ਸ਼ਰਧਾਂਜਲੀ ਸਮਾਗਮ 'ਤੇ ਵਿਸ਼ੇਸ਼: ਇਨਕਲਾਬੀ ਟਰੇਡ ਯੂਨੀਅਨ ਲਹਿਰ ਦਾ ਮੋਢੀ ਸੀ ਅਮਰ 'ਲੰਬੀ'

 18 ਜਨਵਰੀ ਨੂੰ ਸ਼ਰਧਾਂਜਲੀ ਸਮਾਗਮ 'ਤੇ ਵਿਸ਼ੇਸ਼:

ਇਨਕਲਾਬੀ ਟਰੇਡ ਯੂਨੀਅਨ ਲਹਿਰ ਦਾ ਮੋਢੀ ਸੀ ਅਮਰ 'ਲੰਬੀ'

ਅਮਰ 'ਲੰਬੀ'

ਜ਼ਿੰਦਗੀ ਨੂੰ ਖੂਬਸੂਰਤ ਬਣਾਉਣ ਦੀ ਚੇਤਨ ਖਾਹਸ਼ ਨਾਲ ਆਪਣੇ ਨਿੱਜੀ ਸੁੱਖਾਂ ਨੂੰ ਤਿਆਗ ਕੇ ਕੰਡਿਆਲੇ ਰਾਹ ਦਾ ਸਫਰ ਤਹਿ ਕਰਦਿਆਂ ਲੋਕ ਹਿੱਤਾਂ ਲਈ ਜੂਝਣ ਵਾਲੇ ਮਨੁੱਖ ਹੀ ਲੋਕ ਨਾਇਕ ਅਖਵਾਉਣ ਦੇ ਹੱਕਦਾਰ ਹੁੰਦੇ ਹਨ। ਅਜਿਹੇ ਮਨੁੱਖ ਹੀ ਲੋਕਾਂ ਦੇ ਸਤਿਕਾਰ ਤੇ ਸਲਾਮ ਦੇ ਹੱਕਦਾਰ ਬਣਦੇ ਹਨ। ਅਜਿਹਾ ਹੀ ਇੱਕ ਲੋਕ ਨਾਇਕ ਸੀ ਅਮਰ 'ਲੰਬੀ', ਜਿਸਨੇ ਆਪਣੀ ਜ਼ਿੰਦਗੀ ਦੇ ਹੁਸੀਨ ਪਲ, ਲਿਆਕਤ, ਸਮੁੱਚਾ ਸਮਾਂ ਅਤੇ ਸ਼ਕਤੀ ਲੋਕ ਹਿੱਤਾਂ ਲਈ ਅਰਪਤ ਕਰ ਦਿੱਤੇ।

ਜ਼ਿਲਾ ਮਾਨਸਾ ਦੇ ਪਿੰਡ ਦਾਤੇਵਾਸ ਵਿਖੇ 2 ਜੁਲਾਈ 1946 ਨੂੰ ਪਿਤਾ ਭਰਪੂਰ ਸਿੰਘ ਅਤੇ ਮਾਤਾ ਭਗਵਾਨ ਕੌਰ ਦੇ ਘਰ ਜਨਮੇ ਅਮਰ ਲੰਬੀ ਨੇ ਹਰ ਕਿਸਮ ਦੀ ਲੁੱਟ, ਜਬਰ ਅਤੇ ਵਿਤਕਰਿਆਂ ਤੋਂ ਮੁਕਤ ਸਮਾਜ ਸਿਰਜਣ ਲਈ ਜ਼ਿੰਦਗੀ ਦੇ ਕਰੀਬ 47 ਵਰੇ ਲੋਕ ਸੰਗਰਾਮ ਦੇ ਲੇਖੇ ਲਾਏ। ਸਾਲ 1968 ਵਿੱਚ ਬਿਜਲੀ ਬੋਰਡ ਵਿੱਚ ਬੁਢਲਾਡਾ ਵਿਖੇ ਬਤੌਰ ਲਾਈਨਮੈਨ ਭਰਤੀ ਹੋਣ ਤੋਂ ਪਹਿਲਾਂ ਉਹਨਾਂ ਸਾਲ ਭਰ ਬੰਗਲੌਰ ਵਿਖੇ ਇੱਕ ਸਨਅੱਤੀ ਅਦਾਰੇ ਵਿੱਚ ਨੌਕਰੀ ਕਰਦਿਆਂ ਸਰਮਾਏਦਾਰ ਮਾਲਕਾਂ ਵੱਲੋਂ ਕੀਤੀ ਜਾਂਦੀ ਲੁੱਟ ਅਤੇ ਧੱਕੇ ਨੂੰ ਨੇੜਿਉਂ ਤੱਕਦਿਆਂ ਅਤੇ ਹੰਢਾਉਂਦਿਆਂ ਆਪਣੀ ਹੋਣੀ ਨੂੰ ਮਜ਼ਦੂਰ ਜਮਾਤ ਦੀ ਹੋਣੀ ਨਾਲ ਪੱਕੇ ਤੌਰ 'ਤੇ ਜੋੜ ਲਿਆ। ਇਸਦੇ ਨਾਲ ਹੀ ਉਹਨਾਂ ਸ਼ਹੀਦ ਭਗਤ ਸਿੰਘ ਨੂੰ ਆਪਣਾ ਆਦਰਸ਼ ਬਣਾ ਲਿਆ ਅਤੇ ਨਵੀਂ ਜ਼ਿੰਦਗੀ ਦੀ ਸ਼ੁਰੂਆਤ ਕਰ ਦਿੱਤੀ। ਇਹਨਾਂ ਗੁਣਾਂ ਦੀ ਬਦੌਲਤ ਹੀ ਬਿਜਲੀ ਬੋਰਡ ਅੰਦਰ ਭਰਤੀ ਹੁੰਦਿਆਂ ਸਾਰ ਉਹਨਾਂ ਮੁਲਾਜ਼ਮਾਂ ਦੇ ਹੱਕਾਂ ਦੀ ਰਾਖੀ ਲਈ ਅਫਸਰਸ਼ਾਹੀ, ਮੈਨੇਜਮੈਂਟ ਅਤੇ ਸਰਕਾਰ ਦੇ ਮੁਲਾਜ਼ਮ ਵਿਰੋਧੀ ਕਦਮਾਂ ਅਤੇ ਨੀਤੀਆਂ ਖਿਲਾਫ ਸੰਘਰਸ਼ ਦਾ ਝੰਡਾ ਲਹਿਰਾ ਦਿੱਤਾ। ਬਿਜਲੀ ਕਾਮਿਆਂ ਦੀ ਜਥੇਬੰਦੀ ਟੈਕਨੀਕਲ ਸਰਵਿਸਜ਼ ਯੂਨੀਅਨ ਦੇ ਸਾਧਾਰਨ ਵਰਕਰ ਤੋਂ ਆਪਣੀ ਸੰਘਰਸ਼ਮਈ ਜ਼ਿੰਦਗੀ ਦਾ ਸਫ਼ਰ ਸ਼ੁਰੂ ਕਰਕੇ ਉਹ ਸੂਬਾ ਪੱਧਰੇ ਚੋਟੀ ਦੇ ਕੁੱਝ ਗਿਣੇ-ਚੁਣੇ ਆਗੂਆਂ ਵਜੋਂ ਪ੍ਰਵਾਨ ਚੜਿਆ, ਜਿਹਨਾਂ ਬਿਜਲੀ ਮੁਲਾਜ਼ਮਾਂ ਸਮੇਤ ਸਮੂਹ ਮੁਲਾਜ਼ਮ ਲਹਿਰ ਨੂੰ ਆਰਥਿਕ ਅਤੇ ਤਬਕਾਤੀ ਤੰਗ ਹਿੱਤਾਂ ਦੀ ਵਲਗਣ ਵਿੱਚੋਂ ਕੱਢ ਕੇ ਇੱਕ ਨਵਾਂ ਇਨਕਲਾਬੀ ਅਤੇ ਜਮਹੂਰੀ ਮੁਹਾਂਦਰਾ ਅਤੇ ਸੋਚ ਅਤੇ ਰਾਹ ਪ੍ਰਦਾਨ ਕੀਤਾ। 

ਬੁਢਲਾਡਾ ਵਿਖੇ ਨੌਕਰੀ ਦੌਰਾਨ ਮੁਲਾਜ਼ਮ ਹਿੱਤਾਂ ਲਈ ਨਿਭਾਏ ਜਾ ਰਹੇ ਰੋਲ ਸਦਕਾ ਉਸਦੀਆਂ ਗਤੀਵਿਧੀਆਂ ਦਾ ਗਲ਼ਾ ਘੁੱਟਣ ਲਈ ਅਫਸਰਸ਼ਾਹੀ ਵੱਲੋਂ ਉਸ ਨੂੰ ਸੈਂਕੜੇ ਕਿਲੋਮੀਟਰ ਦੂਰ ਲੰਬੀ ਵਿਖੇ ਤਬਦੀਲ ਕਰ ਦਿੱਤਾ। ਪਰ ਉਸ ਨੇ ਘਰ-ਪਰਿਵਾਰ ਤੋਂ ਦੂਰ ਅਨੇਕਾਂ ਦੁਸ਼ਵਾਰੀਆਂ ਝੱਲਦਿਆਂ ਲੰਬੀ ਖੇਤਰ ਨੂੰ ਹੀ ਆਪਣੀ ਕਰਮਭੂਮੀ ਬਣਾ ਲਿਆ। ਉਸਨੇ ਮੁਲਾਜ਼ਮਾਂ ਤੋਂ ਅਗਾਂਹ ਵਧ ਕੇ ਲੰਬੀ ਇਲਾਕੇ ਦੇ ਨੌਜਵਾਨਾਂ, ਵਿਦਿਆਰਥੀਆਂ ਅਤੇ ਕਿਸਾਨਾਂ ਨੂੰ ਵੀ ਸ਼ਹੀਦ ਭਗਤ ਸਿੰਘ ਦੇ ਵਿਚਾਰਾਂ ਦੀ ਗੁੜਤੀ ਦੇਣ, ਆਪਣੇ ਹੱਕਾਂ ਲਈ ਚੇਤਨ ਅਤੇ ਲਾਮਬੰਦ ਕਰਨ ਲਈ ਦਿਨ-ਰਾਤ ਇੱਕ ਕਰ ਦਿੱਤਾ। ਇਸ ਮਕਸਦ ਦੀ ਪੂਰਤੀ ਲਈ ਉਸਨੇ ਉੱਘੇ ਨਾਟਕਕਾਰ ਸ੍ਰੀ ਗੁਰਸ਼ਰਨ ਸਿੰਘ ਅਤੇ ਲੋਕ ਕਵੀ ਸੰਤ ਰਾਮ ਉਦਾਸੀ ਦੇ ਸਭਿਆਚਾਰਕ ਪ੍ਰੋਗਰਾਮਾਂ ਨੂੰ ਕਲਾਮਈ ਢੰਗ ਨਾਲ ਵਰਤੋਂ ਵਿੱਚ ਲਿਆਂਦਾ। ਉਹਨਾਂ ਬਿਜਲੀ ਕਾਮਿਆਂ ਨੂੰ ਆਰਥਿਕ ਹਿੱਤਾਂ ਤੋਂ ਉੱਪਰ ਉੱਠ ਕੇ ਆਪਣੀ ਪੁੱਗਤ ਸਥਾਪਤੀ ਲਈ ਕਿਸਾਨਾਂ, ਮਜ਼ਦੂਰਾਂ, ਨੌਜਵਾਨਾਂ ਅਤੇ ਵਿਦਿਆਰਥੀਆਂ ਸਮੇਤ ਮਿਹਨਤਕਸ਼ ਲੋਕਾਂ ਦੀ ਲਹਿਰ ਨਾਲ ਜੋਟੀ ਪਾ ਕੇ ਚੱਲਣ ਦੀ ਚੇਤਨਾ ਦਾ ਸੰਚਾਰ ਕਰਨ ਲਈ ਅਣਥੱਕ ਘਾਲਣਾ ਘਾਲੀ। ਬੇਹੱਦ ਕਠਿਨ ਹਾਲਤਾਂ ਦੇ ਸਨਮੁੱਖ ਉਸਨੇ ਭੁੱਖਣਭਾਣੇ 50-50 ਮੀਲ ਦਾ ਸਫਰ ਪੈਦਲ ਤਹਿ ਕਰਦਿਆਂ ਇੱਕ ਸੂਝਵਾਨ ਸਿਰੜੀ ਅਤੇ ਆਪਾਵਾਰੂ ਆਗੂ ਵਜੋਂ ਮਕਬੂਲੀਅਤ ਹਾਸਲ ਕੀਤੀ। ਅੱਜ ਵੀ ਸਮੂਹ ਮੁਲਾਜ਼ਮ ਵਰਗ ਅੰਦਰ ਲੰਬੀ ਗਰੁੱਪ ਦੇ ਨਾਂ ਨਾਲ ਜਾਣੀ ਜਾਂਦੀ ਇਨਕਲਾਬੀ ਟਰੇਡ ਯੂਨੀਅਨ ਲੀਹ ਦੀ ਸੋਚ ਅਤੇ ਧਾਰਾ ਨੂੰ ਵਿਕਸਤ ਅਤੇ ਸਥਾਪਤ ਕਰਨ ਵਿੱਚ ਆਪਣੇ ਮੋਹਰੀ ਯੋਗਦਾਨ ਦੀ ਬਦੌਲਤ ਹੀ, ਉਸਦਾ ਨਾਂ ਅਮਰ ਸਿੰਘ ਤੋਂ ਅਮਰ ਲੰਬੀ ਬਣ ਗਿਆ। ਇਹ ਉਸਦੀ ਅਣਥੱਕ ਘਾਲਣਾ ਦਾ ਹੀ ਫਲ ਸੀ ਕਿ ਮਲੋਟ ਸ਼ਹਿਰ ਅੰਦਰ ਸਿਆਸੀ ਸ਼ਹਿ ਪ੍ਰਾਪਤ ਗੁੰਡਿਆਂ ਵੱਲੋਂ ਅਗਵਾ ਕੀਤੀ ਔਰਤ ਦੇ ਮੁੱਦੇ ਨੂੰ ਲੈ ਕੇ ਅਚਲਾ ਅਗਵਾਕਾਂਡ ਵਿਰੋਧੀ ਘੋਲ ਵਿੱਚ ਬਿਜਲੀ ਕਾਮਿਆਂ ਨੇ ਮੋਹਰੀ ਭੂਮਿਕਾ ਨਿਭਾਈ। ਇਸ ਤੋਂ ਬਿਨਾ ਬਿਜਲੀ ਮੁਲਾਜ਼ਮਾਂ ਵੱਲੋਂ ਪੁਲਸ ਜਬਰ ਵਿਰੁੱਧ ਅਤੇ ਵੱਖ ਵੱਖ ਤਬਕਿਆਂ ਦੇ ਹੱਕੀ ਘੋਲਾਂ ਵਿੱਚ ਸਿਰਕੱਢ ਭੂਮਿਕਾ ਨਿਭਾਉਣ ਦੀਆਂ ਪਾਈਆਂ ਮਿਸਾਲੀ ਪੈੜਾਂ ਉੱਪਰ ਅਮਰ ਲੰਬੀ ਦੀ ਉੱਭਰਵੀਂ ਛਾਪ ਆਖੀ ਜਾ ਸਕਦੀ ਹੈ। 

ਅਪ੍ਰੈਲ 1974 ਵਿੱਚ ਬਿਜਲੀ ਮੁਲਾਜ਼ਮਾਂ ਵੱਲੋਂ ਕੀਤੀ ਲੰਮੀ ਹੜਤਾਲ ਦੌਰਾਨ ਸਿਰਕੱਢ ਆਗੂ ਹੋਣ ਦੇ ਨਾਤੇ ਹੀ ਅਮਰ ਲੰਬੀ ਨੂੰ 'ਪੰਜਾਬ ਸੇਫਟੀ ਐਕਟ' ਦੇ ਤਹਿਤ ਗ੍ਰਿਫਤਾਰ ਕਰਕੇ ਮਹੀਨਿਆਂ ਬੱਧੀ ਜੇਲ ਵਿੱਚ ਡੱਕਣ ਤੋਂ ਇਲਾਵਾ, ਲੰਮਾ ਸਮਾਂ ਨੌਕਰੀ ਤੋਂ ਮੁਅਤਲ ਰੱਖਿਆ ਗਿਆ। ਇਸ ਹੜਤਾਲ ਦੌਰਾਨ ਸਰਕਾਰ ਵੱਲੋਂ ਸੂਬੇ ਭਰ ਵਿੱਚ ਬਿਜਲੀ ਮੁਲਾਜ਼ਮਾਂ ਉੱਪਰ ਕੀਤੇ ਜਬਰ ਦੇ ਅੱਲੇ ਜ਼ਖਮਾਂ ਦੇ ਚੱਲਦਿਆਂ ਹੀ ਇੰਦਰਾ ਗਾਂਧੀ ਦੀ ਅਗਵਾਈ ਵਾਲੀ ਕੇਂਦਰ ਸਰਕਾਰ ਵੱਲੋਂ ਮੜੀ ਐਮਰਜੈਂਸੀ ਸਦਕਾ ਮੁੜ ਭਾਰੀ ਜਬਰ ਦਾ ਇਸ ਜਥੇਬੰਦੀ ਨੂੰ ਨਿਸ਼ਾਨਾ ਬਣਾਇਆ ਗਿਆ। ਇਸ ਜਬਰ ਤਸ਼ੱਦਦ ਤੋਂ ਤ੍ਰਭਕ ਕੇ ਜਦ ਟੀ.ਐਸ.ਯੂ. ਦੀ ਲੀਡਰਸ਼ਿੱਪ ਵੱਲੋਂ ਇਸ ਜੁਝਾਰੂ ਜਥੇਬੰਦੀ ਨੂੰ ਭੰਗ ਕਰ ਦਿੱਤਾ ਤਾਂ ਅਮਰ ਲੰਬੀ ਵੱਲੋਂ ਹੋਰਨਾਂ ਆਗੂਆਂ ਨਾਲ ਮਿਲ ਕੇ ਛੇਤੀ ਹੀ ਟੈਕਨੀਕਲ ਸਰਵਿਸਜ਼ ਯੂਨੀਅਨ ਨੂੰ ਮੁੜ ਸੁਰਜੀਤ ਕਰਨ ਵਿੱਚ ਸਿਰਕੱਢ ਭੂਮਿਕਾ ਨਿਭਾਈ ਗਈ। 

ਸ੍ਰੀ ਲੰਬੀ ਨੇ ਬਿਜਲੀ ਮੁਲਾਜ਼ਮਾਂ ਤੋਂ ਅਗਾਂਹ ਸੰਨ 1978 ਵਿੱੰਚ ਚੱਲੇ ਬੇਰੁਜ਼ਗਾਰ ਅਧਿਆਪਕਾਂ ਦੇ ਘੋਲ ਅਤੇ ਵਿਦਿਆਰਥੀ ਆਗੂ ਪ੍ਰਿਥੀਪਾਲ ਰੰਧਾਵਾ ਦੇ ਕਤਲ ਵਿਰੋਧੀ ਘੋਲ, ਮੋਗਾ ਦੇ ਵਿਦਿਆਰਥੀ ਘੋਲ, 1980 ਦੇ ਬੱਸ ਕਿਰਾਇਆ ਘੋਲ ਅਤੇ ਹੋਰ ਅਨੇਕਾਂ ਲੋਕ ਘੋਲਾਂ ਵਿੱਚ ਉੱਘੜਵਾਂ ਰੋਲ ਨਿਭਾਇਆ। ਪੰਜਾਬ ਅੰਦਰ ਚੱਲੇ ਕਾਲੇ ਦੌਰ ਦੌਰਾਨ ਉਸਨੇ ਹਕੂਮਤੀ ਅਤੇ ਫਿਰਕੂ ਦਹਿਸ਼ਤਗਰਦੀ ਵਿਰੁੱਧ ਲੋਕਾਂ ਨੂੰ ਲਾਮਬੰਦ ਕਰਨ ਲਈ 'ਜਬਰ ਅਤੇ ਫਿਰਕਾਪ੍ਰਸਤੀ ਵਿਰੋਧੀ ਫਰੰਟ' ਦੇ ਅਹਿਮ ਆਗੂ ਵਜੋਂ ਰੋਲ ਦਿੱਤਾ। ਸ੍ਰੀ ਲੰਬੀ ਅਸਲ ਅਰਥਾਂ ਵਿੱਚ ਇੱਕ ਚੇਤਨ ਇਨਕਲਾਬੀ ਘੁਲਾਟੀਆ ਅਤੇ ਲੋਕ-ਆਗੂ ਸੀ। ਇਸੇ ਕਰਕੇ ਲੋਕ ਲਹਿਰ ਵਿੱਚ ਆਪਣਾ ਹੋਰ ਵੀ ਵੱਧ ਤੋਂ ਵੱਧ ਯੋਗਦਾਨ ਪਾਉਣ ਲਈ ਉਹਨਾਂ ਸੰਨ 2000 ਵਿੱਚ ਛੇ ਵਰੇ ਪਹਿਲਾਂ ਹੀ ਨੌਕਰੀ ਤੋਂ ਸਵੈ-ਇੱਛਤ ਰਿਟਾਇਰਮੈਂਟ ਲੈ ਕੇ ਆਪਣਾ ਸਮੁੱਚਾ ਸਮਾਂ ਅਤੇ ਸ਼ਕਤੀ ਲੋਕ ਲਹਿਰ ਨੂੰ ਸਮਰਪਣ ਕਰ ਦਿੱਤੀ। ਇੱਕ ਸੜਕ ਹਾਦਸੇ ਉਪਰੰਤ 10 ਜਨਵਰੀ 2015 ਨੂੰ ਉਹ ਆਪਣੇ ਪਰਿਵਾਰ ਅਤੇ ਲੋਕ ਲਹਿਰ ਦੇ ਸਭਨਾਂ ਸਾਥੀਆਂ ਨੂੰ ਵਿਛੋੜਾ ਦੇ ਗਏ। ਅੱਜ 18 ਜਨਵਰੀ 2015 ਨੂੰ ਆਪਣੇ ਮਹਿਬੂਬ ਅਤੇ ਲੋਕ ਨਾਇਕ ਅਮਰ ਲੰਬੀ ਨੂੰ ਪੰਜਾਬ ਭਰ ਵਿੱਚੋਂ ਹਜ਼ਾਰਾਂ ਲੋਕ ਮੋਗਾ ਵਿਖੇ ਪਹੁੰਚ ਕੇ ਸੂਹੀ ਸ਼ਰਧਾਂਜਲੀ ਭੇਟ ਕਰਨਗੇ। 

 -ਯਸ਼ਪਾਲ  ਫੋਨ- 98145 35005 

Commemorating birthday celebrations of Shaheed Bhagat Singh

On Sep. 28, more than 800 youth led a march in villages of Moga district to commemorate the birthday celebrations of Shaheed Bhagat Singh.

ਸ਼ਹੀਦ ਭਗਤ ਸਿੰਘ ਦੇ ਜਨਮ ਦਿਹਾੜੇ ਤੇ ਨੌਜਵਾਨਾਂ ਦਾ ਲਾ-ਮਿਸਾਲ ਕਾਫ਼ਲਾ ਮਾਰਚ

28 ਸਤੰਬਰ, ਸ਼ਹੀਦ-ਏ-ਆਜ਼ਮ ਭਗਤ ਸਿੰਘ ਦਾ ਜਨਮ ਦਿਹਾੜਾ ਪੂਰੇ ਪੰਜਾਬ ਦੇ ਕਿਰਤੀ ਲੋਕਾਂ ਵਲੋਂ ਇਨਕਲਾਬੀ ਜੋਸ਼ ਤੇ ਉਤਸ਼ਾਹ ਨਾਲ ਮਨਾਇਆ ਗਿਆ। ਲੋਕ ਮੋਰਚਾ ਅਤੇ ਇਨਕਲਾਬੀ ਕੇਂਦਰ ਪੰਜਾਬ ਵਲੋਂ ਇਸ ਜਨਮ ਦਿਹਾੜੇ ਨੂੰ ਇੱਕ ਮੁਹਿੰਮ ਵਜੋਂ ਮਨਾਉਣ ਦਾ ਸੱਦਾ ਦਿੱਤਾ ਗਿਆ ਸੀ। ਇਸ ਮੁਹਿੰਮ ਦੀ ਕੜੀ ਵਜੋਂ ਹੀ ਮੋਗਾ ਜਿਲ੍ਹੇ ਦੇ ਨਿਹਾਲ ਸਿੰਘ ਵਾਲਾ ਖੇਤਰ 'ਚ ਨੌਜਵਾਨਾਂ ਦਾ ਕਾਫਲਾ ਮਾਰਚ ਜਥੇਬੰਦ ਕੀਤਾ ਗਿਆ ਜਿਸ ਨੂੰ ਨੌਜਵਾਨਾਂ ਨੇ ਬੇਹੱਦ ਉਤਸ਼ਾਹਜਨਕ ਹੁੰਘਾਰਾ ਭਰਿਆ। ਪੰਜਾਬ ਦੀ ਇਨਕਲਾਬੀ ਜਮਹੂਰੀ ਲਹਿਰ 'ਚ ਨੌਜਵਾਨ ਲਹਿਰ ਦਾ ਖੱਪਾ ਜਦੋਂ ਫ਼ਿਕਰਮੰਦੀ ਦਾ ਮਸਲਾ ਹੈ ਤਾਂ ਅਜਿਹੇ ਸਮੇਂ ਜਥੇਬੰਦ ਹੋਇਆ ਕਾਫ਼ਲਾ ਮਾਰਚ ਤੇ ਇਹਦੀ ਲਾ-ਮਿਸਾਲ ਸਫ਼ਲਤਾ, ਜਵਾਨੀ ਅੰਦਰ ਅੰਗੜਾਈ ਭਰ ਰਹੇ ਸ਼ਹੀਦ ਭਗਤ ਸਿੰਘ ਦੇ ਵਿਚਾਰ ਸ਼ੁਭ ਸੰਕੇਤ ਹਨ।

ਨਿਹਾਲ ਸਿੰਘ ਵਾਲਾ ਖੇਤਰ ਦੇ 7 ਕੁ ਪਿੰਡਾਂ ਦੇ ਨੌਜਵਾਨ 15 ਕੁ ਸਤੰਬਰ ਤੋਂ ਇਸ ਮਾਰਚ ਨੂੰ ਜਥੇਬੰਦ ਕਰਨ ਜੁਟੇ ਹੋਏ ਹਨ। ਕਿਸੇ ਪਿੰਡ 'ਚ ਨੌਜਵਾਨਾਂ ਦੀਆਂ ਮੀਟਿੰਗਾ ਹੋ ਰਹੀਆਂ ਹਨ ਤੇ ਕਿਸੇ ਪਿੰਡ 'ਚ ਰਾਤ ਵੇਲੇ ਪ੍ਰੋਜੈਕਟਰ ਲਗਾ ਕੇ ਲੋਕਾਂ ਦੇ ਇਕੱਠ 'ਚ ਸ਼ਹੀਦ ਭਗਤ ਸਿੰਘ ਬਾਰੇ ਦਸਤਾਵੇਜੀ ਫ਼ਿਲਮਾਂ ਦਿਖਾਈਆਂ ਜਾ ਰਹੀਆਂ ਹਨ। ਕਿਧਰੇ ਨੌਜਵਾਨਾਂ ਦੇ ਗਰੁੱਪ ਫੰਡ ਇਕੱਠਾ ਕਰਨ 'ਚ ਜੁਟੇ ਹੋਏ ਹਨ। ਬਸੰਤੀ ਪੱਗਾਂ ਲਈ ਕੱਪੜਾ ਖਰੀਦਿਆ ਜਾ ਰਿਹਾ ਹੈ। ਆਏ ਦਿਨ ਮਾਰਚ 'ਚ ਸ਼ਾਮਲ ਹੋਣ ਵਾਲੇ ਨੌਜਵਾਨਾਂ ਦੀ ਲਿਸਟ ਲੰਮੀ ਹੋ ਰਹੀ ਹੈ। ਪੱਗਾਂ ਲਈ ਕੱਪੜਾ ਘਟ ਰਿਹਾ ਹੈ, ਹੋਰ ਮੰਗਵਾਇਆ ਜਾ ਰਿਹਾ ਹੈ। 28 ਸਤੰਬਰ ਦੀ ਸਵੇਰ ਸੈਦੋਕੇ ਪਿੰਡ 'ਚ ਨੌਜਵਾਨਾਂ ਦੇ ਗਰੁੱਪ ਬਸੰਤੀ ਪੱਗਾਂ ਬੰਨ੍ਹੀ ਪੁੱਜਣੇ ਸ਼ੁਰੂ ਹੋ ਜਾਂਦੇ ਹਨ। ਦਸ ਕੁ ਵੱਜਦੇ ਤੱਕ ਪਿੰਡ ਦੀ ਸੱਥ ਬਸੰਤੀ ਪੱਗਾਂ ਨਾਲ ਸਜੀ ਜਵਾਨੀ ਨਾਲ ਭਰ ਜਾਂਦੀ ਹੈ। ਸਪੀਕਰ 'ਚੋਂ "ਰੰਗ ਦੇ ਬਸੰਤੀ ਚੋਲਾ" ਦਾ ਗੀਤ ਗੂੰਜ ਰਿਹਾ ਹੈ। ਪਿੰਡ 'ਚੋਂ ਵੀ ਸੈਂਕੜੇ ਲੋਕ ਜਵਾਨੀ ਦੇ ਇਸ ਰੰਗ ਨੂੰ ਦੇਖਣ ਲਈ ਪੁੱਜ ਜਾਂਦੇ ਹਨ।

ਪਿੰਡ ਦੀ ਸੱਥ 'ਚ ਲੋਕਾਂ ਦੇ ਇਸ ਭਰਵੇਂ ਇੱਕਠ ਨੂੰ ਮੋਰਚੇ ਦੇ ਸੂਬਾ ਕਮੇਟੀ ਮੈਂਬਰ ਕ੍ਰਿਸ਼ਨ ਦਿਆਲ ਸੰਬੋਧਿਤ ਹੁੰਦੇ ਹਨ। ਅੱਜ ਦੇ ਸਮੇਂ ਦੇ ਪ੍ਰਸੰਗ 'ਚ "ਇਨਕਲਾਬ ਜ਼ਿੰਦਾਬਾਦ" ਤੇ "ਸਾਮਰਾਜ ਮੁਰਦਾਬਾਦ" ਦੇ ਨਾਹਰੇ ਦੀ ਵਿਆਖਿਆ ਕਰਦਿਆਂ ਸ਼ਹੀਦ ਭਗਤ ਸਿੰਘ ਦੇ ਸੁਪਨਿਆਂ ਦੇ ਸਮਾਜ ਲਈ ਚਲ ਰਹੀ ਜੱਦੋਜਹਿਦ ਦੀ ਗੱਲ ਕਰਦੇ ਹਨ। ਸਾਮਰਾਜਵਾਦ ਤੇ ਜਗੀਰਦਾਰੀ ਤੋਂ ਮੁਕਤੀ ਲਈ ਕਿਸਾਨਾਂ ਮਜ਼ਦੂਰਾਂ ਮੁਲਾਜ਼ਮਾਂ, ਛੋਟੇ ਕਾਰੋਬਾਰੀਆਂ, ਨੌਜਵਾਨਾਂ ਵਿਦਿਆਰਥੀਆਂ ਦੀ ਸਾਂਝੀ ਲੋਕ ਲਹਿਰ ਉਸਾਰਨ ਦੀ ਲੋੜ ਉਭਾਰਦੇ ਹਨ ਤੇ ਇਹਦੇ 'ਚ ਜਵਾਨੀ ਨੂੰ ਆਪਣਾ ਹਿੱਸਾ ਪਾਉਣ ਦਾ ਸੱਦਾ ਦਿੰਦੇ ਹਨ। ਵਿਸ਼ੇਸ਼ ਤੌਰ 'ਤੇ ਪਹੁੰਚੇ ਲੋਕ ਮੋਰਚਾ ਪੰਜਾਬ ਦੇ ਜਨਰਲ ਸਕੱਤਰ ਅਮੋਲਕ ਸਿੰਘ ਸਾਮਰਾਜਵਾਦ ਖਿਲਾਫ਼ ਕੌਮੀ ਮੁਕਤੀ ਲਹਿਰ 'ਚ ਮੁਲਕ ਦੀ ਜਵਾਨੀ ਦੀ ਸ਼ਾਨਾਮੱਤੀ ਭੂਮਿਕਾ ਦਾ ਜਿਕਰ ਕਰਦਿਆਂ ਕਹਿੰਦੇ ਹਨ ਕਿ ਅੱਜ ਦੇ ਸਮੇਂ 'ਚ ਹੋ ਰਹੇ ਅਜਿਹੇ ਸਲਾਹੁਣਯੋਗ ਯਤਨ ਇਤਿਹਾਸ ਦੇ ਪੰਨਿਆਂ 'ਤੇ ਗੂੜ੍ਹੇ ਉਕਰੇ ਜਾਣਗੇ। ਜਦੋਂ ਹਾਕਮ ਜਮਾਤਾਂ ਵਲੋਂ ਜਵਾਨੀ ਨੂੰ ਗੰਦੇ ਸਭਿਆਚਾਰ ਤੇ ਨਸ਼ਿਆਂ ਦੇ ਸਮੁੰਦਰਾਂ 'ਚ ਡੋਬ ਦੇਣ ਦੇ ਯਤਨ ਹੋ ਰਹੇ ਹਨ, ਜਦੋਂ ਨਿਰਾਸ਼ਾ ਦੇ ਆਲਮ 'ਚ ਡੁੱਬੀ ਜਵਾਨੀ ਖੁਦਕੁਸ਼ੀਆਂ ਵਰਗੇ ਵਰਤਾਰਿਆਂ 'ਚ ਘਿਰਦੀ ਜਾਪਦੀ ਹੈ ਤਾਂ ਅਜਿਹੇ ਸਮੇਂ ਚੇਤਨ ਜਵਾਨੀ ਵਲੋਂ ਸ਼ਹੀਦ ਭਗਤ ਸਿੰਘ ਦੇ ਰਾਹ ਨੂੰ ਬੁਲੰਦ ਕਰਨ ਦਾ ਹੋਕਾ ਦੇਣਾ ਪੰਜਾਬ ਦੀ ਇਨਕਲਾਬੀ ਜਮਹੂਰੀ ਲਹਿਰ ਲਈ ਸੁਲੱਖਣੀਆਂ ਘੜੀਆਂ ਹਨ। ਉਹ ਬਸੰਤੀ ਪੰਗਾਂ ਬਨਣ ਨੂੰ ਰਸਮ ਤੱਕ ਸੀਮਤ ਨਾ ਰਹਿ ਜਾਣ ਤੋਂ ਸੁਚੇਤ ਕਰਦਿਆਂ ਸਮੇਂ ਦੀਆਂ ਹਕੀਕਤਾਂ ਨੂੰ ਬੁੱਝਣ ਤੇ ਅਮਲਾਂ 'ਚ ਸ਼ਹੀਦ ਭਗਤ ਸਿੰਘ ਦੇ ਦਰਸਾਏ ਰਾਹ 'ਤੇ ਅੱਗੇ ਵੱਧਣ ਦਾ ਸੱਦਾ ਦਿੰਦੇ ਹਨ।

ਪਿੰਡ ਦੀ ਸੱਥ 'ਚ ਬਸੰਤੀ ਪੱਗਾਂ ਵਾਲੇ ਸਿਰਾਂ ਦਾ ਹੜ ਆਇਆ ਹੋਇਆ ਹੈ। ਇਸ ਇੱਕਠ 'ਚ ਸਕੂਲਾਂ ਕਾਲਜਾਂ 'ਚ ਪੜ੍ਹਦੀ ਜਵਾਨੀ ਵੀ ਹੈ ਤੇ ਖੇਤਾਂ 'ਚ ਕੰਮ ਕਰਦੀ ਜਵਾਨੀ ਵੀ ਹੈ। ਦਿਹਾੜੀਆਂ ਕਰਦੇ, ਦੁਕਾਨਾਂ 'ਤੇ ਕੰਮ ਕਰਨ ਵਾਲੇ ਵੀ ਤੇ ਟਰੇਨਿੰਗ ਕਰਕੇ ਰੁਜ਼ਗਾਰ ਦੀ ਮੰਗ ਲਈ ਜੂਝ ਰਹੇ ਨੌਜਵਾਨ ਵੀ ਇਹਦਾ ਹਿੱਸਾ ਹਨ। ਸਾਰੇ ਹੀ ਲੱਗਭਗ ਭਗਤ ਸਿੰਘ ਦੇ "ਹਾਣੀ" ਹਨ। ਕਾਫ਼ਲਾ ਮਾਰਚ ਲਈ ਤੁਰ ਪੈਂਦਾ ਹੈ। ਮੂਹਰੇ ਗੱਡੀ 'ਤੇ ਸ਼ਹੀਦ ਭਗਤ ਸਿੰਘ ਦੀਆਂ ਆਦਮ-ਕੱਦ ਤਸਵੀਰਾਂ ਸਜੀਆਂ ਹੋਈਆਂ ਹਨ। ਇਸ ਗੱਡੀ ਦੇ ਪਿੱਛੇ ਲੱਗਭੱਗ 800 ਨੌਜਵਾਨ 400 ਵਹੀਕਲਾਂ 'ਤੇ ਸਵਾਰ ਹਨ ਤੇ ਲੋਕ ਮੋਰਚਾ ਪੰਜਾਬ ਦੇ ਝੰਡੇ ਹਵਾ 'ਚ ਲਹਿਰਾ ਰਹੇ ਹਨ। ਕਿਸੇ ਵੀ ਵਹੀਕਲ ਨੂੰ ਗੱਡੀ ਤੋਂ ਅੱਗੇ ਲੰਘਣ ਦੀ ਇਜਾਜ਼ਤ ਨਹੀਂ ਹੈ ਅਤੇ ਨਾਂ ਹੀ ਕੋਈ ਅਜਿਹਾ ਯਤਨ ਕਰਦਾ ਹੈ। ਕਿਉਂਕਿ ਇਹ ਕਾਫ਼ਲਾ ਇਮਾਨਦਾਰੀ ਤੇ ਸੰਜੀਦਗੀ ਨਾਲ ਸ਼ਹੀਦ ਭਗਤ ਸਿੰਘ ਨੂੰ ਸਲਾਮ ਕਹਿਣ ਆਇਆ ਹੈ। ਤੇ ਉਹਦੀ ਵਿਚਾਰਧਾਰਾ ਦਾ ਪਿੰਡਾ 'ਚ ਛਿੱਟਾ ਦੇਣ ਲਈ ਤੁਰਿਆ ਹੈ। ਦੋ-ਦੋ ਦੀਆਂ ਲਾਈਨਾਂ 'ਚ ਕਾਫ਼ਲੇ ਦੀ ਲੰਬਾਈ ਤਿੰਨ ਕਿਲੋਮੀਟਰ ਤੱਕ ਚਲੀ ਜਾਂਦੀ ਹੈ। ਹਿਮੰਤਪੁਰੇ ਪਿੰਡ 'ਚ ਕਾਫ਼ਲੇ ਲਈ ਚਾਹ ਦਾ ਇੰਤਜ਼ਾਮ ਹੈ। ਚਾਹ ਪੀ ਕੇ ਕਾਫ਼ਲਾ ਅੱਗੇ ਚਲ ਪੈਂਦਾ ਹੈ। ਮਾਛੀਕੇ, ਦੀਵਾਨਾ, ਬੁਰਜ ਕਲਾਲਾ, ਰਾਮਾਂ, ਚਕਰ, ਮੀਨੀਆਂ ਹੁੰਦਾ ਹੋਇਆ ਕੁੱਸੇ ਵੱਲ ਰਵਾਨਾ ਹੁੰਦਾ ਹੈ। ਇਹਨਾਂ 'ਚ ਵੰਖ-ਵੱਖ ਥਾਵਾਂ 'ਤੇ ਲੋਕ ਮੋਰਚੇ ਦੇ ਆਗੂ ਕਰਮ ਰਾਮਾਂ, ਜੁਗਰਾਜ ਕੁੱਸਾ ਤੇ ਅਮਨਦੀਪ ਮਾਛੀਕੇ, ਮਾਸਟਰ ਸੁਰਿੰਦਰ ਸਿੰਘ ਤੇ ਗੁਰਮੁਖ ਸਿੰਘ ਹਿੰਮਤਪੁਰਾ ਸੰਪੇਖ 'ਚ ਲੋਕਾਂ ਨੂੰ ਸੰਬੋਧਤ ਹੁੰਦੇ ਹਨ। ਲੋਕ ਗਲ਼ੀਆਂ 'ਚ, ਦਰਵਾਜਿਆਂ 'ਚ ਇੱਕਠੇ ਹੋਕੇ ਜਵਾਨੀ ਦੇ ਇਸ ਰੰਗ ਨੂੰ ਹੈਰਾਨੀ ਤੇ ਖ਼ੁਸ਼ੀ ਨਾਲ ਤੱਕਦੇ ਹਨ ਤੇ ਨਾਹਰਿਆਂ ਦਾ ਹੁੰਘਾਰਾ ਭਰਦੇ ਹਨ। ਕਿਸਾਨ ਘੋਲਾਂ 'ਚ ਮੋਹਰੀ ਰਹਿਣ ਵਾਲੇ ਪਿੰਡਾ 'ਚ ਨਾਹਰਿਆਂ ਦੇ ਜਵਾਬ 'ਚ ਅਜਿਹੀ ਤੱਸਲੀ ਝਲਕਦੀ ਹੈ ਜਿਹੜੀ ਕਿਸਾਨ-ਮਜ਼ਦੂਰ ਲਹਿਰ 'ਚ ਨੌਜਵਾਨਾਂ ਦੀ ਊਣੀ ਰਹਿ ਰਹੀ ਗਿਣਤੀ ਦੇ ਫ਼ਿਕਰ ਤੋਂ ਬਾਅਦ ਦੀ ਤੱਸਲੀ ਹੈ।

ਪਿੰਡ ਕੁੱਸੇ 'ਚ ਪਹਿਲਾਂ ਹੀ 80-90 ਆਦਮੀ ਔਰਤਾਂ ਲੰਗਰ ਦੀ ਤਿਆਰੀ ਕਰਦੇ ਹੋਏ ਕਾਫ਼ਲੇ ਨੂੰ ਉਡੀਕ ਰਹੇ ਹਨ। ਪਿੰਡ ਦੇ ਲੋਕ ਸੱਥ 'ਚ ਜੁੜੇ ਉਡੀਕ ਰਹੇ ਹਨ। ਲੰਗਰ ਛਕਣ ਤੋਂ ਬਾਅਦ ਸਾਰਾ ਇਕੱਠ ਜੁੜ ਜਾਂਦਾ ਹੈ। ਇਸੇ ਦੌਰਾਨ ਹੀ ਢੁੱਡੀਕੇ ਖ਼ੇਤਰ ਦੇ ਪਿੰਡਾਂ 'ਚ 30-35 ਨੌਜਵਾਨਾਂ ਦਾ ਕਾਫ਼ਲਾ ਵੱਖ-ਵੱਖ ਪਿੰਡਾਂ 'ਚ ਸ਼ਹੀਦ ਭਗਤ ਸਿੰਘ ਦੇ ਜਨਮ ਦਿਹਾੜੇ ਮੌਕੇ ਬਨੇਰਿਆਂ 'ਤੇ ਦੀਵੇ ਬਾਲਣ ਦੇ ਹੋਕੇ ਲਾਉਂਦਾ ਆ ਸ਼ਾਮਲ ਹੁੰਦਾ ਹੈ। ਦੋ ਬੱਚੀਆਂ ਭਗਤ ਸਿੰਘ ਦੀ ਘੋੜੀ ਗਾਉਂਦੀਆਂ ਹਨ। ਮੰਚ ਤੋਂ ਪੰਜਾਬ ਸਟੂਡੈਂਟਸ ਯੂਨੀਅਨ (ਸ਼ਹੀਦ ਰੰਧਾਵਾ) ਦੇ ਸੂਬਾ ਪ੍ਰਧਾਨ ਪਾਵੇਲ ਕੁੱਸਾ ਲੋਕਾਂ ਨੂੰ ਮੁਖਾਤਬ ਹੁੰਦੇ ਹਨ। ਔਝੜੇ ਰਾਹੀਂ ਪਈ ਜਵਾਨੀ ਦੇ, ਵੋਟ ਪਾਰਟੀਆਂ ਹੱਥ ਚੜ੍ਹ ਕੇ, ਆਪਸੀ ਲੜਾਈਆਂ-ਝਗੜਿਆਂ 'ਚ ਉਲਝਣ ਦੀ, ਇਲਾਕੇ ਦੇ ਸਭਨਾਂ ਲੋਕਾਂ ਦੀ ਫਿਕਰਮੰਦੀ ਸਾਂਝੀ ਕਰਦੇ ਹਨ। ਜਵਾਨੀ ਦਾ ਸੁਨਹਿਰੀ ਭਵਿੱਖ ਸ਼ਹੀਦ ਭਗਤ ਸਿੰਘ ਦੇ ਮਾਰਗ ਨਾਲ ਹੀ ਜੁੜਿਆ ਹੋਣ ਕਰਕੇ, ਸ਼ਹੀਦ ਦੇ ਵਿਚਾਰਾਂ ਨੂੰ ਗ੍ਰਿਹਣ ਕਰਨ ਲਈ ਕਹਿੰਦੇ ਹਨ। ਉਨ੍ਹਾਂ ਕਿਹਾ ਕਿ ਲੋਕ ਹੱਕਾਂ ਦੀ ਲਹਿਰ 'ਚ ਆਕੇ ਹੀ ਜਵਾਨੀ ਦੀ ਅਥਾਹ ਸਿਰਜਣਾਤਮਕ ਸਮਰੱਥਾ ਭਰ ਜੋਬਨ 'ਤੇ ਆ ਸਕਦੀ ਹੈ ਤੇ ਨਵੇਂ ਨਰੋਏ ਸਮਾਜ ਦੀ ਸਿਰਜਣਾ 'ਚ ਮਹੱਤਵਪੂਰਨ ਭੂਮਕਾ ਅਦਾ ਕਰ ਸਕਦੀ ਹੈ।

ਆਗੂ ਟੀਮ ਵਲੋਂ ਨੌਜਵਾਨਾਂ ਦੇ ਇਨੇਂ ਇਕੱਠ 'ਚ ਅਨੁਸਾਸ਼ਨ ਬਣਾਈ ਰੱਖਣ ਦੀ ਫ਼ਿਕਰਮੰਦੀ ਪਹਿਲਾਂ ਵਿਸ਼ੇਸ਼ ਤੌਰ 'ਤੇ ਸਭਨਾਂ ਸ਼ਾਮਲ ਹੋਣ ਵਾਲੇ ਨੌਜਵਾਨਾਂ ਨਾਲ ਸਾਂਝੀ ਕੀਤੀ ਗਈ ਸੀ। ਲੋਹੜੇ ਦੇ ਜਬਤ ਤੇ ਸੰਜੀਦਗੀ ਨਾਲ ਵਿਚਰ ਰਹੇ ਨੌਜਵਾਨਾਂ ਨੇ ਅਜਿਹੇ ਸਾਰੇ ਫ਼ਿਕਰ ਦੂਰ ਕਰ ਦਿੱਤੇ। ਸਾਰੇ ਮਾਰਚ 'ਚ "ਇਨਕਲਾਬ ਜ਼ਿੰਦਾਬਾਦ" ਦੇ ਨਾਹਰੇ ਗੂੰਜਦੇ ਰਹੇ।

ਕੁੱਸੇ ਤੋਂ ਰਵਾਨਾ ਹੋਕੇ ਕਾਫ਼ਲਾ, ਬੌਡੇ, ਲੁਹਾਰਾ, ਬਿਲਾਸਪੁਰ ਹੁੰਦਾ ਹੋਇਆ ਕਿਸਾਨ ਲਹਿਰ ਦੇ ਸ਼ਹੀਦ ਸਾਧੂ ਸਿੰਘ ਦੇ ਨਗਰ ਤਖ਼ਤੂਪੁਰਾ 'ਚ ਪੁਜਦਾ ਹੈ। ਨਾਅਰੇ ਹੋਰ ਉੱਚੇ ਹੋ ਜਾਂਦੇ ਹਨ। ਤਖ਼ਤੂਪੁਰੇ ਦੀ ਧਰਤੀ ਨੂੰ ਸਲਾਮਾਂ ਦੀ ਗੂੰਜ ਹੋਰ ਉੱਚੀ ਸੁਣਾਈ ਦੇਣ ਲਗਦੀ ਹੈ। ਸਾਧੂ ਸਿੰਘ ਨੂੰ ਖੋਹ ਲੈਣ ਵਾਲੇ ਜਾਬਰ ਹਾਕਮਾਂ ਖਿਲਾਫ਼ ਭਰਿਆ ਗੁੱਸਾ ਗਰਜਦੇ ਬੋਲਾਂ 'ਚ ਪ੍ਰਗਟ ਹੋ ਰਿਹਾ ਹੈ ਤੇ ਉਹਦੇ ਕਾਤਲਾਂ ਤੋਂ ਬਦਲਾ ਲੈਣ ਦੀਆਂ ਭਾਵਨਾਵਾਂ ਜਾਹਰ ਕਰ ਰਿਹਾ ਹੈ। ਪੂਰੇ ਪਿੰਡ 'ਚ ਮਾਰਚ ਕਰਕੇ ਕਾਫ਼ਲਾ ਸੱਥ 'ਚ ਪੁਜਦਾ ਹੈ ਜਿੱਥੇ ਲੋਕਾਂ ਵਲੋਂ ਜੋਸ਼ੀਲਾ ਸਵਾਗਤ ਹੁੰਦਾ ਹੈ। ਭਾਰਤੀ ਕਿਸਾਨ ਯੂਨੀਅਨ (ਏਕਤਾ) ਦੇ ਜਨਰਲ ਸਕੱਤਰ ਸੁਖਦੇਵ ਸਿੰਘ ਕੋਕਰੀ ਕਲਾਂ ਸ਼ਹੀਦ ਭਗਤ ਸਿੰਘ ਦੇ ਜਨਮ ਦਿਹਾੜੇ ਦੀਆਂ ਮੁਬਾਰਕਾਂ ਸਾਂਝੀਆਂ ਕਰਦੇ ਹਨ। ਪੰਜਾਬ ਦੀ ਕਿਸਾਨ ਲਹਿਰ ਨੂੰ ਨੌਜਵਾਨਾਂ ਦੇ ਜ਼ੋਸ਼ ਤੇ ਉਤਸ਼ਾਹ ਦੀ ਲੋੜ ਪੇਸ਼ ਕਰਦੇ ਹਨ। ਉਹ ਕੰਹਿਦੇ ਹਨ ਕਿ ਜਾਬਰ ਹਾਕਮਾਂ ਨਾਲ ਮੱਥਾ ਲਾਉਣ ਲਈ ਸ਼ਹੀਦ ਸਾਧੂ ਸਿੰਘ ਦੇ ਵਾਰਸਾਂ ਨੂੰ ਇਹ ਧਰਤੀ ਪੈਦਾ ਕਰਦੀ ਰਹੇਗੀ ਤੇ ਅੱਜ ਬਸੰਤੀ ਪੱਗਾਂ ਦਸਦੀਆਂ ਨੇ ਕਿ ਸਾਧੂ ਸਿੰਘ ਦੇ ਵਾਰਸ ਜਿਉਂਦੇ ਨੇ, ਉਹਦੇ ਝੰਡੇ ਨੂੰ ਸਾਂਭਣ ਲਈ ਘਗਲੀ ਪੀੜ੍ਹੀ ਮੈਦਾਨ 'ਚ ਆ ਰਹੀ ਹੈ।

ਹਨੇਰਾ ਹੋਣਾ ਸ਼ੁਰੂ ਹੋ ਜਾਂਦਾ ਹੈ। ਨਾਅਰਿਆਂ ਦੀ ਗੂੰਜ 'ਚ ਸਮਾਪਤੀ ਹੁੰਦੀ ਹੈ। ਕਾਫ਼ਲਾ ਜਿੰਨੀ ਗਿਣਤੀ 'ਚ ਸਵੇਰੇ ਤੁਰਿਆ ਸੀ, ਓਨੀ ਹੀ ਗਿਣਤੀ 'ਚ ਵਿਛੜਦਾ ਹੈ। ਵਾਪਸ ਘਰਾਂ ਨੂੰ ਚਾਲੇ ਪਾ ਰਹੇ ਨੌਜਵਾਨਾਂ ਦੇ ਚਿਹਰੇ ਪੜ੍ਹ ਕੇ ਲਗਦਾ ਹੈ ਕਿ ਮਨ ਮਸਤਕ ਦੀਆਂ ਤਾਰਾਂ 'ਚ ਕੋਈ ਨਵਾਂ ਤੇ ਸੋਹਣਾ ਰਾਗ਼ ਛਿੜ ਪਿਆ ਹੈ। ਆਪਣੇ ਮਹਿਬੂਬ ਸ਼ਹੀਦ ਦਾ ਸੁਨੇਹਾ ਲਗਭੱਗ 9 ਪਿੰਡਾਂ 'ਚ ਵੰਡ ਕੇ ਤਸੱਲੀ ਭਰਪੂਰ ਮਘਦੇ ਚਿਹਰੇ ਘਰਾਂ ਨੂੰ ਪਰਤਦੇ ਹਨ।

Punjab Protest Against Lalgarh Atrocities

COMMITTE FORMED TO PROTEST AGAINST REPRESSION ON LALGARH PEOPLE
A' Committee Against Repression On Lalgarh People' has been formed in Punjab today. It consists of three members, who are well-known leaders of democratic-revolutionary organisations, namely- Kanwaljit Khanna (Inqulabi Kender, Punjab), Balwant Makhu (Lok Sangram Manch) and Amolak Singh (Lok Morcha Punjab). The Committee in its first meeting held has decided to hold a protest demonstration at Moga on 10.7.09. Lok Morcha Punjab endorsing this call has called upon all its members and sympathisers to participate in the protest demonstration in full strength to show their solidarity with the struggling people of Lalgarh.