ਬਹਿਣੀਵਾਲ 'ਚ ਹੋਇਆ ਕਥਿਤ ਪੁਲਸ ਮੁਕਾਬਲਾ : ਫਰਜ਼ੀ ਮੁਕਾਬਲਿਆਂ ਦੇ ਨਾਂ ਹੇਠ ਕਤਲਾਂ ਦੀ ਲੜੀ ਦਾ ਹਿੱਸਾ

ਜਮਹੂਰੀ ਅਧਿਕਾਰ ਸਭਾ, ਪੰਜਾਬ ਦੀ ਰਿਪੋਰਟ

ਬਹਿਣੀਵਾਲ ਦੀ ਜੂਹ 'ਚ ਹੋਇਆ ਕਥਿਤ ਪੁਲਸ ਮੁਕਾਬਲਾ :

ਫਰਜ਼ੀ ਮੁਕਾਬਲਿਆਂ ਦੇ ਨਾਂ ਹੇਠ ਕਤਲਾਂ ਦੀ ਲੜੀ ਦਾ ਹਿੱਸਾ

           ਜਮਹੂਰੀ ਅਧਿਕਾਰ ਸਭਾ ਦੇ ਸੂਬਾ ਪ੍ਰਧਾਨ, ਪ੍ਰਸਿੱਧ ਨਾਟਕਕਾਰ ਪ੍ਰੋਫੈਸਰ ਅਜਮੇਰ ਔਲਖ ਅਤੇ ਜਨਰਲ ਸਕੱਤਰ ਪ੍ਰੋਫੈਸਰ ਜਗਮੋਹਨ ਨੇ ਬਹਿਣੀਵਾਲ ਦੀ ਜੂਹ 'ਚ ਹੋਏ ਕਥਿਤ ਪੁਲਸ ਮੁਕਾਬਲੇ ਨੂੰ ਫਰਜ਼ੀ ਮੁਕਾਬਲਿਆਂ ਦੇ ਨਾਂ ਹੇਠ ਕਤਲਾਂ ਦੀ ਲੜੀ ਕਰਾਰ ਦਿੱਤਾ ਹੈ।ਉਹਨਾਂ ਨੇ ਇਹ ਗੱਲ 26-27 ਅਪ੍ਰੈਲ 2013 ਦੀ ਵਿਚਕਾਰਲੀ ਰਾਤ ਨੂੰ ਰਚਾਏ ਗਏ ਇਸ ਕਥਿਤ ਪੁਲਸ ਮੁਕਾਬਲੇ ਦੀ ਪੜਤਾਲ ਸਬੰਧੀ ਉਹਨਾਂ ਦੀ ਅਗਵਾਈ ਵਿੱਚ ਨਰਭਿੰਦਰ (ਸੂਬਾ ਜਥੇਬੰਧਕ ਸਕੱਤਰ), ਸੇਵਾ-ਮੁਕਤ ਬੈਂਕ ਮੈਨੇਜਰ ਪ੍ਰਿਤਪਾਲ ਸਿੰਘ (ਸੂਬਾ ਪ੍ਰਕਾਸ਼ਨ ਸਕੱਤਰ), ਐਡਵੋਕੇਟ ਐਨ ਕੇ ਜੀਤ (ਸੂਬਾ ਕਮੇਟੀ ਮੈਂਬਰ), ਐਡਵੋਕੇਟ ਬਲਕਰਨ ਬੱਲੀ ਅਤੇ ਕਾਮਰੇਡ ਜਸਪਾਲ ਖੋਖਰ (ਕਮੇਟੀ ਮੈਂਬਰ) ਆਦਿ ਮੈਂਬਰਾਂ ਦੀ ਇਕ ਤੱਥ ਖੋਜ ਕਮੇਟੀ ਵੱਲੋਂ ਤਿਆਰ ਕੀਤੀ ਪੜਤਾਲੀਆ ਰਿਪੋਰਟ ਜਾਰੀ ਕਰਦਿਆਂ ਕਹੀ ।ਟੀਮ ਨੇ 25 ਅਪ੍ਰੈਲ ਨੂੰ ਤਿੰਨਾਂ ਦੋਸ਼ੀਆਂ - ਨਾਹਰ ਸਿੰਘ, ਕੁਲਵਿੰਦਰ ਸਿੰਘ ਅਤੇ ਜਸਵਿੰਦਰ ਸਿੰਘ ਵੱਲੋਂ - ਦੋ ਕਾਰਬਾਈਨਾਂ ਅਤੇ ਇਕ ਐੱਸ.ਐੱਲ.ਆਰ. ਨਾਲ ਲੈਸ 6 ਵਿਅਕਤੀਆਂ ਦੀ ਪੁਲਸ ਪਾਰਟੀ ਦੀ ਹਿਰਾਸਤ ਵਿਚੋਂ ਇਕ ਪੁਲਸ ਕਰਮਚਾਰੀ ਨੂੰ ਮਾਰ ਕੇ ਅਤੇ ਦੂਜੇ ਨੂੰ ਜ਼ਖ਼ਮੀ ਕਰਕੇ, ਇਕ ਐੱਸ.ਐੱਲ.ਆਰ. ਸਮੇਤ ਭੱਜ ਜਾਣ ਅਤੇ 26-27 ਅਪ੍ਰੈਲ ਦੀ ਦਰਮਿਆਨੀ ਰਾਤ ਨੂੰ ਇਨ੍ਹਾਂ ਵਿਚੋਂ ਦੋ ਮੁਲਜ਼ਮਾਂ - ਨਾਹਰ ਸਿੰਘ ਅਤੇ ਕੁਲਵਿੰਦਰ ਸਿੰਘ - ਦੇ ਪਿੰਡ ਬਹਿਣੀਵਾਲ ਨੇੜੇ ਕਥਿਤ ਪੁਲਸ ਮੁਕਾਬਲੇ ਵਿਚ ਮਾਰੇ ਜਾਣ ਅਤੇ ਤੀਜੇ ਮੁਲਜ਼ਮ ਜਸਵਿੰਦਰ ਸਿੰਘ ਦੇ ਬਚ ਕੇ ਭੱਜ ਜਾਣ ਸਬੰਧੀ ਪੁਲਸ ਕਹਾਣੀ ਜੋ ਇਨ੍ਹਾਂ ਘਟਨਾਵਾਂ ਨਾਲ ਸਬੰਧਤ ਐਫ.ਆਈ.ਆਰਾਂ ਵਿਚ ਦਰਜ਼ ਹੈ, ਨੂੰ ਘਟਨਾਵਾਂ ਨਾਲ ਸਬੰਧਤ ਥਾਵਾਂ ਤੇ ਹਾਜ਼ਰ ਲੋਕਾਂ ਵੱਲੋਂ ਦਿੱਤੀ ਜਾਣਕਾਰੀ, ਮ੍ਰਿਤਕਾਂ ਦੀਆਂ ਪੋਸਟ ਮਾਰਟਮ ਰਿਪੋਰਟਾਂ, ਇਨ੍ਹਾਂ ਰਿਪੋਰਟਾਂ ਤੇ ਮਾਹਰ ਡਾਕਟਰਾਂ, ਫਰੈਂਸਿਕ ਮਾਹਰਾਂ ਅਤੇ ਫ਼ੌਜਦਾਰੀ ਦੇ ਮਾਹਰ ਵਕੀਲਾਂ ਵੱਲੋਂ ਦਿੱਤੀਆਂ ਗਈਆਂ ਰਾਇਆਂ (ਉਪੀਨੀਅਨ), ਕਿਸੇ ਭਗੌੜੇ ਮੁਲਜ਼ਮ ਨੂੰ ਫੜ੍ਹਨ ਲਈ ਤਾਕਤ ਦੀ ਵਰਤੋਂ ਸਬੰਧੀ ਕਾਨੂੰਨੀ ਵਿਵਸਥਾਵਾਂ (ਪਰੋਵਿਜ਼ਨ) ਅਤੇ ਝੂਠੇ ਮੁਕਾਬਲਿਆਂ ਸਬੰਧੀ ਸ਼ਿਕਾਇਤਾਂ ਮਿਲਣ ਤੇ ਯੋਗ ਕਾਰਵਾਈ ਸਬੰਧੀ ਸੁਪਰੀਮ ਕੋਰਟ ਦੇ ਫ਼ੈਸਲਿਆਂ ਦੀ ਰੋਸ਼ਨੀ 'ਚ ਵਿਚਾਰਿਆ ਗਿਆ ਹੈ। ਇਸ ਸਾਰੀ ਵਿਚਾਰ-ਚਰਚਾ ਉਪਰੰਤ ਸਭਾ ਹੇਠ ਲਿਖੇ ਸਿੱਟਿਆਂ ਉੱਪਰ ਪੁੱਜੀ ਹੈ :-

v                ਮ੍ਰਿਤਕਾਂ ਦੇ ਪਹਿਨੇ ਹੋਏ ਕੱਪੜਿਆਂ ਤੋਂ ਉਹਨਾਂ ਵੱਲੋਂ ਮੋਟਰ ਸਾਈਕਲ ਤੋਂ ਉਤਰਕੇ ਭੱਜਣ ਅਤੇ ਪੁਲਸ ਨਾਲ ਮੁਕਾਬਲਾ ਕਰਨ ਦੀ ਕਹਾਣੀ ਦੀ ਪੁਸ਼ਟੀ ਨਹੀਂ ਹੁੰਦੀ। ਦੋਹਾਂ ਦੇ ਪੈਰਾਂ ਵਿਚ ਚਿੱਟੀਆਂ ਨੀਲੀਆਂ ਚਪਲਾਂ ਪਾਈਆਂ ਹੋਈਆਂ ਸਨ ਜਿਨ੍ਹਾਂ ਨਾਲ ਖੇਤਾਂ ਵਿਚ ਭੱਜਣਾ ਬੇਹੱਦ ਔਖਾ ਹੈ। ਪੇਸ਼ਾਵਰ ਭਗੌੜਿਆਂ ਤੋਂ ਇਸ ਤਰ੍ਹਾਂ ਕਰਨ ਦੀ ਉਮੀਦ ਨਹੀਂ ਕੀਤੀ ਜਾ ਸਕਦੀ।

v                ਮੁਕਾਬਲਾ ਕਰਨ ਵਾਲਾ ਹਮੇਸ਼ਾਂ ਕਿਸੇ ਓਟ ਦਾ ਸਹਾਰਾ ਲਵੇਗਾ, ਖੁੱਲ੍ਹਾ ਖੇਤ ਮੁਕਾਬਲੇ ਦੀ ਜਗਾ ਨਹੀਂ ਹੋ ਸਕਦੀ।

v                ਮੁਕਾਬਲੇ ਵਿਚ ਦੋਨੋ ਮੁਕਾਬਲਾ ਕਰ ਰਹੀਆਂ ਧਿਰਾਂ ਦੇ ਜ਼ਖ਼ਮੀ ਹੋਣ ਦੀ ਸੰਭਾਵਨਾ ਹੈ, ਪਰ ਕਿਸੇ ਪੁਲਸ ਵਾਲੇ ਦੇ ਕੋਈ ਝਰੀਟ ਵੀ ਨਹੀਂ ਆਈ।

v                ਦੋਸ਼ੀਆਂ ਦੇ ਸਾਰੀਆਂ ਗੋਲੀਆਂ ਲੱਕ ਤੋਂ ਉਪਰ ਹੀ ਲੱਗੀਆਂ ਹਨ। ਕੋਈ ਵੀ ਗੋਲੀ ਸਰੀਰ ਦੇ ਹੇਠਲੇ ਹਿੱਸੇ ਵਿਚ ਨਹੀਂ ਲੱਗੀ। ਇਸ ਤੋਂ ਸਾਫ਼ ਜ਼ਾਹਰ ਹੁੰਦਾ ਹੈ ਕਿ ਪੁਲਸ ਦੀ ਮਨਸ਼ਾ ਦੋਸ਼ੀਆਂ ਨੂੰ ਮਾਰਨ ਦੀ ਸੀ ਨਾ ਕਿ ਫੜ੍ਹਨ ਦੀ। ਜੇ ਪੁਲਸ ਵੱਲੋਂ ਪ੍ਰਚਾਰੀ ਜਾ ਰਹੀ ਮੁਕਾਬਲੇ ਦੀ ਕਹਾਣੀ ਸੱਚੀ ਵੀ ਮੰਨ ਲਈਏ ਤਾਂ ਵੀ ਦੋਸ਼ੀ ਕੁਲਵਿੰਦਰ ਸਿੰਘ ਜੋ ਕਿ ਇਕ ਲੱਤ ਤੋਂ ਆਹਰੀ ਸੀ ਅਤੇ ਬਹੁਤਾ ਭੱਜ ਨਹੀਂ ਸਕਦਾ ਸੀ, ਨੂੰ ਜਿਉਂਦਿਆਂ ਫੜ੍ਹਿਆ ਜਾ ਸਕਦਾ ਸੀ।

v                ਦੋਨੋ ਮ੍ਰਿਤਕਾਂ ਦੇ ਸਰੀਰ ਉਪਰ ਲੱਗੀਆਂ ਗੋਲੀਆਂ ਦੀ ਇਕੋ ਦਿਸ਼ਾ ਵੀ ਮੁਕਾਬਲੇ ਨੂੰ ਸ਼ੱਕ ਦੇ ਘੇਰੇ ਵਿਚ ਲਿਆਉਂਦੀ ਹੈ। ਭਾਵੇਂ ਉਹਨਾਂ ਦੀਆਂ ਲਾਸ਼ਾਂ ਖੇਤ ਵਿਚ ਤੀਹ ਪੈਂਤੀ ਕਰਮਾਂ ਦੀ ਵਿੱਥ ਉਤੇ ਪਈਆਂ ਸਨ।

v                ਮ੍ਰਿਤਕ ਨਾਹਰ ਸਿੰਘ ਦੇ ਬਾਂਹ ਉਪਰ ਗੋਲੀਆਂ ਦੇ ਜ਼ਖ਼ਮ ਕਿਸੇ ਤਰ੍ਹਾਂ ਵੀ ਮੁਕਾਬਲੇ ਵਿਚ ਲੱਗੀਆਂ ਗੋਲੀਆਂ ਦੇ ਜ਼ਖ਼ਮ ਸਿੱਧ ਨਹੀਂ ਹੁੰਦੇ, ਸਗੋਂ ਸੰਭਾਵਨਾ ਇਹ ਹੈ ਕਿ ਮ੍ਰਿਤਕ ਦੀਆਂ ਬਾਹਾਂ ਕਿਸੇ ਕੱਪੜੇ ਨਾਲ ਸਰੀਰ ਦੇ ਬਰਾਬਰ ਬੰਨ੍ਹੀਆਂ ਗਈਆਂ ਅਤੇ ਨੇੜਿਉਂ ਕੀਤੇ ਫਾਇਰ ਦੀ ਗੋਲੀ ਹੀ ਉਸਦੇ ਸਰੀਰ ਨੂੰ ਪਾਰ ਕਰਕੇ ਫਿਰ ਬਾਂਹ ਦੇ ਵੀ ਪਾਰ ਹੋ ਸਕਦੀ ਹੈ। ਫਾਰੈਂਸਕ ਮਾਹਰਾਂ ਅਨੁਸਾਰ ਦੂਰ ਤੋਂ ਕੀਤੇ ਫਾਇਰ ਦੀ ਗੋਲੀ ਜੇ ਸਰੀਰ ਵਿਚ ਦੀ ਨਿਕਲ ਵੀ ਜਾਂਦੀ ਹੈ, ਤਾਂ ਉਹ ਫਿਰ ਸਰੀਰ ਦੇ ਹੋਰ ਅੰਗ ਨੂੰ ਪਾਰ ਨਹੀਂ ਕਰਦੀ।

v                ਪਿੰਡ ਬਹਿਣੀਵਾਲ ਦੇ ਲੋਕਾਂ ਅਨੁਸਾਰ ਪੁਲਸ ਨੇ ਦੋਸ਼ੀਆਂ ਨੂੰ ਸ਼ਾਮ ਨੂੰ 8.30 ਵਜੇ ਫੜ੍ਹ ਲਿਆ ਸੀ ਅਤੇ ਫਿਰ ਪੁਲਸ ਕੁਝ ਦੇਰ ਬਾਅਦ ਬਾਲਣ ਦੇ ਢੇਰ ਵਿਚੋਂ ਕੁਝ ਕੱਢ ਕੇ ਲੈ ਗਈ ਸੀ। ਕੀ ਫਿਰ ਪੁਲਸ ਹਿਰਾਸਤ ਵਿਚ ਹੀ ਦੋਸ਼ੀਆਂ ਨੇ ਪੁਲਸ ਨਾਲ ਮੁਕਾਬਲਾ ਕੀਤਾ।

v                25 ਅਪ੍ਰੈਲ ਨੂੰ ਦੋਸ਼ੀਆਂ ਦੇ ਪੁਲਸ ਹਿਰਾਸਤ ਵਿਚੋਂ ਭੱਜਣ ਸਮੇਂ ਪੁਲਸ ਕਰਮਚਾਰੀਆਂ ਦਾ ਵਿਹਾਰ ਸ਼ੱਕ ਦੇ ਘੇਰੇ ਵਿਚ ਹੈ, ਕਿਉਂਕਿ ਪੁਲਸ ਪਾਰਟੀ ਦੇ ਛੇ ਮੈਂਬਰ ਸਨ ਅਤੇ ਉਹ ਆਧੁਨਿਕ ਹਥਿਆਰਾਂ ਨਾਲ ਲੈਸ ਸਨ।

ਮੰਗਾਂ ਅਤੇ ਸੁਝਾਅ:-

v                ਪੁਲਸ ਨੇ ਉਕਤ ਦੋਵਾਂ ਵਿਅਕਤੀਆਂ ਨੂੰ ਕਥਿਤ ਮੁਕਾਬਲੇ ਵਿਚ ਮਾਰ ਕੇ ਅਸਲ ਵਿਚ ਇਨ੍ਹਾਂ ਵਿਅਕਤੀਆਂ ਵੱਲੋਂ ਪੁਲਸ ਹਿਰਾਸਤ ਚੋਂ ਭੱਜਣ ਸਮੇਂ ਐੱਚ.ਸੀ. ਅਵਤਾਰ ਸਿੰਘ ਨੂੰ ਮਾਰ ਦੇਣ ਅਤੇ ਐੱਚ.ਸੀ. ਮਨਦੀਪ ਸਿੰਘ ਨੂੰ ਜ਼ਖ਼ਮੀ ਕਰਨ ਦਾ ਬਦਲਾ ਲਿਆ ਹੈ। ਇਉਂ ਕਰਦਿਆਂ ਕਾਨੂੰਨ ਦੀਆਂ ਸ਼ਰੇਆਮ ਧੱਜੀਆਂ ਉਡਾਈਆਂ ਗਈਆਂ ਹਨ। ਅਤੇ ਅਦਾਲਤੀ ਹੁਕਮਾਂ ਦੀ ਘੋਰ ਉਲੰਘਣਾ ਕੀਤੀ ਗਈ ਸੀ। ਇਸ ਗੱਲ ਵਿਚ ਕੋਈ ਸ਼ੱਕ ਨਹੀਂ ਕਿ ਇਹ ਕਾਲਾ ਕਾਰਨਾਮਾ ਹੇਠਲੇ ਪੱਧਰ ਦੇ ਪੁਲਸ ਅਧਿਕਾਰੀਆਂ ਨੇ ਨਹੀਂ ਸਗੋਂ ਉਚ ਪੁਲਸ ਅਧਿਕਾਰੀਆਂ ਨੇ ਸਾਜਿਸ਼ ਰਚਕੇ ਵਿਉਂਤਬੱਧ ਢੰਗ ਨਾਲ ਕੀਤਾ ਹੈ। ਇਸ ਦਾ ਮਕਸਦ ਲੋਕਾਂ ਤੇ ਪੁਲਸ (ਸਰਕਾਰੀ ਡੰਡੇ) ਦੀ ਦਬਸ਼ ਕਾਇਮ ਰੱਖਣਾ ਹੈ। ਇਸ ਮਾਮਲੇ 'ਚ ਪੁਲਸ ਦੇ ਸਿਆਸੀ ਪ੍ਰਭੂ ਉਸ ਨਾਲ ਘਿਉ ਖਿਚੜੀ ਹਨ। ਇਸ ਦਾ ਪ੍ਰਗਟਾਵਾ ਲੱਗਭੱਗ ਸਾਰੀਆਂ ਮੁੱਖ ਸਿਆਸੀ ਪਾਰਟੀਆਂ ਦੇ ਆਗੂਆਂ ਅਤੇ ਅਖੌਤੀ ਲੋਕ ਨੁਮਾਇੰਦਿਆਂ ਵੱਲੋਂ ਇਸ ਮਸਲੇ ਤੇ ਧਾਰੀ ਚੁੱਪ ਤੋਂ ਹੁੰਦਾ ਹੈ।

v                ਝੂਠੇ ਪੁਲਸ ਮੁਕਾਬਲੇ ਰਚਾਉਣ ਵੇਲੇ, ਲੋਕਾਂ ਨੂੰ ਭੰਬਲ ਭੂਸੇ ਵਿਚ ਪਾਕੇ ਬੇਹਰਕਤੇ ਕਰਨ ਅਤੇ ਆਪਣੇ ਗ਼ੈਰ ਕਾਨੂੰਨੀ ਤੇ ਅਣਮਨੁੱਖੀ ਵਹਿਸ਼ੀ ਕਾਰੇ ਨੂੰ ਵਾਜਬ ਠਹਿਰਉਣ ਲਈ, ਪੁਲਸ ਅਧਿਕਾਰੀ ਅਕਸਰ ਮ੍ਰਿਤਕ ਤੇ ਖ਼ਤਰਨਾਕ ਮੁਜਰਮ, ਦਹਿਸ਼ਤਗਰਦ ਜਾਂ ਦੇਸ਼ ਧ੍ਰੋਹੀ ਹੋਣ ਦਾ ਠੱਪਾ ਲਾ ਦਿੰਦੀ ਹੈ। (ਇਸ਼ਰਤ ਜਹਾਂ ਫਰਜ਼ੀ ਪੁਲਸ ਮੁਕਾਬਲੇ ਦੀ ਅੱਜਕੱਲ੍ਹ ਉਧੜ ਰਹੀ ਕਹਾਣੀ ਇਸ ਦੀ ਸੱਜਰੀ ਮਿਸਾਲ ਹਨ। ਇਹ ਵੀ ਦਲੀਲ ਦਿੱਤੀ ਜਾਂਦੀ ਹੈ ਕਿ ਖ਼ਤਰਨਾਕ ਮੁਜਰਮ ਆਪਣਾ ਅਸਰ-ਰਸੂਖ਼ ਵਰਤਕੇ ਅਦਾਲਤਾਂ ਵਿਚੋਂ ਬਰੀ ਹੋ ਜਾਂਦੇ ਹਨ, ਇਸ ਲਈ ਉਹਨਾਂ ਨੂੰ ਪੁਲਸ ਮੁਕਾਬਲੇ ਵਿਚ 'ਗੱਡੀ ਚਾੜਿਆ' ਜਾਣਾ ਚਾਹੀਦਾ ਹੈ। ਪਰ ਇਹ ਸਾਰੀਆਂ ਗੱਲਾਂ ਸਿਰੇ ਦੀਆਂ ਗ਼ੈਰ ਜਮਹੂਰੀ, ਗੈਰ ਸੰਵਿਧਾਨਕ ਅਤੇ ਅੰਤਰ ਰਾਸ਼ਟਰੀ ਤੌਰ 'ਤੇ ਪ੍ਰਵਾਨਤ ਮਨੁੱਖੀ ਹੱਕਾਂ ਦੀ ਉਲੰਘਣਾ ਹਨ। ਕਿਸੇ ਵੀ ਅਜਿਹੇ ਮੁਲਕ ਵਿਚ - ਜੋ ਸੰਵਿਧਾਨ ਅਤੇ ਕਾਨੂੰਨ ਉਪਰ ਅਧਾਰਤ ਰਾਜ ਹੋਣ ਦਾ ਦਾਅਵਾ ਕਰਦਾ ਹੈ, ਕਿਸੇ ਪੁਲਸ ਜਾਂ ਰਾਜ ਦੀ ਸ਼ਹਿ ਪ੍ਰਾਪਤ ਸਿਆਸੀ ਟੋਲੇ ਨੂੰ ਉਹਨਾਂ ਦੀਆਂ ਅੱਖਾਂ ਵਿੱਚ ਰੜਕਦੇ ਬੰਦਿਆਂ ਨੂੰ ਝੂਠੇ ਪੁਲਸ ਮੁਕਾਬਲਿਆਂ 'ਚ ਮਾਰ ਮੁਕਾਉਣ ਦਾ ਹੱਕ ਨਹੀਂ ਦਿੱਤਾ ਜਾ ਸਕਦਾ। ਲੋਕਾਂ ਨੂੰ ਇਹਨਾਂ ਬੇਥਵੀਆਂ ਦਲੀਲਾਂ ਨੂੰ ਮੁੱਢੋਂ ਸੁੱਢੋਂ ਰੱਦ ਕਰਕੇ ਕਾਨੂੰਨ ਦੇ ਰਾਜ ਉਤੇ ਆਧਾਰਤ ਜਮਹੂਰੀਅਤ ਦੇ ਹੱਕ ਵਿਚ ਆਵਾਜ਼ ਬੁਲੰਦ ਕਰਨੀ ਚਾਹੀਦੀ ਹੈ।

v                ਇਸ ਸਬੰਧ 'ਚ ਕੁੱਝ ਮਹੀਨੇ ਪਹਿਲਾਂ ਸੁਪਰੀਮ ਕੋਰਟ ਦੇ ਦੋ ਜੱਜਾਂ ਉਤੇ ਆਧਾਰਤ ਬੈਂਚ ਵੱਲੋਂ ''ਰੋਹਤਾਸ ਕੁਮਾਰ ਬਨਾਮ ਹਰਿਆਣਾ ਸਰਕਾਰ ਵਗੈਰਾ” ਕੇਸ ਵਿਚ ਕੀਤਾ ਫ਼ੈਸਲਾ ਵਰਨਣ ਯੋਗ ਹੈ। ਇਸ ਕੇਸ ਵਿਚ ਪੁਲਸ ਅਨੁਸਾਰ “ਮਹਿੰਦਰਗੜ੍ਹ ਅਤੇ ਰਿਵਾੜੀ ਜ਼ਿਲ੍ਹਿਆਂ ਵਿਚ ਸਭ ਤੋਂ ਵੱਧ ਲੋੜੀਂਦੇ ਮੁਜਰਮ” ਸੁਨੀਲ ਨਾਂ ਦੇ ਇਕ ਵਿਅਕਤੀ ਨੂੰ ਨਾਰਨੌਲ ਪੁਲਸ ਨੇ ਇਕ ਮੁਕਾਬਲੇ 'ਚ ਮਾਰ ਦੇਣ ਦਾ ਦਾਅਵਾ ਕੀਤਾ ਸੀ। ਮ੍ਰਿਤਕ ਦੇ ਵਾਰਸਾਂ ਦਾ ਕਹਿਣਾ ਸੀ ਕਿ ਸੁਨੀਲ ਨੂੰ ਝੂਠੇ ਪੁਲਸ ਮੁਕਾਬਲੇ ਵਿਚ ਮਾਰਿਆ ਗਿਆ ਹੈ। ਸੁਪਰੀਮ ਕੋਰਟ ਨੇ ਆਪਣੇ ਫ਼ੈਸਲੇ ਵਿਚ ਇਸ ਕਥਿਤ ਮੁਕਾਬਲੇ ਨੂੰ ਝੂਠਾ ਕਰਾਰ ਦਿੰਦਿਆਂ ਹਰਿਆਣਾ ਸਰਕਾਰ ਨੂੰ ਮ੍ਰਿਤਕਾਂ ਦੇ ਵਾਰਸਾਂ ਨੂੰ 20 ਲੱਖ ਰੁਪਏ ਮੁਆਵਜ਼ਾ ਦੇਣ ਦਾ ਆਦੇਸ਼ ਦਿੱਤਾ। ਇਸ ਦੇ ਨਾਲ ਹੀ ਅਦਾਲਤ ਨੇ ਇਹ ਵੀ ਨਿਰਦੇਸ਼ ਦਿੱਤੇ ਕਿ:-

Ø     ਝੂਠੇ ਪੁਲਸ ਮੁਕਾਬਲੇ ਦੀ ਪੜਤਾਲ ਕਰ ਰਹੇ ਅਧਿਕਾਰੀ ਨੂੰ ਮ੍ਰਿਤਕਾਂ ਦੇ ਚਾਲ ਚੱਲਣ ਨੂੰ ਧਿਆਨ ਵਿਚ ਨਹੀਂ ਰੱਖਣਾ ਚਾਹੀਦਾ ਸਗੋਂ ਆਪਣੀ ਪੜਤਾਲ ਕਥਿਤ ਮੁਕਾਬਲੇ ਦੇ ਹਾਲਾਤਾਂ ਉਤੇ ਕੇਂਦਰਤ ਕਰਨੀ ਚਾਹੀਦੀ ਹੈ। ਤਾਂ ਕਿ ਜ਼ਰੂਰੀ ਸਬਕ ਕੱਢੇ ਜਾ ਸਕਣ ਅਤੇ ਘਟਨਾਵਾਂ ਨੂੰ ਮੁੜ ਵਾਪਣ ਤੋਂ ਰੋਕਿਆ ਜਾ ਸਕੇ।

Ø     ਜਿਉਂ ਹੀ ਪੁਲਸ ਖ਼ਿਲਾਫ਼ ਕਤਲ ਦੀ ਸ਼ਿਕਾਇਤ ਮ੍ਰਿਤਕ ਦੇ ਵਾਰਸਾਂ ਵੱਲੋਂ ਕੀਤੀ ਜਾਂਦੀ ਹੈ, ਐੱਫ.ਆਈ.ਆਰ. ਤੁਰੰਤ ਦਰਜ਼ ਕੀਤੀ ਜਾਣੀ ਚਾਹੀਂਦੀ ਹੈ।

Ø     ਪੁਲਸ ਮੁਕਾਬਲੇ ਵਿਚ ਹੋਈ ਮੌਤ ਦੀ ਤਫ਼ਤੀਸ਼ ਕਿਸੇ ਨਿਰਪੱਖ ਏਜੰਸੀ ਤੋਂ ਕਰਵਾਈ ਜਾਣੀ ਚਾਹੀਦੀ ਹੈ।

v                ਪੁਲਸ ਵੱਲੋਂ ਨਾਹਰ ਸਿੰਘ ਅਤੇ ਕੁਲਵਿੰਦਰ ਸਿੰਘ ਨੂੰ ਕਥਿਤ ਮਕਾਬਲੇ 'ਚ ਮਾਰ ਮਕਾਉਣ ਅਤੇ ਜਸਵਿੰਦਰ ਸਿੰਘ ਦੇ ਬਚ ਕੇ ਨਿਕਲ ਜਾਣ ਦੀ ਕਹਾਣੀ ਨਾਲ ਇਨ੍ਹਾਂ ਘਟਨਾਵਾਂ ਸਬੰਧੀ ਥਾਣਾ ਮੌੜ ਅਤੇ ਥਾਣਾ ਜੌੜਕੀਆਂ 'ਚ ਦਰਜ਼ ਐਫ ਆਈ ਆਰ ਤਫਤੀਸ਼ ਬੰਦ ਹੋ ਗਈ ਹੈ। ਇਸ ਨਾਲ ਇਨ੍ਹਾਂ ਦੋਹਾਂ ਵਾਰਦਾਤਾਂ ਦਾ ਸੱਚ ਲੋਕਾਂ ਜਾਂ ਅਦਾਲਤਾਂ ਸਾਹਮਣੇ ਆਉਣ ਦੇ ਦਰਵਾਜ਼ੇ ਬੰਦ ਹੋ ਗਏ ਹਨ। ਇਸ ਲਈ ਇਨ੍ਹਾਂ ਦੋਹਾਂ ਘਟਨਾਵਾਂ ਦੀ ਸ਼ੈਸਨ ਜੱਜ ਪੱਧਰ ਦੇ ਨਿਆਂਇਕ ਅਧਿਕਾਰੀ ਤੋਂ ਪੜਤਾਲ ਕਰਵਾਕੇ ਅਗਲੇਰੀ ਕਾਰਵਾਈ ਕੀਤੀ ਜਾਣੀ ਚਾਹੀਂਦੀ ਹੈ।

v                ਮ੍ਰਿਤਕ ਨਾਹਰ ਸਿੰਘ ਅਤੇ ਕੁਲਵਿੰਦਰ ਸਿੰਘ ਦੇ ਮਾਪਿਆਂ ਵੱਲੋਂ ਅਖੌਤੀ ਪੁਲਸ ਮੁਕਾਬਲੇ ਨੂੰ ਝੂਠਾ ਕਰਾਰ ਦੇਣ ਅਤੇ ਦੋਹਾਂ ਨੂੰ ਫੜ੍ਹ ਕੇ ਮਾਰਨ ਦਾ ਦੋਸ਼ ਲਗਾਇਆ ਗਿਆ ਹੈ। ਉਹਨਾਂ ਨੇ ਜਸਵਿੰਦਰ ਸਿੰਘ ਨੂੰ ਵੀ ਪੁਲਸ ਵੱਲੋਂ ਕਿਧਰੇ ਛੁਪਾਉਣ ਜਾਂ ਮਾਰ ਖਪਾਉਣ ਦਾ ਦੋਸ਼ ਲਗਾਇਆ ਹੈ। ਇਸ ਆਧਾਰ ਉਤੇ ਸੁਪਰੀਮ ਕੋਰਟ ਦੀਆਂ ਹਦਾਇਤਾਂ ਅਨੁਸਾਰ ਮੁਕੱਦਮਾ ਦਰਜ਼ ਕਰਕੇ, ਇਸ ਦੀ ਪੜਤਾਲ ਕਿਸੇ ਨਿਰਪੱਖ ਏਜੰਸੀ ਤੋਂ ਅਦਾਲਤੀ ਦੇਖ-ਰੇਖ ਹੇਠ ਕਰਵਾਈ ਜਾਣੀ ਚਾਹੀਦੀ ਹੈ।

v                ਜਸਵਿੰਦਰ ਸਿੰਘ, ਜਿਸਨੂੰ ਪੁਲਸ ਨੇ ਭਗੌੜਾ ਦੱਸਿਆ ਹੈ ਨੂੰ ਲੱਭਿਆ ਜਾਵੇ ਅਤੇ ਸਰਕਾਰ ਇਹ ਯਕੀਨੀ ਬਣਾਵੇ ਕਿ ਪੁਲਸ ਗ਼ੈਰ ਕਾਨੂੰਨੀ ਕਾਰੇ (ਝੂਠੇ ਪੁਲਸ ਮੁਕਾਬਲੇ) ਉੱਤੇ ਪੜਦਾ ਪਾਉਣ ਲਈ ਉਸ ਨੂੰ ਖ਼ਤਮ ਨਾ ਕਰ ਸਕੇ। 

ਜਾਰੀ ਕਰਤਾ: ਪ੍ਰੌਫੈਸਰ ਅਜਮੇਰ ਔਲਖ (ਸੂਬਾ ਪ੍ਰਧਾਨ)   ਪ੍ਰੋਫੈਸਰ ਜਗਮੋਹਨ ਸਿੰਘ (ਜਨਰਲ ਸਕਤਰ)
ਮੋਬਾਈਲ 9815575495                   ਮੋਬਾਈਲ 9814001836

ਜਮਹੂਰੀ ਅਧਿਕਾਰ ਸਭਾ, ਪੰਜਾਬ

ਰਾਕੇਸ਼ ਕੁਮਾਰ ਦੀ ਖੋਜ-ਭਰਪੂਰ ਨਵ-ਪ੍ਰਕਾਸ਼ਿਤ ਪੁਸਤਕ, 'ਮਹਾਨ ਗ਼ਦਰੀ ਇਨਕਲਾਬੀ : ਸ਼ਹੀਦ ਊਧਮ ਸਿੰਘ'।

ਸ਼ਹੀਦ ਊਧਮ ਸਿੰਘ ਬਾਰੇ ਪ੍ਰਮਾਣਿਕ ਦਸਤਾਵੇਜ਼ੀ ਪੁਸਤਕ ਨੇ ਕੀਤੇ ਨਵੇਂ ਖੁਲਾਸੇ
ਬਦਲੇ ਤੋਂ ਪਾਰ, ਸਮਾਜਕ ਬਦਲਾਅ ਨੂੰ ਪਰਨਾਇਆ ਸੀ : ਊਧਮ ਸਿੰਘ

ਬੌਧਿਕ ਹਲਕਿਆਂ, ਇਤਿਹਾਸਕਾਰਾਂ, ਆਲੋਚਕਾਂ, ਖੋਜਕਾਰ ਵਿਦਿਆਰਥੀਆਂ ਅਤੇ ਪਾਠਕ-ਵਰਗ ਅੰਦਰ ਨਵੀਆਂ ਵਿਚਾਰ-ਚਰਚਾਵਾਂ ਛੇੜੇਗੀ ਰਾਕੇਸ਼ ਕੁਮਾਰ ਦੀ ਖੋਜ-ਭਰਪੂਰ ਨਵ-ਪ੍ਰਕਾਸ਼ਿਤ ਪੁਸਤਕ, 'ਮਹਾਨ ਗ਼ਦਰੀ ਇਨਕਲਾਬੀ : ਸ਼ਹੀਦ ਊਧਮ ਸਿੰਘ'।

ਸ਼ਹੀਦ ਊਧਮ ਸਿੰਘ ਬਾਰੇ ਸਤਹੀ ਪੱਧਰ ਦੀ ਜਾਣਕਾਰੀ ਕਾਰਨ ਬਣੀਆਂ ਧਾਰਨਾਵਾਂ ਨੂੰ ਬਦਲ ਕੇ ਉਸਨੂੰ ਵਿਅਕਤੀਗਤ ਬਦਲੇ ਤੱਕ ਸੀਮਤ ਸਨਾਖ਼ਤ ਤੋਂ ਬਹੁਤ ਵਿਸ਼ਾਲ ਅਤੇ ਮਹਾਨ ਆਦਰਸ਼ ਵਾਲੇ ਇਨਕਲਾਬੀ ਸੰਗਰਾਮੀਏਂ ਵਜੋਂ ਸਾਹਮਣੇ ਲਿਆਉਂਦੀ ਹੈ ਇਹ ਪੁਸਤਕ।

ਗ਼ਦਰ ਪਾਰਟੀ ਸਥਾਪਨਾ ਸ਼ਤਾਬਦੀ (1913-2013) ਸਬੰਧੀ ਦੇਸ਼-ਵਿਦੇਸ਼ ਅੰਦਰ ਚੱਲ ਰਹੀਆਂ ਨਿਰੰਤਰ ਵਿਚਾਰ-ਚਰਚਾਵਾਂ ਅਤੇ ਸਰਗਰਮੀਆਂ ਦੇ ਦੌਰ ਅੰਦਰ ਇਸ ਪੁਸਤਕ ਦਾ ਇਤਿਹਾਸਕ ਮੁੱਲ ਹੋਰ ਵੀ ਮਹੱਤਤਾ ਰੱਖਦਾ ਹੈ। ਪੁਸਤਕ ਊਧਮ ਸਿੰਘ ਦਾ ਗ਼ਦਰ ਪਾਰਟੀ ਅਤੇ ਨੌਜਵਾਨ ਭਾਰਤ ਸਭਾ ਨਾਲ ਗੂੜ੍ਹਾ ਸਬੰਧ ਹੋਣ ਦਾ ਪ੍ਰਮਾਣ ਪੇਸ਼ ਕਰਦੀ ਇਹ ਦਰਸਾਉਂਦੀ ਹੈ ਕਿ ਊਧਮ ਸਿੰਘ ਦੇ ਉਦੇਸ਼ਾਂ, ਨਿਸ਼ਾਨਿਆਂ ਅਤੇ ਆਦਰਸ਼ਾਂ ਦਾ ਕੈਨਵਸ ਵਸੀਹ ਅਤੇ ਉਚੇਰਾ ਹੈ। ਉਹ ਕਿਸੇ ਇਕੱਲੀ ਇਕਹਿਰੀ ਘਟਨਾ ਤੋਂ ਨਾ ਸ਼ੁਰੂ ਹੁੰਦਾ ਹੈ ਅਤੇ ਨਾ ਸਮਾਪਤ।

ਰੰਗਦਾਰ ਤਸਵੀਰਾਂ ਵਾਲੇ ਸਫ਼ਿਆਂ ਸਮੇਤ ਕੋਈ 400 ਸਫ਼ਿਆਂ 'ਚ ਸਮੋਈ ਰਾਕੇਸ਼ ਕੁਮਾਰ ਦੀ ਪੁਸਤਕ 'ਚ ਸ਼ਾਮਲ ਢੇਰ ਸਾਰੇ ਇਤਿਹਾਸਕ ਦਸਤਾਵੇਜ਼ੀ ਪ੍ਰਮਾਣ, ਊਧਮ ਸਿੰਘ ਦੇ ਹਲਫ਼ੀਆ ਬਿਆਨ ਅਤੇ ਨਾ ਝੁਠਲਾਏ ਜਾ ਸਕਣ ਵਾਲੇ ਪੱਖ ਊਧਮ ਸਿੰਘ ਨੂੰ ਇਕ ਬੌਧਿਕ, ਚਿੰਤਨਸ਼ੀਲ, ਇਨਕਲਾਬੀ ਸੋਚ ਨੂੰ ਪਰਨਾਏ ਕਰਾਂਤੀਕਾਰੀ ਵਜੋਂ ਉਭਾਰ ਕੇ ਸਾਹਮਣੇ ਲਿਆਉਂਦੇ ਹਨ।

ਪਰੰਪਰਾਗਤ ਇਤਿਹਾਸਕਾਰੀ ਦੇ ਘੇਰੇ 'ਚ ਊਧਮ ਸਿੰਘ ਨੂੰ ਓਪਰੀ ਨਜ਼ਰੇ ਵਡਿਆਕੇ ਪੇਸ਼ ਕਰਦਿਆਂ ਉਸਦਾ ਕੱਦ ਉਚਾ ਨਹੀਂ ਸਗੋਂ ਛੋਟਾ ਹੀ ਕੀਤਾ ਜਾਂਦਾ ਹੈ। ਉਹਨਾਂ ਦੀ ਐਨਕ 'ਚ ਊਧਮ ਸਿੰਘ ਦਾ ਸੰਗਰਾਮੀ ਚੇਤਨਾ ਅਤੇ ਅਮਲ ਦਾ ਸਫ਼ਰ ਜਲ੍ਹਿਆਂਵਾਲਾ ਬਾਗ ਦੀ ਖ਼ੂਨੀ ਵਿਸਾਖੀ ਤੋਂ ਸ਼ੁਰੂ ਹੁੰਦਾ ਹੈ ਜਿਹੜਾ ਕੈਕਸਟਨ ਹਾਲ ਲੰਡਨ 'ਚ ਮਾਈਕਲ ਓਡਵਾਇਰ ਤੇ ਗੋਲੀਆਂ ਚਲਾਉਣ ਦੀ ਇਕ ਘਟਨਾ ਕਰਕੇ 31 ਜੁਲਾਈ 1940 ਨੂੰ ਲੰਡਨ 'ਚ ਹੀ ਫਾਂਸੀ ਦਾ ਰੱਸਾ ਚੁੰਮਣ ਨਾਲ ਸਮਾਪਤ ਹੋ ਜਾਂਦਾ ਹੈ।

ਪੁਸਤਕ ਇਤਿਹਾਸ ਦੇ ਨਵੇਂ ਸਫ਼ੇ ਸਿਰਜਦੀ ਹੈ। ਪੁਸਤਕ ਦਾ ਇਹ ਇਤਿਹਾਸਕ ਹਾਸਲ ਹੈ ਕਿ ਉਸ ਵਿਚ ਰਾਕੇਸ਼ ਦੀ ਕਲਮ ਖ਼ੁਦ ਬਹੁਤ ਘੱਟ ਲਿਖ ਕੇ ਸਗੋਂ ਇਤਿਹਾਸਕ ਤੱਥਾਂ ਦੀ ਰੌਸ਼ਨੀ 'ਚ ਇਹ ਸਥਾਪਤ ਕਰਦੀ ਹੈ ਕਿ ਸਾਨੂੰ ਉਸ ਊਧਮ ਸਿੰਘ ਦੀਆਂ ਪੈੜਾਂ ਸੰਭਾਲਣ ਦੀ ਲੋੜ ਹੈ ਜਿਹੜਾ ਵਿਅਕਤੀਗਤ ਬਦਲੇ ਤੱਕ ਸੀਮਤ ਨਹੀਂ। ਜਿਹੜਾ ਸਾਮਰਾਜੀ ਗਲਬੇ, ਜਾਗੀਰੂ ਦਾਬੇ, ਪੂੰਜੀਪਤੀ ਮਾਸਖੋਰਿਆਂ ਅਤੇ ਲੋਕਾਂ ਦੀ ਰੱਤ ਨਚੋੜਵੇਂ ਪ੍ਰਬੰਧ ਤੋਂ ਮੁਕੰਮਲ ਮੁਕਤੀ ਹਾਸਲ ਕਰਕੇ ਨਵੇਂ, ਆਜ਼ਾਦ, ਜਮਹੂਰੀ ਅਤੇ ਬਰਾਬਰੀ ਤੇ ਟਿਕੇ, ਨਿਆਂ ਭਰੇ ਭਾਰਤ ਦੀ ਸਿਰਜਣਾ ਕਰਨ ਦੇ ਮਹਾਨ ਆਦਰਸ਼ ਨੂੰ ਪਰਨਾਇਆ ਹੋਇਆ ਹੈ।

ਪੁਸਤਕ ਉਨ੍ਹਾਂ 'ਵਿਚਾਰਵਾਨਾਂ', ਰਾਜਨੀਤਕ ਮੌਕਾਪ੍ਰਸਤਾਂ ਅਤੇ ਬਰਤਾਨਵੀ ਸਾਮਰਾਜ ਦੇ ਸੇਵਾਦਾਰਾਂ ਦੇ ਬਾਖ਼ੂਬ ਬਖ਼ੀਏ ਉਧੇੜਦੀ ਹੈ ਜਿਹੜੇ ਊਧਮ ਸਿੰਘ ਨੂੰ 'ਦਹਿਸ਼ਤਗਰਦ', 'ਕਾਤਲ' ਅਤੇ 'ਸਿਰ ਫਿਰਿਆ ਨੌਜਵਾਨ' ਦੱਸਦੇ ਰਹੇ ਹਨ। ਜਿਹੜੇ ਲੰਡਨ 'ਚ ਊਧਮ ਸਿੰਘ ਵੱਲੋਂ ਚਲਾਈ ਗੋਲੀ ਮੌਕੇ ਮ੍ਰਿਤਕਾਂ ਅਤੇ ਜ਼ਖ਼ਮੀਆਂ ਨਾਲ ਦੁੱਖ ਸਾਂਝਾ ਕਰਨ ਅਤੇ ਊਧਮ ਸਿੰਘ ਦੀ ਘੋਰ ਨਿੰਦਾ ਕਰਨ ਦੇ ਘ੍ਰਿਣਤ ਕੰਮ ਕਰਦੇ ਰਹੇ ਹਨ। ਜਿਹੜੇ ਹੁਣ ਭਰਮ ਪਾਲਦੇ ਹਨ ਕਿ ਲੋਕ ਇਤਿਹਾਸ ਤੋਂ ਅਣਭਿੱਜ ਨੇ, ਉਹਨਾਂ ਦੇ ਲਿਖੇ ਕਾਲੇ ਸਫ਼ਿਆਂ ਤੋਂ ਵਾਕਫ਼ ਨਹੀਂ ਇਸ ਕਰਕੇ ਉਹ ਊਧਮ ਸਿੰਘ ਨੂੰ ਸ਼ਹੀਦੀ ਰੁਤਬਾ ਦੇਣ ਅਤੇ ਆਪਣੀਆਂ ਸਿਆਸੀ ਰੋਟੀਆਂ ਸੇਕਣ ਲਈ ਉਸਨੂੰ 'ਯਾਦ ਕਰਨ' ਦਾ ਖੇਖਣ ਵੀ ਕਰਦੇ ਹਨ।

ਪੁਸਤਕ 'ਚ ਪ੍ਰਕਾਸ਼ਿਤ 5 ਮਈ, 1940 ਨੂੰ ਅਦਾਲਤ ਵਿਚ ਦਿੱਤਾ ਊਧਮ ਸਿੰਘ ਦਾ ਹੱਥ ਲਿਖਤ ਬਿਆਨ ਮੌਖਿਕ ਰੂਪ 'ਚ ਸ਼ਾਮਲ ਹੈ। ਇਹ ਬਿਆਨ ਊਧਮ ਸਿੰਘ ਦੇ ਅਸਲ 'ਸ਼ਿਕਾਰ' ਅਤੇ 'ਅਸਲ ਨਿਸ਼ਾਨੇ' ਬਾਰੇ ਪ੍ਰਮਾਣਿਕ ਦਸਤਾਵੇਜ਼ ਹੈ :

''ਕਿਸੇ ਵਿਅਕਤੀ ਦੀ ਜਾਨ ਲੈਣਾ ਮੇਰਾ ਮਕਸਦ ਨਹੀਂ। ਜ਼ਾਲਮਾਨਾ ਬ੍ਰਿਟਿਸ਼ ਰਾਜ ਭਾਰਤੀ ਲੋਕਾਂ ਲਈ ਘਾਤਕ ਹੈ। ਵੱਡੇ ਜ਼ਿੰਮੀਦਾਰ ਅਤੇ ਭਾਰਤ ਦੇ ਮਾਲਕ ਬਣ ਬੈਠੇ ਜਿਹੜੇ ਮੇਰੇ ਦੇਸ਼ ਦੇ ਮਹੱਤਵਪੂਰਨ ਉਦਯੋਗਾਂ ਦੇ ਮਾਲਕ ਬਣ ਬੈਠੇ ਹਨ ਉਹ ਆਪਣੀ ਲਾਲਸਾ ਲਈ, ਸਾਡੇ ਦੇਸ਼ ਦੇ ਲੋਕਾਂ ਦੀ ਰੱਤ ਨਿਚੋੜਕੇ ਲਿਜਾ ਰਹੇ ਹਨ। ਕਾਮਿਆਂ ਨੂੰ ਜਿਉਣ ਦੇ ਹੱਕ ਤੋਂ ਵਾਂਝਿਆਂ ਕੀਤਾ ਜਾ ਰਿਹਾ ਹੈ। ਇਹ ਆਪ ਸ਼ਾਹੀ ਠਾਠ ਦੀ ਜ਼ਿੰਦਗੀ ਜੀਅ ਰਹੇ ਹਨ।''

ਇਹੋ ਬਿਆਨ ਅੱਗੇ ਚੱਲ ਕੇ ਇਹ ਦਰਸਾਉਂਦਾ ਹੈ :

''ਮੈਂ ਮੌਤ ਦੀ ਸਜ਼ਾ ਤੋਂ ਨਹੀਂ ਡਰਦਾ। ਇਹ ਮੇਰੇ ਵਾਸਤੇ ਕੁਝ ਵੀ ਨਹੀਂ। ਮੈਨੂੰ ਮਰਨ ਤੇ ਮਾਣ ਹੈ। ਅਸੀਂ ਬ੍ਰਿਟਿਸ਼ ਸਾਮਰਾਜ ਦੇ ਸਤਾਏ ਹੋਏ ਹਾਂ। ਆਪਣੀ ਜਨਮ-ਭੂਮੀ ਨੂੰ ਆਜ਼ਾਦ ਕਰਾਉਣ ਲਈ ਆਪਣੇ ਮਰਨ ਤੇ ਵੀ ਮਾਣ ਹੋਵੇਗਾ। ਮੈਨੂੰ ਮਾਣ ਹੈ ਮੇਰੇ ਜਾਣ ਮਗਰੋਂ ਵੀ ਮੇਰੇ ਦੇਸ਼ ਨੂੰ ਆਜ਼ਾਦ ਕਰਾਉਣ ਲਈ ਹਜ਼ਾਰਾਂ ਦੇਸ਼ ਵਾਸੀ ਅੱਗੇ ਆਉਣਗੇ।''

ਸ਼ਹੀਦ ਊਧਮ ਸਿੰਘ ਦੇ ਸਮੇਂ ਨਾਲੋਂ ਵੀ ਵਿਰਾਟ ਅਤੇ ਤਿੱਖਾ ਰੂਪ ਧਾਰਨ ਕਰਕੇ ਖੜ੍ਹੀਆਂ ਗੰਭੀਰ ਚੁਣੌਤੀਆਂ ਨੂੰ ਅਜੋਕੇ ਸਮੇਂ ਅੰਦਰ ਮੁਖ਼ਾਤਬ ਹੋਣ ਲਈ, ਆਪਣੇ ਰਾਹ ਅਤੇ ਨਿਸ਼ਾਨੇ ਬਾਰੇ ਚੇਤੰਨ ਹੋਣ ਲਈ ਰੌਸ਼ਨ ਮਿਨਾਰ ਦਾ ਕੰਮ ਕਰੇਗੀ ਰਾਕੇਸ਼ ਕੁਮਾਰ ਦੀ ਅਮੁੱਲੀ ਪੁਸਤਕ। ਪੂਰਨ ਵਿਸ਼ਵਾਸ ਨਾਲ ਕਿਹਾ ਜਾ ਸਕਦਾ ਹੈ ਕਿ ਇਹ ਪੁਸਤਕ ਨਵੇਂ ਸੰਵਾਦ ਅੱਗੇ ਤੋਰੇਗੀ ਜਿਹੜੇ ਸਾਡੇ ਅਤੀਤ, ਵਰਤਮਾਨ ਅਤੇ ਭਵਿੱਖ ਨੂੰ ਸਮਝਣ ਵਿਚ ਸਹਾਈ ਹੋਣਗੇ।

ਜਾਰੀ ਕਰਤਾ : ਅਮੋਲਕ ਸਿੰਘ
ਪ੍ਰਧਾਨ, ਪੰਜਾਬ ਲੋਕ ਸੱਭਿਆਚਾਰਕ ਮੰਚ (ਪਲਸ ਮੰਚ)
ਸੰਪਰਕ : 94170-76735

ਖੇਤ ਮਜ਼ਦੂਰ ਜਥੇਬੰਦੀ ਦੀ ''ਵਿਸ਼ੇਸ਼ ਫੰਡ ਮੁਹਿੰਮ'' 'ਚ ਜੋਰਦਾਰ ਹਿੱਸਾ ਪਾਉਣ ਦੀ ਅਪੀਲ

ਖੇਤ ਮਜ਼ਦੂਰ ਜਥੇਬੰਦੀ ਵੱਲੋਂ ''ਵਿਸ਼ੇਸ਼ ਫੰਡ ਮੁਹਿੰਮ'' 'ਚ ਜੋਰਦਾਰ ਹਿੱਸਾ ਪਾਈ ਲਈ, ਸਭਨਾਂ ਇਨਕਲਾਬੀ, ਜਮਹੂਰੀ, ਕੌਮਪ੍ਰਸਤ ਅਤੇ ਦੇਸ਼ ਭਗਤ ਤਾਕਤਾਂ ਤੇ ਜਥੇਬੰਦੀਆਂ ਨੂੰ 

                        ਅਪੀਲ

ਸਤਿਕਾਰਯੋਗ ਸਾਥੀਓ,

ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਵੱਲੋਂ ਆਪਣੀ ਜਥੇਬੰਦਕ-ਤਕੜਾਈ ਵਾਸਤੇ ਹੱਥ ਲਈ ''ਵਿਸ਼ੇਸ਼ ਫੰਡ ਮੁਹਿੰਮ'' ਦੀ ਕੀਤੀ ਅਪੀਲ ਨੂੰ ਹੁੰਗਾਰਾ ਭਰਦਿਆਂ ਅਸੀਂ, ਆਵਦੀਆਂ ਇਕਾਈਆਂ ਰਾਹੀਂ ਇਸ ਮੁਹਿੰਮ ਦੀ ਮੱਦਦ ਲਾਮਬੰਦ ਕਰਨ ਦਾ ਫੈਸਲਾ ਲਿਆ ਹੈ। ਅਸੀਂ ਆਪਣੇ ਵੱਲੋਂ ਤੁਹਾਨੂੰ ਇਸ ਮੁਹਿੰਮ ਵਿਚ ਹਿੱਸਾ ਪਾਈ ਕਰਨ ਦੀ ਅਪੀਲ ਕਰਦੇ ਹਾਂ।

ਹਕੂਮਤ ਲਗਾਤਾਰ ਸਭਨਾਂ ਲੋਕ-ਤਬਕਿਆਂ ਤੇ ਵਰਗਾਂ ਨੂੰ ਲੁੱਟਦੀ ਤੇ ਕੁੱਟਦੀ ਆ ਰਹੀ ਹੈ। ਵਿਕਾਸ ਦੇ ਨਾਂ ਹੇਠ ਸੰਸਾਰੀਕਰਨ, ਉਦਾਰੀਕਰਨ, ਨਿੱਜੀਕਰਨ ਤੇ ਵਪਾਰੀਕਰਨ ਦੀਆਂ ਸਾਮਰਾਜੀ-ਨੀਤੀਆਂ ਹਰ ਤਬਕੇ ਤੇ ਹੋਰ ਖੇਤਰ ਅੰਦਰ ਲਾਗੂ ਕਰਨ ਦੀ ਹਕੂਮਤੀ-ਧੁੱਸ ਨੇ ਲੋਕਾਂ ਦੇ ਹਰ ਤਬਕੇ ਦੀ ਲੁੱਟ ਤੇ ਕੁੱਟ ਨੂੰ ਤੇਜ਼ ਤੇ ਤਿੱਖਾ ਕੀਤਾ ਹੈ। ਹਕੂਮਤ ਸਿਰਫ਼ ਲੋਕਾਂ ਤੋਂ ਜਲ, ਜੰਗਲ, ਜਮੀਨ, ਰੁਜ਼ਗਾਰ, ਸਿੱਖਿਆ, ਸੇਹਤ-ਸਹੂਲਤਾਂ, ਬਿਜਲੀ ਤੇ ਆਵਾਜਾਈ ਵਰਗੀਆਂ ਮੁੱਢਲੀਆਂ ਸਹੂਲਤਾਂ ਹੀ ਨਹੀਂ ਖੋਹ ਰਹੀ ਹੈ, ਸਗੋਂ ਨਾਲ ਦੀ ਨਾਲ ਇਸ ਖੋਹਾ-ਖੋਹੀ ਖਿਲਾਫ਼ ਆਵਾਜ਼ ਉਠਾ ਰਹੇ ਹਰ ਤਬਕੇ ਤੇ ਵਰਗ ਦੀ ਜਬਾਨਬੰਦੀ ਕਰਨ ਲਈ ਗਰੀਨ ਹੰਟ ਵਰਗੇ ਫੌਜੀ ਓਪਰੇਸ਼ਨ ਚਲਾ ਰਹੀ ਹੈ। ਅਫਸਪਾ ਵਰਗੇ ਕਾਲੇ ਜਾਬਰ ਕਨੂੰਨ ਮੜ ਰਹੀ ਹੈ। ਉਲਟ-ਦਹਿਸ਼ਤਗਰਦੀ ਵਿਰੁੱਧ ਕੇਂਦਰ (NCTC) ਵਰਗੇ ਕਨੂੰਨ ਘੜ ਰਹੀ ਹੈ। ਪੰਜਾਬ ਅੰਦਰ ਧਰਨਿਆਂ ਮੁਜਾਹਰਿਆਂ 'ਤੇ ਮੁਕੰਮਲ ਪਾਬੰਦੀ ਠੋਕ ਦਿੱਤੀ ਗਈ ਹੈ। ਜਥੇਬੰਦ ਹੋਣ ਤੇ ਸੰਘਰਸ਼ ਕਰਨ ਦੇ ਹੱਕਾਂ 'ਤੇ ਪੁਲਸੀ ਜਬਰ ਤੇ ਦਹਿਸ਼ਤ ਦਾ ਬਿੰਨ-ਬਰੇਕੋਂ ਰੋਲਰ ਫੇਰਿਆ ਜਾ ਰਿਹਾ ਹੈ। ਇਉਂ ਇਸ ਦੋ-ਧਾਰੀ ਹੱਲੇ ਰਾਹੀਂ ਹਾਕਮਾਂ ਵੱਲੋਂ ਮੁਲਕ 'ਤੇ ਸਾਮਰਾਜੀ ਜਗੀਰੂ ਲੁੱਟ-ਖੋਹ ਅਤੇ ਦਾਬੇ ਦੇ ਸ਼ਿਕੰਜੇ ਦੀ ਨਿੱਤ ਚੂੜੀ ਕਸੀ ਜਾ ਰਹੀ ਹੈ।

ਆਰਥਿਕ ਵਸੀਲਿਆਂ ਤੋਂ ਵਿਰਵੇ ਕੀਤੇ ਹੋਏ, ਸਮਾਜਿਕ ਤੌਰ 'ਤੇ ਦਬਾਏ-ਲਤਾੜੇ ਹੋਏ, ਨਿਤਾਣੇ-ਨਿਆਸਰੇ ਬਣਾ ਕੇ ਰੱਖੇ ਹੋਏ ਅਤੇ ਰਾਜਨੀਤਿਕ ਪੱਖੋਂ ਪਛੜੇਵੇਂ ਦੀ ਮਾਰ ਹੰਢਾ ਰਹੇ ਇਹਨਾਂ ਖੇਤ ਮਜ਼ਦੂਰਾਂ ਨੂੰ ਹਕੂਮਤਾਂ ਵੱਲੋਂ ਵਿੱਢੇ ਨਵੀਆਂ ਸਾਮਰਾਜੀ ਨਿਰਦੇਸ਼ਿਤ ਨੀਤੀਆਂ ਦੇ ਹੱਲੇ ਨੇ ਹੋਰ ਵੱਧ ਗਰੀਬੀ, ਭੁੱਖਮਰੀ, ਕਰਜੇ, ਦਾਬੇ ਤੇ ਪਛੜੇਵੇਂ ਮੂੰਹ ਧੱਕ ਦਿੱਤਾ ਹੈ। ਇਸ ਹਾਲਤ ਨੂੰ ਮੋੜਾ ਦੇਣ ਹਿਤ ਖੇਤ ਮਜ਼ਦੂਰਾਂ ਦੀ ਇਸ ਜਥੇਬੰਦੀ ਨੇ ਸਮੂਹ ਖੇਤ ਮਜ਼ਦੂਰਾਂ ਨੂੰ ''ਜਥੇਬੰਦ ਕਰਕੇ ਦ੍ਰਿੜ ਸੰਘਰਸ਼ਾਂ ਦੇ ਮੋਰਚੇ 'ਤੇ ਲਿਆਉਣ ਲਈ'' ਜੂਝਣ ਦੀ ਦ੍ਰਿੜਤਾ ਨੂੰ ਪ੍ਰਗਟਾਇਆ ਹੈ।

ਖੇਤ ਮਜ਼ਦੂਰ (ਬੇਜਮੀਨੇ ਕਿਸਾਨ) ਮੁਲਕ ਤੋਂ ਸਾਮਰਾਜੀ-ਜਗੀਰੂ ਲੁੱਟ ਤੇ ਦਾਬੇ ਦੇ ਜੂਲੇ ਨੂੰ ਵਗਾਹ-ਮਾਰਨ ਲਈ ਉੱਠ ਰਹੀ ਮੁਲਕ ਦੀ ਵਿਸ਼ਾਲ ਲੋਕਾਈ ਦਾ ਇਕ ਹੋਣਹਾਰ ਅੰਗ ਹਨ। ਵਿਸ਼ੇਸ਼ ਕਰਕੇ ਇਹ ਸਨਅਤੀ ਮਜਦੂਰਾਂ, ਕਿਸਾਨਾਂ, ਨਿੱਕ-ਬੁਰਜੂਆਜੀ ਅਤੇ ਕੌਮੀ ਸਰਮਾਏਦਾਰੀ ਦੇ ਸਾਂਝੇ ਮੋਰਚੇ ਦਾ ਥੰਮ ਬਣਦੀ ਕਿਸਾਨ ਲਹਿਰ ਦੀ ਰੀੜ ਦੀ ਹੱਡੀ ਬਣਦੇ ਹਨ। ਉਹਨਾਂ ਵੱਲੋਂ ਇਸ ਦਿਸ਼ਾ 'ਚ ਲਾਮਬੰਦ ਹੋਣ ਅਤੇ ਜਥੇਬੰਦ ਹੋਣ ਲਈ ਮਾਰਿਆ ਜਾ ਰਿਹਾ ਹੰਭਲਾ ਪ੍ਰਸੰਸਾਯੋਗ ਹੈ।

ਉਹਨਾਂ ਦੀ ਜਥੇਬੰਦੀ - ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਵਧਾਰੇ-ਪਸਾਰੇ ਅਤੇ ਪੇਸ਼ਕਦਮੀ ਵਾਸਤੇ ਕਾਰਕੁੰਨਾਂ ਵੱਲੋਂ ਜਥੇਬੰਦੀ ਦੀਆਂ ਅਗਵਾਨੂੰ ਟੀਮਾਂ 'ਚ ਰੋਲ ਸੰਭਾਲਣ ਅਤੇ ਦੇਣ ਵਿਚ ਉਹਨਾਂ ਨੂੰ ਪੇਸ਼ ਆਉਂਦੀਆਂ ਆਰਥਿਕ ਤੰਗੀਆਂ-ਤੁਰਸ਼ੀਆਂ ਗੰਭੀਰ ਅੜਿੱਕਾ ਬਣ ਰਹੀਆਂ ਹਨ। ਇਸ ਅੜਿੱਕੇ ਨੂੰ ਸਰ ਕਰਨ ਦਾ ਕਾਰਜ ਸਭਨਾਂ ਇਨਕਲਾਬੀ, ਜਮਹੂਰੀ ਤੇ ਲੋਕ-ਹਿਤੈਸ਼ੀ ਸ਼ਕਤੀਆਂ ਅਤੇ ਜਥੇਬੰਦੀਆਂ ਦਾ ਦੂਰਗਾਮੀ ਸਾਂਝਾ ਸਰੋਕਾਰ ਬਣਦਾ ਹੈ।

ਇਸ ਲਈ, ਲੋਕ ਮੋਰਚਾ ਪੰਜਾਬ, ਸਭਨਾ ਇਨਕਲਾਬੀ, ਜਮਹੂਰੀ, ਕੌਮਪ੍ਰਸਤ ਤੇ ਦੇਸ਼ ਭਗਤ ਤਾਕਤਾਂ ਤੇ ਜਥੇਬੰਦੀਆਂ ਨੂੰ ਪੁਰਜੋਰ ਅਪੀਲ ਕਰਦਾ ਹੈ ਕਿ ਉਹਨਾਂ ਨੂੰ ਇਸ ਖੇਤ ਮਜ਼ਦੂਰ ਜਥੇਬੰਦੀ ਦੀਆਂ ਮੂਹਰਲੀਆਂ/ਆਗੂ ਸਫਾਂ 'ਚ ਰੋਲ ਅਖਤਿਆਰ ਕਰਨ ਲਈ ਤਤਪਰ ਕਾਰਕੁੰਨਾਂ ਨੂੰ ਉਹਨਾਂ ਦੀਆਂ ਕਬੀਲਦਾਰੀਆਂ ਦੇ ਬੋਝ ਦੇ ਅੜਿੱਕੇ ਨੂੰ ਸਰ ਕਰਨ 'ਚ ਹਿੱਸਾ ਪਾਉਣ ਲਈ ਅੱਗੇ ਆਉਣਾ ਚਾਹੀਦਾ ਹੈ ਅਤੇ ਮਾਇਕ ਤੇ ਹੋਰ ਪਦਾਰਥਿਕ ਸ਼ਕਲਾਂ 'ਚ ਇਸ ਦੂਰਗਾਮੀ ਅਹਿਮੀਅਤ ਰੱਖਦੇ ਸਾਂਝੇ ਸਰੋਕਾਰ ਨੂੰ ਸੰਬੋਧਤ ਹੋਣ ਲਈ ਹੰਭਲਾ ਮਾਰਨਾ ਚਾਹੀਦਾ ਹੈ।

ਵੱਲੋਂ : ਸੂਬਾ ਕਮੇਟੀ, ਲੋਕ ਮੋਰਚਾ ਪੰਜਾਬ
ਜਾਰੀ ਕਰਤਾ: ਜਗਮੇਲ ਸਿੰਘ, ਜਨਰਲ ਸਕੱਤਰ (9417224822) ਮਿਤੀ:16.5.13

ਖੇਤ ਮਜ਼ਦੂਰ ਜਥੇਬੰਦੀ ਦੇ ਸਭਨਾਂ ਹਿਤੈਸ਼ੀਆਂ ਦੇ ਨਾਂ ਅਪੀਲ - ਵਿਸ਼ੇਸ਼ ਫੰਡ ਮੁਹਿੰਮ 'ਚ ਯੋਗਦਾਨ ਪਾਉਣ ਲਈ ਅੱਗੇ ਆਓ

ਖੇਤ ਮਜ਼ਦੂਰ ਜਥੇਬੰਦੀ ਦੇ ਸਭਨਾਂ ਹਿਤੈਸ਼ੀਆਂ ਦੇ ਨਾਂ ਅਪੀਲ
ਵਿਸ਼ੇਸ਼ ਫੰਡ ਮੁਹਿੰਮ 'ਚ ਯੋਗਦਾਨ ਪਾਉਣ ਲਈ ਅੱਗੇ ਆਓ

ਸਾਥੀ ਜੀ, ਅਸੀਂ ਤੁਹਾਡੇ ਨਾਲ ਸਾਡੀ ਜਥੇਬੰਦੀ ਦੀ ਇੱਕ ਅਹਿਮ ਸਮੱਸਿਆ ਸਾਂਝੀ ਕਰਨਾ ਚਾਹੁੰਦੇ ਹਾਂ। ਜਿਵੇਂ ਕਿ ਤੁਹਾਨੂੰ ਪਤਾ ਹੀ ਹੈ ਕਿ ਅੱਜ ਸਰਕਾਰਾਂ ਵੱਲੋਂ ਜਾਗੀਰੂ ਅਤੇ ਸਾਮਰਾਜੀ ਲੁੱਟ ਨੂੰ ਹੋਰ ਤੇਜ਼ ਤੇ ਤਿੱਖੀ ਕਰਨ ਵਾਲੀਆਂ ਨੀਤੀਆਂ ਤੇਜੀ ਨਾਲ ਲਾਗੂ ਕੀਤੀਆਂ ਜਾ ਰਹੀਆਂ ਹਨ। ਇਹਨਾਂ ਲੋਕ ਵਿਰੋਧੀ ਨੀਤੀਆਂ ਦਾ ਹੱਲਾ ਹੋਰਨਾਂ ਮਿਹਨਤਕਸ਼ਾਂ ਵਾਂਗ ਖੇਤ ਮਜ਼ਦੂਰਾਂ ਨੂੰ ਵੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕਰ ਰਿਹਾ ਹੈ। ਇਸ ਆਰਥਿਕ ਧਾਵੇ ਨੂੰ ਅੱਗੇ ਵਧਾਉਣ ਲਈ ਸਭੈ ਸਰਕਾਰਾਂ ਵੱਲੋਂ ਜਾਬਰ ਹੱਲਾ ਵੀ ਤੇਜ਼ ਕੀਤਾ ਜਾ ਰਿਹਾ ਹੈ। ਜਥੇਬੰਦ ਹੋਣ ਅਤੇ ਸੰਘਰਸ਼ ਕਰਨ ਦੇ ਮੁੱਢਲੇ ਅਤੇ ਜਮਹੂਰੀ ਅਧਿਕਾਰ ਬੁਰੀ ਤਰ੍ਹਾਂ ਦਰੜੇ ਜਾ ਰਹੇ ਹਨ। ਇਹਨਾਂ ਹਮਲਿਆਂ ਦਾ ਜੁਆਬ ਦੇਣ ਲਈ ਵੱਖ ਵੱਖ ਤਬਕਿਆਂ ਦੀਆਂ ਆਪਣੀਆਂ ਵਿਸ਼ਾਲ ਜਨਤਕ ਆਧਾਰ ਅਤੇ ਭੇੜੂ ਸਮਰੱਥਾ ਵਾਲੀਆਂ ਜਥੇਬੰਦੀਆਂ ਦੀ ਬੇਹੱਦ ਲੋੜ ਹੈ। ਇਸ ਤੋਂ ਅੱਗੇ ਸਾਂਝੇ ਘੋਲ ਵੀ ਅਣਸਰਦੀ ਲੋੜ ਹਨ।

ਖੇਤ ਮਜ਼ਦੂਰ, ਜਿਹੜੇ ਆਰਥਿਕ, ਸਮਾਜਿਕ ਅਤੇ ਰਾਜਨੀਤਕ ਤੌਰ 'ਤੇ ਪਹਿਲਾਂ ਹੀ ਸਮਾਜ ਦੀ ਕੰਨੀ 'ਤੇ ਧੱਕੇ ਹੋਏ ਹਨ। ਇਹਨਾਂ ਨੀਤੀਆਂ ਦੇ ਸਿੱਟੇ ਵਜੋਂ ਹੋਰ ਵੀ ਗੰਭੀਰ ਸੰਕਟ ਦੇ ਮੂੰਹ ਧੱਕੇ ਜਾ ਰਹੇ ਹਨ। ਉਹਨਾਂ ਵਿੱਚ ਜਥੇਬੰਦ ਹੋਣ ਤੇ ਸੰਘਰਸ਼ ਕਰਨ ਦੀ ਲੋੜ ਵਧ ਰਹੀ ਹੈ। ਸਾਡੀ ਜਥੇਬੰਦੀ ਇਹਨਾਂ ਨੂੰ ਜਥੇਬੰਦ ਕਰਕੇ ਦ੍ਰਿੜ੍ਹ ਸੰਘਰਸ਼ਾਂ ਦੇ ਮੋਰਚੇ 'ਤੇ ਲਿਆਉਣ ਲਈ ਜੂਝ ਰਹੀ ਹੈ। ਖੇਤ ਮਜ਼ਦੂਰਾਂ ਵੱਲੋਂ ਇਸ ਨੂੰ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ। ਵੱਡੇ ਪੱਧਰ 'ਤੇ ਇਸਦੇ ਪਸਾਰੇ ਦੀਆਂ ਸੰਭਾਵਨਾਵਾਂ ਮੌਜੂਦ ਹਨ। ਇਹਨਾਂ ਸੰਭਾਵਨਾਵਾਂ ਨੂੰ ਹਕੀਕਤ ਵਿੱਚ ਬਦਲਣ ਲਈ ਜਥੇਬੰਦੀ ਵਾਸਤੇ ਪੂਰਾ ਸਮਾਂ ਦੇਣ ਵਾਲੀਆਂ ਆਗੂ ਟੀਮਾਂ ਦੀ ਅਣਸਰਦੀ ਲੋੜ ਹੈ। ਮੌਜੂਦਾ ਸਮੇਂ ਯੂਨੀਅਨ ਕੰਮਾਂ ਲਈ ਪੂਰਾ ਸਮਾਂ ਦੇਣ ਵਾਲੇ ਆਗੂਆਂ/ਕਾਰਕੁੰਨਾਂ ਦੀਆਂ ਸਮਰੱਥਾਵਾਨ ਟੀਮਾਂ ਸਾਡੇ ਕੋਲ ਇੱਕ ਹੱਦ ਤੱਕ ਮੌਜੂਦ ਹਨ। ਥੋੜ੍ਹੀ ਹੋਰ ਮਿਹਨਤ ਤੇ ਸਮੇਂ ਦੇ ਨਾਲ ਅਜਿਹੇ ਹੋਰ ਆਗੂ/ਕਾਰਕੁੰਨ ਪੈਦਾ ਹੋਣ ਦੀਆਂ ਅਥਾਹ ਸੰਭਾਵਨਾਵਾਂ ਦਿਖਾਈ ਦੇ ਰਹੀਆਂ ਹਨ, ਜਿਹਨਾਂ ਦੀ ਯੋਗਤਾ ਨੂੰ ਭਰਪੂਰ ਵਰਤੋਂ ਵਿੱਚ ਲਿਆ ਕੇ ਸਾਡੀ ਜਥੇਬੰਦੀ ਛੇਤੀ ਹੀ ਵਿਸ਼ਾਲ ਅਤੇ ਮਜਬੂਤ ਜਥੇਬੰਦੀ ਵਜੋਂ ਉੱਭਰ ਸਕਦੀ ਹੈ। ਇਸ ਸਮੇਂ ਸਥਾਨਕ ਤੇ ਸਰਕਾਰੀ ਰਿਆਇਤਾਂ ਸਹੂਲਤਾਂ ਵਾਲੇ ਛੋਟੇ ਮੁੱਦਿਆਂ ਉੱਪਰ ਘੋਲ ਜਥੇਬੰਦ ਕਰਨ ਤੋਂ ਅੱਗੇ ਵਧ ਸਕਦੀ ਹੈ। ਜ਼ਮੀਨ, ਕਰਜ਼ੇ ਤੇ ਨਿੱਜੀਕਰਨ ਆਦਿ ਨਾਲ ਜੁੜੇ ਵੱਡੇ ਤੇ ਬੁਨਿਆਦੀ ਮੁੱਦਿਆਂ ਨੂੰ ਘੋਲ ਮੁੱਦਿਆਂ ਵਜੋਂ ਹੱਥ ਲੈਣ ਦੇ ਸਮਰੱਥ ਬਣ ਸਕਦੀ ਹੈ। ਪਰ ਯੂਨੀਅਨ ਲਈ ਪੂਰਾ ਸਮਾਂ ਦੇ ਸਕਣ ਦੀ ਯੋਗਤਾ ਅਤੇ ਮਾਨਸਿਕ ਤਿਆਰੀ ਰੱਖਦੇ ਸਭਨਾਂ ਆਗੂਆਂ/ਕਾਰਕੁੰਨਾਂ ਦੀ ਪੂਰੀ ਤੇ ਸਹੀ ਵਰਤੋਂ ਕਰਨ ਦੇ ਮਾਮਲੇ ਵਿੱਚ ਸਾਨੂੰ ਗੰਭੀਰ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਜਿਹੜੇ ਆਗੂ /ਕਾਰਕੁੰਨ ਇਹ ਯੋਗਤਾ ਰੱਖਦੇ ਹਨ, ਉਹਨਾਂ ਨੂੰ ਘਰਾਂ ਦੀਆਂ ਕਬੀਲਦਾਰੀਆਂ ਦਾ ਬੋਝ ਵੀ ਚੁੱਕਣਾ ਪੈ ਰਿਹਾ ਹੈ। ਖੇਤ ਮਜ਼ਦੂਰਾਂ ਦੀ ਊਣੀ ਮਿਹਨਤ, ਸੋਕੜੇ ਮਾਰੇ ਰੁਜ਼ਗਾਰ ਤੇ ਵਧਦੀ ਮਹਿੰਗਾਈ ਦੇ ਕਾਰਨ ਪੂਰੇ ਦਾ ਪੂਰਾ ਟੱਬਰ ਰਲ ਕੇ ਵੀ ਦੋ ਡੰਗ ਦੀ ਰੋਟੀ ਦਾ ਜੁਗਾੜ ਕਰਨ ਤੇ ਹੋਰ ਲੋੜਾਂ ਤੋਂ ਥੁੜ੍ਹਦਾ ਹੈ। ਹਾਲਤ ਇਹ ਸਾਹਮਣੇ ਆਉਂਦੀ ਹੈ ਕਿ ''ਜਾਂ ਟਾਂਡਿਆਂ ਵਾਲੀ ਨਹੀਂ- ਜਾਂ ਭਾਂਡਿਆਂ ਵਾਲੀ ਨਹੀਂ''। ਜੇਕਰ ਉਹ ਜਥੇਬੰਦੀ ਦੇ ਕੰਮਾਂ ਵਿੱਚ ਲਗਾਤਾਰ ਆਪਣਾ ਸਮਾਂ ਦਿੰਦੇ ਹਨ ਤਾਂ ਘਰ ਦੀ ਕਬੀਲਦਾਰੀ ਉੱਖੜਦੀ ਹੈ, ਜੇ ਕਬੀਲਦਾਰੀ ਨੂੰ ਸੰਭਾਲਦੇ ਹਨ ਤਾਂ ਜਥੇਬੰਦੀ ਲਈ ਸਮਾਂ ਨਹੀਂ ਬਚਦਾ। ਸਿੱਟੇ ਵਜੋਂ ਜਥੇਬੰਦੀ ਦਾ ਢਾਂਚਾ ਉੱਖੜਦਾ ਹੈ। ਪਰ ਸਾਡੀ ਜਥੇਬੰਦੀ ਅਜੇ ਆਰਥਿਕ ਪੱਖੋਂ ਇਸ ਗੱਲ ਦੇ ਸਮਰੱਥ ਨਹੀਂ ਕਿ ਉਹ ਅਜਿਹੇ ਆਗੂਆਂ, ਵਰਕਰਾਂ ਦੀਆਂ ਕਬੀਲਦਾਰੀਆਂ ਦਾ ਬੋਝ ਵੰਡਾ ਸਕੇ। ਜਿਹੜੇ ਕੁਝ ਕੁ ਆਗੂ/ਕਾਰਕੁੰਨ ਸਿਰੜ ਨਾਲ ਲੱਕ ਬੰਨ੍ਹ ਕੇ ਕੁਲਵਕਤੀ ਤੁਰ ਵੀ ਰਹੇ ਹਨ। ਉਹਨਾਂ ਨੂੰ ਵੀ ਪਰਿਵਾਰ ਤੇ ਯੂਨੀਅਨ ਕੰਮਾਂ ਦੀਆਂ ਇੱਕੋ ਸਮੇਂ ਉੱਭਰਦੀਆਂ ਤਿੱਖੀਆਂ ਲੋੜਾਂ ਦੇ ਭਾਰੀ ਤਣਾਅ ਵਾਲੀਆਂ ਹਾਲਤਾਂ 'ਚੋਂ ਗੁਜ਼ਰਨਾ ਪੈ ਰਿਹਾ ਹੈ। 

ਕੁਝ ਸਮਾਂ ਪਹਿਲਾਂ ਭਾਰੀ ਮੀਹਾਂ ਕਾਰਨ ਸਾਡੇ ਦੋ ਲੱਗਭੱਗ ਕੁਲਵਕਤੀ ਕਾਰਕੁੰਨਾਂ ਦੇ ਕੋਠੇ ਬੁਰੀ ਤਰ੍ਹਾਂ ਨੁਕਸਾਨੇ ਗਏ ਸਨ, ਜਿਹਨਾਂ ਨੂੰ ਪੂਰੀ ਸਰਦੀ ਤੰਬੂਆਂ ਦੇ ਆਸਰੇ ਹੀ ਕੱਟਣੀ ਪਈ। ਪਰ ਕਈ ਮਹੀਨੇ ਬੀਤ ਜਾਣ ਦੇ ਬਾਵਜੂਦ ਉਹਨਾਂ ਨੇ ਨਾ ਜਥੇਬੰਦੀ ਦਾ ਕੰਮ ਛੱਡਿਆ ਤੇ ਨਾ ਹੀ ਆਰਥਿਕ ਸਹਾਇਤਾ ਦੀ ਮੰਗ ਕੀਤੀ। ਕੁੱਲ ਮਿਲਾ ਕੇ ਇਹਨਾਂ ਕਾਰਕੁੰਨਾਂ ਅਤੇ ਉਹਨਾਂ ਦੇ ਪਰਿਵਾਰਾਂ ਨੇ ਔਖ-ਸੌਖ ਝੱਲਣ ਲਈ ਕਾਫੀ ਚੰਗੀ ਮਾਨਸਿਕ ਤਿਆਰੀ ਦਾ ਪ੍ਰਗਟਾਵਾ ਕੀਤਾ। ਇਸ ਹਾਲਤ ਵਿੱਚ ਉਹਨਾਂ ਦੀ ਮੱਦਦ ਕਰਨਾ ਅਣਸਰਦੀ ਲੋੜ ਸੀ, ਪਰ ਇਹ ਸਾਡੇ ਲਈ ਪੂਰੀ ਤਰ੍ਹਾਂ ਅਸੰਭਵ ਸੀ। ਇਸ ਹਾਲਤ ਨੂੰ ਵਾਚ ਕੇ ਲੋਕ ਲਹਿਰ ਦੇ ਹਮਾਇਤੀ ਕੁੱਝ ਮੁਲਾਜ਼ਮ ਹਿੱਸਿਆਂ ਵੱਲੋਂ ਖੁਦ ਹੀ ਇਸ ਲੋੜ ਨੂੰ ਮਹਿਸੂਸ ਕੀਤਾ ਗਿਆ। ਇਹਨਾਂ ਪਰਿਵਾਰਾਂ ਲਈ ਉੱਦਮ ਜੁਟਾ ਕੇ ਉਹਨਾਂ ਦੇ ਮਕਾਨ ਬਣਾਉਣ 'ਚ ਚੰਗੀ ਮੱਦਦ ਜੁਟਾਈ ਗਈ। ਇੱਕ ਹੋਰ ਅਜਿਹੇ ਕਾਰਕੁੰਨ ਨੂੰ ਗੰਭੀਰ ਬਿਮਾਰੀ ਨੇ ਘੇਰ ਲਿਆ ਸੀ, ਜਿਸ ਦੇ ਇਲਾਜ ਉੱਪਰ ਇੱਕ ਲੱਖ ਦੇ ਕਰੀਬ ਆਉਣ ਵਾਲਾ ਖਰਚਾ ਸਾਡੀ ਜਥੇਬੰਦੀ ਅਤੇ ਉਸ ਪਰਿਵਾਰ ਲਈ ਬੇਹੱਦ ਮੁਸ਼ਕਲ ਸੀ। ਇਸ ਕੇਸ ਵਿੱਚ ਵੀ ਨੇੜਲੇ ਤੇ ਹਮਾਇਤੀ ਮੁਲਾਜ਼ਮ ਅਤੇ ਕਿਸਾਨ ਹਿੱਸਿਆਂ ਨੇ ਵਿਅਕਤੀਗਤ ਮੱਦਦ ਜੁਟਾ ਕੇ ਉਸਦਾ ਦਾ ਇਲਾਜ ਕਰਵਾਇਆ ਸੀ। ਇਸ ਤੋਂ ਇਲਾਵਾ ਜਥੇਬੰਦੀ ਲਈ ਪੂਰਾ ਸਮਾਂ ਦੇਣ ਵਾਲੇ ਜਾਂ ਬਹੁਤਾ ਸਮਾਂ ਦੇਣ ਵਾਲੇ ਕਾਰਕੁੰਨਾਂ ਦੀਆਂ ਆਪਣੀਆਂ ਜਾਂ ਪਰਿਵਾਰਕ ਮੈਂਬਰਾਂ ਦੀਆਂ ਬਿਮਾਰੀਆਂ ਸਮੇਂ ਇਲਾਜ ਕਰਵਾਉਣ, ਜੁਆਕਾਂ ਦੇ ਮੂੰਹ 'ਚ ਦੋ ਬੁਰਕੀਆਂ ਪਾਉਣ, ਉਹਨਾਂ ਦਾ ਨੰਗ ਢਕਣ ਵਰਗੀਆਂ ਅਣਸਰਦੀਆਂ ਲੋੜਾਂ ਪੂਰੀਆਂ ਕਰਨ ਦੀ ਹਾਲਤ ਸਾਡੇ ਸਾਹਮਣੇ ਗੰਭੀਰ ਆਰਥਿਕ ਸਮੱਸਿਆ ਬਣ ਕੇ ਆਉਂਦੀ ਹੈ। ਜ਼ਿਲ੍ਹਾ ਮੁਕਤਸਰ ਵਿੱਚ ਸਾਡੀ ਜਥੇਬੰਦੀ ਦੇ ਦੋ ਅਹਿਮ ਕਾਰਕੁੰਨ ਬਿਮਾਰੀਆਂ ਦਾ ਸ਼ਿਕਾਰ ਹੋ ਕੇ ਸਾਨੂੰ ਵਿਛੋੜਾ ਦੇ ਗਏ ਹਨ, ਜਿਹਨਾਂ ਨੂੰ ਵੇਲੇ ਸਿਰ ਅਤੇ ਚੰਗੇ ਇਲਾਜ ਨਾਲ ਬਚਾਅ ਸਕਣ ਦੀਆਂ ਸੰਭਾਵਨਾਵਾਂ ਮੌਜੂਦ ਵੀ ਸਨ। ਪਰ ਇਹਨਾਂ ਪਰਿਵਾਰਾਂ ਅਤੇ ਜਥੇਬੰਦੀ ਦੀ ਕਮਜ਼ੋਰ ਆਰਥਿਕ ਹਾਲਤ ਕਾਰਨ ਅਜਿਹਾ ਸੰਭਵ ਨਹੀਂ ਹੋ ਸਕਿਆ। ਇਹਨਾਂ ਆਗੂਆਂ ਦੇ ਘਰਾਂ ਦੀ ਹਾਲਤ ਇਹ ਸੀ ਕਿ ਸੰਸਕਾਰ ਤੇ ਭੋਗ ਦੇ ਖਰਚਿਆਂ  'ਚ ਵੀ ਯੂਨੀਅਨ ਨੂੰ ਹੱਥ ਵਟਾਉਣਾ ਪਿਆ।

ਅਸੀਂ ਇਸ ਸਮੱਸਿਆ ਦੇ ਹੱਲ ਲਈ ਆਪਣੇ ਵੱਲੋਂ ਲਗਾਤਾਰ ਕੋਸ਼ਿਸ਼ਾਂ ਕਰਦੇ ਆ ਰਹੇ ਹਾਂ। ਮਿਸਾਲ ਵਜੋਂ ਹੁਣ ਇਹਨਾਂ ਦਿਨਾਂ ਵਿੱਚ ਹੀ ਜ਼ਿਲ੍ਹਾ ਸੰਗਰੂਰ ਵਿੱਚ 125 ਦੇ ਕਰੀਬ ਯੂਨੀਅਨ ਵਰਕਰਾਂ ਵੱਲੋਂ ਇਕੱਠੇ ਹੋ ਕੇ ਕਈ ਦਿਨ ਇਸ ਮਕਸਦ ਖਾਤਰ ਕਣਕ ਦੀ ਵਾਢੀ ਕੀਤੀ ਗਈ। ਤਾਂ ਜੋ ਸਮੂਹਿਕ ਮਿਹਨਤ ਨਾਲ ਇਕੱਠੇ ਹੋਏ ਇਸ ਫੰਡ ਨੂੰ ਅਜਿਹੇ ਕਾਰਕੁੰਨਾਂ ਦੀ ਸਹਾਇਤਾ ਲਈ ਵੀ ਵਰਤਿਆ ਜਾ ਸਕੇ। ਇਸ ਤੋਂ ਪਹਿਲਾਂ ਵੀ ਅਸੀਂ ਕਈ ਥਾਈਂ ਕਣਕ ਦੀ ਵਾਢੀ, ਝੋਨੇ ਦੀ ਲਵਾਈ ਅਤੇ ਨਰਮੇ ਦੀ ਚੁਗਾਈ ਦੇ ਸੀਜ਼ਨਾਂ ਵਿੱਚ ਇਕੱਠੇ ਹੋ ਕੇ ਕੀਤੇ ਕੰਮ ਦੇ ਪੈਸਿਆਂ ਨੂੰ ਯੂਨੀਅਨ ਦੇ ਫੰਡਾਂ ਤੋਂ ਇਲਾਵਾ ਇਸ ਮਕਸਦ ਖਾਤਰ ਵੀ ਜੁਟਾਉਣ ਦੇ ਯਤਨ ਕਰਦੇ ਆ ਰਹੇ ਹਾਂ। ਵਿਸ਼ੇਸ਼ ਲੋੜਾਂ ਅਤੇ ਮੌਕਿਆਂ 'ਤੇ ਚੋਣਵੇਂ ਮਜ਼ਦੂਰ ਹਿੱਸਿਆਂ ਕੋਲੋਂ ਇਸ ਖਾਤਰ ਯੋਗਦਾਨ ਪਵਾ ਰਹੇ ਹਾਂ। ਇੱਕ ਛੋਟੇ ਤੇ ਨੇੜੇ ਬੈਠੇ ਖੇਤ ਮਜ਼ਦੂਰ ਹਿਤੈਸ਼ੀ ਮੁਲਾਜ਼ਮ, ਕਿਸਾਨ ਤੇ ਹੋਰਨਾਂ ਹਿੱਸਿਆਂ ਕੋਲੋਂ ਮੌਕਾ-ਬਾ-ਮੌਕਾ ਵਿਸ਼ੇਸ਼ ਫੰਡ ਹਾਸਲ ਕਰਨ ਰਾਹੀਂ ਇਹਨਾਂ ਲੋੜਾਂ ਨੂੰ ਪੂਰਾ ਕਰਨ ਦੇ ਟੁੱਟਵੇਂ-ਖਿੰਡਵੇਂ ਤੇ ਅੰਸ਼ਿਕ ਯਤਨ ਜੁਟਾਉਂਦੇ ਆ ਰਹੇ ਹਾਂ। ਪਰ ਕੁੱਲ ਲੋੜਾਂ ਦੇ ਹਿਸਾਬ ਨਾਲ ਇਹ ਆਟੇ 'ਚ ਲੂਣ ਬਰੋਬਾਰ ਹਨ। 

ਯੂਨੀਅਨ ਲਈ ਪੂਰਾ ਸਮਾਂ ਦੇਣ ਦੇ ਸਮਰੱਥ ਤੇ ਮਾਨਸਿਕ ਤੌਰ 'ਤੇ ਤਿਆਰ ਸਭਨਾਂ ਆਗੂਆਂ/ਕਾਰਕੁੰਨਾਂ ਦੀਆਂ ਬੇਹੱਦ ਵਾਜਬ, ਅਣ-ਸਰਦੀਆਂ ਪਰਿਵਾਰਕ ਲੋੜਾਂ ਦਾ ਕੁਝ ਨਾ ਕੁਝ ਬੋਝ ਵੰਡਾਉਣਾ ਉਹਨਾਂ ਨੂੰ ਕੁਲਵਕਤੀ ਤੋਰਨ ਲਈ ਸ਼ਰਤ ਵਰਗੀ ਗੱਲ ਬਣੀ ਖੜ੍ਹੀ ਹੈ। ਜੋ ਸਾਡੇ ਵਿੱਤ ਤੋਂ ਕਿਤੇ ਵੱਡੀ ਗੱਲ ਹੈ। ਇਸ ਲਈ ਅਸੀਂ ਅਜਿਹੇ ਹੋਣਹਾਰ ਆਗੂਆਂ ਦੀ ਸਹਾਇਤਾ ਵਾਸਤੇ ਖੇਤ ਮਜ਼ਦੂਰ ਜਥੇਬੰਦੀ ਤੇ ਲਹਿਰ ਦੇ ਹਿਤੈਸ਼ੀ ਸਭਨਾਂ ਹਿੱਸਿਆਂ ਕੋਲੋਂ ਵੱਡੀ ਫੰਡ ਮੁਹਿੰਮ ਜਥੇਬੰਦ ਕਰਨ ਦਾ ਫੈਸਲਾ ਕੀਤਾ ਹੈ। ਸੋ ਅਸੀਂ ਤੁਹਾਨੂੰ ਪੁਰਜ਼ੋਰ ਅਪੀਲ ਕਰਦੇ ਹਾਂ ਕਿ ਇਸ ਫੰਡ-ਮੁਹਿੰਮ ਵਿੱਚ ਭਰਪੂਰ ਯੋਗਦਾਨ ਪਾਇਆ ਜਾਵੇ। ਤੁਹਾਡੇ ਜ਼ੋਰਦਾਰ ਸਹਿਯੋਗ ਤੋਂ ਬਿਨਾ ਸਾਡੇ ਲਈ ਇਸ ਸਮੱਸਿਆ ਦਾ ਹੱਲ ਕਰਨਾ ਮੁਸ਼ਕਲ ਹੀ ਨਹੀਂ, ਲੱਗਭੱਗ ਅਸੰਭਵ ਹੈ। ਸਾਨੂੰ ਇਸ ਗੱਲ ਦਾ ਪੂਰਨ ਅਹਿਸਾਸ ਹੈ ਕਿ ਅੰਤਿਮ ਤੌਰ 'ਤੇ ਤਾਂ ਸਾਡੀ ਜਥੇਬੰਦੀ ਨੇ ਆਪਣੇ ਵਿਸ਼ਾਲ ਜਨਤਕ ਆਧਾਰ ਅਤੇ ਮਜਬੂਤੀ ਦੇ ਆਸਰੇ ਖੁਦ ਹੀ ਇਸ ਸਮੱਸਿਆ ਨੂੰ ਪੂਰੀ ਤਰ੍ਹਾਂ ਨਜਿੱਠਣ ਦੇ ਸਮਰੱਥਾ ਬਣਨਾ ਹੈ। ਪਰ ਮੌਜੂਦਾ ਹਾਲਤਾਂ 'ਚ ਵਕਤੀ ਤੌਰ 'ਤੇ ਤੁਹਾਡੇ ਸਭਨਾਂ ਦੇ ਸਹਿਯੋਗ ਤੋਂ ਬਿਨਾ ਇਹ ਮੁਕਾਮ ਹਾਸਲ ਕਰਨਾ ਅਜੇ ਸੰਭਵ ਨਹੀਂ।

ਅਸੀਂ ਹੁਣ ਇੱਕ ਵਾਰ ਜ਼ੋਰਦਾਰ ਝੁੱਟੀ ਮਾਰ ਕੇ ਇਹ ਫੰਡ ਇਕੱਠਾ ਕਰਨ ਦਾ ਟੀਚਾ ਮਿਥਿਆ ਹੈ। ਇਸ ਤੋਂ ਇਲਾਵਾ ਇਸ ਕੰਮ ਖਾਤਰ ਲਗਾਤਾਰ ਛਿਮਾਹੀ ਜਾਂ ਪ੍ਰਤੀ ਮਹੀਨਾ ਨਿਯਮਤ ਫੰਡ ਦੇਣਾ ਵੀ ਇਸ ਕਾਰਜ ਦਾ ਇੱਕ ਹਿੱਸਾ ਹੈ। ਅਸੀਂ ਆਸ ਕਰਦੇ ਹਾਂ ਕਿ ਖੇਤ ਮਜ਼ਦੂਰ ਜਥੇਬੰਦੀ ਅਤੇ ਲਹਿਰ ਨੂੰ ਅੱਗੇ ਵਧਾਉਣ ਲਈ ਇਸ ਕਾਰਜ 'ਚ ਆਪ ਜੀ ਵੱਲੋਂ ਦਿਲ ਖੋਲ੍ਹ ਕੇ ਭਰਪੂਰ ਯੋਗਦਾਨ ਪਾਇਆ ਜਾਵੇਗਾ।

ਖੇਤ ਮਜ਼ਦੂਰ ਜਥੇਬੰਦੀ ਜੋ ਕਿਸਾਨ ਲਹਿਰ ਦਾ ਹੀ ਅਟੁੱਟ ਅੰਗ ਹੈ। ਇਸਦੀ ਮਜਬੂਤੀ ਤੇ ਪਸਾਰਾ ਸਿਰਫ ਖੇਤ ਮਜ਼ਦੂਰਾਂ ਲਈ ਹੀ ਨਹੀਂ ਸਗੋਂ ਸਮੁੱਚੇ ਮਿਹਨਤਕਸ਼ ਤਬਕਿਆਂ ਲਈ ਵੀ ਸਹਾਈ ਸਾਬਤ ਹੋਵੇਗਾ। ਇਹ ਹਕੀਕਤ ਸਭਨਾਂ ਦੇ ਸਾਹਮਣੇ ਹੈ ਕਿ ਬੀ.ਕੇ.ਯੂ. ਏਕਤਾ (ਉਗਰਾਹਾਂ) ਦੀ ਤਕੜਾਈ ਦਾ ਸਭਨਾਂ ਸੰਘਰਸ਼ਸ਼ੀਲ ਤੇ ਪੀੜਤ ਹਿੱਸਿਆਂ ਨੂੰ ਗਿਣਨਯੋਗ ਸਹਾਰਾ ਮਿਲਿਆ ਹੈ। ਮੁਲਾਜ਼ਮਾਂ ਤੇ ਬੇਰੁਜ਼ਗਾਰਾਂ ਦੇ ਘੋਲਾਂ ਸਮੇਂ ਇਹਦੇ ਹਮਾਇਤੀ ਕੰਨ੍ਹੇ ਨੇ ਮਹੱਤਵਪੂਰਨ ਰੋਲ ਨਿਭਾਇਆ ਹੈ। ਸ਼ਰੂਤੀ ਅਗਵਾ ਕਾਂਡ 'ਚ ਇਹਦੇ ਰੋਲ ਨੇ ਕੁੱਲ ਕੇਸ ਦਾ ਪਾਸਾ ਪਲਟ ਦਿੱਤਾ ਹੈ। ਇਉਂ ਹੀ ਮਜ਼ਦੂਰ ਜਥੇਬੰਦੀ ਦੀ ਮਜਬੂਤੀ ਦਾ ਸਮੁੱਚੇ ਸੰਘਰਸ਼ਸ਼ੀਲ ਤੇ ਲੁੱਟੇ ਪੁੱਟੇ ਜਾ ਰਹੇ ਹਿੱਸਿਆਂ ਦੇ ਹੱਕ ਵਿੱਚ ਵਜ਼ਨ ਬਣਨਾ ਹੈ। ਕਿਸਾਨ ਜਥੇਬੰਦੀ ਦੀ ਹੋਰ ਤਕੜਾਈ ਦਾ ਵੀ ਖੇਤ ਮਜ਼ਦੂਰ ਜਥੇਬੰਦੀ ਦੀ ਮਜਬੂਤੀ ਨਾਲ ਬੇਹੱਦ ਨੇੜਲਾ ਸਬੰਧ ਹੈ। ਕਿਸਾਨ ਜਥੇਬੰਦੀ ਵੱਲੋਂ ਜ਼ਮੀਨੀ ਸੁਧਾਰਾਂ ਨੂੰ ਲਾਗੂ ਕਰਕੇ ਇਹਦੀ ਵੰਡ ਬੇਜ਼ਮੀਨੇ ਕਿਸਾਨਾਂ ਵਿੱਚ ਕਰਵਾਉਣ, ਸੂਦਖੋਰੀ ਨੂੰ ਨੱਥ ਮਾਰਦਾ ਕਿਸਾਨ ਪੱਖੀ ਕਰਜ਼ਾ ਕਾਨੂੰਨ ਬਣਾਉਣ, ਕਰਜ਼ਿਆਂ ਦਾ ਖਾਤਮਾ ਆਦਿਕ ਹੱਥ ਲਏ ਜਾ ਰਹੇ ਮੁੱਦੇ ਅਤੇ ਇਹਨਾਂ ਕਰਕੇ ਹੋ ਰਹੇ ਹਕੂਮਤੀ ਅਤੇ ਗੁੰਡਾ ਵਾਰ ਅਜਿਹੇ ਮਸਲੇ ਹਨ, ਜਿਹਨਾਂ ਦੀ ਸਫਲਤਾ ਇਹਨਾਂ ਘੋਲਾਂ ਵਿੱਚ ਖੇਤ ਮਜ਼ਦੂਰਾਂ ਦੀ ਗਹਿ ਗੱਡਵੀਂ ਸ਼ਮੂਲੀਅਤ ਨਾਲ ਜੁੜੀ ਹੋਈ ਹੈ। ਇਹ ਤਾਂ ਹੀ ਸੰਭਵ ਹੈ ਜੇਕਰ ਖੇਤ ਮਜ਼ਦੂਰ ਖੁਦ ਵੱਡੀ ਪੱਧਰ 'ਤੇ ਜਥੇਬੰਦ ਹੁੰਦੇ ਹਨ। ਘੋਲਾਂ ਦੇ ਅਮਲ ਰਾਹੀਂ ਚੇਤਨਾ ਹਾਸਲ ਕਰਦੇ ਹਨ। ਇਸ ਲਈ ਖੇਤ ਮਜ਼ਦੂਰ ਜਥੇਬੰਦੀ ਦੀ ਮਜਬੂਤੀ ਤੇ ਪਸਾਰੇ ਵਿੱਚ ਅੜਿੱਕਾ ਬਣੀ ਖੜ੍ਹੀ ਇਸ ਆਰਥਿਕ ਸਮੱਸਿਆ ਨੂੰ ਸਰ ਕਰਨ ਲਈ ਉੱਦਮ ਜੁਟਾਉਣਾ ਖੇਤ ਮਜ਼ਦੂਰਾਂ ਦੀ ਮੱਦਦ ਤਾਂ ਹੈ ਹੀ, ਇਸ ਤੋਂ ਵੀ ਅੱਗੇ ਇਹ ਹੋਰਨਾਂ ਵਰਗਾਂ ਦੇ ਲੋਕਾਂ ਲਈ ਆਪਣੀ ਅਤੇ ਆਪਣੇ ਵਰਗ ਦੀ ਮੱਦਦ ਦਾ ਵੀ ਹਿੱਸਾ ਬਣਦਾ ਹੈ। ਸੋ ਅਸੀਂ ਆਸ ਕਰਦੇ ਹਾਂ ਕਿ ਆਪ ਜੀ ਵੱਲੋਂ ਇਸ ਫੰਡ ਮੁਹਿੰਮ 'ਚ ਭਰਪੂਰ ਯੋਗਦਾਨ ਪਾਇਆ ਜਾਵੇਗਾ। 

ਭਰਵੇਂ ਹੁੰਗਾਰੇ ਦੀ ਆਸ ਨਾਲ,
ਸੂਬਾ ਕਮੇਟੀ,
ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ
ਜ਼ੋਰਾ ਸਿੰਘ ਨਸਰਾਲੀ, ਸੂਬਾ ਪ੍ਰਧਾਨ (98763 94024)
ਲਛਮਣ ਸਿੰਘ ਸੇਵੇਵਾਲਾ, ਸੂਬਾ ਸਕੱਤਰ (94170 79170, 76963 63025)
(29 ਅਪ੍ਰੈਲ, 2013)

ਲੋਕ-ਤਾਕਤ ਦਾ ਕਿਲਾ ਹੋਰ ਮਜਬੂਤ ਕਰੋ

ਫਰੀਦਕੋਟ ਅਗਵਾ ਕਾਂਡ:

ਲੰਮੇ ਤੇ ਸਿਰੜੀ ਘੋਲ ਦੀ ਜਿੱਤ ਨੂੰ ਸੰਭਾਲੋ
ਲੋਕ-ਤਾਕਤ ਦਾ ਕਿਲਾ ਹੋਰ ਮਜਬੂਤ ਕਰੋ

ਇਨਸਾਫਪਸੰਦ ਲੋਕੋ,

ਬਹੁ-ਚਰਚਿਤ ਫਰੀਦਕੋਟ ਅਗਵਾ ਕਾਂਡ ਖਿਲਾਫ ਤੁਹਾਡੇ ਵੱਲੋਂ ਲੜੇ ਲੰਮੇ ਤੇ ਸਿਰੜੀ ਘੋਲ ਨੇ ਆਖਰ ਆਪਣਾ ਰੰਗ ਵਿਖਾ ਦਿੱਤਾ ਹੈ। ਰਾਜ ਭਾਗ ਦੀ ਛਤਰਛਾਇਆ ਤੇ ਅੰਨ੍ਹੀਂ ਧੰਨ ਦੌਲਤ ਦੇ ਗੁਮਾਨ 'ਚ ਆਫਰੇ ਫਿਰਦੇ ਨਿਸ਼ਾਨ-ਡਿੰਪੀ ਸਮਰਾ ਦੇ ਗੁੰਡਾ ਗਰੋਹ ਨੂੰ ਤੁਹਾਡੀ ਤਾਕਤ ਨੇ ਇੱਕ ਵਾਰ ਚਿੱਤ ਕਰ ਦਿੱਤਾ ਹੈ। 27 ਮਈ ਨੂੰ ਇਸ ਕੇਸ ਦੇ ਹੋਏ ਅਦਾਲਤੀ ਫੈਸਲੇ 'ਚ ਨਿਸ਼ਾਨ ਨੂੰ ਦੂਹਰੀ ਉਮਰ ਕੈਦ, ਅਕਾਲੀ ਆਗੂ ਅਤੇ ਇਸ ਗੁੰਡਾ ਗਰੋਹ ਦੇ ਕਰਤਾ-ਧਰਤਾ ਡਿੰਪੀ ਸਮਰਾ ਤੇ ਨਿਸ਼ਾਨ ਦੀ ਮਾਤਾ ਨਵਜੋਤ ਕੌਰ ਸਮੇਤ 8 ਜਣਿਆਂ ਨੂੰ 7-7 ਸਾਲ ਤੇ ਘਾਲੀ ਨੂੰ 9 ਸਾਲ ਦੀ ਕੈਦ ਹੋ ਗਈ ਹੈ। ਅਦਾਲਤ ਦਾ ਇਹ ਫੈਸਲਾ ਲੋਕਾਂ ਦੇ ਘੋਲ ਦੀ ਅਹਿਮ ਜਿੱਤ ਹੈ। ਦਿਨ-ਦਿਹਾੜੇ ਬੇਖੌਫ਼ ਹੋ ਕੇ ਨਾਬਾਲਗ ਲੜਕੀ ਨੂੰ ਹਥਿਆਰਾਂ ਤੇ ਧੌਂਸ ਦੇ ਜ਼ੋਰ ਘਰੋਂ ਅਗਵਾ ਕਰਨ ਰਾਹੀਂ ਵਰਤਾਏ ਇਸ ਕਹਿਰ ਖਿਲਾਫ਼ ਐਕਸ਼ਨ ਕਮੇਟੀ ਦੀ ਅਗਵਾਈ ਵਿੱਚ ਪਹਿਲ ਪ੍ਰਿਥਮੇ ਸੜਕਾਂ 'ਤੇ ਨਿੱਤਰੇ ਫਰੀਦਕੋਟ ਵਾਸੀਆਂ ਦੀ ਜਿੱਤ ਹੈ। ਇਸ ਘੋਲ ਦੀ ਡਟਵੀਂ ਹਮਾਇਤ 'ਚ ਨਿੱਤਰੀਆਂ ਕਿਸਾਨ, ਖੇਤ ਮਜ਼ਦੂਰ, ਵਿਦਿਆਰਥੀ, ਨੌਜਵਾਨ, ਮੁਲਾਜ਼ਮ ਤੇ ਇਨਕਲਾਬੀ ਜਮਹੁਰੀ ਜਥੇਬੰਦੀਆਂ ਦੀ ਜਿੱਤ ਹੈ। ਪਰਬਤੋਂ ਭਾਰੀ ਮੁਸ਼ਕਲਾਂ ਤੇ ਬੇਹਿਸਾਬ ਦਬਾਵਾਂ-ਤਣਾਵਾਂ ਦੇ ਬਾਵਜੂਦ ਡਟ ਕੇ ਖੜ੍ਹਨ ਵਾਲੇ ਪੀੜਤ ਪਰਿਵਾਰ ਤੇ ਲੜਕੀ ਦੇ ਸਿਰੜ ਦੀ ਜਿੱਤ ਹੈ। ਇਹ ਜਿੱਤ ਵਕੀਲਾਂ ਦੀ ਨਿਧੜਕ, ਬੇਗਰਜ਼ ਤੇ ਲੋਕ ਸੇਵਾ ਨੂੰ ਸਮਰਪਤ ਭਾਵਨਾ ਦੀ ਜਿੱਤ ਹੈ। ਇਹ ਜਿੱਤ ਸਾਧਾਰਨ ਜਿੱਤ ਨਹੀਂ, ਮਹੱਤਵਪੂਰਨ ਜਿੱਤ ਹੈ, ਫਖ਼ਰਯੋਗ ਜਿੱਤ ਹੈ। ਇਹ ਜਿੱਤ ਮਹੱਤਵਪੂਰਨ ਜਿੱਤ ਇਸ ਕਰਕੇ ਹੈ ਕਿ ਇਹ ਸਿਆਸੀ ਸ਼ਹਿ ਪ੍ਰਾਪਤ, ਖੌਫ਼ਨਾਕ, ਹੰਢੇ-ਵਰਤੇ ਤੇ ਪੇਸ਼ਾਵਰ ਗੁੰਡਾ ਗਰੋਹ ਤੋਂ ਇਲਾਵਾ ਅਕਾਲੀ ਸਰਕਾਰ ਤੇ ਬਾਦਲ ਪਰਿਵਾਰ, ਆਹਲਾ ਪੁਲਿਸ ਅਧਿਕਾਰੀਆਂ ਤੇ ਮੁਢਲੇ ਦੌਰ 'ਚ ਅਦਾਲਤੀ ਤਾਣੇ-ਬਾਣੇ ਨਾਲ ਭਿੜ ਕੇ ਹਾਸਲ ਕੀਤੀ ਜਿੱਤ ਹੈ। ਇਸ ਜਿੱਤ 'ਚ ਮੁਲਕ ਭਰ 'ਚ ਅਗਵਾ ਤੇ ਬਲਾਤਕਾਰਾਂ ਖਿਲਾਫ ਉੱਠੇ ਲੋਕ ਰੋਹ ਦਾ ਵੀ ਗਿਣਨਯੋਗ ਦਖਲ ਹੈ। ਮੀਡੀਆ ਦੇ ਵੱਡੇ ਹਿੱਸੇ ਵੱਲੋਂ ਇਸ ਕੇਸ ਦੀ ਦਰੁਸਤ ਪੈਂਤੜੇ ਤੋਂ ਕੀਤੀ ਪੇਸ਼ਕਾਰੀ ਦਾ ਵੀ ਰੋਲ ਹੈ। 

ਦੂਜੇ ਪਾਸੇ ਇਹ ਇਸ ਗੁੰਡਾ ਗਰੋਹ ਤੋਂ ਅੱਗੇ ਇਸ ਸਮੁੱਚੀ ਘਟਨਾ ਨੂੰ ਪੁੱਠਾ ਗੇੜਾ ਦੇਣ ਲਈ ਤੁਲੀਆਂ ਸਭਨਾਂ ਲੋਕ-ਵਿਰੋਧੀ ਤਾਕਤਾਂ ਦੀ ਸ਼ਰਮਨਾਕ ਹਾਰ ਹੈ। ਇਸ ਸਰੀਹਣ ਧੱਕੇਸ਼ਾਹੀ ਨੂੰ 'ਕੁੜੀ ਦੇ ਮਰਜ਼ੀ ਨਾਲ ਘਰੋਂ ਜਾਣ' ਤੇ ਪਿਆਰ ਮੁਹੱਬਤ ਦੇ ਕਿੱਸੇ ਵਜੋਂ ਪੇਸ਼ ਕਰਨ ਵਾਲੇ ਡੀ.ਜੀ.ਪੀ. ਸੁਮੇਧ ਸੈਣੀ ਸਮੇਤ ਸਭਨਾਂ ਪੁਲਿਸ ਅਧਿਕਾਰੀਆਂ, ਇਸ ਗਰੋਹ ਨੂੰ ਸਿਆਸੀ ਛਤਰੀ ਮੁਹੱਈਆ ਕਰਨ ਵਾਲੇ ਅਤੇ ਦੋਸ਼ੀ ਪੁਲਿਸ ਅਫਸਰਾਂ ਨੂੰ ਤਰੱਕੀਆਂ ਨਾਲ ਨਿਵਾਜਣ ਵਾਲੇ ਮੁੱਖ ਮੰਤਰੀ ਤੇ ਉੱਪ ਮੁੱਖ ਮੰਤਰੀ ਸਮੇਤ ਸਭਨਾਂ ਅਕਾਲੀ ਲੀਡਰਾਂ ਤੇ ਮੰਤਰੀਆਂ ਦੀ ਇਖਲਾਕੀ ਤੇ ਸਿਆਸੀ ਹਾਰ ਹੈ। ਸਭ ਸ਼ਰਮ ਹਯਾ ਨੂੰ ਛਿੱਕੇ ਟੰਗ ਕੇ ਅਤੇ ਚਿੱਟੇ ਦਿਨ ਵਰਗੀ ਹਕੀਕਤ ਨੂੰ ਨਜ਼ਰਅੰਦਾਜ਼ ਕਰਕੇ ਪੁਲਿਸ ਅਧਿਕਾਰੀਆਂ ਤੇ ਹਕੂਮਤ ਦੀ ਮਿਹਰ ਖੱਟਣ ਲਈ ਉਹਨਾਂ ਦੇ ਕੂੜ ਪ੍ਰਚਾਰ ਨੂੰ ਇੱਕਾ-ਦੁੱਕਾ ਅਖਬਾਰਾਂ ਤੇ ਟੀ.ਵੀ. ਚੈਨਲਾਂ 'ਤੇ ਪੇਸ਼ ਕਰਨ ਵਾਲੇ ਕੁਝ ਕੁ ਵਿਕਾਊ ਪੱਤਰਕਾਰਾਂ ਦੇ ਮੂੰਹ 'ਤੇ ਕਰਾਰੀ ਚਪੇੜ ਹੈ। 

ਰਾਜ ਦਰਬਾਰ ਦੇ ਆਹਲਾ ਗਲਿਆਰਿਆਂ ਤੱਕ ਪਹੁੰਚ, ਅੰਨ੍ਹੀਂ ਦੌਲਤ ਤੇ ਜ਼ਮੀਨ ਦੇ ਜ਼ੋਰ ਉੱਭਰੇ ਨਿਸ਼ਾਨ-ਡਿੰਪੀ ਸਮਰਾ ਦੇ ਇਸ ਗਰੋਹ ਨੂੰ ਇਹ ਚਿੱਤ ਚੇਤਾ ਵੀ ਨਹੀਂ ਸੀ ਕਿ ਕਿਤੇ ਆਹ ਦਿਨ ਵੀ ਵੇਖਣੇ ਪੈਣਗੇ। ਉਹਨਾਂ ਨੇ ਤਾਂ ਅਪਰਾਧ ਜਗਤ ਦੀ ਦੁਨੀਆਂ ਵਿੱਚ ਤਾਰੀਆਂ ਲਾਉਣ ਦੇ ਸੁਪਨੇ ਹੀ ਲਏ ਸਨ। ਇਹ ਉਹਨਾਂ ਦੀ ਨਿਰੀ ਖਾਮ-ਖਿਆਲੀ ਹੀ ਨਹੀਂ ਸੀ, ਹਕੀਕਤ ਵਿੱਚ ਅਜਿਹਾ ਹੀ ਵਾਪਰਦਾ ਆ ਰਿਹਾ ਸੀ। ਲੁੱਟਾਂ-ਖੋਹਾਂ, ਕਤਲਾਂ, ਅਗਵਾ ਤੇ ਬਲਾਤਕਾਰਾਂ ਦੇ 35 ਮੁਕੱਦਮੇ ਦਰਜ ਹੋਣ ਦੇ ਬਾਵਜੂਦ ਕਿਤੇ ਫੁੱਲ ਦੀ ਨਹੀਂ ਸੀ ਲੱਗੀ। ਇਸ ਲਈ ਉਹਨਾਂ ਨੂੰ ਤਾਂ ਹੁਣ ਜੱਗੋਂ ਤੇਰ੍ਹਵੀਂ ਹੋ ਗਈ ਲੱਗਦੀ ਹੈ। ਪਹਿਲਾਂ ਵੀ ਤੇ ਹੁਣ ਅਦਾਲਤ ਵੱਲੋਂ ਸਜ਼ਾ ਸੁਣਾਉਣ ਤੋਂ ਬਾਅਦ ਵੀ ਭਾਵੇਂ ਕਈ ਭੁੱਬਾਂ ਮਾਰ ਕੇ ਰੋਂਦੇ ਵੇਖੇ ਗਏ ਹਨ, ਪਰ ਜਿਵੇਂ ਸੜ ਕੇ ਵੀ ਰੱਸੀ ਦਾ ਵੱਟ ਨਹੀਂ ਜਾਂਦਾ। ਅਦਾਲਤ 'ਚੋਂ ਬਾਹਰ ਨਿੱਕਲਦਿਆਂ ਪੱਤਰਕਾਰਾਂ ਅਤੇ ਲੋਕਾਂ ਖਿਲਾਫ ਧਮਕੀਆਂ ਭਰੀ ਭੜਾਸ ਵੀ ਦਿਖਾਈ ਦਿੱਤੀ ਹੈ। 

ਭੈਣੋ ਤੇ ਭਰਾਵੋ, ਇਹ ਜਿੱਤ ਸੌਖਿਆਂ ਹੀ ਪ੍ਰਾਪਤ ਨਹੀਂ ਹੋਈ। ਅਨੇਕਾਂ ਦੁਸ਼ਵਾਰੀਆਂ ਝੱਲ ਕੇ ਹਾਸਲ ਹੋਈ ਹੈ। ਆਪਾਂ ਨੂੰ ਨਾ ਸਿਰਫ ਇਸ ਗਰੋਹ ਨੂੰ ਗ੍ਰਿਫਤਾਰ ਕਰਵਾਉਣ ਲਈ ਹੀ ਵਿਸ਼ਾਲ ਤੇ ਲਗਾਤਾਰ ਜਨਤਕ ਐਕਸ਼ਨਾਂ ਦਾ ਤਾਂਤਾ ਬੰਨ੍ਹਣਾ ਪਿਆ ਸਗੋਂ ਪੈਰ ਪੈਰ 'ਤੇ ਹਕੂਮਤ ਤੇ ਇਸ ਗਰੋਹ ਦੇ ਵਾਰਾਂ ਤੇ ਚਾਲਾਂ ਨੂੰ ਕੁੱਟਣ ਲਈ ਵੀ ਵਾਰ ਵਾਰ ਜਨਤਾ ਨੂੰ ਹਰਕਤ ਵਿੱਚ ਲਿਆਉਣਾ ਪਿਆ ਹੈ। ਇਸ ਗਰੋਹ ਦੀ ਗ੍ਰਿਫਤਾਰੀ ਤੋਂ ਬਾਅਦ ਅਦਾਲਤੀ ਫੈਸਲੇ ਦੇ ਬਹਾਨੇ ਨਾਰੀ ਨਿਕੇਤਨ ਦੇ ਨਾਂ ਹੇਠ ਪੁਲਿਸ ਦੀ ਕੱਚੀ ਕੈਦ ਵਿੱਚ ਧੱਕੀ ਗਈ ਪੀੜਤ ਲੜਕੀ ਦੀ ਰਿਹਾਈ ਵੀ ਉਦੋਂ ਹੀ ਹੋਈ ਜਦੋਂ ਆਪਣੇ ਵੱਲੋਂ ਨਾਰੀ ਨਿਕੇਤਨ ਅੱਗੇ ਅਣਮਿਥੇ ਸਮੇਂ ਦੇ ਧਰਨੇ ਦਾ ਐਲਾਨ ਹੋ ਗਿਆ। ਕੇਸ ਦੀਆਂ ਗਵਾਹੀਆਂ ਸ਼ੁਰੂ ਹੋਣ ਤੋਂ ਐਨ ਪਹਿਲਾਂ ਪੀੜਤ ਪਰਿਵਾਰ ਨੂੰ ਨਿਸ਼ਾਨ ਵੱਲੋਂ ਜੇਲ੍ਹ 'ਚੋਂ ਹੀ ਦਿੱਤੀਆਂ ਧਮਕੀਆਂ ਦੇ ਮੱਦੇਨਜ਼ਰ ਗਵਾਹਾਂ ਤੇ ਵਕੀਲਾਂ ਦੀ ਸੁਰੱਖਿਆ ਦੀ ਜਾਮਨੀ ਵੀ ਚੇਤਨ, ਜਥੇਬੰਦ ਤੇ ਵਿਸ਼ਾਲ ਜਨਤਕ ਤਾਕਤ, ਵਿਸ਼ੇਸ਼ ਕਰਕੇ ਪੇਂਡੂ ਕਿਸਾਨ ਅਤੇ ਖੇਤ ਮਜ਼ਦੂਰ ਜਨਤਾ ਦੇ ਹਰਕਤ ਵਿੱਚ ਆਉਣ ਨਾਲ ਹੀ ਹੋਈ ਹੈ। ਇਹਨਾਂ ਧਮਕੀਆਂ ਦਾ ਠੋਕਵਾਂ ਜੁਆਬ ਫਰੀਦਕੋਟ ਵਿੱਚ ਹਜ਼ਾਰਾਂ ਕਿਸਾਨ-ਮਜ਼ਦੂਰ ਔਰਤਾਂ ਦੀ ਵਿਲੱਖਣ ਅਤੇ ਵਿਸ਼ਾਲ ਰੈਲੀ-ਮੁਜਾਹਰਾ ਕਰ ਕੇ ਦਿੱਤਾ ਗਿਆ ਹੈ। ਕੇਸ ਦੀ ਮਹੀਨਿਆਂ ਬੱਧੀ ਚੱਲੀ ਰੋਜ਼ਾਨਾ ਸੁਣਵਾਈ ਦੌਰਾਨ ਗਵਾਹਾਂ ਤੇ ਵਕੀਲਾਂ ਦੀ ਸੁਰੱਖਿਆ ਲਈ ਸੈਂਕੜੇ ਲੋਕਾਂ ਖਾਸ ਕਰਕੇ ਕਿਸਾਨਾਂ ਵੱਲੋਂ ਅਦਾਲਤ ਵਿੱਚ ਹਾਜ਼ਰ ਰਹਿ ਕੇ ਗੁੰਡਾ ਗਰੋਹ ਦੀਆਂ ਕੇਸ ਨੂੰ ਪ੍ਰਭਾਵਤ ਕਰਨ ਵਾਲੀਆਂ ਦਹਿਸ਼ਤ-ਪਾਊ ਚਾਲਾਂ ਦਾ ਢੁਕਵਾਂ ਜੁਆਬ ਦਿੱਤਾ ਹੈ। ਫੈਸਲੇ ਨੇੜੇ ਢੁੱਕੇ ਕੇਸ ਨੂੰ ਪੁੱਠਾ ਗੇੜਾ ਦੇਣ ਲਈ ਵਿਸ਼ੇਸ਼ ਕਰਕੇ ਬਠਿੰਡੇ ਤੋਂ ਆਉਂਦੇ ਵਕੀਲ ਨੂੰ ਸਰੀਰਕ ਨੁਕਸਾਨ ਪਹੁੰਚਾਉਣ ਜਾਂ ਕਿਸੇ ਝੂਠੇ ਕੇਸ ਵਿੱਚ ਉਲਝਾਉਣ ਦੀਆਂ ਸਾਜ਼ਸਾਂ ਦਾ ਢੁਕਵਾਂ ਜੁਆਬ ਵੀ ਫਰੀਦਕੋਟ ਵਿੱਚ ਵਿਸ਼ਾਲ ਜਨਤਕ ਤਾਕਤ ਦੇ ਜ਼ੋਰ ਦਿੱਤਾ ਗਿਆ। 

ਘੋਲ ਸਬਕਾਂ ਨੂੰ ਪੱਲੇ ਬੰਨ੍ਹੋ: ਚੌਕਸੀ ਬਰਕਰਾਰ ਰੱਖੋ

ਹੋਰਨਾਂ ਪੱਖਾਂ ਤੋਂ ਇਲਾਵਾ, ਇਸ ਘੋਲ ਦੀ ਅਹਿਮ ਪ੍ਰਾਪਤੀ ਇਹ ਵੀ ਹੈ ਕਿ ਆਪਣੇ ਲੁਟੇਰੇ ਹਿੱਤਾਂ ਖਾਤਰ 'ਪਾੜੋ ਤੇ ਰਾਜ ਕਰੋ' ਦੀ ਨੀਤੀ ਤਹਿਤ ਹਾਕਮਾਂ ਵੱਲੋਂ ਪੇਂਡੂਆਂ ਅਤੇ ਸ਼ਹਿਰੀਆਂ, ਹਿੰਦੂਆਂ ਅਤੇ ਸਿੱਖਾਂ ਆਦਿ ਦੇ ਪੈਦਾ ਕੀਤੇ ਵਖਰੇਵੇਂ ਅਤੇ ਇਹਨਾਂ ਨੂੰ ਹਵਾ ਦਿੰਦੇ ਰਹਿਣ ਦੀਆਂ ਚਾਲਾਂ ਇਸ ਘੋਲ ਵਿੱਚ ਅੜਿੱਕਾ ਨਹੀਂ ਬਣੀਆਂ, ਸਗੋਂ ਪਿੰਡਾਂ ਦੇ ਕਿਸਾਨਾਂ ਅਤੇ ਖੇਤ ਮਜ਼ਦੂਰਾਂ ਨੇ ਐਕਸ਼ਨ ਕਮੇਟੀ ਦੀ ਅਗਵਾਈ ਵਿੱਚ ਚੱਲਦੇ ਇਸ ਘੋਲ ਨੂੰ ਆਪਣਾ ਘੋਲ ਸਮਝ ਕੇ ਸਿਰੇ ਦਾ ਤਾਣ ਲਾਇਆ ਹੈ ਤੇ ਤੋੜ ਚੜ੍ਹਾਇਆ ਹੈ। ਇਸ ਤੋਂ ਅਗਾਂਹ ਪਰਿਵਾਰ ਅਤੇ ਸੰਘਰਸ਼ ਵਿੱਚ ਸ਼ਾਮਲ ਲੋਕਾਂ ਵਿਚਕਾਰ ਕੁੜੱਤਣ ਭਰਨ ਦੀਆਂ ਕੋਝੀਆਂ ਹਰਕਤਾਂ ਨੂੰ ਵੀ ਫਿੱਟ ਲਾਹਣਤਾਂ ਦਾ ਸਾਹਮਣਾ ਕਰਨਾ ਪਿਆ ਹੈ। ਪੇਂਡੂਆਂ ਅਤੇ ਸ਼ਹਿਰੀਆਂ ਦੀ ਇਸ ਸਾਂਝ ਨੇ ਘੋਲ ਦੀ ਜਿੱਤ ਵਿੱਚ ਬੇਹੱਦ ਅਹਿਮ ਹਿੱਸਾ ਪਾਇਆ ਹੈ। ਇਸ ਸਾਂਝ ਨੂੰ ਹੋਰ ਵਡੇਰੀ ਅਤੇ ਪੱਕੀ ਕਰਨ ਦੀ ਲੋੜ ਹੈ। 

ਜਿਸ ਨਿਸ਼ਾਨ-ਡਿੰਪੀ ਸਮਰਾ ਦੇ ਗਰੋਹ ਨੂੰ ਆਪਾਂ ਸਜ਼ਾਵਾਂ ਕਰਵਾਈਆਂ ਹਨ, ਉਹ ਲੋਕਾਂ ਕੋਲ ਖੁਦ ਕਹਿੰਦੇ ਰਹੇ ਹਨ ਕਿ ਸਾਡਾ ਦੋ ਕਰੋੜ ਲੱਗ ਗਿਆ ਹੈ। ਹੁਣ ਵੀ ਇਹ ਟਿਕ ਕੇ ਬਹਿਣ ਵਾਲੇ ਨਹੀਂ। ਜੇਲ੍ਹੋਂ ਨਿਕਲਣ ਲਈ ਹਰ ਹੀਲਾ ਵਸੀਲਾ ਕਰਨਗੇ। ਹਾਈਕੋਰਟ ਅਤੇ ਸੁਪਰੀਮ ਕੋਰਟ ਤੱਕ ਜਾਣਗੇ। ਆਹਲਾ ਪੁਲਸੀ ਅਤੇ ਹਕੂਮਤੀ ਲਾਣੇ ਨਾਲ ਮਿਲ ਕੇ ਸੰਘਰਸ਼ ਦੇ ਮੋਹਰੀ ਹਿੱਸਿਆਂ ਖਿਲਾਫ ਕਿੜਾਂ ਕੱਢਣ ਦੀਆਂ ਚਾਲਾਂ ਚੱਲਣ ਲਈ ਤਾਣ ਲਾਉਣਗੇ। ਇਸ ਲਈ ਹੁਣ ਵੀ ਇਸ ਜਿੱਤ 'ਤੇ ਤਸੱਲੀ ਕਰਕੇ ਬਹਿਣ ਦੀ ਥਾਂ ਚੌਕਸੀ ਰੱਖਣ ਦੀ ਲੋੜ ਹੈ। ਉਹਨਾਂ ਦੀਆਂ ਚਾਲਾਂ ਨੂੰ ਕੁੱਟਣ ਲਈ ਤਿਆਰ ਬਰ ਤਿਆਰ ਰਹਿਣ ਦੀ ਲੋੜ ਹੈ। ਇਸ ਕੇਸ ਵਿੱਚ ਹਕੂਮਤ ਅਤੇ ਗੁੰਡਾ ਗਰੋਹ ਨਾਲ ਲੋਕਾਂ ਦੇ ਨਿੱਤਰਕੇ ਸਾਹਮਣੇ ਆਏ ਖਰਬੂਜੇ ਤੇ ਛੁਰੀ ਵਾਲੇ ਰਿਸ਼ਤੇ ਨੂੰ ਮਨੀਂ ਵਸਾਉਣ ਦੀ ਲੋੜ ਹੈ। ਵਿਰੋਧੀਆਂ ਦੀ ਹਰ ਚਾਲ 'ਤੇ ਨਿਗਾਹ ਰੱਖਣ, ਬੁੱਝਣ ਅਤੇ ਫੇਲ੍ਹ ਕਰਨ ਲਈ ਲੋਕ-ਤਾਕਤ ਨੂੰ ਹੋਰ ਸਾਣ 'ਤੇ ਲਾਉਣ ਦੀ ਲੋੜ ਹੈ। ਸਬੂਤਾਂ ਦੀ ਘਾਟ ਦੇ ਨਾਂ ਹੇਠ ਅਦਾਲਤ ਵੱਲੋਂ ਬਰੀ ਕੀਤੇ ਬਾਕੀ ਦੋਸ਼ੀਆਂ ਨੂੰ ਸਜ਼ਾਵਾਂ ਦਿਵਾਉਣ ਲਈ ਸਰਕਾਰ 'ਤੇ ਦਬਾਅ ਵਧਾਉਣ ਦੀ ਲੋੜ ਹੈ। ਅਦਾਲਤੀ ਪ੍ਰਬੰਧ, ਜਿਸ ਨੇ ਪਹਿਲਾਂ ਲੰਮਾ ਸਮਾਂ ਪੀੜਤ ਲੜਕੀ ਨੂੰ ਪੁਲਸ ਤੇ ਹਕੂਮਤ ਦੇ ਹੱਥਾਂ 'ਚ ਸੌਂਪੀ ਰੱਖਿਆ ਸੀ ਅਤੇ ਹੁਣ ਸਬੂਤਾਂ ਦੀ ਘਾਟ ਦੇ ਬਹਾਨੇ ਹੇਠ, ਦਸ ਦੋਸ਼ਿਆਂ ਨੂੰ ਬਰੀ ਕਰ ਦਿੱਤਾ ਹੈ, ਇਹ ਸਚਾਈ ਅਧਾਰਤ ਫੈਸਲੇ ਲੈਣ ਦੀ ਥਾਂ ਮਹਿਜ ਕਾਗਜ਼ਾਂ ਦਾ ਢਿੱਡ ਭਰਨ ਵਾਲੇ ਸਬੂਤਾਂ ਨੂੰ ਹੀ ਪ੍ਰਮੁੱਖਤਾ ਦੇਣ ਵਾਲੇ ਖਾਸੇ ਨੂੰ ਸਮਝਣ ਦੀ ਲੋੜ ਹੈ। ਇਸ ਘੋਲ ਦੌਰਾਨ ਹੋਏ ਵੱਡੇ ਖਰਚਿਆਂ ਅਤੇ ਆਉਣ ਵਾਲੇ ਸੰਭਾਵੀ ਖਰਚਿਆਂ ਨੂੰ ਧਿਆਨ ਵਿੱਚ ਰੱਖਦਿਆਂ ਦਿਲ ਖੋਲ੍ਹ ਕੇ ਫੰਡ ਵਿੱਚ ਯੋਗਦਾਨ ਪਾਉਣ ਦੀ ਲੋੜ ਹੈ। ਇਹ ਗੱਲ ਸਮਝਣ ਦੀ ਲੋੜ ਹੈ ਕਿ ਲੋਕਾਂ ਦੇ ਭਾਰੀ ਦਬਾਅ ਕਰਕੇ ਹਕੂਮਤੀ ਲਾਣੇ ਨੂੰ ਕੌੜਾ ਘੁੱਟ ਭਰਨਾ ਪਿਆ ਹੈ। ਪਰ ਉਸਨੇ ਗੁੰਡਾ ਗਰੋਹਾਂ ਦੀ ਪੁਸ਼ਤ ਪਨਾਹੀ ਤੋਂ ਤੋਬਾ ਨਹੀਂ ਕੀਤੀ, ਸਗੋਂ ਮੌਜੂਦਾ ਹਾਲਤਾਂ ਅੰਦਰ ਇਹਨਾਂ ਦੇ ਗੂੜ੍ਹੇ ਸਬੰਧਾਂ ਨੇ ਵਧਣਾ-ਫੁੱਲਣਾ ਹੈ। ਜਿਵੇਂ ਅਕਾਲੀ-ਭਾਜਪਾ ਸਰਕਾਰ ਸਮੇਤ ਸਾਰੀਆਂ ਲੋਕ-ਵਿਰੋਧੀ ਸਰਕਾਰਾਂ ਅਤੇ ਪਾਰਟੀਆਂ ਵੱਲੋਂ ਐਫ.ਡੀ.ਆਈ. ਸਮੇਤ ਹੋਰਨਾਂ ਅਨੇਕ ਢੰਗਾਂ ਰਾਹੀਂ ਰੁਜ਼ਗਾਰ, ਜ਼ਮੀਨਾਂ, ਵਿਦਿਆ, ਬਿਜਲੀ, ਪਾਣੀ, ਸਿਹਤ-ਸਹੂਲਤਾਂ ਆਦਿ ਖੋਹਣ, ਨਿੱਜੀਕਰਨ ਕਰਨ ਅਤੇ ਮਹਿੰਗਾਈ ਵਧਾਉਣ ਵਾਲੀਆਂ ਨੀਤੀਆਂ ਨੂੰ ਅੰਨ੍ਹੇਵਾਹ ਲਾਗੂ ਕਰਨ ਦੀ ਰਫ਼ਤਾਰ ਫੜੀ ਹੈ, ਇਸ ਖਿਲਾਫ਼ ਉੱਠ ਰਹੇ ਅਤੇ ਉੱਠਣ ਵਾਲੇ ਘੋਲਾਂ ਨੂੰ ਕੁਚਲਣ ਲਈ ਵੀ ਅਜਿਹੇ ਗਰੋਹ ਹਕੂਮਤਾਂ ਲਈ ਵੱਧ ਮਾਫਕ ਬਣਦੇ ਹਨ। ਜਨਤਾ 'ਚੋਂ ਡਿਗਦੀ ਸ਼ਾਖ ਕਾਰਨ ਵੋਟਾਂ ਦੌਰਾਨ ਬੂਥਾਂ 'ਤੇ ਕਬਜ਼ੇ ਕਰਨ ਲਈ ਵੀ ਅਜਿਹੇ ਗਰੋਹ ਹਾਕਮਾਂ ਦੀ ਲੋੜ ਹਨ। ਲੰਘੀਆਂ ਪੰਚਾਇਤ ਸੰਮਤੀ ਚੋਣਾਂ ਦੌਰਾਨ ਅਜਿਹੇ ਗਰੋਹਾਂ ਦੀ ਅਕਾਲੀ ਦਲ ਵੱਲੋਂ ਦੱਬ ਕੇ ਵਰਤੋਂ ਦੇ ਅਨੇਕਾਂ ਮਾਮਲੇ ਸਾਹਮਣੇ ਆਏ ਹਨ। ਇਹ ਲੋੜ ਹੋਰ ਵਧਣੀ ਹੈ। ਬੇਰੁਜ਼ਗਾਰੀ ਦੇ ਝੰਬੇ ਨੌਜਵਾਨ ਜੋ ਹਕੂਮਤ ਵਿਰੁੱਧ ਕਰੜੇ ਸੰਘਰਸ਼ਾਂ ਅਤੇ ਵੱਡੀਆਂ ਤਬਦੀਲੀਆਂ ਦੀ ਅਥਾਹ ਸਮਰੱਥਾ ਰੱਖਦੇ ਹਨ, ਨੂੰ ਨਿਸ਼ੇੜੀਆਂ ਅਤੇ ਗੁੰਡਾ ਗਰੋਹਾਂ 'ਚ ਪਲਟਣਾ ਹਕੂਮਤਾਂ ਵੱਲੋਂ ਕਈ ਪੱਖੋਂ ਲਾਹੇਵੰਦਾ ਸਾਧਨ ਹੈ। ਇਸ ਲਈ ਲੋਕ ਤਾਕਤ ਨੂੰ ਹੋਰ ਮਜਬੂਤ ਕਰਨ ਲਈ ਤਾਣ ਜੁਟਾਉਣ ਦੀ ਲੋੜ ਹੈ। ਇਹ ਲੋਕ ਤਾਕਤ ਦਾ ਮਜਬੂਤ ਕਿਲਾ ਹੀ ਆਪਣੇ ਸਭ ਦੁੱਖਾਂ-ਦਰਦਾਂ ਦੀ ਦਾਰੂ ਹੈ। ਅੰਤ 'ਚ ਅਸੀਂ ਇਸ ਘੋਲ ਦੀ ਸਫਲਤਾ ਲਈ ਹਿੱਸਾ ਪਾਉਣ ਵਾਲੇ ਸਭਨਾਂ ਲੋਕਾਂ ਦਾ ਧੰਨਵਾਦ ਕਰਦੇ ਹਾਂ, ਜਿਹਨਾਂ ਦੀ ਬਦੌਲਤ ਇਹ ਜਿੱਤ ਨਸੀਬ ਹੋਈ ਹੈ। 

ਵੱਲੋਂ:
ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ)
ਸੂਬਾ ਪ੍ਰਧਾਨ, ਜੋਗਿੰਦਰ ਸਿੰਘ ਉਗਰਾਹਾਂ
ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ
ਸੂਬਾ ਪ੍ਰਧਾਨ, ਜ਼ੋਰਾ ਸਿੰਘ ਨਸਰਾਲੀ
ਪ੍ਰਕਾਸ਼ਕ: ਸੁਖਦੇਵ ਸਿੰਘ ਕੋਕਰੀ ਕਲਾਂ, ਸੂਬਾ ਜਨਰਲ ਸਕੱਤਰ ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) (94174 66038),  ਲਛਮਣ ਸਿੰਘ ਸੇਵੇਵਾਲਾ, ਸੂਬਾ ਜਨਰਲ ਸਕੱਤਰ, ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ (94170 79170)

ਫਰੀਦਕੋਟ ਅਗਵਾ ਕਾਂਡ - ਸੈਸ਼ਨ ਕੋਰਟ ਦੇ ਫੈਸਲੇ 'ਤੇ ਸੰਖੇਪ ਪ੍ਰਤੀਕਰਮ

ਫਰੀਦਕੋਟ ਅਗਵਾ ਕਾਂਡ ਨਾਲ ਸਬੰਧਤ ਕੇਸਾਂ ਬਾਰੇ

ਸੈਸ਼ਨ ਕੋਰਟ ਦੇ ਫੈਸਲੇ 'ਤੇ 
ਸੰਖੇਪ ਪ੍ਰਤੀਕਰਮ

• ਇਹ ਫੈਸਲਾ ਲੋਕਾਂ ਦੇ ਸੰਘਰਸ਼ ਦੀ ਸ਼ਾਨਦਾਰ ਜਿੱਤ ਹੈ। ਫਰੀਦਕੋਟ ਦੇ ਲੋਕਾਂ ਦੀ, ਗੁੰਡਾਗਰਦੀ ਵਿਰੋਧੀ ਐਕਸ਼ਨ ਕਮੇਟੀ ਅਤੇ ਉਸਦੀ ਹਮਾਇਤ ਵਿੱਚ ਡਟ ਕੇ ਨਿੱਤਰੀਆਂ, ਪੰਜਾਬ ਦੇ ਕਿਸਾਨਾਂ, ਖੇਤ ਮਜ਼ਦੂਰਾਂ, ਮੁਲਾਜ਼ਮਾਂ, ਵਿਦਿਆਰਥੀਆਂ, ਨੌਜੁਆਨਾਂ ਦੀਆਂ ਜਥੇਬੰਦੀਆਂ- ਖਾਸ ਤੌਰ 'ਤੇ ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) ਅਤੇ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਜਿਹਨਾਂ ਨੇ ਅਗਵਾ ਵਾਲੀ ਘਟਨਾ ਤੋਂ ਲਗਾਤਾਰ ਸੰਘਰਸ਼ ਕੀਤਾ, ਦੇ ਸਿਰ ਇਸ ਜਿੱਤ ਦਾ ਸਿਹਰਾ ਜਾਂਦਾ ਹੈ। 
• ਅਗਵਾ ਕੀਤੀ ਨਾਬਾਲਗ ਲੜਕੀ-ਸ਼ਿਵਾਨੀ (ਕਾਲਪਨਿਕ ਨਾਂ) ਦੀ ਬ੍ਰਾਮਦਗੀ ਅਤੇ ਮੁੱਖ ਮੁਲਜ਼ਮਾਂ ਦੀ ਗ੍ਰਿਫਤਾਰੀ ਤੋਂ ਬਾਅਦ, ਪੀੜਤ ਪਰਿਵਾਰ ਅਤੇ ਕੇਸ ਦੀ ਪੈਰਵੀ ਕਰ ਰਹੀਆਂ ਜਥੇਬੰਦੀਆਂ ਦੇ ਆਗੂਆਂ, ਵਕੀਲਾਂ ਆਦਿ ਨੂੰ ਚੁੱਪ ਕਰਵਾਉਣ ਲਈ, ਮੁਲਜ਼ਮਾਂ, ਉਹਨਾਂ ਦੇ ਸਿਆਸੀ ਸਰਪ੍ਰਸਤ ਅਕਾਲੀ ਹਾਕਮਾਂ ਅਤੇ ਪੁਲਿਸ ਅਧਿਕਾਰੀਆਂ ਦੀਆਂ ਨਾਪਾਕ ਕੋਸ਼ਿਸ਼ਾਂ ਦਾ ਮੁੱਢ ਇਸ ਕੇਸ ਵਿੱਚ ਗਵਾਹੀਆਂ ਸ਼ੁਰੂ ਹੋਣ ਸਮੇਂ ਤੋਂ ਹੀ ਬੱਝ ਗਿਆ ਸੀ, ਜਦੋਂ ਮੁੱਖ ਮੁਲਜ਼ਮ ਨਿਸ਼ਾਨ ਸਿੰਘ ਨੇ ਜੇਲ੍ਹ ਅੰਦਰੋਂ ਫੋਨ 'ਤੇ ਪੀੜਤ ਲੜਕੀ ਦੇ ਪਿਤਾ ਨੂੰ ਧਮਕਾਇਆ ਸੀ। ਇਹਨਾਂ ਧਮਕੀਆਂ ਦਾ ਡਟਵਾਂ ਟਾਕਰਾ ਕਰਨ ਲਈ ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) ਅਤੇ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਅਤੇ ਇਹਨਾਂ ਜਥੇਬੰਦੀਆਂ ਨਾਲ ਜੁੜੀਆਂ ਔਰਤਾਂ ਨੇ ਫਰੀਦਕੋਟ ਸ਼ਹਿਰ ਵਿੱਚ ਲਾਮਿਸਾਲ ਮੁਜਾਹਰੇ ਕੀਤੇ, ਪੀੜਤ ਪਰਿਵਾਰ ਅਤੇ ਪੈਰਵੀ ਕਰ ਰਹੇ ਵਿਅਕਤੀਆਂ ਲਈ ਸੁਰੱਖਿਆ ਮੁਹੱਈਆ ਕਰਵਾਈ ਅਤੇ ਦੋਸ਼ੀਆਂ ਖਿਲਾਫ ਕਾਰਵਾਈ ਕਰਨ ਲਈ ਅਧਿਕਾਰੀਆਂ ਨੂੰ ਸੁਣਵਾਈ ਕੀਤੀ। 
• ਇਹ ਫੈਸਲਾ ਪੰਜਾਬ ਦੇ ਅਕਾਲੀ ਹਾਕਮਾਂ ਦੇ ਇਸ਼ਾਰੇ 'ਤੇ ਪੰਜਾਬ ਪੁਲਿਸ ਦੇ ਮੁਖੀ ਸੁਮੇਧ ਸੈਣੀ ਦੀ ਅਗਵਾਈ ਹੇਠ, ਨਿਸ਼ਾਨ ਸਿੰਘ-ਡਿੰਪੀ ਸਮਰਾ ਗ੍ਰੋਹ ਨੂੰ ਬਚਾਉਣ ਲਈ ਅੱਡੀ ਚੋਟੀ ਦਾ ਜ਼ੋਰ ਲਾਉਣ ਵਾਲੇ ਉੱਚ ਪੁਲਿਸ ਅਧਿਕਾਰੀਆਂ- ਜਿਹਨਾਂ ਵਿੱਚ ਡੀ.ਆਈ.ਜੀ. ਪਰਮਰਾਜ ਸਿੰਘ ਉਮਰਾਨੰਗਲ, ਐਸ.ਐਸ.ਪੀ. ਗੁਰਿੰਦਰ ਸਿੰਘ ਢਿੱਲੋਂ ਅਤੇ ਆਈ.ਜੀ. ਨਿਰਮਲ ਸਿੰਘ ਢਿੱਲੋਂ ਦੀ ਸ਼ਰਮਨਾਕ ਇਖਲਾਕੀ ਹਾਰ ਹੈ, ਜੋ ਆਪਣੇ ਸਿਆਸੀ ਪ੍ਰਭੂਆਂ ਦੇ ਇਸ਼ਾਰੇ 'ਤੇ ਇਸ ਗੁੰਡਾ ਗਰੋਹ ਨੂੰ ਨਿਰਦੋਸ਼ ਦੱਸ ਰਹੇ ਸਨ ਅਤੇ ਸਾਰੀ ਘਟਨਾ ਨੂੰ ਅਗਵਾ ਦੀ ਥਾਂ ਮੁਹੱਬਤ ਦਾ ਕਿੱਸਾ ਦੱਸ ਰਹੇ ਸਨ ਅਤੇ ਇਹ ਕੂੜ ਪ੍ਰਚਾਰ ਫੈਲਾਉਣ ਲਈ ਵਾਰ ਵਾਰ ਟੀ.ਵੀ. ਚੈਨਲਾਂ ਅਤੇ ਅਖਬਾਰਾਂ ਨੂੰ ਇੰਟਰਵਿਊਆਂ ਦੇ ਰਹੇ ਸਨ। ਮੁਲਜ਼ਮਾਂ ਨੇ ਇਹਨਾਂ ਇੰਟਰਵਿਊਆਂ ਦੀਆਂ ਸੀ.ਡੀਆਂ ਅਤੇ ਅਜੀਤ ਅਖਬਾਰ ਵਿੱਚ ਛਪੀਆਂ ਖਬਰਾਂ ਅਦਾਲਤ ਵਿੱਚ ਆਪਣੀ ਬੇਗੁਨਾਹੀ ਦੇ ਸਬੂਤ ਵਜੋਂ ਪੇਸ਼ ਕੀਤੀਆਂ। 
• ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰਵਾਉਣ ਅਤੇ ਸਜ਼ਾ ਦਿਵਾਉਣ ਲਈ ਪੀੜਤ ਪਰਿਵਾਰ ਵੱਲੋਂ ਲਿਆ ਗਿਆ ਦ੍ਰਿੜ੍ਹ ਸਟੈਂਡ ਅਤਿ ਸ਼ਲਾਘਾਯੋਗ ਹੈ। ਉਹਨਾਂ ਨੇ ਹੁਕਮਰਾਨ ਪਾਰਟੀਆਂ ਦੇ ਸਾਰੇ ਦਬਾਅ ਨਕਾਰਦਿਆਂ ਲੋਕ-ਤਾਕਤ 'ਤੇ ਟੇਕ ਰੱਖੀ ਅਤੇ ਨਿਸ਼ਾਨ ਸਿੰਘ-ਡਿੰਪੀ ਸਮਰਾ ਗਰੋਹ ਦੇ ਖਿਲਾਫ ਬੇਖੌਫ਼ ਹੋ ਕੇ ਅਦਾਲਤ ਵਿੱਚ ਸੱਚ ਬੋਲਣ ਦੀ ਜੁਰਅੱਤ ਵਿਖਾਈ। 
• ਪੰਜਾਬ ਦੇ ਲੱਗਭੱਗ ਸਾਰੇ ਅਖਬਾਰਾਂ ਨੇ ਇਸ ਮਸਲੇ 'ਤੇ ਮੁੱਖ ਤੌਰ 'ਤੇ ਹਾਂ-ਪੱਖੀ ਰੋਲ ਨਿਭਾਇਆ। ਘਟਨਾ ਲਈ ਜੁੰਮੇਵਾਰ ਨਿਸ਼ਾਨ ਸਿੰਘ-ਡਿੰਪੀ ਸਮਰਾ ਗੁੰਡਾ ਗਰੋਹ ਅਤੇ ਉਸਦੀ ਪੁਸ਼ਤ-ਪਨਾਹੀ ਕਰਨ ਵਾਲੇ ਅਕਾਲੀ ਹਾਕਮਾਂ ਅਤੇ ਪੁਲਿਸ ਅਫਸਰਾਂ ਦਾ ਲੋਕ-ਦੋਖੀ ਕਿਰਦਾਰ ਲੋਕਾਂ ਵਿੱਚ ਨੰਗਾ ਕੀਤਾ। ਗੁੰਡਿਆਂ, ਸਿਆਸੀ ਆਗੂਆਂ ਅਤੇ ਪੁਲਸ ਦੇ ਨਾਪਾਕ ਗੱਠਜੋੜ ਤੋਂ ਧੀਆਂ-ਭੈਣਾਂ ਦੀਆਂ ਇੱਜਤਾਂ ਬਚਾਉਣ ਲਈ ਜੂਝ ਰਹੇ ਲੋਕਾਂ ਦੇ ਸੰਘਰਸ਼ ਨੂੰ ਸਹੀ ਰੂਪ ਵਿੱਚ ਪੇਸ਼ ਕੀਤਾ ਅਤੇ ਇਸ ਤਰ੍ਹਾਂ ਪੀੜਤ ਲੜਕੀ ਨੂੰ ਬਰਾਮਦ ਕਰਵਾਉਣ ਅਤੇ ਗੁੰਡਾ ਗਰੋਹ ਦੇ ਸਾਰੇ ਮੈਂਬਰਾਂ ਨੂੰ ਗ੍ਰਿਫਤਾਰ ਕਰਵਾਉਣ ਵਿੱਚ ਆਵਦਾ ਬਣਦਾ ਰੋਲ ਨਿਭਾਇਆ। ਪਰ ਪੰਜਾਬੀਅਤ ਦਾ ਮੁਦੱਈ ਕਹਾਉਂਦੇ ਪੰਜਾਬ ਦੇ ਇੱਕ ਪ੍ਰਮੁੱਖ ਅਖਬਾਰ ਦੇ ਦੋ ਪੱਤਰਕਾਰਾਂ ਅਤੇ ਹਾਕਮਾਂ ਦੀ ਦੇਖ-ਰੇਖ ਹੇਠ ਚੱਲ ਰਹੇ ਕੁੱਝ ਟੀ.ਵੀ. ਚੈਨਲਾਂ ਨੇ ਦੋਸ਼ੀਆਂ ਦਾ ਬੇਸ਼ਰਮੀ ਨਾਲ ਪੱਖ ਪੂਰ ਰਹੇ ਪੁਲਸ ਅਧਿਕਾਰੀਆਂ ਵੱਲੋਂ ਜਾਰੀ ਕੂੜ-ਕਹਾਣੀਆਂ ਤੇ ਖੋਜੀ ਪੱਤਰਕਾਰਤਾ ਦਾ ਲੇਬਲ ਲਾ ਕੇ ਸਿਰੇ ਦੀਆਂ ਗੈਰ ਜੁੰਮੇਵਾਰ ਅਤੇ ਮਨਘੜਤ ਕਹਾਣੀਆਂ ਛਾਪੀਆਂ/ਦਿਖਾਈਆਂ। ਇਹਨਾਂ 'ਚੋਂ ਕੁੱਝ ਮੁਜਰਮਾਂ ਦਾ ਪੱਖ ਪੂਰਨ ਲਈ ਅਦਾਲਤ ਵਿੱਚ ਝੂਠੀਆਂ ਗਵਾਹੀਆਂ ਦੇਣ ਵੀ ਆਏ ਅਤੇ ਇਸ ਤਰ੍ਹਾਂ ਲੋਕ-ਲਹਿਰਾਂ ਨਾਲ ਸਿਰੇ ਦੀ ਨਫ਼ਰਤ ਅਤੇ ਦੁਸ਼ਮਣੀ ਦਾ ਪ੍ਰਗਟਾਵਾ ਕੀਤਾ। ਇਹ ਫੈਸਲਾ ਇਹਨਾਂ ਵਿਕਾਊ ਅਤੇ ਬਦਚਲਣ ਕਲਮਾਂ ਲਈ ਨਮੋਸ਼ੀ ਭਰੀ ਹਾਰ ਹੈ।  
•  ਲੋਕਾਂ ਦੀ ਇਹ ਜਿੱਤ ਇਸ ਪੱਖੋਂ ਹੋਰ ਵੱਧ ਮਹੱਤਵਪੂਰਨ ਹੈ ਕਿ ਨਿਸ਼ਾਨ ਸਿੰਘ-ਡਿੰਪੀ ਸਮਰਾ ਦੇ ਜਿਸ ਗੁੰਡਾ ਗਰੋਹ ਨੂੰ ਗ੍ਰਿਫਤਾਰ ਕਰਵਾਉਣ ਅਤੇ ਸਜ਼ਾ ਦਿਵਾਉਣ ਲਈ ਉਹ ਜੂਝ ਰਹੇ ਸਨ, ਉਹ ਅੱਤ ਦਰਜੇ ਦਾ ਖੂੰਖਾਰ ਅਤੇ ਵਹਿਸ਼ੀ ਸੀ, ਅਕਾਲੀ ਹਾਕਮਾਂ ਅਤੇ ਪੁਲਸ ਦੇ ਥਾਪੜੇ ਹੇਠ ਸੀ। ਕੇਸ ਦੌਰਾਨ ਪੇਸ਼ ਹੋਏ ਸਬੂਤਾਂ ਅਨੁਸਾਰ ਇਸ ਗਰੋਹ ਦੇ ਖਿਲਾਫ ਪੰਜਾਬ ਦੇ ਫਰੀਦਕੋਟ, ਮੋਗਾ, ਬਠਿੰਡਾ, ਫਿਰੋਜ਼ਪੁਰ ਅਤੇ ਸ਼ਹੀਦ ਭਗਤ ਸਿੰਘ ਨਗਰ ਜ਼ਿਲ੍ਹਿਆਂ ਦੇ ਥਾਣਿਆਂ ਵਿੱਚ 35 ਮੁਕੱਦਮੇ ਦਰਜ ਹਨ, ਜਿਹਨਾਂ 'ਚੋਂ 12 ਅਸਲਾ ਐਕਟ ਤਹਿਤ, 7 ਇਰਾਦਾ ਕਤਲ, ਇੱਕ ਕਤਲ ਦੇ ਜੁਰਮ ਤਹਿਤ ਸੀ। ਇਸ ਤੋਂ ਇਲਾਵਾ ਇਹ ਗਰੋਹ ਲੁੱਟਾਂ-ਖੋਹਾਂ, ਡਾਕਿਆਂ, ਦੰਗਾ-ਫਸਾਦ ਕਰਨ, ਜਬਰੀ ਲੋਕਾਂ ਦੇ ਘਰਾਂ ਵਿੱਚ ਦਾਖਲ ਹੋ ਕੇ ਵਾਰਦਾਤਾਂ ਕਰਨ ਅਤੇ ਚੋਰੀਆਂ ਦੀਆਂ ਕਈ ਵਾਰਦਾਤਾਂ ਵਿੱਚ ਸ਼ਾਮਲ ਹੈ। ਅਦਾਲਤ 'ਚ ਦੋਸ਼ੀਆਂ ਨੇ ਖੁਦ ਦਾਅਵਾ ਕੀਤਾ ਹੈ ਕਿ ਉਹ ਫਰੀਦਕੋਟ ਦੇ ਸਿਰਕੱਢ ਅਕਾਲੀ ਹਨ, ਅਤੇ ਬੇਸ਼ੁਮਾਰ ਜਾਇਦਾਦ ਦੇ ਮਾਲਕ ਹਨ। ਗਰੋਹ ਦੇ ਮੁਖੀਆਂ 'ਚੋਂ ਇੱਕ ਨਿਸ਼ਾਨ ਸਿੰਘ, ਪਹਿਲਾਂ ਨਜਾਇਜ਼ ਹਥਿਆਰ ਰੱਖਣ ਦੇ ਇੱਕ ਕੇਸ ਵਿੱਚ ਅਦਾਲਤ ਵੱਲੋਂ ਦੋਸ਼ੀ ਐਲਾਨਿਆ ਗਿਆ ਹੈ। ਪਰ ਜੁਰਮ ਕਰਨ ਸਮੇਂ ਨਾਬਾਲਗ ਹੋਣ ਕਾਰਨ ਉਹਨੂੰ ਸਾਲ 2011 ਵਿੱਚ ਇੱਕ ਸਾਲ ਦੀ ਸਮਾਜ ਸੇਵਾ ਕਰਨ ਦਾ ਡੰਨ ਲਾਇਆ ਗਿਆ ਸੀ। ਅਗਵਾ ਅਤੇ ਬਲਾਤਕਾਰ ਦੀਆਂ ਇਹ ਦੋਵੇਂ ਵਾਰਦਾਤਾਂ, ਉਸਨੇ ਆਪਣੇ ਗਰੋਹ ਨਾਲ ਮਿਲ ਕੇ, 'ਸਮਾਜ ਸੇਵਾ' ਦਾ ਡੰਨ ਨਿਭਾਉਂਦੇ ਸਮੇਂ ਹੀ ਕੀਤੀਆਂ ਹਨ।  
• ਇਸ ਕੇਸ ਦੌਰਾਨ ਇੱਕ ਮਹੱਤਵਪੂਰਨ ਗੱਲ ਉੱਭਰਕੇ ਇਹ ਵੀ ਆਈ ਹੈ ਕਿ ਇੱਕ ਪਾਸੇ ਜਦੋਂ ਡੀ.ਜੀ.ਪੀ. ਤੋਂ ਲੈ ਕੇ ਐਸ.ਐਸ.ਪੀ. ਤੱਕ ਉੱਚ ਪੁਲਿਸ ਅਧਿਕਾਰੀ ਗੁੰਡਾ ਗਰੋਹ ਦਾ ਸ਼ਰੇਆਮ ਪੱਖ ਪੂਰ ਰਹੇ ਸਨ ਅਤੇ ਦੋ ਡੀ.ਐਸ.ਪੀ. ਵਾਰਦਾਤ ਕਰਨ ਤੋਂ ਬਾਅਦ ਦੋਸ਼ੀਆਂ ਨੂੰ ਮੌਜ ਨਾਲ ਬਚ ਕੇ ਭੱਜ ਜਾਣ ਦੇ ਪ੍ਰਬੰਧ ਵਿੱਚ ਜੁਟੇ ਹੋਏ ਸਨ, ਉਥੇ ਹੇਠਲੀ ਪੱਧਰ ਦੇ ਪੁਲਿਸ ਮੁਲਾਜ਼ਮਾਂ ਵੱਲੋਂ ਸਾਰੇ ਦਬਾਵਾਂ ਦੇ ਬਾਵਜੂਦ ਪੀੜਤ ਪਰਿਵਾਰ ਅਤੇ ਸੰਘਰਸ਼ ਕਰ ਰਹੇ ਲੋਕਾਂ ਪ੍ਰਤੀ ਹਮਦਰਦੀ ਅਤੇ ਸੰਵੇਦਨਸ਼ੀਲਤਾ ਦੇ ਝਲਕਾਰੇ ਮਿਲੇ।  
•   ਇਹ ਜਿੱਤ ਪੰਜਾਬ ਦੀ ਸਮੁੱਚੀ ਇਨਕਲਾਬੀ ਜਨਤਕ ਲਹਿਰ ਦੀ ਜਿੱਤ ਹੈ, ਜਿਸ ਨੇ ਇਸ ਚੁਣੌਤੀ ਭਰੇ ਸੰਘਰਸ਼ ਨੂੰ ਸਾਂਝੇ ਤੌਰ 'ਤੇ ਲਿਆ ਅਤੇ ਇਸਦੀ ਕਾਮਯਾਬੀ ਲਈ ਬਣਦਾ ਯੋਗਦਾਨ ਪਾਇਆ।
• ਲੜਾਈ ਅਜੇ ਮੁੱਕੀ ਨਹੀਂ। ਮੁਲਜ਼ਮ ਗੁੰਡਾ ਗਰੋਹ ਅਤੇ ਇਸਦੇ ਸਿਆਸੀ ਸਰਪ੍ਰਸਤ ਸਮੇਂ ਦੀ ਤਾਕ ਵਿੱਚ ਹਨ। ਲੋਕ-ਦੋਖੀ ਤਾਕਤਾਂ ਮੁਲਜ਼ਮਾਂ ਨੂੰ ਜੇਲ੍ਹੋਂ ਬਾਹਰ ਕੱਢਣ ਲਈ ਹਰ ਹੀਲਾ ਵਰਤਣਗੇ, ਕਿਉਂਕਿ ਅਗਲੀਆਂ ਲੋਕ ਸਭਾ ਚੋਣਾਂ ਲਈ ਉਹਨਾਂ ਨੂੰ ਮੁਲਜ਼ਮਾਂ ਦੀ ਲੋੜ ਹੈ। ਇਸ ਲਈ ਲੋਕਾਂ ਨੂੰ ਆਵਦੀ ਏਕਤਾ ਬਰਕਰਾਰ ਰੱਖਣ ਅਤੇ ਹਾਕਮਾਂ ਦੀ ਹਰ ਲੋਕ-ਵਿਰੋਧੀ ਚਾਲ 'ਤੇ ਬਾਜ਼ ਅੱਖ ਰੱਖਣ ਦੀ ਲੋੜ ਹੈ। 

                       -ਐਨ.ਕੇ. ਜੀਤ ਐਡਵੋਕੇਟ
                        ਅਡਵਾਈਜ਼ਰ ਲੋਕ ਮੋਰਚਾ ਪੰਜਾਬ, ਮੋਬਾਇਲ- 94175 07363

ਫਰੀਦਕੋਟ ਅਗਵਾ ਕਾਂਡ ਦੀਆਂ ਪਰਤਾਂ 'ਚੋਂ ਗੁਜ਼ਰਦਿਆਂ

                           ਓੜਕ ਸੱਚ ਰਹੀ:

ਫਰੀਦਕੋਟ ਅਗਵਾ ਕਾਂਡ ਦੀਆਂ ਪਰਤਾਂ 'ਚੋਂ ਗੁਜ਼ਰਦਿਆਂ

ਫਰੀਦਕੋਟ ਦੇ ਬਹੁ-ਚਰਚਿਤ ਅਗਵਾ ਕਾਂਡ ਦੇ ਦੋਸ਼ੀਆਂ ਨੂੰ ਅਦਾਲਤ ਵੱਲੋਂ ਦਿੱਤੀਆਂ ਸਜ਼ਾਵਾਂ, ਲੋਕ-ਆਵਾਜ਼ ਅਤੇ ਲੋਕ-ਸੰਗਰਾਮ ਦੀ ਹੋਈ ਮਾਣ-ਮੱਤੀ ਜਿੱਤ ਨੇ ਇਸ ਅਗਵਾ ਕਾਂਡ ਨਾਲ ਜੁੜੀਆਂ ਅਨੇਕਾਂ ਪਰਤਾਂ ਖੋਲ੍ਹ ਦਿੱਤੀਆਂ ਹਨ। ਇਹ ਪਰਤਾਂ ਸੱਚ ਦੀ ਬਾਂਹ ਫੜਨ ਵਾਲਿਆਂ ਅਤੇ ਕੂੜ ਦੇ ਬੇੜੇ 'ਤੇ ਸਵਾਰਾਂ ਦੀ ਸ਼ਨਾਖਤ ਕਰਾਉਂਦੀਆਂ ਹਨ। 
ਬਾਬਾ ਫਰੀਦ ਦੀ ਨਗਰੀ ਫਰੀਦਕੋਟ ਦੀ ਨਾ-ਬਾਲਗ ਧੀ ਜਦੋਂ ਬੀਤੇ ਵਰ੍ਹੇ 24 ਸਤੰਬਰ ਨੂੰ ਦਿਨ ਦਿਹਾੜੇ ਘੁੱਗ ਵਸਦੇ ਸ਼ਹਿਰ ਫਰੀਦਕੋਟ ਤੋਂ ਅਗਵਾ ਕੀਤੀ ਗਈ ਤਾਂ ਇਸ ਹਿਰਦੇਵੇਦਿਕ ਘਟਨਾ ਨੇ ਇੱਜਤਾਂ ਦੇ ਰਾਖਿਆਂ, ਇਨਸਾਨੀ ਕਦਰਾਂ-ਕੀਮਤਾਂ ਦੇ ਝੰਡਾਬਰਦਾਰਾਂ, ਹੱਕ, ਸੱਚ, ਇਨਸਾਫ ਦੇ ਪਹਿਰੇਦਾਰਾਂ, ਦੁੱਲੇ ਭੱਟੀ, ਗ਼ਦਰੀ ਬਾਬਿਆਂ ਅਤੇ ਭਗਤ-ਸਰਾਭਿਆਂ ਦੇ ਵਾਰਸਾਂ ਨੂੰ ਧੁਰ ਅੰਦਰ ਤੱਕ ਵਲੂੰਧਰ ਕੇ ਅਤੇ ਝੰਜੋੜ ਕੇ ਰੱਖ ਦਿੱਤਾ। 
ਇਹ ਕਾਰਾ ਨਾ ਚੋਰੀ-ਛੁਪੇ ਹੋਇਆ। ਨਾ ਰਾਤ ਦੇ ਹਨੇਰੇ ਵਿੱਚ ਹੋਇਆ। ਦਿਨ-ਦੀਵੀਂ ਅਗਵਾ ਕੀਤੀ ਗਈ ਲੜਕੀ ਨੂੰ ਉਸਦੇ ਹੀ ਘਰੋਂ ਧੂਹਿਆ ਗਿਆ। ਉਸਦੀ ਮਾਂ ਦਾ ਸਿਰ ਪਾੜਿਆ ਗਿਆ। ਬਾਹਵਾਂ ਤੋੜੀਆਂ ਗਈਆਂ। ਲੜਕੀ ਦੇ ਬਾਪ ਦੀ ਵੀ ਬਾਂਹ ਭੰਨੀ ਗਈ। ਅਗਵਾਕਾਰਾਂ ਨੇ ਬੱਕਰੇ ਬੁਲਾਏ। ਗੋਲੀਆਂ ਚਲਾਈਆਂ। ਜਬਰੀ ਘੜੀਸਦੇ ਹੋਏ ਕੁੜੀ ਨੂੰ ਗੱਡੀ ਵਿੱਚ ਸੁੱਟ ਕੇ ਭੱਜਣ ਲੱਗੇ। ਗੱਡੀ ਨਾਲੇ ਵਿੱਚ ਫਸ ਗਈ। ਅਗਵਾਕਾਰ ਪਿਸਤੌਲਾਂ, ਬੰਦੂਕਾਂ 'ਚੋਂ ਪਟਾਕੇ ਚਲਾਉਂਦੇ ਰਹੇ। 
ਅਗਵਾ ਕੀਤੀ ਲੜਕੀ ਦਾ ਵਾਰਦਾਤ ਵਾਲਾ ਇਹ ਘਰ ਜੇ ਪੈਦਲ ਚੱਲ ਕੇ ਜਾਣਾ ਹੋਵੇ ਤਾਂ ਪੁਲਸ ਥਾਣੇਂ ਤੋਂ 7 ਮਿੰਟ ਦੀ ਦੂਰੀ 'ਤੇ ਹੈ। ਬੋਲ਼ੇ ਕੰਨਾਂ ਨੂੰ ਗੋਲੀਆਂ ਦੀ ਆਵਾਜ਼ ਸੁਣਾਈ ਨਾ ਦਿੱਤੀ। ਬੇਖੌਫ਼ ਹੋਇਆ ਅਗਵਾਕਾਰ ਟੋਲਾ, ਉਲਟਾ ਲੋਕਾਂ ਨੂੰ ਡਰਾਵੇ, ਧਮਕੀਆਂ ਦਿੰਦਾ ਹੋਇਆ ਬੜੇ ਆਰਾਮ ਨਾਲ ਕੁੜੀ ਨੂੰ ਅਗਵਾ ਕਰਕੇ ਲੈ ਗਿਆ। 
ਅਗਵਾ ਕਰਨ ਵਾਲੇ ਟੋਲੇ ਦਾ ਸਰਗਣਾ ਨਿਸ਼ਾਨ ਸਿੰਘ, ਅਕਾਲੀ-ਆਗੂ ਡਿੰਪੀ ਸਮਰਾ ਦੀ ਓਟ-ਛਤਰੀ ਸਦਕਾ, ਬਾਵਜੂਦ ਅੱਧੀ ਦਰਜਣ ਤੋਂ ਵੱਧ ਸਿਰ ਪਏ ਕੇਸਾਂ ਦੇ, ਅਗਵਾ ਕਾਂਡ ਤੋਂ ਇੱਕ ਦਿਨ ਪਹਿਲਾਂ ਬਾਬਾ ਫਰੀਦ ਦੇ ਮੇਲੇ 'ਤੇ ਪੰਜਾਬ ਸਰਕਾਰ ਦੇ ਟੀਸੀ ਦੇ ਨੇਤਾਵਾਂ ਦੇ ਗੋਡੇ ਮੁੱਢ ਸਸ਼ੋਭਤ ਸੀ। ਅਜਿਹੇ ਅਗਵਾਕਾਰ ਖਿਲਾਫ ਐਫ.ਆਈ.ਆਰ. ਦਰਜ ਕਰਵਾਉਣ ਲਹੂ ਲੁਹਾਣ ਹੋਏ ਆਪ ਥਾਣੇ ਪੁੱਜੇ ਮਾਪਿਆਂ ਦੀ ਪੁਕਾਰ ਬੂਟਾਂ ਹੇਠ ਰਗੜੀ ਗਈ। ਪੀੜਤ ਪਰਿਵਾਰ ਦੀ ਬਾਂਹ ਫੜਨ ਲਈ ਜਾਗਦੀ ਜਮੀਰ ਵਾਲੇ ਨਿਰਭੈ ਹੋ ਕੇ ਮੈਦਾਨ ਵਿੱਚ ਨਿੱਤਰੀ ਇਨਸਾਫ ਦੀ ਆਵਾਜ਼ ਨੂੰ ਟਿੱਚ ਕਰਕੇ ਜਾਣਿਆ ਗਿਆ। ਮਾਪਿਆਂ ਅਤੇ ਹਾਅ ਦਾ ਨਾਅਰਾ ਮਾਰਨ ਵਾਲਿਆਂ ਦੇ ਜਖ਼ਮਾਂ 'ਤੇ ਇਹ ਕਹਿ ਕੇ ਲੂਣ ਭੁੱਕਿਆ ਗਿਆ ਕਿ ''ਕੁੜੀ ਤਾਂ ਮੁੰਡੇ ਨਾਲ ਬਾਂਹ 'ਚ ਬਾਂਹ ਪਾ ਕੇ ਗਈ ਹੈ'' ਕੂੜ ਪ੍ਰਚਾਰ ਵਿੱਢਿਆ ਗਿਆ। ਧਮਕੀਆਂ ਦਾ ਬਾਜ਼ਾਰ ਸੋਚੀ ਸਮਝੀ ਸਕੀਮ ਨਾਲ ਗਰਮਾਇਆ ਗਿਆ। ਲੋਕ ਮਨਾਂ ਅੰਦਰ ਪਨਪਦਾ ਰੋਹ ਜਰਬਾਂ ਖਾਣ ਲੱਗਾ। ਫਰੀਦਕੋਟ ਵਾਸੀ ਤੜਫ ਉੱਠੇ। ਸਾਂਝੀ ਐਕਸ਼ਨ ਕਮੇਟੀ ਬਣੀ। ਲੋਕ ਜਥੇਬੰਦੀਆਂ ਸੰਘਰਸ਼ ਦੇ ਮੈਦਾਨ ਵਿੱਚ ਨਿੱਤਰ ਪਈਆਂ। ਪੁਲਸ ਦੇ ਉੱਚ ਅਧਿਕਾਰੀ, ਪਰਿਵਾਰ ਅਤੇ ਲੋਕਾਂ ਦੀ ਗੱਲ ਅਣਸੁਣੀ ਕਰਨ ਲੱਗੇ। ਮਨਘੜਤ ਤੋਤਕੜੇ ਸੁਣਾਉਣ ਲੱਗੇ। ਦਿਨ ਬੀਤਦੇ ਗਏ। ਲੋਕ ਮਨਾਂ ਅੰਦਰ ਸੁੱਤੀ ਕਲਾ ਜਾਗ ਪਈ। ਕੁੜੀ ਦੇ ਅਗਵਾ ਦਾ ਮਸਲਾ, ਇੱਕ ਪਰਿਵਾਰ ਦਾ ਨਾ ਹੋ ਕੇ ਸਮਾਜ ਦਾ ਮਸਲਾ ਬਣਨ ਦਾ ਰੂਪ ਧਾਰ ਗਿਆ। ਫਰੀਦਕੋਟ ਸ਼ਹਿਰ ਮੁਕੰਮਲ ਬੰਦ ਹੋਇਆ। ਜੈਤੋ ਸਮੇਤ ਲਾਗਲੇ ਕਸਬਿਆਂ ਵਿੱਚ ਬੰਦ ਰਿਹਾ। ਅਕਾਲੀ-ਭਾਜਪਾ ਨੇਤਾਵਾਂ, ਵਿਧਾਇਕਾਂ ਅਤੇ ਮੰਤਰੀਆਂ ਦਾ ਫਰੀਦਕੋਟ ਸ਼ਹਿਰ ਵਿੱਚ ਵੜਨਾ ਮੁਹਾਲ ਹੋ ਗਿਆ। ਜੇ ਕਿਸੇ ਨੇਤਾ ਨੇ ਚੋਰੀ-ਛਿਪੇ ਜਾਂ ਹਥਿਆਰਬੰਦ ਲਾਮ-ਲਸ਼ਕਰ ਦੇ ਜ਼ੋਰ ਵੜਨ ਦੀ ਸੋਚੀ ਤਾਂ ਜਬਰਦਸਤ ਘਿਰਾਓ ਹੋਏ। ਪਿੱਟ-ਸਿਆਪੇ ਹੋਏ। ਲੋਕਾਂ ਦੇ ਸੁਆਲਾਂ ਅੱਗੇ ਲਾ-ਜੁਆਬ ਹੋਏ। ਲੜਕੀ ਨੂੰ ਜਲਦੀ ਭਾਲ ਕੇ ਲਿਆਉਣ ਦੇ ਵਾਅਦੇ ਕਰਕੇ ਛੁਟਕਾਰਾ ਪਾਇਆ। 
ਜਿਉਂ ਜਿਉਂ ਵਕਤ ਬੀਤਦਾ ਗਿਆ, ਪਾਲਾਬੰਦੀ ਹੋਰ ਗੂਹੜੀ, ਤਿੱਖੀ ਅਤੇ ਸਪੱਸ਼ਟ ਹੁੰਦੀ ਗਈ। ਪੰਜਾਬ ਦੇ ਕੋਨੇ ਕੋਨੇ ਤੋਂ ਲੋਕ ਰੋਹ ਦੀ ਜਵਾਲਾ ਫੁੱਟ ਪਈ। ਮਜ਼ਦੂਰਾਂ, ਕਿਸਾਨਾਂ, ਨੌਜਵਾਨਾਂ, ਵਿਦਿਆਰਥੀਆਂ, ਔਰਤਾਂ, ਪੱਤਰਕਾਰਾਂ, ਵਕੀਲਾਂ, ਜਮਹੂਰੀਅਤ ਅਤੇ ਇਨਸਾਫਪਸੰਦ ਸ਼ਕਤੀਆਂ ਨੇ ਅਗਵਾਕਾਰਾਂ ਅਤੇ ਉਹਨਾਂ ਦੇ ਸਰਪ੍ਰਸਤਾਂ ਖਿਲਾਫ ਮੋਰਚਾ ਹੋਰ ਵੀ ਭਖ਼ਾ ਦਿੱਤਾ। ਜ਼ਿਕਰਯੋਗ ਹੈ ਕਿ ਜਿੱਥੇ ਪੁਲਸ ਦੇ ਕੁਝ ਉੱਚ ਦਰਜਾ ਅਧਿਕਾਰੀਆਂ ਨੇ ਅਗਵਾਕਾਰਾਂ ਦੀ ਪਿੱਠ ਥਾਪੜਨ 'ਚ ਕੋਈ ਰੜਕ ਨਹੀਂ ਛੱਡੀ, ਉਥੇ ਪੁਲਸ ਮੁਲਾਜ਼ਮਾਂ ਦੇ ਗਿਣਨਯੋਗ ਹਿੱਸੇ ਨੇ ਆਪਣੀ ਜ਼ਮੀਰ ਦੀ ਆਵਾਜ਼ ਸੁਣਦਿਆਂ ਨੈਤਿਕ ਕਦਰਾਂ-ਕੀਮਤਾਂ ਦੀ ਸੁੱਚਤਾ ਬਣਾਈ ਰੱਖਣ ਦਾ ਵੀ ਪ੍ਰਮਾਣ ਦਿੱਤਾ। ਉਧਰ ਅਕਾਲੀ ਆਗੂਆਂ, ਗੁੰਡਾ ਗਰੋਹਾਂ, ਸਿਰਮੌਰ ਹੁਕਮਰਾਨਾਂ ਅਤੇ ਝੁਠ ਦੇ ਸੌਦਾਗਰ, ਰਾਜ ਦਰਬਾਰ ਦੇ ਧੁਤੂ ਬਣੇ ਪੰਜਾਬੀਅਤ ਦੇ ਅਲੰਬਰਦਾਰ ਕਹਾਉਂਦੇ ਇੱਕ ਅਖਬਾਰ ਨੇ ਅਗਵਾਕਾਂਡ ਨੂੰ 'ਮੁਹੱਬਤ ਦਾ ਕਿੱਸਾ' ਬਣਾ ਕੇ ਪੇਸ਼ ਕਰਨ ਦੀ ਕੋਈ ਕਸਰ ਨਾ ਛੱਡੀ। 
ਪੁਲਸ ਦੇ ਚੋਟੀ ਦੇ ਅਧਿਕਾਰੀਆਂ ਨੇ ਪ੍ਰੈਸ ਕਾਨਫਰੰਸਾਂ ਵਿੱਚ ਮਨਘੜਤ ਕਹਾਣੀਆਂ ਪੇਸ਼ ਕੀਤੀਆਂ। ਕੁੜੀ ਵੱਲੋਂ ਸ਼ਾਦੀ ਕਰਾ ਲਏ ਜਾਣ ਦੀਆਂ ਜਾਅਲੀ ਫੋਟੋਆਂ ਪ੍ਰੈਸ ਨੂੰ ਜਾਰੀ ਕੀਤੀਆਂ। ਜਿੱਥੇ ਪ੍ਰੈਸ ਦੇ ਵਡੇਰੇ ਹਿੱਸੇ ਨੇ ਪੀੜਤ ਧਿਰ ਦੀ ਆਵਾਜ਼ ਨੂੰ ਪ੍ਰਮੁੱਖ ਥਾਂ ਦਿੱਤੀ, ਉਥੇ ਰਾਜ ਦਰਬਾਰ ਦੇ ਚਹੇਤੇ ਅਗਵਾਕਾਰਾਂ ਦੀ ਪੁਸ਼ਤਪਨਾਹੀ ਕਰਨ ਵਿੱਚ ਪੱਤਰਕਾਰਤਾ, ਮਾਨਵੀ, ਜਮਹੂਰੀ ਅਤੇ ਨੈਤਿਕ ਕਦਰਾਂ ਕੀਮਤਾਂ ਦੀ ਪੂਰੀ ਬੇਹਯਾਈ ਨਾਲ ਮਿੱਟੀ ਪਲੀਤ ਕੀਤੀ। ਸਮਾਜ ਨੂੰ ਗੁੰਮਰਾਹ ਕਰਨ ਦਾ ਭੁਲੇਖਾ ਪਾਲਿਆ। 
ਵਿਸ਼ੇਸ਼ ਕਰਕੇ ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) ਅਤੇ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ  ਨੇ ਹੋਰ ਤਿੱਖੇ ਸੰਘਰਸ਼ ਛੇੜ ਦਿੱਤੇ। ਚੰਡੀਗੜ੍ਹ ਤਾਰਾਂ ਖੜਕਣ ਲੱਗੀਆਂ। ਬਲ ਅਤੇ ਛਲ ਦੇ ਹਥਿਆਰ, ਸਰਕਾਰੀ ਸਰਪ੍ਰਸਤੀ ਹੇਠ ਹੋਰ ਚੰਡੇ ਗਏ। ਇੱਕ ਬੰਨੇ ਲੋਕ ਹਮਦਰਦੀ, ਲੋਕ ਸ਼ਮੂਲੀਅਤ, ਲੋਕ-ਰੋਹ ਨੂੰ ਭੰਨਣ ਲਈ ਪੀੜਤ ਲੜਕੀ ਖਿਲਾਫ ਹੋਛਾ ਪ੍ਰਚਾਰ ਵਿੱਢਿਆ  ਗਿਆ। ਦੂਜੇ ਬੰਨੇ ਸੰਘਰਸ਼ਸ਼ੀਲ ਸ਼ਕਤੀਆਂ ਅਤੇ ਲੋਕਾਂ ਦੀ ਆਵਾਜ਼ ਦੇ ਗਲ਼ ਅੰਗੂਠਾ ਦੇਣ ਲਈ 'ਹੁਕਮਨਾਮੇ' ਜਾਰੀ ਕੀਤੇ ਗਏ ਕਿ ''ਜਿਹੜੇ ਲੋਕ ਐਵੇਂ ਸੜਕਾਂ 'ਤੇ ਸਪੀਕਰ ਲੈ ਕੇ, ਨਾਅਰੇ ਮਾਰਦੇ, ਮੁਜਾਹਰੇ ਕਰਦੇ ਹਨ, ਉਹ ਕੁੜੀ ਦੀ ਬੇ-ਅਦਬੀ ਕਰ ਰਹੇ ਹਨ, ਉਹਨਾਂ ਨੂੰ ਸ਼ੜਕਾਂ 'ਤੇ ਨਿਕਲਣ ਤੋਂ ਜਬਰੀ ਰੋਕਿਆ ਜਾਏਗਾ। ਲੋਕ ਰੋਹ ਹੋਰ ਵੀ ਪ੍ਰਚੰਡ ਹੋ ਗਿਆ। ਸ਼ਰੇਆਮ ਭਰੇ ਇਕੱਠਾਂ, ਮਾਰਚਾਂ, ਲੇਖਾਂ ਆਦਿ ਵਿੱਚ ਅਗਵਾਕਾਰ ਗਰੋਹ ਦੀ ਪਿੱਠ ਥਾਪੜਨ ਵਾਲੀ ਹਕੂਮਤ ਅਤੇ ਪੁਲਸ ਅਧਿਕਾਰੀਆਂ ਦਾ ਪਰਦਾਫਾਸ਼ ਕੀਤਾ ਜਾਣ ਲੱਗਾ। ਰਾਜ ਨਹੀਂ ਸੇਵਾ, 'ਨੰਨੀ ਛਾਂ', 'ਧੀਆਂ ਦਾ ਸਤਿਕਾਰ ਕਰੋ' ਦੇ ਪ੍ਰਚਾਰ ਦੀ ਜਨਤਕ ਆਵਾਜ਼ ਨੇ ਫੂਕ ਕੱਢ ਕੇ ਰੱਖ ਦਿੱਤੀ। ਹਾਕਮਾਂ ਨੂੰ ਸੇਕ ਲੱਗਣ ਲੱਗਾ। ਉਹਨਾਂ ਦੀਆਂ ਸਕੀਮਾਂ ਦੇ ਭਾਂਡੇ ਮੂਧੇ ਵੱਜਣ ਲੱਗੇ। ਮਸਲਾ ਹੋਰ ਵੀ ਵਿਆਪਕ ਅਤੇ ਤਿੱਖਾ ਰੁਖ਼ ਧਾਰਨ ਕਰ ਗਿਆ। 
ਲੋਕ-ਰੋਹ ਤੋਂ ਤ੍ਰਬਕੇ ਹਾਕਮਾਂ ਨੂੰ ਤਰੇਲੀਆਂ ਆਉਣ ਲੱਗੀਆਂ। ਮਹੀਨਿਆਂ ਤੋਂ ਗੋਲੀਆਂ ਰੇੜ੍ਹਦੇ ਆ ਰਹੇ ਹਾਕਮਾਂ ਅਤੇ ਅਧਿਕਾਰੀਆਂ ਨੂੰ ਜਨਤਕ ਰੋਹ ਅੱਗੇ ਝੁਕਣਾ ਪਿਆ। 'ਲੜਕੀ ਜਿੱਥੇ ਵੀ ਹੈ, ਸੁਰੱਖਿਅਤ ਹੈ, ਸਾਡੀਆਂ ਸੂਹੀਆਂ ਏਜੰਸੀਆਂ ਦੀ ਸੂਚਨਾ ਹੈ' ਵਰਗੇ ਹੋਛੇ ਬਿਆਨ ਦਾਗ਼ਣ ਵਾਲਿਆਂ ਨੂੰ ਦਿਨਾਂ ਵਿੱਚ ਹੀ ਥਾਂ ਥਾਂ ਛਾਪੇਮਾਰੀ ਕਰਨੀ ਪਈ। ਮੁੱਖ ਸਰਗਣੇ ਦੇ ਜੋਟੀਦਾਰ ਧੜਾਧੜ ਫੜੇ ਜਾਣ ਲੱਗੇ। ਫੜੇ ਜਾਣ ਵਾਲੇ 'ਕਾਕੇ' ਮੰਤਰੀਆਂ ਦੇ ਸਕੇ ਸਾਬਤ ਹੋਣ ਲੱਗੇ। ਅਖੀਰ ਇੱਕ ਦਿਨ ਕੁੜੀ ਅਤੇ ਅਗਵਾਕਾਰ ਨਿਸ਼ਾਨ ਸਿੰਘ ਫੜ ਕੇ ਫਰੀਦਕੋਟ ਅਦਾਲਤ ਵਿੱਚ ਪੇਸ਼ ਕਰਨਾ ਪਿਆ। 
ਭਾਵੇਂ ਰੱਸੀ ਸੜ ਗਈ ਪਰ ਵੱਟ ਨਾ ਗਿਆ। ਫਰੀਦਕੋਟ ਅਦਾਲਤ ਵਿੱਚ ਹੋਏ ਅਦਾਲਤੀ ਹੁਕਮਾਂ ਦੇ ਆਪ ਹੀ ਅਰਥ ਕੱਢਦਿਆਂ ਲੜਕੀ ਨੂੰ ਜਬਰਦਸਤ ਪੁਲਸ ਪਹਿਰੇ ਵਿੱਚ ਜਲੰਧਰ ਨਾਰੀ ਨਿਕੇਤਨ ਵਿੱਚ ਤਾੜ ਦਿੱਤਾ। ਮਾਪਿਆਂ, ਰਿਸ਼ਤੇਦਾਰਾਂ, ਪੱਤਰਕਾਰਾਂ ਅਤੇ ਜਮਹੂਰੀਅਤ-ਪਸੰਦ ਹਿੱਸਿਆਂ ਤੱਕ ਨੂੰ ਵੀ ਮਿਲਣ 'ਤੇ ਰੋਕਾਂ ਮੜ੍ਹ ਦਿੱਤੀਆਂ। ਹਫ਼ਤਿਆਂ-ਬੱਧੀ ਮਾਪੇ ਰਾਹਾਂ ਦੀ ਖਾਕ ਛਾਨਣ ਲੱਗੇ। ਉੱਧਰ ਬਠਿੰਡੇ ਅਤੇ ਹੋਰਨਾਂ ਥਾਵਾਂ 'ਤੇ ਲੋਕਾਂ ਦਾ ਠਾਠਾਂ ਮਾਰਦਾ ਰੋਹ ਲੜਕੀ ਨੂੰ ਜਬਰੀ ਪੁਲਸ ਹਿਰਾਸਤ ਵਿੱਚ ਰੱਖਣ ਖਿਲਾਫ ਸੜਕਾਂ 'ਤੇ ਉਮੜ ਪਿਆ। ਐਲਾਨ ਕਰ ਦਿੱਤਾ ਗਿਆ ਕਿ ਐਕਸ਼ਨ ਕਮੇਟੀ ਦੀ ਅਗਵਾਈ ਵਿੱਚ ਬੀ.ਕੇ.ਯੂ. ਏਕਤਾ (ਉਗਰਾਹਾਂ), ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਅਤੇ ਹੋਰ ਜਥੇਬੰਦੀਆਂ ਨਾਰੀ ਨਿਕੇਤਨ ਦੇ ਬਾਹਰ ਅਣਮਿਥੇ ਸਮੇਂ ਦਾ ਧਰਨਾ ਮਾਰਨਗੀਆਂ। ਇਹ ਧਰਨਾ ਪੀੜਤ ਲੜਕੀ ਨੂੰ ਮਾਪਿਆਂ ਦੇ ਹਵਾਲੇ ਕਰਵਾਉਣ ਤੱਕ ਜਾਰੀ ਰਹੇਗਾ। ਇਸ ਐਲਾਨ ਨੇ ਹਾਕਮਾਂ ਅਤੇ ਅਗਵਾਕਾਰਾਂ ਦਾ ਪੱਖ ਪੂਰਦੇ ਅਧਿਕਾਰੀਆਂ ਦੇ ਪੈਰਾਂ ਹੇਠੋਂ ਜ਼ਮੀਨ ਕੱਢ ਦਿੱਤੀ। ਉੱਧਰ ਕਾਨੂੰਨੀ ਤੌਰ 'ਤੇ ਨਿਸ਼ਕਾਮ ਸੇਵਕ ਅਤੇ ਨਿੱਡਰ ਲੋਕਾਂ ਦੇ ਪ੍ਰਤੀਨਿਧ ਵਕੀਲ ਐਨ.ਕੇ.ਜੀਤ ਅਤੇ ਵਕੀਲ ਭਾਈਚਾਰੇ ਨੇ ਕਾਨੂੰਨੀ ਲੜਾਈ ਵਿੱਚ ਉੱਚੀਆਂ ਸੁੱਚੀਆਂ ਕਦਰਾਂ-ਕੀਮਤਾਂ ਦਾ ਪਰਚਮ ਬੁਲੰਦ ਕੀਤਾ। ਹੱਕੀ ਮੰਗ ਲਈ ਅਦਾਲਤ ਦਾ ਦਰਵਾਜ਼ਾ ਖੜਕਾਇਆ। ਅਖੀਰ ਲੋਕ ਮੰਗ ਦੀ ਜਿੱਤ ਹੋਈ। ਨਾਰੀ ਨਿਕੇਤਨ ਅੱਗੇ ਧਰਨਾ ਸ਼ੁਰੂ ਹੋਣ ਦੀ ਤਾਰੀਖ ਤੋਂ ਪਹਿਲਾਂ ਹੀ ਅਦਾਲਤੀ ਹੁਕਮਾਂ ਅਨੁਸਾਰ ਲੜਕੀ, ਮਾਪਿਆਂ ਦੇ ਹਵਾਲੇ ਕਰਨੀ ਪਈ। ਜੇਲ੍ਹ ਵਿੱਚ ਡੱਕੇ ਹੋਏ ਨਿਸ਼ਾਨ, ਡਿੰਪੀ ਸਮਰਾ ਅੱਗ ਤੋਂ ਲਿਟਣ ਲੱਗੇ। 
ਲੋਕ ਜਥੇਬੰਦੀਆਂ ਨੇ ਚੌਕਸੀ ਬਰਕਰਾਰ ਰੱਖਣ ਦਾ ਸੱਦਾ ਦਿੱਤਾ। ਫਰੀਦਕੋਟ ਵਿੱਚ ਬੀ.ਕੇ.ਯੂ. ਏਕਤਾ (ਉਗਰਾਹਾਂ) ਨੇ ਲਾ-ਮਿਸਾਲ ਇਕੱਠ ਕੀਤਾ। ਐਕਸ਼ਨ ਕਮੇਟੀ ਦੇ ਉੱਦਮ ਨਾਲ ਹੋਈ ਇਸ ਇਕੱਤਰਤਾ ਵਿੱਚ ਪੀੜਤ ਲੜਕੀ ਅਤੇ ਉਸਦੇ ਮਾਪੇ ਇਕੱਠ ਨੂੰ ਸੰਬੋਧਨ ਹੋਏ। ਲੜਕੀ ਨੇ ਲਿਖਤੀ ਰੂਪ ਵਿੱਚ ਲੋਕਾਂ ਦੀ ਕਚਹਿਰੀ ਵਿੱਚ ਸੱਚੋ-ਸੱਚ ਪੇਸ਼ ਕੀਤਾ। ਜੇਲ੍ਹ ਵਿੱਚ ਡੱਕੇ ਗਰੋਹ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ। ਜੇਲ੍ਹ 'ਚੋਂ ਨਿਸ਼ਾਨ ਸਿੰਘ ਨੇ ਫੋਨ ਕਰਕੇ ਲੜਕੀ ਦੇ ਪਿਤਾ ਨੂੰ ਧਮਕੀਆਂ ਦਿੱਤੀਆਂ। ਬੀ.ਕੇ.ਯੂ. ਏਕਤਾ (ਉਗਰਾਹਾਂ) ਨੇ ਉਸ ਦਿਨ ਤੋਂ ਹੀ ਲੜਕੀ ਦੇ ਘਰ ਹਥਿਆਰਬੰਦ ਪਹਿਰਾ ਚੌਵੀ ਘੰਟੇ ਸ਼ੁਰੂ ਕੀਤਾ ਹੋਇਆ ਹੈ। ਫਰੀਦਕੋਟ ਸ਼ਹਿਰ ਵਿੱਚ ਪੰਜਾਬ ਦੇ ਕੋਨੇ ਕੋਨੇ ਤੋਂ ਆਈਆਂ ਹਜ਼ਾਰਾਂ ਔਰਤਾਂ ਦੇ ਵਗਦੇ ਦਰਿਆ ਨੇ ਔਰਤ ਸ਼ਕਤੀ ਪ੍ਰਦਰਸ਼ਨ ਕੀਤਾ। ਧਮਕੀਆਂ ਦੇਣ ਵਾਲਿਆਂ ਨੂੰ ਚਿਤਾਵਨੀ ਦਿੱਤੀ। ਪੀੜਤ ਧਿਰ ਦੇ ਲੋਕ-ਸੇਵਕ ਵਕੀਲ ਐਨ.ਕੇ. ਜੀਤ ਨੂੰ ਝੂਠੇ ਕੇਸਾਂ ਵਿੱਚ ਉਲਝਾਉਣ, ਜਾਨ-ਲੇਵਾ ਹਮਲਾ ਕਰਨ ਦੀਆਂ ਗੋਂਦਾਂ ਗੁੰਦੀਆਂ ਜਾਣ ਲਗੀਆਂ। 
ਅਖੀਰ 27 ਮਈ ਨੂੰ ਹੋਏ ਇਤਿਹਾਸਕ ਫੈਸਲੇ ਨੇ ਪੀੜਤ ਲੜਕੀ, ਉਸਦੇ ਪਰਿਵਾਰ ਅਤੇ ਉਹਨਾਂ ਦੀ ਬਾਂਹ ਫੜਨ ਵਾਲੀਆਂ ਜਮਹੂਰੀ ਇਨਕਲਾਬੀ, ਲੋਕ-ਹਿਤੈਸ਼ੀ ਸ਼ਕਤੀਆਂ ਦੇ ਸਹੀ ਸਟੈਂਡ ਦੀ ਪੁਸ਼ਟੀ ਕਰ ਦਿੱਤੀ। ਪੰਜਾਬ ਅੰਦਰ ਇਸ ਬਹੁ-ਚਰਚਿਤ ਕਾਂਡ ਸਬੰਧੀ ਹੋਏ ਇਸ ਫੈਸਲੇ ਦੇ ਸਬਕਾਂ ਨੂੰ ਸੁਹਿਰਦ ਲੋਕ-ਦਰਦੀ ਸ਼ਕਤੀਆਂ ਪੱਲੇ ਬੰਨ੍ਹ ਕੇ ਪੰਜਾਬ ਅੰਦਰ ਸਿਰ ਚੁੱਕ ਰਹੀ ਗੁੰਡਾਗਰਦੀ, ਅਗਵਾਕਾਂਡਾਂ ਆਦਿ ਖਿਲਾਫ ਇਤਿਹਾਸਕ ਜਨਤਕ ਲਹਿਰ ਦਾ ਰੌਸ਼ਨ ਮਿਨਾਰ ਖੜ੍ਹਾ ਕਰਨ ਦਾ ਕਾਰਜ ਅਗੇਰੇ ਤੋਰਨ ਦਾ ਨਵਾਂ ਸਫ਼ਾ ਲਿਖ ਸਕਣਗੀਆਂ। 
—ਅਮੋਲਕ ਸਿੰਘ
ਸੰਪਰਕ: 94170 76735