਸ਼ਮਣ ਵੱਡੇ-ਵੱਡੇ ਜਗੀਰਦਾਰਾਂ, ਸਰਮਾਏਦਾਰਾਂ, ਸਾਮਰਾਜੀਆਂ ਤੇ ਵੱਡੇ ਅਫਸਰਸ਼ਾਹਾਂ ਦੇ ਇਸ ਹਾਕਮ ਲਾਣੇ ਨੇ ਲੋਕਾਂ ਦੇ ਇਸ ਬੁਨਿਆਦੀ ਹੱਕ ਨੂੰ ਆਵਦੀ ਮਰਜੀ ਦਾ ਮੁਥਾਜ ਬਣਾ ਰੱਖਿਆ ਹੈ। ਇਸ ਹਾਕਮ ਲਾਣੇ ਦੀ ਮਰਜੀ ਹੈ ਕਿ ਉਹ ਸੰਘਰਸ਼ ਨੂੰ ਜਾਂ ਸੰਘਰਸ਼ ਦੀ ਕਿਸੇ ਸ਼ਕਲ ਨੂੰ ਕਰਨ ਦੀ ਇਜਾਜਤ ਦਿੰਦਾ ਹੈ ਜਾਂ ਬੰਦਸ਼ਾਂ ਜੜਦਾ ਹੈ।

ਭਾਰਤੀ ਹਾਕਮ, ਰਾਜ ਦੀ ਕੁੱਲ ਤਾਕਤ ਦੇ ਜ਼ੋਰ ਸੰਨ ਸੰਤਾਲੀ ਤੋਂ ਹੀ ਲੋਕ ਸੰਘਰਸ਼ਾਂ ਦੇ ਬੁਨਿਆਦੀ ਹੱਕ 'ਤੇ ਝਬੁੱਟਾਂ ਮਾਰਦੇ ਆ ਰਹੇ ਹਨ। ਕਦੇ ਲੁਕਵੀਆਂ ਤੇ ਕਦੇ ਨੰਗੀਆਂ-ਚਿੱਟੀਆਂ। ਗੱਲ ਹੀ ਨਾ ਸੁਣ ਕੇ; ਮਸਲਾ ਹੱਲ ਨਾ ਕਰਕੇ; ਮੰਨ ਕੇ ਵੀ ਲੰਮਾ ਸਮਾਂ ਲਾਗੂ ਨਾ ਕਰਕੇ; ਹੰਭਾ ਕੇ ਹਫਾ ਕੇ; ਮਹਿੰਗਾਈ ਤੇ ਗਰੀਬੀ ਵਧਾਉਣ ਰਾਹੀਂ ਰੋਟੀ ਦਾ ਸੰਸਾ ਖੜ੍ਹਾ ਕਰਕੇ; ਨੌਕਰੀ ਤੋਂ ਛਾਂਟੀ ਕਰਨ ਰਾਹੀਂ ਬੇਰੁਜ਼ਗਾਰੀ ਦਾ ਦੈਂਤ ਵਿਖਾ ਕੇ; ਜਾਤੀ ਟਕਰਾਅ ਤੇ ਫਿਰਕੂ ਦੰਗੇ ਭੜਕਾਉਣ ਰਾਹੀਂ ਪਾਟਕ ਪਾ ਕੇ; ਨਫਰਤ ਫੈਲਾਉਣ ਰਾਹੀਂ ਬੇਭਰੋਸਗੀ ਪੈਦਾ ਕਰਕੇ; ਫਿਰਕੂ ਦਹਿਸ਼ਤਗਰਦ ਟੋਲਿਆਂ ਨੂੰ ਫਿਰਕੂ ਕਾਤਲੀ ਹਨ੍ਹੇਰੀ ਝੁਲਾਉਣ ਦੀ ਖੁੱਲ੍ਹ ਦੇਣ ਰਾਹੀਂ ਮੌਤ ਦਾ ਭੈਅ ਬਣਾ ਕੇ; ਅੰਨ੍ਹਾ ਕੌਮੀ ਜਨੂੰਨ ਭੜਕਾਉਣ ਰਾਹੀਂ ਸੁਰਤ ਭੰਵਾ ਕੇ; ਰਣਵੀਰ ਸੈਨਾ, ਸਲਵਾ ਜੁਦਮ, ਕੋਇਆ ਕਮਾਂਡੋ ਵਰਗੀਆਂ ਨਿੱਜੀ ਸੈਨਾਵਾਂ ਵੱਲੋਂ ਲੁੱਟ-ਮਾਰ ਦੀ ਦਹਿਸ਼ਤ ਫੈਲਾ ਕੇ; ਖੁਦਪ੍ਰਸਤੀ ਦੇ, ''ਖਾਓ-ਪੀਓ, ਐਸ਼ ਕਰੋ'' ਦੇ, ਅਸ਼ਲੀਲਤਾ ਦੇ ਅਤੇ ਨਸ਼ੇਖੋਰੀ ਦੇ ਸਾਹਿਤ ਸੱਭਿਆਚਾਰ ਦਾ ਗਰਦੋਗੁਬਾਰ ਚੜ੍ਹਾ ਕੇ ਜਥੇਬੰਦ ਹੋਣ ਤੇ ਸੰਘਰਸ਼ ਕਰਨ ਦੇ ਬੁਨਿਆਦੀ ਹੱਕ ਨੂੰ ਰੋਲਦੇ ਆ ਰਹੇ ਹਨ।

ਇਹਨਾਂ ਸਾਰੇ ਅੜਿੱਕਿਆਂ ਨੂੰ ਸਮਝ ਕੇ ਸਰ ਕਰਦਾ ਹੋਇਆ ਫਿਰ ਵੀ ਕੋਈ ਆਵਦੇ ਇਸ ਹੱਕ ਦੀ ਵਰਤੋਂ ਕਰਨ ਦੇ ਰਾਹ ਤੁਰਦਾ ਹੈ ਤਾਂ ਹਾਕਮ ਝੱਟ ਜਬਰ ਉੱਤੇ ਉੱਤਰ ਆਉਂਦਾ ਹੈ। ਹਾਕਮਾਂ ਕੋਲ ਬਰਤਾਨਵੀ ਸਾਮਰਾਜ ਤੋਂ ਵਿਰਾਸਤ 'ਚ ਮਿਲੇ ਤੇ ਨਵੇਂ ਘੜੇ ਹੋਏ ਸੈਂਕੜੇ ਅੰਨ੍ਹੇ ਬੋਲੇ ਕਾਲੇ ਕਾਨੂੰਨ ਹਨ। ਪੁਲਿਸ ਥਾਣੇ ਅਤੇ ਤਸੀਹਾ ਕੇਂਦਰ ਹਨ। ਫੌਜਾਂ ਹਨ। ਜੇਲ੍ਹਾਂ ਹਨ।ਇਥੇ ਸੂਬੇ ਵਿਚ ਹੋਰ ਜੇਲ੍ਹਾਂ ਅਤੇ ਹਰੀਕੇ ਪੱਤਣ 'ਤੇ ਕਾਲੇ ਪਾਣੀ ਜੇਲ੍ਹ ਵਰਗੀ ਜੇਲ੍ਹ ਬਣਾਉਣ ਦਾ ਐਲਾਨ ਕਰ ਦਿੱਤਾ ਹੈ।

''ਵਿਕਾਸ'' ਦੇ ਨਾਂ ਹੇਠ ਇਸ ਹਾਕਮ ਲਾਣੇ ਵੱਲੋਂ ਮੜੀਆਂ ਜਾ ਰਹੀਆਂ ਲੋਕ ਦੋਖੀ ਤੇ ਮੁਲਕ ਦੋਖੀ ਨੀਤੀਆਂ ਨੇ ਸਾਮਰਾਜੀ ਜਗੀਰੂ ਗੱਠਜੋੜ ਵੱਲੋਂ ਕੀਤੀ ਜਾ ਰਹੀ ਲੁੱਟ ਨੂੰ ਤੇਜ਼ ਕੀਤਾ ਹੈ। ਇਸ ਲੁੱਟ ਦਾ ਘੇਰਾ ਹਰ ਖੇਤਰ ਤੇ ਹਰ ਕਾਰੋਬਾਰ ਦੇ ਧੁਰ ਖੱਲ-ਖੂੰਜੇ ਤੱਕ ਵਧਾਇਆ ਹੈ। ਇਸ ਤੇਜ਼ ਹੋਈ ਲੁੱਟ ਦੇ ਸਿੱਟੇ ਵਜੋਂ ਉੱਠ ਰਹੇ ਜਾਂ ਉੱਠ ਸਕਦੇ ਲੋਕ ਸੰਘਰਸ਼ਾਂ ਉੱਤੇ ਮੁਲਕ ਨੂੰ ''ਅੰਦਰੂਨੀ ਖਤਰੇ'' ਦੀ ਊਜ ਲਾ ਕੇ ਦਬਾਉਣ-ਕੁਚਲਣ ਲਈ ਨੰਗੇ-ਚਿੱਟੇ ਜਾਬਰ ਹੱਲੇ ਦਾ ਰਾਹ ਚੁਣਿਆ ਹੋਇਆ ਹੈ। ''ਅਪਰੇਸ਼ਨ ਗਰੀਨ ਹੰਟ'' ਦੇ ਵਿੱਢੇ ਹੱਲੇ ਰਾਹੀਂ ਮੁਲਕ ਦੇ ਸੱਤ ਸੂਬਿਆਂ ਅੰਦਰ ਜਥੇਬੰਦ ਹੋਣ ਤੇ ਸੰਘਰਸ਼ ਕਰਨ ਦੇ ਬੁਨਿਆਦੀ ਹੱਕ ਦੀ ਸੰਘੀ ਘੁੱਟਣ ਲਈ ਫੌਜ ਚਾੜ੍ਹੀ ਹੋਈ ਹੈ।ਹਥਿਆਰਬੰਦ ਫੌਜਾਂ ਲਈ ਵਿਸ਼ੇਸ਼ ਅਧਿਕਾਰ ਕਾਨੂੰਨ (ਅਫਸਪਾ) ਫੌਜ-ਪੁਲਿਸ ਨੂੰ ਫੜਕੇ ਤਸੀਹੇ ਦੇਣ ਉਪਰੰਤ ਮਾਰ ਦੇਣ ਅਤੇ ਔਰਤਾਂ ਨਾਲ ਬਲਾਤਕਾਰ ਦੀ ਖੁੱਲ੍ਹ ਵੀ ਦਿੰਦਾ ਹੈ। ਐਨ.ਸੀ.ਟੀ.ਸੀ. ਦਾ ਨਵਾਂ ਜਾਬਰ ਕਾਨੂੰਨ, ਸੂਹੀਆ ਪੁਲਿਸ ਨੂੰ ਕਿਸੇ ਨੂੰ ਵੀ ਗ੍ਰਿਫਤਾਰ ਕਰ ਲੈਣ, ਪੁੱਛਗਿੱਛ ਕਰਨ, ਤਸੀਹੇ ਦੇਣ ਅਤੇ ਪੁੱਛਗਿੱਛ ਕਰਨ ਵਿਚ ਅਮਰੀਕਨ ਤੇ ਇਜ਼ਰਾਇਲੀ ਪੁਲਸ ਅਫਸਰਾਂ ਨੂੰ ਸ਼ਾਮਿਲ ਕਰ ਲੈਣ ਦਾ ਹੱਕ ਦਿੰਦਾ ਹੈ।

ਕੇਂਦਰੀ ਕਾਂਗਰਸੀ ਹਕੂਮਤ ਵਾਂਗੂੰ ਸੂਬਾਈ ਅਕਾਲੀ-ਭਾਜਪਾ ਹਕੂਮਤ ਨੂੰ ਇਸ ਹਾਕਮ ਲਾਣੇ ਦੇ ਹਿੱਤ ਪਾਲਣ ਲਈ ਨੰਗੀ-ਚਿੱਟੀ ਬੇਸ਼ਰਮ ਚਾਕਰੀ ਦਾ ਝੱਲ ਚੜ੍ਹਿਆ ਹੋਇਆ ਹੈ। ਲੋਕ-ਮਾਰੂ ਤੇ ਕਾਰੋਬਾਰ-ਉਜਾੜੂ ਉਦਾਰੀਕਰਨ, ਸੰਸਾਰੀਕਰਨ ਤੇ ਨਿੱਜੀਕਰਨ ਦੀਆਂ ਨੀਤੀਆਂ ਲਾਗੂ ਕਰ ਰਹੀ ਹੈ। ਕਿਸਾਨਾਂ ਕੋਲੋਂ ਜਮੀਨਾਂ ਖੋਹ ਕੇ ਹਾਕਮ ਲਾਣੇ ਦੀ ਝੋਲੀ ਪਾ ਰਹੀ ਹੈ। ਕਾਰੋਬਾਰਾਂ ਤੇ ਸਰਕਾਰੀ ਅਦਾਰਿਆਂ ਨੂੰ ਇਹਨਾਂ ਲਈ ਅੰਨ੍ਹੇ ਮੁਨਾਫ਼ੇ ਦੀਆਂ ਦੁਕਾਨਾਂ ਬਣਾ ਰਹੀ ਹੈ।ਬੇਰੁਜ਼ਗਾਰਾਂ ਨੁੰ  ਰੁਜਗਾਰ ਦੇਣ ਤੋਂ ਕੋਰਾ ਜਵਾਬ ਦੇ ਰਹੀ ਹੈ ਜਾਂ ਬਹੁਤ ਹੀ ਨਿਗੂਣੀਆਂ ਤਨਖਾਹਾਂ ਅਤੇ ਕਰੜੀਆਂ ਸ਼ਰਤਾਂ 'ਤੇ ਠੇਕਾ-ਰੁਜ਼ਗਾਰ ਦੇ ਰਹੀ ਹੈ। ਰੁਜ਼ਗਾਰ ਵਿਚ ਲੱਗਿਆਂ ਤੋਂ ਰੁਜ਼ਗਾਰ ਖੋਹ ਰਹੀ ਹੈ। ਠੇਕਾ ਭਰਤੀ ਕਰਮਚਾਰੀਆਂ ਦੀ ਤਨਖਾਹ ਬਾਰੇ ਤਾਂ ਪਹਿਲਾਂ ਹੀ ਬੇਯਕੀਨੀ ਦਾ ਮਾਹੌਲ ਹੈ। ਹੁਣ ਤਾਂ ਸਰਕਾਰੀ ਰੈਗੂਲਰ ਕਰਮਚਾਰੀਆਂ ਨੂੰ ਮਹੀਨਾਵਾਰ ਮਿਲਦੀ ਤਨਖਾਹ ਦੇਣ ਤੋਂ ਵੀ ਹੱਥ ਪਿੱਛੇ ਖਿੱਚਣ ਲੱਗ ਪਈ ਹੈ।ਰਸੋਈ, ਸਿੱਖਿਆ, ਸਿਹਤ, ਆਵਾਜਾਈ, ਬਿਜਲੀ ਦੀ ਮਹਿੰਗ ਦੀਆਂ ਲਗਾਮਾਂ ਖੁੱਲੀਆਂ ਛੱਡੀਆਂ ਜਾ ਰਹੀਆਂ ਹਨ। ਲੋਕਾਂ ਨੂੰ ਦੇਣ ਵਾਲੀਆਂ ਸਬਸਿਡੀਆਂ ਇਸ ਹਾਕਮ ਲਾਣੇ ਨੂੰ ਦੇ ਰਹੀ ਹੈ। ਕੇਂਦਰੀ ਸਰਕਾਰ ਵੱਲੋਂ ਲਾਏ ਟੈਕਸਾਂ ਦਾ ਵਿਰੋਧ ਦਾ ਡਰਾਮਾ ਕਰਦੀ ਕਰਦੀ ਖੁਦ ਹੋਰ ਟੈਕਸ ਮੜ ਕੇ ਲੱਦਾ ਭਾਰਾ ਕਰਕੇ ਲੋਕਾਂ 'ਤੇ ਲੱਦ ਰਹੀ ਹੈ। ਲੋਕ ਆਪਣੇ ਹੱਕਾਂ-ਹਿੱਤਾਂ ਦੀ ਪ੍ਰਾਪਤੀ ਤੇ ਬਚਾਅ ਲਈ ਆਵਾਜ਼ ਉਠਾਉਂਦੇ ਹਨ ਤਾਂ ਸਰਕਾਰ ਪੈਰਾਂ ਤੋਂ ਸਿਰ ਤੱਕ ਹਥਿਆਰਾਂ ਤੇ ਅਧਿਕਾਰਾਂ ਨਾਲ ਲੈਸ ਪੁਲਸੀ ਧਾੜਾਂ ਨੂੰ ਲੋਕਾਂ ਦੀ ਜਬਾਨਬੰਦੀ ਕਰਨ ਲਈ ਚਾੜ ਦਿੰਦੀ ਹੈ। ਅਜਿਹੀ ਹਾਲਤ ਵਿਚ ਚੇਤਨ ਲੋਕ-ਸਮੂਹ ਜਥੇਬੰਦ-ਸੰਘਰਸ਼ ਦੇ ਜੋਰ ਨਾ ਸਿਰਫ਼ ਇਸ ਹਾਕਮ ਹੱਲੇ ਮੂਹਰੇ ਕੰਧ ਬਣ ਸਕਦੇ ਹਨ, ਸਗੋਂ ਇਸ ਹਾਕਮ ਲਾਣੇ ਦੀ ਜਕੜ ਤੋੜਨ ਵਿਚ ਕਾਮਯਾਬ ਹੋ ਸਕਦੇ ਹਨ।

ਕਿਸਾਨ ਸੰਘਰਸ਼, ਸਰਕਾਰ ਦੀ ਅੱਖ ਦਾ ਰੋੜ

ਪੰਜਾਬ ਅੰਦਰ ਕਿਸਾਨ-ਸੰਘਰਸ਼ ਇਕ ਤਾਕਤ ਵਜੋਂ ਸਥਾਪਤ ਹੋ ਚੁੱਕਿਆ ਹੈ। ਸਰਕਾਰ ਵੱਲੋਂ ਮੜੀਆਂ ਜਾ ਰਹੀਆਂ ਲੋਕ-ਦੋਖੀ, ਕਿਸਾਨ-ਦੋਖੀ ਨੀਤੀਆਂ ਵਿਚ ਰੁਕਾਵਟ ਪਾਉਣ ਦੀ ਹਾਲਤ ਵਿਚ ਹੈ। ਆਵਦੇ ਮੰਗ-ਪੱਤਰ ਵਿਚ ਦਰਜ ਕਿਸਾਨ ਮੰਗਾਂ ਦੇ ਹੱਲ ਲਈ ਅਤੇ ਸਰਕਾਰ ਵੱਲੋਂ ਬੋਲੇ ਨਵੇਂ ਧਾਵਿਆਂ ਤੇ ਧਾੜਿਆਂ ਵਿਰੁਧ ਕਿਸਾਨ-ਸੰਘਰਸ਼ਾਂ ਦਾ ਝੰਡਾ ਝੁਲਦਾ ਰਹਿੰਦਾ ਹੈ। ਸਰਕਾਰ ਨੇ ਸੰਘਰਸ਼ਾਂ ਨੂੰ ਰੋਕਣ ਵਾਸਤੇ ਸੰਨ 2011 ਵਿਚ ਲਿਆਂਦੇ ਕਾਲੇ ਕਾਨੂੰਨਾਂ ਨੂੰ ਕਿਸਾਨ-ਸੰਘਰਸ਼ ਨੇ ਰੱਦ ਕਰਵਾਇਆ ਹੈ। ਸਰਕਾਰ ਵੱਲੋਂ ਕਿਸਾਨਾਂ ਕੋਲੋਂ ਜਮੀਨਾਂ ਖੋਹ ਕੇ ਦੇਸੀ-ਬਦੇਸ਼ੀ ਵੱਡੇ ਧਨਾਢਾਂ ਦੀ ਝੋਲੀ ਪਾਉਣ ਦੀ ਚਾਲ ਨੂੰ ਕੁਰਬਾਨੀਆਂ ਦੇ ਕੇ ਰੋਕਿਆ ਹੈ। ਬਿਜਲੀ ਦੇ ਨਿੱਜੀਕਰਨ ਨੂੰ ਰੋਕਣ ਲਈ 7 ਸਾਲ ਲੰਮਾ ਘੋਲ ਲੜਿਆ ਤੇ ਕੁਰਬਾਨੀਆਂ ਦਿੱਤੀਆਂ। ਸ਼ਰੋਮਣੀ ਕਮੇਟੀ ਦੇ ਲੱਠਮਾਰ ਗਰੋਹ ਵੱਲੋਂ ਕੀਤੇ ਕਬਜੇ ਖਿਲਾਫ਼ ਖੰਨਾ-ਚਮਾਰਾ ਵਿਚ ਕਿਸਾਨ-ਸੰਘਰਸ਼ ਚੱਲਿਆ ਹੈ।ਸ਼ਹਾਦਤਾਂ ਹੋਈਆਂ ਹਨ। ਹਕੂਮਤੀ ਸਰਪ੍ਰਸਤੀ ਵਾਲੇ ਭੌਂ ਮਾਫੀਏ ਤੋਂ ਆਬਾਦਕਾਰਾਂ  ਦੀਆਂ ਜਮੀਨਾਂ ਆਜਾਦ ਕਰਵਾਉਣ ਦਾ ਘੋਲ ਲੜਿਆ ਹੈ। ਹਕੂਮਤੀ ਸ਼ਹਿ ਤੇ ਸਰਪ੍ਰਸਤੀ ਵਾਲੇ, ਫਰੀਦਕੋਟ ਅਗਵਾ ਕਾਂਡ ਦੇ ਮੁੱਖ ਦੋਸ਼ੀ ਗੁੰਡਾ ਗਰੋਹ ਨੂੰ ਜੇਲੀਂ ਪਹੁੰਚਾਉਣ ਤੇ ਬੱਚੀ ਨੂੰ ਉਸਦੇ ਮਾਪਿਆਂ ਦੇ ਸਪੁਰਦ ਕਰਵਾਉਣ ਦੇ ਚੱਲੇ ਤੇ ਸਫਲ ਹੋਏ ਘੋਲ 'ਚ ਕਿਸਾਨ-ਸੰਘਰਸ਼ ਦਾ ਵੱਡਾ ਹਿੱਸਾ ਹੈ। ਪ੍ਰਚੂਨ ਕਾਰੋਬਾਰ ਵਿਚ ਸਿੱਧੇ ਵਿਦੇਸ਼ੀ ਨਿਵੇਸ਼ ਨੂੰ ਖੁੱਲ ਦੇਣ ਅਤੇ ਕਾਰੋਬਾਰ 'ਚ ਲੱਗੇ ਲੋਕਾਂ ਦੇ ਹੋਣ ਵਾਲੇ ਉਜਾੜੇ ਵਿਰੁਧ ਕਿਸਾਨ-ਸੰਘਰਸ਼ ਨੇ ਆਵਾਜ ਉਠਾਈ ਹੈ।

ਤੇ ਨਾਲ ਦੀ ਨਾਲ ਕਿਸਾਨ ਸੰਘਰਸ਼, ਰੁਜ਼ਗਾਰ ਪ੍ਰਾਪਤੀ ਲਈ ਸੰਘਰਸ਼ ਕਰਦੇ ਈ.ਟੀ.ਟੀ., ਬੀ.ਐੱਡ., ਈ.ਜੀ.ਐਸ., ਟੈੱਟ ਪਾਸ, ਪੀ.ਟੀ.ਆਈ. ਤੇ ਡੀ.ਪੀ.ਈ. ਅਧਿਆਪਕਾਂ ਤੇ ਲਾਇਨਮੈਨਾਂ ਨਾਲ ਭਰਾਤਰੀ ਹਮੈਤੀ-ਹੰਦਾ ਲਾਉਂਦਾ ਰਿਹਾ ਹੈ। ਰੁਜ਼ਗਾਰ ਬਚਾਉਣ  ਲਈ ਜੱਦੋਜਹਿਦ ਕਰ ਰਹੇ ਬਿਜਲੀ ਕਾਮਿਆਂ ਤੇ ਰੈਗੂਲਰ ਹੋਣਾ ਚਾਹੁੰਦੇ ਥਰਮਲ ਦੇ ਕੱਚੇ ਕਾਮਿਆਂ ਦੇ ਅਤੇ ਐਸ.ਟੀ.ਆਰ. ਅਧਿਆਪਕਾਂ ਦੀ ਡਟਵੀਂ ਹਮੈਤ ਦੇ ਕੇ ਤਾਕਤ ਦਿੰਦਾ ਰਿਹਾ ਹੈ। ਸਰਕਾਰੀ ਬੇਇਨਸਾਫ਼ੀ ਤੇ ਪੁਲਸੀ ਜਬਰ ਖਿਲਾਫ਼ ਸੰਘਰਸ਼ ਦੇ ਮੈਦਾਨ ਵਿਚ ਆਈਆਂ ਆਂਗਣਵਾੜੀ ਵਰਕਰਾਂ ਤੇ ਹੈਲਪਰਾਂ ਦੀ ਹਿਮਾਇਤ ਵਿਚ ਹਾਜ਼ਰ ਹੋਇਆ ਹੈ। ਸਾਲ 2009 ਵਿਚ ਬਠਿੰਡਾ ਸਕੱਤਰੇਤ ਮੂਹਰੇ ਪੱਕੇ ਟੈਂਟ ਲਾ ਕੇ ਆਪੋ ਆਪਣੀਆਂ ਮੰਗਾਂ ਦੀ ਪ੍ਰਾਪਤੀ ਲਈ ਸੰਘਰਸ਼ ਕਰ ਰਹੀਆਂ 16-17 ਜਥੇਬੰਦੀਆਂ ਦੇ ਹੱਕ 'ਚ ਸਹਾਇਤਾ ਕਮੇਟੀ ਬਣਾ ਕੇ ਵੱਡਾ ਇਕੱਠ ਕੀਤਾ ਹੈ।

ਕਿਸਾਨ-ਸੰਘਰਸ਼ ਨਾ ਸਿਰਫ਼ ਕਿਸਾਨਾਂ 'ਚ ਹੀ ਉਤਸ਼ਾਹ ਭਰਦਾ ਹੈ, ਸਗੋਂ ਹੋਰਨਾਂ ਤਬਕਿਆਂ ਨੂੰ, ਸ਼ਹਿਰੀਆਂ ਨੂੰ ਪਰੇਰਨਾ, ਉਤਸ਼ਾਹ ਤੇ ਸਹਿਯੋਗ ਦਿੰਦਾ ਰਿਹਾ ਹੈ। ਉਹਨਾਂ ਤਬਕਿਆਂ ਨੂੰ ਸਰਕਾਰ ਤੋਂ ਮੰਗਾਂ ਮੰਨਵਾਉਣ ਵਿਚ ਮੱਦਦਗਾਰ ਹੁੰਦਾ ਰਿਹਾ ਹੈ। ਕਿਸਾਨ ਆਬਾਦੀ ਦਾ ਵੱਡਾ ਹਿੱਸਾ ਹਨ। ਜੇ ਇਹ ਚੇਤਨ ਹੋ ਕੇ ਜਥੇਬੰਦ ਹੁੰਦੇ ਹਨ, ਸੰਘਰਸ਼ਾਂ ਦੇ ਰਾਹ ਤੁਰਦੇ ਹਨ ਤਾਂ ਇਹ ਰਾਜ ਤੇ ਸਮਾਜ ਦੀ ਅਜੋਕੀ ਲੁੱਟ ਤੇ ਦਾਬੇ ਵਾਲੀ ਤਸਵੀਰ ਬਦਲ ਸਕਣ ਦੀ ਸਮਰੱਥਾ ਰਖਦੇ ਹਨ।ਏਸੇ ਕਰਕੇ ਕਿਸਾਨ ਸੰਘਰਸ਼ ਸਰਕਾਰ ਦੀ ਅੱਖ ਦਾ ਰੋੜ ਬਣਿਆ ਹੋਇਆ ਹੈ।

ਇਹ ਹਕੂਮਤੀ ਹੱਲਾ ਕਿਸਾਨ ਸੰਘਰਸ਼ 'ਤੇ ਪਹਿਲੀ ਵਾਰ ਨਹੀਂ ਹੋਇਆ ਹੈ। ਇਹ ਤਾਂ ਉਦੋਂ ਤੋਂ ਹੀ ਹੁੰਦਾ ਆ ਰਿਹਾ ਹੈ, ਜਦੋਂ ਮੁਲਕ ਦੇ ਨਵੇਂ ਸਜੇ ਹਾਕਮ ਮੁਲਕ ਦੀ ਸਤਾ ਬਦਲੀ ਨੂੰ ''ਸੰਪੂਰਨ ਆਜ਼ਾਦੀ'' ਦਾ ਅਤੇ ਜਾਬਰ ਰਾਜ-ਮਸ਼ੀਨਰੀ ਨੂੰ ''ਜਮਹੂਰੀਅਤ'' ਦਾ ''ਜਮਹੂਰੀ ਹੱਕਾਂ'' ਦੇ ਖੋਟੇ-ਮੋਤੀ ਜੜਿਆ ਲਿਬਾਸ ਪਹਿਨਾਉਣ ਦੇ ਖੇਖਣ ਕਰ ਰਹੇ ਸਨ, ਐਨ ਉਸ ਵੇਲੇ ਮੁਲਕ ਦੀ ਫੌਜ ਤਿਲੰਗਾਨਾ ਦੇ ਕਿਸਾਨ-ਅੰਦੋਲਨ ਨੂੰ ਕੁਚਲਣ ਲਈ ਚਾੜੀ ਗਈ ਸੀ।  ਮੁਲਕ ਅੰਦਰ ਇਹ ਹਮਲੇ ਜਾਰੀ ਰਹਿ ਰਹੇ ਹਨ। ਹੁਣ ਤੱਕ ਬਹੁਤ ਸਰਕਾਰਾਂ ਬਦਲੀਆਂ ਪਰ ਹਾਕਮਾਂ ਦਾ ਜਾਬਰ ਰਵੱਈਆ ਨਹੀਂ ਬਦਲਿਆ। ਇਹ ''ਜਮਹੂਰੀਅਤ'' ਦਾ ਢੋਲ ਵੀ ਕੁੱਟੀ ਜਾ ਰਹੇ ਹਨ ਤੇ ਲੋਕਾਂ ਦਾ, ਸੰਘਰਸ਼ਾਂ ਦਾ ਗਲਾ ਵੀ ਘੁੱਟੀ ਜਾ ਰਹੇ ਹਨ।

''ਜਮਹੂਰੀਅਤ'' - ਹਾਥੀ ਦੇ ਦੰਦ

ਜਿਸ ਰਾਜ ਤੇ ਸਮਾਜ ਦੀਆਂ ਕੁੱਲ ਕਲਾਵਾਂ ਉੱਤੇ ਜਗੀਰੂ ਤਾਕਤਾਂ ਦਾ ਅਤੇ ਸਾਮਰਾਜ ਦਾ ਗਲਬਾ ਹੋਵੇ, ਉਥੇ ਜਮਹੂਰੀਅਤ ਨਹੀਂ ਹੁੰਦੀ। ਲੁੱਟ, ਦਾਬਾ ਤੇ ਜਬਰ ਹੁੰਦਾ ਹੈ। ਸੰਨ ਸੰਤਾਲੀ ਤੋਂ ਪਹਿਲਾਂ ਇਹ ਜਮਹੂਰੀਅਤ ਦੁਸ਼ਮਣ ਤਾਕਤਾਂ ਦਾ ਭਾਰਤੀ ਰਾਜ 'ਤੇ ਗਲਬਾ ਸੀ ਅਤੇ ਸੰਤਾਲੀ ਤੋਂ ਬਾਅਦ ਅੱਜ ਵੀ ਇਹਨਾਂ ਦਾ ਗਲਬਾ ਕਾਇਮ ਹੈ। ਸੰਨ ਸੰਤਾਲੀ 'ਚ ਸੱਤਾ ਹੀ ਬਦਲੀ ਸੀ, ਹੋਰ ਕੁੱਝ ਵੀ ਨਹੀਂ ਬਦਲਿਆ। ਸੱਤਾ ਬਦਲੀ ਨਾਲ ਨਵੇਂ ਸਜੇ ਹਾਕਮਾਂ ਨੇ ਰਜਵਾੜਾਸ਼ਾਹੀ ਨੂੰ ਮੋਟੇ ਭੱਤਿਆਂ ਤੇ ਉੱਚੇ ਅਹੁਦਿਆਂ ਨਾਲ ਨਿਵਾਜ ਕੇ ਅਤੇ ਸਾਮਰਾਜ ਨੂੰ ਲੋਕਾਂ ਦੇ ਗੁੱਸੇ ਤੋਂ ਬਚਾਉਣ ਲਈ ਉਹਲੇ ਕਰਕੇ ਇਸ ਜਮਹੂਰੀਅਤ ਵਿਰੋਧੀ ਪਿਛਾਖੜੀ ਸਮਾਜਿਕ ਪ੍ਰਬੰਧ ਅਤੇ ਵਿਰਾਸਤ 'ਚ ਮਿਲੇ ਬਸਤੀਵਾਦੀ ਖੂੰਖਾਰ ਰਾਜ ਦੀ ਹਕੀਕਤ ਉੱਤੇ ਪਰਦਾ ਪਾਉਣ ਲਈ ਝੂਠੀ ਜਮਹੂਰੀਅਤ ਦਾ ਮਖੌਟਾ ਚਾੜ ਦਿੱਤਾ। ਪਾਰਲੀਮੈਂਟਰੀ ਢਾਂਚੇ ਦਾ ਢਕਵੰਜ ਖੜ੍ਹਾ ਕਰ ਦਿੱਤਾ। ਮੁਲਕ ਦੀ ਅਖੌਤੀ ਜਮਹੂਰੀਅਤ ਦੇ ਸੰਵਿਧਾਨ ਨੂੰ ਲਿਖਤੀ ਰੂਪ ਦੇਣ ਵਾਲੇ ਡਾ. ਅੰਬੇਦਕਰ ਨੇ ਖੁੱਦ ਮੰਨਿਆ ਹੈ ਕਿ ''ਅਸੀਂ ਜਗੀਰਦਾਰੀ ਸਮਾਜਿਕ ਨਿਜ਼ਾਮ ਵਿਚ ਪਾਰਲੀਮਾਨੀ ਜਮਹੂਰੀਅਤ ਦਾ ਤਜ਼ਰਬਾ ਕਰ ਰਹੇ ਹਾਂ।''

ਇਸ ਚੱਲ ਰਹੇ ਜਬਰ ਤੇ ਲੁਟੇਰੇ ਸਿਆਸੀ ਰਾਜ ਦਾ ਮੁਲਕ ਅੰਦਰਲੀਆਂ ਸਭ ਹਾਕਮ ਸਿਆਸੀ ਪਾਰਟੀਆਂ ਸੋਹਲੇ ਗਾ ਰਹੀਆਂ ਹਨ।ਪੰਜਾਬ ਦਾ ਮੌਜੂਦਾ ਅਕਾਲੀ-ਭਾਜਪਾ ਹਾਕਮ ਗੱਠਜੋੜ ਵੀ ਇਸੇ ਰਾਜ ਦੇ ਵਾਧੇ ਤੇ ਸੁਰੱਖਿਆ ਲਈ ਚੱਤੋ ਪਹਿਰ ਪਹਿਰਾ ਦਿੰਦਾ ਹੈ ਤੇ ਟੀਪ-ਟਪੱਲਾ ਕਰਕੇ ਰੰਗ ਰੋਗਨ ਕਰਦਾ ਰਹਿੰਦਾ ਹੈ। ਸਭਨਾਂ ਸੂਬਿਆਂ ਤੇ ਕੇਂਦਰੀ ਹਾਕਮਾਂ ਵਾਂਗੂੰ ਇਹ ਵੀ ਰਜਵਾੜਿਆਂ, ਜਗੀਰਦਾਰਾਂ ਅਤੇ ਪੇਂਡੂ ਤੇ ਸ਼ਹਿਰੀ ਧਨਾਢਾਂ ਦੀ ਸਮਾਜਿਕ ਚੌਧਰ ਤੇ ਸਿਆਸਤ ਵਿਚ ਪੁੱਗਤ ਤੇ ਵੁੱਕਤ ਬਣਾਈ ਰੱਖਦਾ ਹੈ, ਇਸੇ ਦੇ ਸਿਰ 'ਤੇ ਆਵਦੀ ਹਕੂਮਤ ਲੰਮਾ ਸਮਾਂ ਚਲਾਉਂਦੇ ਰਹਿਣ ਦੇ ਮਨਸੂਬੇ ਪਾਲਦਾ ਹੈ।

ਪਾਰਲੀਮੈਂਟ ਅਸੰਬਲੀਆਂ, ਪੰਚਾਇਤਾਂ ਤੇ ਨਗਰ ਪਾਲਿਕਾਵਾਂ ਦੀਆਂ ਚੋਣਾਂ ਸਮੇਂ ਵੋਟਾਂ ਦੀ ਛਲਾਵਿਆਂ ਭਰੀ ਖੇਡ ਖੇਡਦਿਆਂ ਭਾਰਤੀ ਹਾਕਮ ਵੋਟ ਦੇ ਨਕਲੀ ਹੱਕ ਨੂੰ ਹੀ ''ਜਨਮੱਤ'' ਤੇ ''ਜਮਹੂਰੀਅਤ'' ਦਾ ਢੋਲ ਕੁੱਟਦੇ ਜਮਾਂ ਨੀ ਥੱਕਦੇ, ਭੋਰਾ ਨੀ ਅੱਕਦੇ।ਵੋਟਾਂ ਦੀ ਭੀਖ ਮੰਗਦੇ, ਲੋਕਾਂ ਨੂੰ ਲਾਰਿਆਂ ਨਾਲ ਚਾਰਦੇ, ਰਿਸ਼ਵਤੀ ਬੁਰਕੀਆਂ ਨਾਲ ਵਰਾਉਂਦੇ, ਨਸ਼ਿਆਂ 'ਚ ਡਬੋਂਦੇ, ਦਿਨ-ਰਾਤ ਪੂਰੀ ਚਲਿੱਤਰੀ ਨੱਠ-ਭੱਜ ਦਾ ਨਾਟਕ ਖੇਡਦੇ ਹਨ।ਆਵਦੀ ''ਜਮਹੂਰੀਅਤ'' ਦਾ ਪੂਰੇ ਸਾਜਾਂ-ਸਾਜਿੰਦਿਆਂ ਤੇ ਰੰਗਾਂ-ਰੰਗੋਲੀਆਂ ਨਾਲ ਪ੍ਰਚਾਰ ਦਾ ਗੁੱਡਾ ਬੰਨਦੇ ਹਨ। ਪਰ ਜਦੋਂ ਹੀ ਲੋਕਾਂ ਦਾ ਕੋਈ ਹਿੱਸਾ ਆਵਦੇ ਹੱਕਾਂ ਹਿੱਤਾਂ ਦੀ ਪ੍ਰਾਪਤੀ ਤੇ ਸੁਰੱਖਿਆ ਦੀ ਮੰਗ ਕਰਦਾ ਹੈ। ਰੋਸ ਪ੍ਰਗਟਾਉਂਦਾ ਹੈ। ਜਥੇਬੰਦ ਹੁੰਦਾ ਹੈ।ਸੰਘਰਸ਼ ਦੇ ਰਾਹ ਤੁਰਦਾ ਹੈ। ਹਕੂਮਤ ਤੇ ਹਾਕਮ ਪਾਰਟੀਆਂ ਦੀ ਕੀਲ ਤੋਂ ਆਜਾਦ ਤੁਰਦਾ ਹੈ ਫਿਰ ਸੰਘਰਸ਼ ਦੀ ਸ਼ਕਲ ਭਾਵੇਂ ਕਿੰਨੀ ਛੋਟੀ ਤੋਂ ਛੋਟੀ ਹੋਵੇ ਤਾਂ ਵੀ ਹਾਕਮ ਆਵਦੇ ਜਬਰ ਦੇ ਸਾਰੇ ਅਸਤਰਾਂ-ਸ਼ਾਸ਼ਤਰਾਂ ਨਾਲ ਲੈਸ ਹੋ ਟੁੱਟ ਕੇ ਪੈ ਜਾਂਦਾ ਹੈ, ਜਾਨਾਂ ਲੈਣ ਤੱਕ ਜਾ ਵੜਦਾ ਹੈ। ''ਜਮਹੂਰੀਅਤ'' ਦੇ ਨਕਾਬ ਹੇਠੋਂ ਹਾਥੀ ਦੇ ਖਾਣ ਵਾਲੇ ਦੰਦ ਸਾਹਮਣੇ ਆ ਜਾਂਦੇ ਹਨ।

ਮੁਲਕ ਦੇ ਉੱਤਰ ਪੂਰਬੀ ਖਿੱਤੇ ਦੇ ਲੋਕਾਂ ਤੇ ਜੰਮੂ ਕਸ਼ਮੀਰ ਦੇ ਲੋਕਾਂ ਵੱਲੋਂ ਆਪਾ-ਨਿਰਣੇ ਤੇ ਖੁਦਮੁਖਤਿਆਰੀ ਦੀ ਲਹਿਰ ਉਤੇ ਸੰਨ ਸਤਾਲੀ ਤੋਂ ਹੀ ਬੋਲਿਆ ਫੌਜੀ ਖੂਨੀ ਧਾਵਾ ਭਾਰਤੀ ਹਕੂਮਤ ਦੀ ''ਦੁਨੀਆਂ ਦੀ ਸਭ ਵੱਡੀ ਜਮਹੂਰੀਅਤ'' ਦਾ ਸੱਚ ਪੇਸ਼ ਕਰ ਰਿਹਾ ਹੈ।

ਮੁਲਕ ਦੇ ਹਰ ਖਿੱਤੇ ਅੰਦਰ ਹਕੂਮਤਾਂ ਵਲੋਂ ਜਲ, ਜੰਗਲ, ਜਮੀਨ, ਘਰ, ਕਾਰੋਬਾਰ ਤੇ ਰੁਜ਼ਗਾਰ ਨੂੰ ਖੋਹੇ ਜਾਣ ਦੇ ਖਿਲਾਫ ਸੰਘਰਸ਼ ਕਰਦੇ ਲੋਕਾਂ 'ਤੇ ਪੂਰੇ ਮੁਲਕ ਅੰਦਰ ਹੁੰਦਾ ਹਕੂਮਤੀ ਜਬਰ ਖਾਸ ਕਰਕੇ ਝਾਰਖੰਡ, ਛੱਤੀਸਗੜ ਤੇ ਉੜੀਸਾ ਦੇ ਆਦਿਵਾਸੀਆਂ 'ਤੇ ਚਾੜੀ ਫੌਜ ਜਮਹੂਰੀਅਤ ਦੇ ਦਰਸ਼ਨ ਹੀ ਕਰਵਾ ਰਹੀ ਹੈ।

ਲੋਕਾਂ ਦੇ ਹੱਕਾਂ-ਹਿੱਤਾਂ ਉਤੇ ਹਕੂਮਤੀ ਹਮਲੇ ਤੇਜ਼ ਹੋ ਰਹੇ ਹਨ, ਆਰਥਿਕ ਹੱਲੇ ਵੀ ਤੇ ਜਾਬਰ ਹੱਲੇ ਵੀ।ਪਹਿਲੈ ਸੈਂਕੜੇ ਕਾਲੇ ਕਾਨੂੰਨਾਂ ਦੇ ਹੁੰਦਿਆਂ-ਸੁੰਦਿਆਂ ਨਿੱਤ ਨਵੇਂ ਲੋਕ ਮਾਰੂ ਜਾਬਰ ਕਾਲੇ ਕਨੂੰਨ ਜਮਹੂਰੀਅਤ ਦਾ ਗਲਾ ਘੁੱਟਣ ਲਈ ਘੜੇ ਤੇ ਮੜੇ ਜਾ ਰਹੇ ਹਨ। ਸੱਚੀ ਜਮਹੂਰੀਅਤ ਲਈ ਉੱਠ ਰਹੀ ਲੋਕ ਲਹਿਰ ਦਾ ਤੁਖ਼ਮ ਮਿਟਾਉਣ ਲਈ ਭਾਰਤੀ ਰਾਜ ਨੇ ਅੰਨਾ ਬੋਲਾ ਦਮਨ-ਚੱਕਰ ਚਲਾਇਆ ਹੋਇਆ ਹੈ। ਰੋਸ ਪ੍ਰਗਟਾਉਣ, ਜਥਬੰਦ ਹੋਣ ਤੇ ਸੰਘਰਸ਼ ਕਰਨ ਦੇ ਬੁਨਿਆਦੀ ਤੇ ਜਮਹੂਰੀ ਹੱਕ ਉੱਤੇ ਵਾਰ-ਵਾਰ ਝਬੁੱਟ ਮਾਰਨ ਲਈ ਇਹ ਧੱਕੜ ਰਾਜ ਝਈਆਂ ਲੈ-ਲੈ ਵਰ੍ਹਦਾ ਰਹਿੰਦਾ ਹੈ। ਝੂਠੀ ਜਮਹੂਰੀਅਤ ਦੇ ਸੰਵਿਧਾਨ ਵਿਚ ਸ਼ਹਿਰੀ ਆਜਾਦੀਆਂ ਦੇ ਪ੍ਰਚਾਰਕਾਂ ਤੱਕ ਨੂੰ ਵੀ ਇਹ ਰਾਜ ਨਹੀਂ ਬਖਸ਼ਦਾ। ਸੰਗੀਨ ਜੁਰਮਾਂ ਅਧੀਨ ਜੇਲ੍ਹੀ ਡਕਦਾ ਰਹਿੰਦਾ ਹੈ। ਲੋਕ ਪੱਖੀ ਨਾਟਕ ਮੰਡਲੀਆਂ ਤੇ ਗੀਤਕਾਰਾਂ-ਗਾਇਕਾਂ ਨੂੰ ਇਹ ਰਾਜ ਆਵਦਾ ਕਬਰਪੁੱਟ ਸਮਝਦਾ ਹੋਇਆ ਆਵਦੇ ਜਬਰ ਦੀ ਮਾਰ ਹੇਠ ਲਿਆਉਂਦਾ ਹੈ। ਏਥੇ ਪੰਜਾਬ ਅੰਦਰ ਇਸ ਕਿਸਾਨ-ਸੰਘਰਸ਼ 'ਤੇ ਬੋਲਿਆ ਧਾਵਾ ਅਤੇ ਅਗਾਂਹ ਨੂੰ ਸਭਨਾਂ ਤਬਕਿਆਂ ਦੇ ਸੰਘਰਸ਼ਾਂ ਉਤੇ ਪਾਬੰਦੀਆਂ ਮੜ੍ਹਨ ਦੇ ਹੁਕਮ ਮੁਲਕ ਅੰਦਰ ਚੱਲ ਰਹੇ ਜਾਬਰ ਰਾਜ ਦੀ ਲੜੀ ਦੀ ਕੜੀ ਹੈ।

ਲੋਕ ਮੋਰਚਾ ਪੰਜਾਬ, ਪੰਜਾਬ ਸਰਕਾਰ ਦੇ ਮੌਜੂਦਾ ਧਾਵੇ ਖਿਲਾਫ਼ ਕਿਸਾਨਾਂ, ਮਜਦੂਰਾਂ ਅਤੇ ਸਭਨਾਂ ਸੰਘਰਸ਼ਸ਼ੀਲ ਹਿੱਸਿਆਂ, ਜਮਹੂਰੀ ਸ਼ਕਤੀਆਂ, ਲੋਕ-ਪੱਖੀ ਨਾਟਕਕਾਰਾਂ, ਕਲਾਕਾਰਾਂ ਨੌਜਵਾਨਾਂ ਨੂੰ ਮੁਲਕ ਅੰਦਰ ਸ਼ਹੀਦ ਭਗਤ ਸਿੰਘ ਦੇ ਇਨਕਲਾਬੀ ਵਿਚਾਰਾਂ ਦਾ ਖਰਾ ਜਮਹੂਰੀ ਰਾਜ ਉਸਾਰਨ ਹਿੱਤ ਆਪਣੀਆਂ ਸਾਰੀਆਂ ਤਾਕਤਾਂ ਤੇ ਕਲਾਵਾਂ ਨੂੰ ਸੇਧਤ ਕਰਨ ਦਾ ਸਨਿਮਰ ਸੱਦਾ ਦਿੰਦਾ ਹੈ। ਲੋਕ ਮੋਰਚਾ ਪੰਜਾਬ ਸਦਾ ਅੰਗ-ਸੰਗ ਹੈ।

ਹੱਕ ਦੀ ਰਾਖੀ ਲਈ ਮਜਬੂਤ ਤੇ ਵਿਸ਼ਾਲ ਸੰਘਰਸ਼ ਹੀ ਗਾਰੰਟੀ ਹੈ।

ਵੱਲੋਂ :
ਸੂਬਾ ਕਮੇਟੀ, ਲੋਕ ਮੋਰਚਾ ਪੰਜਾਬ
ਪ੍ਰਧਾਨ : ਗੁਰਦਿਆਲ ਸਿੰਘ ਭੰਗਲ                           ਜਨਰਲ ਸਕੱਤਰ : ਜਗਮੇਲ ਸਿੰਘ
94171-75963                                                 9417224822
ਮਿਤੀ 27.03.13

ਗੂੜ੍ਹੀ ਨੀਂਦ ਸੁੱਤੇ, ਲੋਕਾਂ ਨੂੰ ਜਗਾ ਦਿਓ - ਪਿੰਡਾਂ ਨੂੰ ਜਗਾਓ, ਪਿੰਡਾਂ ਨੂੰ ਹਿਲਾ ਦਿਓ

ਪਿੰਡਾਂ ਨੂੰ ਜਗਾਓ

-ਅਮੋਲਕ ਸਿੰਘ

ਜਾਗੋ ਪਿੰਡ ਪਿੰਡ ਆਈ
ਇਹ ਸੁਨੇਹਾ ਲੈ ਕੇ ਆਈ
ਸੁੱਤੀ ਜਾਗੇ ਇਹ ਲੋਕਾਈ
ਰੁੱਤ ਜਾਗਣੇ ਦੀ ਆਈ
ਗੂੜ੍ਹੀ ਨੀਂਦ ਸੁੱਤੇ, ਲੋਕਾਂ ਨੂੰ ਜਗਾ ਦਿਓ
ਪਿੰਡਾਂ ਨੂੰ ਜਗਾਓ, ਪਿੰਡਾਂ ਨੂੰ ਹਿਲਾ ਦਿਓ
ਪਿੰਡਾਂ ਨੂੰ ਜਗਾਓ.. .. ..

ਦਫ਼ਾ ਇਹ ਚੁਤਾਲੀ ਪਿੰਡ ਪਿੰਡ ਮੜ੍ਹਦੇ
ਸਾਹ ਲੈਣ ਉੱਤੇ ਵੀ ਪਾਬੰਦੀ ਜੜਦੇ

ਰਾਜ ਭਾਗ ਮਾਰੇ ਡੰਡੇ ਬੁੱਢੀ ਮਾਂ 'ਤੇ
ਤਣੀਆਂ ਬੰਦੂਕਾਂ ਦੇਖੋ 'ਨੰਨ੍ਹੀ ਛਾਂ' 'ਤੇ

ਮੰਗ-ਪੱਤਰਾਂ ਤੋਂ ਐਨੇ ਹਾਕਮ ਡਰੇ
ਛਾਪਾਮਾਰੀ ਕੀਤੀ ਸਾਡੇ ਆਣ ਕੇ ਘਰੇ

ਭਾਵੇਂ ਰੋਕਾਂ ਮੜ੍ਹੀਆਂ ਬਠਿੰਡੇ ਸ਼ਹਿਰ 'ਤੇ
ਚੜ੍ਹ ਗਈ ਜੁਆਨੀ ਦੇਖੋ ਲੋਕ-ਲਹਿਰ 'ਤੇ

ਪਿੰਡਾਂ ਦੀਆਂ ਕੰਧਾਂ ਉੱਤੇ ਲਿਖ ਲਾ ਦਿਓ
ਪਿੰਡਾਂ ਨੂੰ ਜਗਾਓ.. .. ..

ਮੰਗ-ਪੱਤਰਾਂ 'ਚ ਲੋਕੀ ਹੱਕ ਮੰਗਦੇ
ਹਾਕਮਾਂ ਦੇ ਬਾਰ ਮੂਹਰੇ ਆਣ ਖੰਘਦੇ

ਚੜ੍ਹਿਆ ਬੁਖ਼ਾਰ ਹੈ ਜਾਗੀਰਦਾਰਾਂ ਨੂੰ
ਨੀਂਦ ਨਹੀਂਓਂ ਆਉਂਦੀ ਵੱਡੇ ਸ਼ਾਹੂਕਾਰਾਂ ਨੂੰ

ਢਿੱਡ ਸੂਲ ਹੋ ਗਿਆ 'ਜਮਹੂਰੀ ਰਾਜ' ਦੇ
ਗਲ਼ 'ਗੂਠਾ ਦਿੱਤਾ ਲੋਕਾਂ ਦੀ ਆਵਾਜ਼ ਦੇ

ਜਿੰਨਾ ਉਹ ਦਬਾਉਣ ਲੋਕੀ ਹੋਰ ਉੱਠਦੇ
ਹਾਕਮਾਂ ਦੇ ਹੁਕਮਾਂ 'ਤੇ ਲੋਕ ਥੁੱਕਦੇ

ਪੰਨੇ ਇਤਿਹਾਸ ਵਾਲੇ ਇਹ ਸੁਣਾ ਦਿਓ
ਪਿੰਡਾਂ ਨੂੰ ਜਗਾਓ.. .. ..

ਸੰਗਤਾਂ ਦੇ ਦਰਸ਼ਣ ਓਹਲਾ ਪਰਦਾ
ਡੰਡਿਆਂ ਦੇ ਨਾਲ ਰਾਜ ਸੇਵਾ ਕਰਦਾ

ਕਰਜ਼ੇ ਦੇ ਮਾਰੇ ਲੋਕੀ ਮੰਗ ਕਰਦੇ
ਕੀਹਦੇ ਕੋਲੇ ਦੱਸੀਏ ਜੀ ਦੁੱਖ ਘਰ ਦੇ

ਨਾਕਾਬੰਦੀ ਕਰਦੇ ਨੇ ਪਿੰਡ ਪਿੰਡ ਦੀ
ਭੰਨ ਦੇਣੀ ਲੋਕਾਂ, ਹਾਕਮਾਂ ਦੀ ਹਿੰਡ ਜੀ

ਲੋਕਾਂ ਨਾਲ ਜੀਹਨੇ ਵੀ ਹੈ ਮੱਥਾ ਲਾ ਲਿਆ
ਜਿੱਤ ਜਾਂਦੇ ਲੋਕ, ਜਾਬਰਾਂ ਨੂੰ ਢਾਅ ਲਿਆ

ਹੱਕ ਦੇ ਨਗ਼ਾਰੇ ਉੱਤੇ ਚੋਟ ਲਾ ਦਿਓ
ਪਿੰਡਾਂ ਨੂੰ ਜਗਾਓ, ਪਿੰਡਾਂ ਨੂੰ ਹਿਲਾ ਦਿਓ

ਸਾਂਝੇ ਦੁੱਖਾਂ ਵਾਲੀ ਸਾਂਝੀ ਪੂਣੀ ਕੱਤੀਏ
ਫ਼ਰਜ਼ਾਂ ਤੋਂ ਭੁੱਲ ਕੇ ਨਾ ਅੱਖ ਵੱਟੀਏ

ਜਕੋ ਤਕੀ ਛੱਡੋ ਉੱਠੋ ਜੋਟੀ ਪਾ ਲਈਏ
ਪਿੰਡਾਂ ਵਿੱਚੋਂ ਸੁੱਤੇ ਸ਼ੇਰਾਂ ਨੂੰ ਜਗਾ ਲਈਏ

ਇੱਕ ਪਿੰਡ ਜਾਗੇ, ਦੂਜੇ ਨੂੰ ਜਗਾ ਲਏ
ਔਰਤਾਂ ਤੇ ਮਰਦਾਂ ਨੇ ਮੋਢੇ ਲਾ ਲਏ

ਬੇੜੀ ਹੈ ਕਿਨਾਰੇ ਸਾਡੀ ਤਾਹੀਂ ਲੱਗਣੀ
ਜਾਬਰਾਂ ਦੇ ਤਾਲੂਏ 'ਚ ਸੱਟ ਵੱਜਣੀ

ਉੱਠੋ ਸ਼ੇਰੋ ਕੂੜ ਦੇ ਮਹੱਲ ਢਾਅ ਦਿਓ
ਪਿੰਡਾਂ ਨੂੰ ਜਗਾਓ.. .. ..

Friday, April 5, 2013

ਲਾ-ਮਿਸਾਲ ਕਿਸਾਨ ਮਜ਼ਦੂਰ ਕਾਨਫਰੰਸ ਵੱਲੋਂ ਜਮੀਨੀ-ਵੰਡ ਕਰਜਾ ਮੁਕਤੀ ਲਈ ਵਿਸ਼ਾਲ ਤੇ ਦ੍ਰਿੜ ਘੋਲਾਂ ਦਾ ਸੱਦਾ

ਲਾ-ਮਿਸਾਲ ਕਿਸਾਨ ਮਜ਼ਦੂਰ ਕਾਨਫਰੰਸ ਵੱਲੋਂ

ਜਮੀਨੀ-ਵੰਡ ਕਰਜਾ ਮੁਕਤੀ ਲਈ ਵਿਸ਼ਾਲ ਤੇ ਦ੍ਰਿੜ ਘੋਲਾਂ ਦਾ ਸੱਦਾ

ਜੀਓਬਾਲਾ ਕਾਂਡ ਦੀ ਅਦਾਲਤੀ ਜਾਂਚ ਦੀ ਮੰਗ

ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਅਤੇ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਵੱਲੋਂ ਸਾਂਝੇ ਤੌਰ 'ਤੇ ਇੱਥੋਂ ਨੇੜਲੇ ਪਿੰਡ ਫਤਹਿਗੜ• ਛੰਨਾ ਵਿਖੇ ਜ਼ਮੀਨ ਪ੍ਰਾਪਤੀ, ਕਰਜਾ ਮੁਕਤੀ, ਖੁਦਕੁਸ਼ੀ ਪੀੜਤਾਂ ਲਈ 5-5 ਲੱਖ ਰੁਪੈ ਮੁਆਵਜਾ ਤੇ ਸਰਕਾਰੀ ਨੌਕਰੀ ਦੇਣ, ਬੇਘਰੇ ਤੇ ਲੋੜਵੰਦਾਂ ਨੂੰ ਪਲਾਟ ਤੇ ਮਕਾਨ ਦੇਣ ਖ਼ੇਤ ਮਜ਼ਦੁਰਾਂ ਦੇ ਖੜੇ ਬਿਜਲੀ ਬਕਾਏ ਖ਼ਤਮ ਕਰਕੇ ਸਾਰੇ ਬੇਜ਼ਮੀਨਿਆਂ ਦੇ ਘਰੇਲੂ ਬਿੱਲ ਬਿਨਾ ਸ਼ਰਤ ਮੁਆਫ਼ ਕਰਨ, ਸੰਘਰਸ਼ ਕਰਨ ਦੇ ਜ਼ਮਹੂਰੀ ਹੱਕ ਤੇ ਲਾਈਆਂ ਰੋਕਾਂ ਖ਼ਤਮ ਕਰਕੇ ਗਿਫ੍ਰਤਾਰ ਕੀਤੇ ਆਗੂ ਬਿਨਾ ਸ਼ਰਤ ਰਿਹਾਅ ਕਰਨ, ਜੀਓਬਾਲਾ (ਤਰਨਤਾਰਨ) ਕਾਂਡ ਦੀ ਅਦਾਲਤੀ ਜਾਂਚ ਕਰਾਉਣ ਆਦਿ ਮੰਗਾਂ ਨੂੰ ਲੈ ਕੇ ਕੀਤੀ ਗਈ ਸੂਬਾਈ ਕਾਨਫਰੰਸ ਵਿੱਚ ਹਜ਼ਾਰਾ ਔਰਤਾਂ ਸਮੇਤ ਦਹਿ ਹਜ਼ਾਰਾਂ ਕਿਸਾਨਾਂ-ਮਜ਼ਦੂਰਾਂ ਨੇ ਸ਼ਮੂਲੀਅਤ ਕੀਤੀ!


ਠਾਠਾਂ ਮਾਰਦਾ ਇਕੱਠ ਤੇ ਅਕਾਸ਼ ਗੁੰਜਾਊ ਨਾਅਰੇ ਇਸ ਗੱਲ ਦੀ ਗਵਾਹੀ ਭਰ ਰਹੇ ਸਨ ਕਿ ਪੰਜਾਬ ਦੀ ਅਕਾਲੀ-ਭਾਜਪਾ ਸਰਕਾਰ ਵੱਲੋਂ ਪਿਛਲੇ ਮਹੀਨੇ ਕਿਸਾਨਾਂ ਮਜ਼ਦੂਰਾਂ ਦੇ ਜ਼ਮਹੂਰੀ ਹੱਕ ਨੂੰ ਕੁਚਲਣ ਲਈ ਹਜਾਰਾਂ ਮਰਦ ਔਰਤਾਂ ਨੂੰ ਜੇਲ•ਾਂ 'ਚ ਡੱਕਣ ਤੋਂ ਇਲਾਵਾ ਝੂਠਾ ਕਤਲ ਕੇਸ ਤੇ ਇਰਾਦਾ ਕਤਲ ਵਰਗੇ ਕੇਸ ਮੜ•ਨ ਖਿਲਾਫ਼ ਉਨਾ ਦੀ ਨਫ਼ਰਤ ਤੇ ਗੁੱਸਾ ਹੋਰ ਵੀ ਵਿਰਾਟ ਰੂਪ ਧਾਰਨ ਕਰ ਗਿਆ ਹੈ।





ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਬੁਲਾਰਿਆਂ ਨੇ ਆਖਿਆ ਕਿ ਪੰਜਾਬ ਅਤੇ ਕੇਂਦਰ ਸਰਕਾਰਾਂ ਦੀਆਂ ਜਗੀਰਦਾਰਾਂ, ਸੂਦਖੋਰਾਂ, ਵੱਡੇ ਵਪਾਰੀਆਂ, ਸਰਮਾਏਦਾਰਾਂ, ਸਾਮਰਾਜੀਆਂ ਤੇ ਬਹੁਕੌਮੀ ਕੰਪਨੀਆਂ ਦੇ ਪੱਖ ਪੂਰਦੀਆਂ ਨੀਤੀਆਂ ਦੀ ਬਦੌਲਤ ਕਰਜ਼ਿਆਂ ਤੇ ਆਰਥਿਕ ਤੰਗੀਆਂ 'ਚ ਫ਼ਸ ਕੇ ਖੁਦਕੁਸ਼ੀਆਂ ਦੇ ਰਾਹ ਪਏ ਤੇ ਬੇਘਰੇ ਤੇ ਬੇਜ਼ਮੀਨੇ ਹੋਏ ਕਿਸਾਨਾਂ ਮਜ਼ਦੂਰਾਂ ਦੀ ਜੂਨ ਸੁਧਾਰਨ ਲਈ ਜ਼ਰੂਰੀ ਹੈ ਕਿ:-

* ਜ਼ਮੀਨ ਸੁਧਾਰ ਕਾਨੂੰਨ ਤਹਿਤ ਸਾਢੇ 17 ਏਕੜ ਤੋਂ ਵੱਧ ਨਿਕਲਦੀ ਕਰੋੜਾਂ ਏਕੜ ਜ਼ਮੀਨ ਤੋਂ ਇਲਾਵਾ ਬੇਅਬਾਦ ਤੇ ਬੰਜ਼ਰ ਜ਼ਮੀਨ ਅਬਾਦ ਕਰਕੇ ਖ਼ੇਤ ਮਜ਼ਦੂਰਾਂ, ਬੇਜ਼ਮੀਨੇ ਤੇ ਥੁੜ ਜ਼ਮੀਨੇ ਕਿਸਾਨਾਂ 'ਚ ਵੰਡ ਕੀਤੀ ਜਾਵੇ।

* ਅਬਾਦਕਾਰਾਂ ਤੇ ਮੁਜਾਰਿਆਂ ਨੂੰ ਜ਼ਮੀਨਾ ਦੇ ਮਾਲਕੀ ਹੱਕ ਦਿੱਤੇ ਜਾਣ।

* ਲਾਗਤ ਖਰਚੇ ਘਟਾਉਣ ਲਈ ਖੇਤੀ ਲਾਗਤ ਵਸਤਾਂ ਦੇ ਵਪਾਰੀਆਂ ਤੇ ਕੰਪਨੀਆਂ ਦੇ ਅੰਨ•ੇ ਮੁਨਾਫ਼ਿਆਂ 'ਤੇ ਕੱਟ ਲਾਈ ਜਾਵੇ।

* ਕਰਜ਼ੇ ਭਰਨ ਤੋਂ ਅਸਮਰੱਥ ਮਜ਼ਦੂਰਾਂ ਕਿਸਾਨਾਂ ਦੇ ਸਾਰੇ ਕਰਜ਼ੇ ਖ਼ਤਮ ਕੀਤੇ ਜਾਣ।

* ਸੂਦਖੋਰੀ ਨੂੰ ਨੱਥ ਮਾਰਦਾ ਕਰਜ਼ਾ ਕਾਨੂੰਨ ਬਣਾ ਕੇ ਸਖ਼ਤੀ ਨਾਲ ਲਾਗੂ ਕੀਤਾ ਜਾਵੇ।

* ਸਰਕਾਰੀ ਖ਼ਜਾਨੇ 'ਚੋਂ ਖ਼ੇਤ ਮਜ਼ਦੂਰਾਂ, ਕਿਸਾਨਾਂ ਤੇ ਹੋਰ ਲੋੜਵੰਦਾਂ ਨੂੰ ਸਬਸਿਡੀਆਂ ਵਧਾਈਆਂ ਜਾਣ।

* ਵਿੱਦਿਆ, ਸਿਹਤ ਸਹੂਲਤਾਂ ਤੇ ਜਨਤਕ ਵੰਡ-ਪ੍ਰਣਾਲੀ ਨੂੰ ਮਜ਼ੂਬੂਤ ਕਰਨ ਲਈ ਬਜਟ ਰਕਮਾਂ 'ਚ ਵਾਧਾ ਕੀਤਾ ਜਾਵੇ।

* ਜਗੀਰਦਾਰਾਂ, ਸੂਦਖੋਰਾਂ, ਵੱਡੇ ਵਪਾਰੀਆਂ, ਤੇ ਸਰਮਾਏਦਾਰਾਂ ਨੂੰ ਖ਼ਜਾਨੇ 'ਚੋਂ ਦਿੱਤੀਆਂ ਜਾਂਦੀਆਂ ਅਰਬਾਂ ਖ਼ਰਬਾਂ ਦੀਆਂ ਰਿਆਇਤਾਂ ਬੰਦ ਕਰਕੇ ਉਨ•ਾ ਦੀ ਆਮਦਨ 'ਤੇ ਟੈਕਸਾਂ ਲਾ ਕੇ ਉਗਰਾਹੀ ਯਕੀਨੀ ਕੀਤੀ ਜਾਵੇ।

* ਰੁਜ਼ਗਾਰ-ਉਜਾੜੂ ਤਕਨੀਕ ਤੇ ਮਸ਼ੀਨਰੀ ਉੱਪਰ ਪਾਬੰਦੀ ਲਾ ਕੇ ਖੇਤੀ ਅਧਾਰਿਤ ਰੁਜ਼ਗਾਰ-ਮੁਖੀ ਸਨਅਤਾਂ ਦਾ ਜਾਲ ਵਿਛਾਇਆ ਜਾਵੇ।

* ਜਵਾਨੀ ਦਾ ਘਾਣ ਕਰ ਰਹੇ ਨਸ਼ਿਆਂ ਦੇ ਸੌਦਾਗਰਾਂ ਨੂੰ ਨੱਥ ਪਾਈ ਜਾਵੇ ਅਤੇ

* ਔਰਤਾਂ ਦੀਆਂ ਇੱਜਤਾਂ 'ਤੇ ਝਪਟ ਰਹੇ ਗੁੰਡਾ ਅਨਸਰਾਂ ਨੂੰ ਸਿਆਸੀ/ਪ੍ਰਸਾਸਨਿਕ ਸਹਿ ਦੇਣੀ ਬੰਦ ਕੀਤੀ ਜਾਵੇ।



ਬੁਲਾਰਿਆਂ ਨੇ ਦੋਸ਼ ਲਾਇਆ ਕਿ ਪੰਜਾਬ ਦੀ ਅਕਾਲੀ-ਭਾਜਪਾ ਸਰਕਾਰ ਲੋਕਾਂ ਦੀ ਇਹ ਹੱਕੀ ਅਵਾਜ ਸੁਣਨ ਦੀ ਥਾਂ ਅਜਿਹੀਆਂ ਮੰਗਾਂ ਉਠਾਉਣ ਵਾਲਿਆਂ ਦੀ ਸੰਘੀ ਘੁੱਟ ਰਹੀ ਹੈ।

* ਸ਼ਾਤਮਈ ਧਰਨਿਆਂ ਮਜੁਹਰਿਆਂ ਦੇ ਜਮਹੂਰੀ ਹੱਕ ਕੁਚਲਣ ਲਈ ਪੁਲਿਸ ਫੌਜ ਦੀ ਨਫ਼ਰੀ 'ਚ ਭਾਰੀ ਵਾਧਾ ਕੀਤਾ ਜਾ ਰਿਹਾ ਹੈ ਅਤੇ

* ਨਵੇਂ ਤੋਂ ਨਵੇਂ ਹਥਿਆਰ ਖਰੀਦੇ ਜਾ ਰਹੇ ਹਨ।

* ਲੋਕਾਂ ਦੀ ਸੋਚ ਨੂੰ ਖੁੰਢਾ ਕਰਨ ਲਈ ਨਸ਼ਿਆਂ ਤੇ ਲੱਚਰ ਸੱਭਿਆਚਾਰ ਦੇ ਦਰਿਆ ਵਗਾਏ ਜਾ ਰਹੇ ਹਨ।

* ਕਿਸਾਨ ਆਗੂਆਂ ਦੇ ਕਾਤਲ ਗੁੰਡਾ ਗ੍ਰੋਹਾਂ ਦੀ ਪੁਸਤ ਪਨਾਹੀ ਕੀਤੀ ਜਾ ਰਹੀ ਹੈ।


ਬੁਲਾਰਿਆਂ ਨੇ ਕਿਸਾਨਾ ਮਜ਼ਦੂਰਾਂ ਨੂੰ ਸੱਦਾ ਦਿੱਤਾ ਕਿ :-

* ਅਕਾਲੀ ਭਾਜਪਾ ਸਰਕਾਰ ਦੇ ਇਨ•ਾਂ ਆਰਥਿਕ ਅਤੇ ਜਾਬਰ ਹੱਲਿਆਂ ਨੂੰ ਠੱਲ•ਣ ਲਈ ਵਿਸਾਲ ਪੱਧਰ 'ਤੇ ਜਥੇਬੰਦ ਹੋਇਆ ਜਾਵੇ।

* ਖਾਸ ਕਰਕੇ ਮਜ਼ਦੂਰ ਕਿਸਾਨ ਔਰਤਾਂ ਤੇ ਨੌਜਵਾਨਾਂ ਨੂੰ ਵਿਸ਼ਾਲ ਗਿਣਤੀ 'ਚ ਲਾਮਬੰਦ ਕਰਕੇ ਦ੍ਰਿੜ ਲੰਮੇ ਤੇ ਜਾਨ ਹੂਲਵੇਂ ਘੋਲਾਂ ਰਾਹੀ ਸਰਕਾਰ ਦੇ ਚੰਦਰੇ ਇਰਾਦੇ ਮਿੱਟੀ 'ਚ ਮਿਲਾਏ ਜਾਣ।

* ਲੋਕ ਵਿਰੋਧੀ ਨੀਤੀਆਂ ਦੀ ਮਾਰ ਹੇਠ ਆ ਰਹੇ ਮੁਲਾਜ਼ਮਾਂ, ਬੇਰੁਜ਼ਗਾਰਾਂ, ਠੇਕਾ-ਕਾਮਿਆਂ ਤੇ ਸਨਅਤੀ ਮਜ਼ੂਦਰਾਂ ਨਾਲ ਸੰਘਰਸ ਸਾਂਝ ਹੋਰ ਪੱਕੀ ਕੀਤੀ ਜਾਵੇ।



ਇਕੱਠ ਵੱਲੋਂ ਮਤੇ ਪਾਸ ਕਰਕੇ ਪੰਜਾਬ ਅੰਦਰ ਪ੍ਰਸ਼ਾਸਨਿਕ ਦਫ਼ਤਰਾਂ ਅੱਗੇ ਧਰਨੇ ਮੁਜਾਹਰੇ ਕਰਨ 'ਤੇ ਰੋਕਾਂ ਲਾਉਣ ਤੇ 690 ਸੂਕੂਲ ਬੰਦ ਕਰਨ ਤੋਂ ਇਲਾਵਾ 1000 ਪ੍ਰਾਈਵੇਟ ਸਕੂਲਾਂ ਲਈ 5-5 ਏਕੜ ਪੰਚਾਇਤੀ ਜ਼ਮੀਨਾਂ ਦੇਣ ਦੇ ਫੈਸਲਿਆਂ ਦੀ ਨਿਖੇਧੀ ਕਰਦਿਆਂ ਇੰਨ•ਾ ਨੂੰ ਵਾਪਸ ਲੈਣ ਦੀ ਮੰਗ ਕੀਤੀ ਗਈ।



ਕਾਨਫਰੰਸ ਨੂੰ ਬੀ.ਕੇ.ਯੂ. ਏਕਤਾ ਦੇ ਸੂਬਾ ਪ੍ਰਧਾਨ ਜੋਗਿੰਦਰ ਸਿੰਘ ਉਗਰਾਹਾਂ, ਜਨਰਲ ਸਕੱਤਰ ਸੁਖਦੇਵ ਸਿੰਘ ਕੋਕਰੀ ਕਲਾਂ, ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਸੂਬਾ ਪ੍ਰਧਾਨ ਜੋਰਾ ਸਿੰਘ ਨਸਰਾਲੀ, ਜਨਰਲ ਸਕੱਤਰ ਲਛਮਣ ਸਿੰੇਘ ਸੇਵੇਵਾਲਾ, ਕਿਸਾਨ ਆਗੂ ਝੰਡਾ ਸਿੰਘ ਜੇਠੂਕੇ, ਹਰਿੰਦਰ ਕੌਰ ਬਿੰਦੂ, ਕੁਲਦੀਪ ਕੌਰ ਕੁੱਸਾ, ਪਰਮਜੀਤ ਕੌਰ ਕੋਟੜਾ ਤੋਂ ਇਲਾਵਾ ਕਿਸਾਨ ਸੰਘਰਸ਼ ਕਮੇਟੀ ਪੰਜਾਬਸ ਦੇ ਪ੍ਰਧਾਨ ਕਮਲਪ੍ਰੀਤ ਸਿੰਘ ਪੰਨੂੰ ਨੇ ਵੀ ਸੰਬੋਧਨ ਕੀਤਾ। ਇਸ ਮੌਕੇ ਪੰਜਾਬ ਲੋਕ ਸੱਭਿਆਚਾਰਕ ਬਠਿੰਡਾ ਮੰਚ ਬਠਿੰਡਾ ਅਤੇ ਨਵਦੀਪ ਸਿੰਘ ਧੌਲਾ ਵੱਲੋਂ ਇਨਕਲਾਬੀ ਗੀਤ ਸੰਗੀਤ ਵੀ ਪੇਸ਼ ਕੀਤਾ ਗਏ। ਸਟੇਜ ਸਕੱਤਰ ਦੀ ਭੂਮਿਕਾ ਸਿੰਗਾਰਾ ਸਿੰਘ ਮਾਨ ਨੇ ਨਿਭਾਈ।



ਜਾਰੀ ਕਰਤਾ ਸੁਖਦੇਵ ਸਿੰਘ ਕੋਕਰੀ ਕਲਾਂ 94174-66038